Ապրիլ Ամիսը՝ ‘Ծանր Աշխատելու եւ Ջանք Թափելու’ Ժամանակ մը

¹ Յիշատակատօնի ժամանակաշրջանի շաբաթները Եհովայի ժողովուրդին համար խոկալու ժամանակ մըն են։ Անիկա ժամանակ մըն է Քրիստոսի մահուամբ իրագործուած բաներուն մասին մտածելու, եւ Յիսուսի թափուած արեան շնորհիւ կարելի դարձած մեր աստուածատուր յոյսին մասին խորհրդածելու։ Երբ մտածէք անցեալ տարուան Ապրիլ 19–ի մասին, ձեր միտքը ի՞նչ կու գայ։ Կը յիշէ՞ք այդ գարնանային երեկոյեան ձեր տեսած դէմքերը, Յիշատակատօնի ճոխ եւ հոգեւոր մթնոլորտը, սուրբ գրային լուրջ դասախօսութիւնն ու սրտաբուխ աղօթքները։ Թերեւս վճռեցիք Եհովայի ու Յիսուսի ձեզի հանդէպ ցուցաբերած սիրոյն համար ձեր խոր երախտագիտութիւնը աւելի ամբողջական կերպով ցուցաբերել։ Այսպիսի խորհրդածութիւն ներկայիս ի՞նչպէս կ’ազդէ ձեզի։

² Բացայայտ է թէ Եհովայի ժողովուրդը բերանացի երախտագիտութիւն յայտնելով չի բաւականանար։ (Կող. 3։15, 17) Յատկապէս անցեալ Ապրիլին, Եհովայի փրկութեան կարգադրութիւններուն հանդէպ մեր գնահատութիւնը ցոյց տուինք, մեր անձերը քրիստոնէական ծառայութեան մէջ աւելի մատչելի դարձնելով։ Օժանդակ ռահվիրաներուն թիւը հարիւրներու հասաւ, Լիբանանի նախկին բարձրակէտէն՝ 40 առ հարիւր աւելի։ Անոնց եւ միւս բոլոր Թագաւորութեան ծանուցանողներուն ջանքերուն շնորհիւ, ժամերու, պարբերաթերթի տեղաւորումներու եւ վերայցելութիւններու նոր բարձրակէտեր արձանագրուեցան։ Աստուածաշունչի նոր ուսումնասիրութիւններու սկսուիլը եւ Յիշատակատօնի ներկաներու նոր բարձրակէտ մը տեսնելով, մեր ուրախութիւնը աւելցաւ։

³ Արդարեւ, մեր յոյսին ստոյգ ըլլալը մեզ գործի կը մղէ։ Ինչպէս Պօղոս առաքեալ գրեց. «Բո՛ւն ասոր համար կ’աշխատինք ու նախատինք կը կրենք [«ծանր կ’աշխատինք ու ջանք կը թափենք», ՆԱ], քանզի կենդանի Աստուծոյ յուսացեր ենք, որ բոլոր մարդոց Փրկիչն է, մանաւանդ հաւատացեալներուն»։—Ա. Տիմ. 4։10

⁴ Այս Յիշատակատօնին, Եհովայի կենարար հայթայթումներուն հանդէպ ձեր հաւատքը ի՞նչպէս ցոյց պիտի տաք։ 1998–ի Օգոստոսին, Լիբանանի մէջ Թագաւորութեան հրատարակիչներու ցարդ արձանագրուած բարձրագոյն թիւը ունեցանք՝ 3736։ Այս Ապրիլին այդ թիւը կրնա՞նք գերազանցել։ Ասիկա մեր կարողութեան սահմաններուն մէջ է։ Սակայն, իւրաքանչիւր հրատարակիչ, մկրտուած ըլլայ թէ ոչ, պէտք է իր մասնակցութիւնը բերէ։ Բազմաթիւ նորեկներ ալ կրնան ասոր մէջ բաժին բերելու համար որակելի ըլլալ։ Ուստի, մինչ Ապրիլին ծանր աշխատելու ու ջանք թափելու համար ծրագիրներ կ’ընէք, ուրիշները խթանելու կերպեր նկատի առէք որ ձեզի ընկերակցին, մէջը ըլլալով՝ նորեկները եւ նուազ փորձառուները։

⁵ Ոմանց Օգնեցէք որ Դարձեալ Գործունեայ Ըլլան. Եթէ գիտէք ոմանք որ մէկ կամ երկու ամիսէ ի վեր դաշտի ծառայութեան չեն մասնակցած, թերեւս կրնաք զանոնք քաջալերել եւ հրաւիրել որ դաշտի ծառայութեան մէջ ձեզի ընկերակցին։ Եթէ ժողովքին մէջ ոմանք անգործունեայ դարձած են, երէցները մասնայատուկ ջանք պիտի թափեն անոնց այցելելու եւ քաջալերելու որ Ապրիլին դարձեալ սկսին։

⁶ Բոլորս ալ պէտք է շարունակենք Եհովայի հոգին խնդրել, որ մեզ իր ծառայութեան մէջ զօրացնէ։ (Ղուկ. 11։13) Այդ հոգին ստանալու համար ի՞նչ պէտք է ընենք։ Աստուծոյ ներշնչեալ Խօսքը կարդացէք։ (Բ. Տիմ. 3։16, 17) Նաեւ պէտք է ‘լսենք թէ Հոգին ի՛նչ կ’ըսէ եկեղեցիներուն’, շաբաթական հինգ ժողովներուն ներկայ գտնուելով։ (Յայտ. 3։6) Հիմա է բարեպատեհ ժամանակը անկանոն եւ անգործունեայ անհատներուն օգնելու, որ իրենց ուսումնասիրութեան սովորութիւնները բարելաւեն եւ ժողովներու ներկայ ըլլալու մէջ յարատեւեն։ (Սաղմ. 50։23) Ասիկա կ’ընենք, մինչ կը հսկենք մեր հոգեւոր բարօրութեան վրայ։ Սակայն, ուրիշ բան մըն ալ պահանջուած է։

⁷ Պետրոս առաքեալ բացատրեց թէ Աստուած իր սուրբ հոգին կու տայ «իրեն հնազանդ եղողներուն»։ (Գործք 5։32) Այսպիսի հնազանդութիւն կը պարփակէ ‘ժողովուրդին քարոզելու ու վկայութիւն տալու’ պատուէրին անսալ։ (Գործք 1։8. 10։42) Ուստի, թէեւ ճիշդ է որ քարոզչութեան մէջ մեզ զօրացնելու համար Աստուծոյ հոգիին կարիքը ունինք, սակայն ճիշդ է նաեւ, որ երբ սկսինք Եհովան հաճեցնելու փափաք ցուցաբերել, ան մեզի աւելի կ’օգնէ։ Թող որ յօժարակամ հնազանդութեան այդ առաջին քայլերը առնելու կարեւորութիւնը երբեք թեթեւի չառնենք։

⁸ Դեռատիներուն Օգնենք. Ո՛վ ծնողներ, ապացոյց ունի՞ք թէ ձեր զաւակները կ’ուզեն ճշմարտութեան մասին ուրիշներու խօսիլ։ Անոնք դաշտի ծառայութեան մէջ ձեզի կ’ընկերակցի՞ն։ Վարքով օրինակելի՞ են։ Եթէ այո, ինչո՞ւ կը վարանիք։ Մօտեցէք Ժողովքի Ծառայութեան Յանձնախումբի անդամներէն մէկուն եւ տեսէք եթէ ձեր զաւակը որակելի է այս Ապրիլին հրատարակիչ մը ըլլալու։ (Տես՝ Կազմակերպուած գիրքը, էջ 99-100։) Նկատի ունեցէք թէ ձեր զաւակները կրնան այս Յիշատակատօնի ժամանակաշրջանին Եհովայի փառաբանութեան աղաղակին մեծապէս նպաստել։—Մատթ. 21։15, 16

⁹ Ճորճիայի մէջ (Ա.Մ.Ն.) Քրիստոնեայ մայր մը, իր փոքր աղջկան միշտ կը քաջալերէր որ ուրիշներուն Եհովայի մասին խօսի։ Անցեալ տարի, մինչ աղջիկը իր մօրը հետ դաշտի ծառայութեան կը մասնակցէր, ան մարդու մը Ի՛նչ կը Պահանջէ գրքոյկը տուաւ եւ հակիրճօրէն բացատրեց բովանդակութեան ցանկը։ Մարդը իրեն հարցուց. «Քանի՞ տարեկան ես»։ «Եօթը տարեկան», պատասխանեց աղջնակը։ Մարդը զարմացաւ անոր տուած իմաստալից ներկայացումին վրայ։ Ան իր մանկութեան շրջանին ճշմարտութեան հետ շփման մէջ եկած էր, սակայն երբեք զայն որպէս ապրելակերպ լուրջի չէր առած։ Շատ չանցած, Աստուածաշունչի ուսումնասիրութիւն մը կը վարուէր մարդուն, իր կնոջ եւ աղջկան հետ։

¹⁰ Դեռատիներէն շատեր արդէն հրատարակիչներ են, եւ մենք հաճոյքով անոնց հետ ծառայութեան կ’ելլենք։ Այս անչափահասները կրնան իրենց տարեկիցները մղել եւ քաջալերել։ Սակայն, Ապրիլը իւրաքանչիւր ընտանիքի համար ալ պատեհ ժամանակ մըն է, սրբազան ծառայութեան մէջ միասնաբար աշխատելով իրենց կապերը զօրացնելու եւ հոգեւորապէս զօրանալու։ Ընտանիքի գլուխները ասոր մէջ առաջնորդութիւնը պէտք է առնեն։—Առ. 24։27

¹¹ Նորեկներուն Օգնել. Ի՞նչ կրնանք ըսել այն նորեկներուն մասին, որոնց հետ Աստուածաշունչը կ’ուսումնասիրէք։ Այս Ապրիլին թափուելիք մասնայատուկ ջանքերուն կրնա՞ն նպաստել։ Թերեւս իրենց սորվածը ուրիշներուն հետ բաժնելու փափաք մը յայտնած էին, մինչ անոնց հետ կը ծածկէիք Գիտութիւն գրքին 2–րդ գլուխին, 22–րդ պարբերութիւնը, կամ 11–րդ գլուխին, 14–րդ պարբերութիւնը։ Եթէ գիրքը վերջացնելու վրայ էք, պատրաստուեցէք անոնց հետ այս հարցին մասին բացայայտօրէն խօսելու, նկատի առնելով 18–րդ գլուխին, 8–րդ պարբերութիւնը, ուր կ’ըսէ. «Հաւանաբար, ձեր սորված բաներուն մասին, ձեր ազգականներուն, բարեկամներուն եւ ուրիշներուն խօսելու մեծ ցանկութիւն ունիք։ Թերեւս արդէն կ’ընէք ասիկա, ինչպէս Յիսուս բարի լուրը ուրիշներուն հետ բաժնեց անպաշտօն կերպով։ (Ղուկ. 10։38, 39. Յովհ. 4։6-15) Այժմ, թերեւս կը փափաքիք աւելին ընել»։ Արդեօք ա՞յս է անոնց պարագան, որոնց հետ կ’ուսումնասիրէք։

¹² Ձեր աշակերտը կը հաւատա՞յ Աստուծոյ Խօսքին։ Ան Աստուածաշունչի սկզբունքները կը գործադրէ՞։ Իր կեանքը աստուածային չափանիշներուն հետ ներդաշնակութեան մէջ բերա՞ծ է։ Ժողովքային հանդիպումներուն ներկայ կը գտնուի՞։ Կը փափաքի՞ Եհովա Աստուծոյ ծառայել։ Ուստի, ինչո՞ւ զինք չքաջալերէք որ երէցներուն մէկուն հետ խօսի, որպէսզի անոնք որոշեն եթէ ան որակելի է չմկրտուած հրատարակիչ մը ըլլալու, եւ ձեր հետ Ապրիլին ծառայութեան մասնակցելու։ (Տես՝ Կազմակերպուած գիրքը, էջ 97-99։) Այս կերպով ան անձամբ կրնայ տեսնել թէ Եհովայի կազմակերպութիւնը ի՛նչպէս Եհովայի ծառայելու իր ջանքերուն մէջ իրեն թիկունք պիտի կանգնի։

¹³ Ճիշդ է որ կարգ մը աշակերտներ ուրիշներէն աւելի արագ կը յառաջդիմեն։ Ուստի, Յունիս 2000–ի Մեր Թագաւորութեան Ծառայութիւնը թերթիկին, էջ 4, պարբերութիւն 5-6–ի տուած ուղղութեան համաձայն, շատեր երկրորդ գիրք մը կ’ուսումնասիրեն այն անհատներուն հետ, որոնք սկիզբը հետաքրքրութիւն ցոյց տուին, սակայն ժողովքին հետ գործունեայ կերպով ընկերակցելու համար յաւելեալ օգնութեան կարիքը ունէին։ Երբեք յոյսերնիս չենք կտրեր որ այս պարկեշտ սիրտ ունեցողները, Քրիստոսի աշակերտները պիտի ըլլան, «կարճ կամ երկար ժամանակուան մէջ»։ (Գործք 26։29, ՆԱ) Սակայն, եթէ այսպիսի անհատներու հետ ձեր ուսումնասիրած ամիսները «երկար ժամանակ» կրնան նկատուիլ, կրնա՞յ ըլլալ որ այս Յիշատակատօնի ժամանակաշրջանը լաւ առիթ մը ըլլայ, որ աշակերտը սկսի Քրիստոսի փրկանքին հանդէպ իր գնահատութեան խորութիւնը ցուցաբերել։

¹⁴ Ի՛նչպէս Անոնց Օգնել որ Մասնակցին. Ուրիշները մարզելու Յիսուսի կերպը քննելով, ծառայութեան սկսելու համար որակելի անհատներուն օգնելու առնչութեամբ կրնանք շատ բան սորվիլ։ Ան պարզապէս ամբոխ մը գտնելով իր առաքեալներուն չըսաւ որ սկսին անոնց խօսիլ։ Նախ եւ առաջ, ան քարոզչութեան գործին կարիքը շեշտեց, աղօթարար կեցուածք մը քաջալերեց, ապա անոնց տուաւ երեք հիմնական հայթայթումներ. ընկերակից մը, նշանակուած թաղամաս մը, եւ պատգամ մը։ (Մատթ. 9։35-38. 10։5-7. Մար. 6։7. Ղուկ. 9։2, 6) Դուք ալ կրնաք նոյնը ընել։ Եթէ պիտի օգնէք ձեր զաւկին, կամ նոր աշակերտի մը, կամ ալ անհատի մը որ ժամանակէ մը ի վեր չէ տեղեկագրած, պատշաճ պիտի ըլլայ մասնայատուկ ջանք թափել որ հետեւեալ նպատակակէտերը հետապնդէք։

¹⁵ Կարիքը Աչքառու Դարձուցէք. Անհատին օգնեցէք որ քարոզչութեան կարեւորութիւնը տեսնէ։ Անոր մասին դրական եղէք։ Պատմեցէք փորձառութիւններ որոնք ցոյց կու տան թէ ժողովքը ծառայութեան մէջ ի՛նչ կ’իրագործէ։ Մատթէոս 9։36-38–ի մէջ, Յիսուսի արտայայտած հոգին ցուցաբերեցէք։ Քաջալերեցէք ապագացու կամ անգործունեայ հրատարակիչը, որ աղօթէ ծառայութեան մէջ իր անձնական մասնակցութիւնը բերելու մասին, ինչպէս նաեւ համաշխարհային գործին յաջողութեան մասին։

¹⁶ Քաջալերեցէք որ Անհատը Մտածէ Վկայելու Շատ մը Պատեհութիւններու Մասին. Յիշեցէք տունէ–տուն վկայութեան համար գրքի ուսումնասիրութեան խումբին հետ ժողվուելու կարելիութեան մասին։ Խօսեցէք՝ ազգականներու ու ծանօթներու հետ, նաեւ ճաշի դադարի միջոցին գործակիցներու կամ դասընկերներու հետ խօսակցելու պատեհութեան մասին։ Հանրային փոխադրամիջոցներ գործածելու միջոցին, յաճախ անհատ մը կրնայ խօսակցութիւն մը սկսիլ, պարզապէս իր քովիններուն հանդէպ անձնական հետաքրքրութիւն ցուցաբերելով։ Երբ նախաքայլը առնենք, ասիկա յաճախ լաւ վկայութիւն մը տալու պատեհութեան դուռ կը բանայ։ Արդարեւ, բազմաթիւ առիթներ կան որ մեր յոյսը ուրիշներու հետ բաժնենք «օրէ օր»։—Սաղմ. 96։2, 3

¹⁷ Սակայն, հաւանաբար նախընտրելի պիտի ըլլայ, որ նոր հրատարակիչին հետ տունէ–տուն միասին աշխատիք, կարելի եղածին չափ շուտ։ Եթէ Ապրիլի ընթացքին ձեր ծառայութիւնը աւելցնելու նպատակակէտ մը դրած էք, թաղամասի ծառային հարցուցէք եթէ յարմար թաղամաս մը մատչելի է։ Եթէ այո, ասիկա ձեզի պատեհութիւններ պիտի տայ որ անոր մէջ լիովին աշխատիք։ Օրինակի համար, ծառայութիւնը լրացնելէ ետք կամ մինչ ժողովի կամ այլ տեղ մը կ’երթաք, թերեւս նկատէք թէ նախապէս տունը չգտնուած անհատ մը կամ հետաքրքրուած անձ մը, այդ պահուն տունն է։ Եթէ յարմար է, հակիրճ այցելութիւն մը տուէք, երբ ասիկա ընելը շատ ազդու պիտի ըլլայ։ Ասիկա իր կարգին, ծառայութեան մէջ բան մը իրագործելու զգացումին եւ ուրախութեան պիտի նպաստէ։

¹⁸ Գրաւիչ Պատգամ մը Պատրաստեցէք. Թագաւորութեան պատգամը ուրիշներուն հետ բաժնելու անհատին փափաքը բան մըն է, բայց զայն ուրիշներուն ներկայացնելու իր կերպին մասին վստահ ըլլալը՝ բոլորովին ուրիշ բան մըն է, մանաւանդ եթէ նորեկ է կամ երկար ժամանակէ ծառայութեան չէ մասնակցած։ Երբ նորեկի մը կամ անգործունեայ անհատի մը օգնութիւն կը տրուի որ պատրաստէ, անիկա ժամավաճառութիւն չէ։ Ծառայութեան Ժողովները եւ դաշտի ծառայութեան հաւաքավայրերը կրնան օգտակար գաղափարներ հայթայթել, սակայն անոնք անհատապէս պատրաստութիւն ընելը չեն փոխարիներ։

¹⁹ Ի՞նչպէս կրնաք նորեկներուն օգնել որ ծառայութեան համար պատրաստուին։ Պարբերաթերթի ներկայացումով մը սկսեցէք, եւ զայն պարզ ու հակիրճ ըրէք։ Անոնցմէ խնդրեցէք որ մտածեն լուրերէն քաղուած իրադարձութիւններու մասին, որոնք թաղամասին մէջ բնակողները կրնան հետաքրքրել, ապա ընթացիկ պարբերաթերթերէն մէկուն մէջ կէտ մը գտէք որ անոր հետ կապ ունի։ Ներկայացումը միասնաբար փորձ ըրէք, եւ զայն ծառայութեան մէջ գործածեցէք կարելի եղածին չափ շուտով։

²⁰ Ապագայ Յաւելումի Մեր Հնարաւորութիւնները Մշակենք. Անցեալ տարի համայն աշխարհի մէջ Յիշատակատօնի ներկաներուն թիւը 14.8 միլիոնը անցաւ։ Տեղեկագրող հրատարակիչներուն թիւը վեց միլիոնէն քիչ մը աւելի էր։ Ասիկա կը նշանակէ թէ շուրջ 8.8 միլիոն անհատներ այս մասնայատուկ յայտագրին ներկայ գտնուելու բաւարար հետաքրքրութիւն ունէին, ուր Աստուածաշունչի գլխաւոր ուսուցումներէն մէկուն բացատրութիւնը լսեցին։ Անոնք անձնապէս ծանօթացան մեզմէ ոմանց, եւ հաւանաբար ասիկա իրենց վրայ լաւ տպաւորութիւն ձգեց։ Անոնցմէ շատեր մեր մասին համակրանքով կը խօսին, մեր համաշխարհային գործին ի նպաստ նուիրատուութիւն կ’ընեն, եւ ուրիշներու առջեւ մեզ կը պաշտպանեն։ Այս մեծ խումբը ապագայ յաւելումի հնարաւորութիւն մը կը ներկայացնէ։ Ի՞նչ կրնանք ընել անոնց օգնելու որ աւելի յառաջդիմեն։

²¹ Յիշատակատօնին ներկայ գտնուող նորեկներուն մեծամասնութիւնը կու գան, քանի որ մեզմէ մէկը անձնապէս զանոնք հրաւիրած է։ Սովորաբար, ասիկա կը նշանակէ թէ առնուազն ներկաներէն մէկը անձնապէս ծանօթ է անոնց։ Երբ անհատ մը մեր հրաւէրին ընդառաջելով ներկայ գտնուի, պատասխանատուութիւնը ունինք անոր զգացնել տալու թէ բարի եկած է եւ օգնելու որ յայտագրէն լիովին օգտուի։ Քանի որ սրահը խճողուած պիտի ըլլայ, անոր օգնեցէք աթոռ մը գտնելու։ Աստուածաշունչ մը փոխ տուէք անոր։ Անոր հարցուցած որեւէ հարցումին պատասխանեցէք։ Ձեր ջերմ ու անհատական հետաքրքրութիւնը կրնայ իր հետաքրքրութիւնը մշակելու գլխաւոր ազդակ մը ըլլալ։ Անշուշտ, այս պատասխանատուութիւնը բոլորիս վրայ կ’իյնայ. եթէ օտար դէմք մը տեսնենք, ջերմ բարի գալուստ մը մաղթենք, եւ իր հետ ծանօթանալու համար հակիրճ խօսակցութիւն մը ունենանք։

²² Յիշատակատօնին ներկայ գտնուիլը անհատի մը մտածելակերպին վրայ խոր տպաւորութիւն մը կրնայ ձգել։ Այն իրողութիւնը թէ ան ժողովին եկած է, կրնայ թելադրել թէ ան իր փնտռածը ուրիշ տեղ չէ գտած եւ թէ մենք կը հրամցնենք բան մը որ ան կը խորհի թէ պէտք է զայն աւելի մօտէն քննէ։ Փրկանքի հոյակապ կարգադրութեան բացատրութիւնը կրնայ խոր յայտնութիւն մը ըլլալ անհատի մը համար, որ Եհովայի անսահման սիրոյն մասին գաղափար իսկ չունի։ Ան կրնայ շուտով նկատել թէ մենք տարբեր ենք՝ անկեղծ, բարեկամական, սիրալիր եւ յարգալից։ Մեր սրահը չի նմանիր իր տեսած եկեղեցիներուն, որոնք նկարներ եւ անիմաստ արարողութիւններ ունին։ Նորեկները անպայման պիտի նկատեն թէ ներկաներուն մէջ ամէն խաւէ անհատներ կան եւ թէ հանգանակութիւններ չկան։ Այս բոլորը կրնան զօրաւոր դրդապատճառ մը ըլլալ որ անոնք վերստին գան։

²³ Յիշատակատօնէն ետք, արթուն պէտք է ըլլանք ներկայ գտնուող իւրաքանչիւր նորեկի յաւելեալ օգնութիւն մատուցանելու։ Եթէ դո՛ւք նորեկներ հրաւիրեցիք, մասնայատուկ պատասխանատուութիւն մը ունիք։ Նախքան որ սրահը ձգեն, վստահ եղէք որ անոնք Թագաւորութեան Սրահին մէջ տեղի ունեցող միւս ժողովներուն մասին տեղեկութիւն ունին։ Յաջորդ հանրային դասախօսութեան բնաբանը յիշեցէք։ Անոնց տեղեակ պահեցէք իրենց տան ամենամօտ Ժողովքի Գրքի Ուսումնասիրութեան վայրէն ու ժամէն։ Հետագային, անոնց տուէք Մեծագոյն Մարդը գիրքը, եւ ըսէք թէ Ապրիլ 30–ով սկսող շաբթուան ուսումնասիրութեան նիւթն է՝ «Ամենէն Հռչակաւոր Քարոզը»։ Բացատրեցէք թէ ինչո՛ւ բոլոր ժողովքը կը ծրագրէ մօտ ապագային մօտակայքը տեղի ունենալիք միօրեայ մասնաւոր համաժողովի մը ներկայ գտնուիլ։

²⁴ Բարեկամական այցելութիւն մը տալու կարգադրութիւնը ըրէք։ Վստահ եղէք որ անոնք ունին Ի՛նչ կը Պահանջէ գրքոյկը եւ Գիտութիւն գիրքը, որոնք կը բացատրեն Աստուածաշունչի հիմնական ուսուցումները։ Եթէ տակաւին չեն ուսումնասիրեր, Աստուածաշունչի ուսումնասիրութիւն մը առաջարկեցէք։ Թելադրեցէք որ կարդան Եհովայի Վկաներ—Որո՞նք Են. Ի՞նչ Են Իրենց Հաւատալիքները գրքոյկը, որ յստակ պատկեր մը կու տայ թէ մեր կազմակերպութիւնը ի՛նչպէս կը գործէ։ Հրաւիրեցէք որ անոնք մեր պատկերիզները դիտեն, օրինակ՝ Եհովայի Վկաներ—Այս Անուան Ետին Գտնուող Կազմակերպութիւնը։ Կարգադրեցէք որ անոնք ժողովքի միւս անդամներուն ծանօթանան։ Յառաջիկայ ամիսներուն, նորեկներուն հետ կապի մէջ մնացէք. զիրենք հրաւիրեցէք որ ժողովներուն ներկայ գտնուին, երբ շրջանային տեսուչը կ’այցելէ, կամ երբ շրջանային կամ միօրեայ մասնաւոր համաժողով ունենաք։ Անոնց ամէն պատեհութիւն տուէք որ ցոյց տան թէ «յաւիտենական կեանքի համար լաւ տրամադրուած» են։—Գործք 13։48, ՆԱ

²⁵ Ի՛նչ Կրնան Ընել Երէցները. Այս Ապրիլին ծառայութեան մէջ եղած յաւելեալ ջանքերուն յաջողութիւնը, մեծաւ մասամբ երէցներէն կախեալ պիտի ըլլայ։ Եթէ գրքի ուսումնասիրութեան վարիչ մըն էք, ձեր ընելիք բաներուն մասին ցանկ մը պատրաստեցէք, ձեր գրքի ուսումնասիրութեան խումբին բոլոր անդամներուն օգնելու համար որ այս մասնայատուկ գործունէութիւններուն մասնակցին։ Ձեր խումբին նշանակուած անհատներուն մէջ դեռատի, նորեկ, անկանոն կամ անգործունեայ անհատներ կա՞ն։ Հարցուցէք եթէ երբեք ծնողներ, ռահվիրաներ կամ այլ հրատարակիչներ, անոնց օգնելու նախաքայլը առած են։ Անձնապէս ի՛նչ օգնութիւն որ կրնաք տալ, տուէ՛ք։ Քոյր մը որ երկու տարիէ դաշտի ծառայութեան մէջ անկանոն էր, անցեալ Ապրիլին աւելի քան 50 ժամ տրամադրեց ծառայութեան։ Ի՞նչ բան այս փոփոխութիւնը պատճառեց։ Ան ըսաւ թէ պատճառը երէցներուն տուած հովուական կերտիչ այցելութիւններն էին։

²⁶ Երէցներն ու օգնական ծառաները պէտք է համագործակցին, վստահ ըլլալու համար թէ յառաջիկայ ամիս բաւարար թաղամաս, պարբերաթերթ եւ գրականութիւն մատչելի են։ Կարելի՞ է դաշտի ծառայութեան յաւելեալ ժողովներ կազմակերպել։ Եթէ այո, այս մասնայատուկ կարգադրութիւններէն տեղեակ պահեցէք զանոնք։ Ամէն բանէ աւելի, ձեր հանրային եւ անձնական աղօթքներուն մէջ Եհովայի օրհնութիւնը խնդրեցէք, Թագաւորութեան յաւելեալ գործունէութեան ամսուան վրայ։—Հռովմ. 15։30, 31. Բ. Թես. 3։1

²⁷ Անցեալ Ապրիլին, Նորթհ Քարոլայնայի ժողովքներէն մէկուն մէջ, երէցները ծառայութեան մէջ յաւելեալ գործունէութիւնը բոլոր սրտով քաջալերեցին։ Ամէն շաբաթ ժողովներուն, անոնք հրատարակիչները քաջալերեցին որ աղօթքով նկատի առնեն, եթէ կրնան օժանդակ ռահվիրայութեան ձեռնարկել։ Ամէն առիթով, ծառայող մարմինին բոլոր անդամները խանդավառութեամբ խօսեցան Ապրիլը ցարդ լաւագոյն ամիսը ընելու մասին։ Իբր արդիւնք՝ այդ ամիս, հրատարակիչներուն 58 առ հարիւրը, մէջը ըլլալով բոլոր երէցները եւ օգնական ծառաները, ռահվիրայ եղան։

²⁸ Լման Մասնակցութիւն Բերելուն Ուրախութիւնը. Ծառայութեան մէջ ‘ծանր աշխատելու եւ ջանք թափելու’ օրհնութիւնները ի՞նչ են։ (Ա. Տիմ. 4։10) Անցեալ Ապրիլին իրենց ժողովքին եռանդուն գործունէութեան նկատմամբ, վերոյիշեալ երէցները գրեցին. «Եղբայրներն ու քոյրերը յաճախ կը խօսին թէ որքա՛ն շատ սէր ու մտերմութիւն կը զգան իրարու հանդէպ, դաշտի ծառայութեան մէջ միասին աշխատելու սկսելէն ի վեր»։

²⁹ Ֆիզիքապէս անկարող երիտասարդ եղբայր մը փափաքեցաւ անցեալ Ապրիլի մասնայատուկ գործունէութեան մէջ բաժին բերել։ Ուշադրութեամբ ծրագրելով եւ իր մօր եւ հոգեւոր եղբայրներուն ու քոյրերուն օգնութեամբ, ան որպէս օժանդակ ռահվիրայ, արդիւնաբեր ամիս մը վայելեց։ Այս փորձառութեան հանդէպ իր զգացումը ի՞նչ էր։ Ան կ’ըսէ. «Կեանքիս մէջ առաջին անգամ ըլլալով, առողջ մարդու մը պէս զգացի»։

³⁰ Կասկած չկայ թէ Եհովա առատօրէն կ’օրհնէ իր թագաւորութեան մասին խօսելու իրենց առանձնաշնորհումը մեծապէս արժեւորող անհատները։ (Սաղմ. 145։11, 12) Մինչ մեր Տիրոջ մահուան յիշատակը կը տօնենք, կը հասկնանք թէ աստուածպաշտութեան օրհնութիւնները շա՛տ աւելի ճոխ պիտի ըլլան ապագային։ Պօղոս առաքեալ անձկալից կը սպասէր յաւիտենական կեանքի վարձատրութեան։ Սակայն, ան գիտէր թէ անոր հասնելու համար չէր կրնար ձեռքերը ծալլել եւ միայն յուսալ։ Ան գրեց. «Որուն համար ես ալ կ’աշխատիմ, ջանք ընելով իր ներգործութեանը համեմատ, որ զօրութիւնով իմ մէջս կը գործէ»։ (Կող. 1։29) Եհովա, Յիսուսի միջոցաւ Պօղոսը զօրացուց որ կեանք փրկող ծառայութիւն մը կատարէ, եւ ներկայիս Ան կրնայ մեզ ալ զօրացնել։ Այս Ապրիլին ասոր փորձառութիւնը պիտի ունենա՞ք։

[Շրջանակ՝ էջ 3]

Անձամբ Որո՞ւ Կրնաք Քաջալերել որ Ապրիլին Հրատարակիչ մը Ըլլայ

Ձեր զաւկի՞ն։

Աստուածաշունչի աշակերտի՞ մը։

Անգործունեայ դարձած անհատի՞ մը։