Որո՞նք Հաւանաբար Աստուածաշունչի Ուսումնասիրութիւն մը Ընդունին
1 Ամովս մարգարէն ըսաւ թէ Իսրայէլի երկրին մէջ սով մը պիտի ըլլար, «ո՛չ թէ հացի սով եւ ո՛չ թէ ջուրի ծարաւ, այլ Տէրոջը խօսքերը լսելու սովը»։ (Ամովս. 8։11) Հոգեւորապէս անօթի ու ծարաւ անհատներու օգտին համար, Եհովայի կազմակերպութիւնը մեծ քանակութեամբ Աստուածաշունչի գրականութիւններ կը բաշխէ համայն աշխարհի մէջ։
2 Մինչեւ օրս, Գիտութիւն գրքէն 70 միլիոն օրինակ, իսկ՝ Ի՛նչ կը Պահանջէ գրքոյկէն, 91 միլիոն օրինակ տպուած է։ Ճշմարտութիւնը սորվեցնելու համար, այս գրականութիւններուն պարզութիւնը եւ ազդու ըլլալը կը գնահատենք։ Սակայն, մեր գրականութիւնները ստացող բառացիօրէն հսկայ զանգուածներ, տակաւին մեր հետ Աստուածաշունչը չեն ուսումնասիրած։ Այս առնչութեամբ ի՞նչ կրնանք ընել։
3 Տեղաւորուած Իւրաքանչիւր Գրականութիւն Հաւանական Ուսումնասիրութիւն մը կը Նշանակէ. Նկատի առէք հրատարակիչի մը փորձառութիւնը, որ դռնէ դուռի առաջին հանդիպումին իսկ կնոջ մը ուսումնասիրութիւն մը առաջարկեց։ Կինը անմիջապէս ընդունեց։ Հետագային, ան ըսաւ. «Դուք առաջին անհատն էք որ ինծի առաջարկեցիք Աստուածաշունչը ուսումնասիրել»։ Ձեր թաղամասին մէջ, մեր գրականութիւնները արդէն ունեցող անհատներէն քանի՞ն հաւանաբար նոյն բանը ըսեն։ Իւրաքանչիւր տեղաւորուած գրականութիւն, վերայցելութիւններու եւ Աստուածաշունչի ուսումնասիրութեան մը պատեհութեան դուռ կը բանայ։
4 Քանի որ յաճախ կը հանդիպինք մարդոց, որոնք արդէն իսկ մեր գրականութիւնները ունին, ի՞նչպէս կրնանք անոնց հետաքրքրութիւնը շարժել որպէսզի անոնց բովանդակութիւնը սորվին։ Վկայ մը ուղղակի տանտիրոջ հարցուց որ Աստուածաշունչէն որեւէ հարցում ունէ՞ր, բայց «Ոչ» պատասխանը ստացաւ։ Քոյրը պնդեց ըսելով. «Վստահաբար կարգ մը հարցումներ ունիք»։ Չէր սխալեր, ուստի ուսումասիրութիւն մը սկսուեցաւ։ Ինչո՞ւ տանտիրոջ չհարցնէք թէ կ’ուզէ՞ Աստուածաշունչի տեսակէտը գիտնալ զինք հետաքրքրող հարցումի մը կամ բանի մը շուրջ։ Պատրաստ եղէք հետաքրքրաշարժ հարցում մը յարուցանելու, եթէ անոր մտքին մէջ հարցում մը չկայ։ Այսպիսի խօսակցութիւններ Աստուածաշունչի հիմնական ճշմարտութիւններու մասին կանոնաւոր ուսումնասիրութեան ճամբան կրնան հարթել։
5 Աստուածաշունչի ուսումնասիրութեան գործունէութիւնը մեր ծառայութեան կորիզն է։ Քանի որ երբեք չենք գիտեր թէ որո՛նք թերեւս ուսումնասիրութիւն մը ընդունին, ուստի մի՛ վարանիք զայն առաջարկելու ամէն անհատի որ կը հանդիպիք։ Հարցը աղօթքով Եհովայի ներկայացուցէք, եւ ձեր աղօթքներուն հետ ներդաշնակ գործեցէք։ Թերեւս տեսնէք թէ այն անհատը, որու ուսումնասիրութիւն առաջարկեցիք, ընդունի զայն։—Ա. Յովհ. 5։14, 15