Հոգեւորապէս ուտելու եւ ուրախանալու առիթ մը
1. Եհովա իր ծառաներուն հոգեւոր կարիքները ի՞նչպէս կը հոգայ։
1 Եհովա սիրալիր կերպով կը հոգայ իր ծառաներուն հոգեւոր կարիքները։ Մինչ աշխարհ ընդհանուր առմամբ հոգեւորապէս սովաբեկ է, մենք շատ լաւ կը կերակրուինք։ (Եսա. 65։13) Կերպերէն մէկը որով Եհովա մեզ կը սնուցանէ, մեր տարեկան նահանգային համաժողովներուն միջոցաւ է։ «Աստուծոյ հոգիով կ’առաջնորդուինք» բնաբանով մօտալուտ Նահանգային Համաժողովին բոլոր նիստերուն ալ ներկայ գտնուելու համար պատրաստութիւններ կը տեսնե՞ս։ Համով ու սննդարար հոգեւոր կոչունք մը պատրաստուած է։
2. Համաժողովին համար կանխաւ ծրագրելը ի՞նչ կը պարփակէ։
2 Կանխաւ ծրագրէ. «Աշխատասէր մարդուն ծրագիրները իրաւամբ առատութիւն կը բերեն»։ (Առ. 21։5) Հետեւաբար, մինչ համաժողովի երեք օրերուն ալ ներկայ գտնուելու համար ծրագիրներդ կ’ամբողջացնես, գործատիրոջդ հետ արձակուրդ առնելու մասին խօսիլը մի՛ ձգձգեր։ Եթէ իջեւանի կարիք ունիս, ասոր նկատմամբ կարգադրութիւններ ըրա՞ծ ես։ Նաեւ պիտի ուզես կէսօրուան ճաշերդ կանխաւ ծրագրել, որպէսզի կարենաս եղբայրներուդ հետ միասին համաժողովի վայրը ճաշել։ Կարգադրութիւններ տես որ ամէն օր բաւական կանուխ համաժողովի հասնիս, տեղ գտնելու, բացման երգեցողութեան եւ աղօթքին մասնակցելու համար։
3. Ի՞նչպիսի հագուստներ պէտք է ծրագրենք հագնիլ։
3 Կ’ուզենք վստահ ըլլալ որ մեր հագուելակերպը համեստ ու կոկիկ է։ (Ա. Տիմ. 2։9, 10) Նահանգային համաժողովները համայնքին վկայութիւն մը տալու հոյակապ պատեհութիւն մը կը հայթայթեն։ Համաժողովի քաղաքին մէջ յարգարժան երեւոյթ մը պահպանելով եւ մեր համաժողովի լանջանշանները կրելով, անհաւատներէն պիտի զանազանուինք եւ դիտողներուն վրայ լաւ տպաւորութիւն պիտի ձգենք։
4. Ի՞նչ բան մեզի եւ մեր ընտանիքներուն պիտի օգնէ որ յայտագրէն լաւագոյն օգուտը քաղենք։
4 Ուշադրութեամբ մտիկ ըրէ. Վստահաբար չենք ուզեր այս հոգեւոր սեղանէն պատառ մը իսկ կորսնցնել։ (Առ. 22։17, 18) Մեր Աստուածաշունչով համարներուն ընթերցանութեան հետեւիլը եւ հակիրճ նոթեր առնելը, պիտի օգնեն մեր միտքը յայտագրին վրայ կեդրոնացած պահելու եւ մտացիր ըլլալէ խուսափելու։ Ապա երեկոյեան, կրնանք մեր նոթերը գործածել ուրիշներու հետ յայտագրին աչքառու կէտերուն մասին զրուցելու համար։ Վերջին քանի մը տարիներուն, նկատուած է թէ կարգ մը դեռատիներ համաժողովին քով–քովի կը նստին եւ յայտագրին ընթացքին կը խօսակցին կամ իրենց բջիջային հեռաձայններով իրարու երկտող կը ղրկեն։ Եթէ զաւակներ ունինք, ի ներառեալ դեռատիներ, շահաւէտ է որ իրարու քով նստինք եւ ընտանեօք յայտագրին հետեւինք, քան թէ թոյլ տանք որ մեր դեռատի զաւակները մեզմէ հեռու ուրիշ դեռատիներու հետ նստին։
5. Ի՞նչպէս կրնանք համաժողովէն աւելի հաճոյք առնել։
5 Ընկերակցութիւնը վայելէ. Համով ճաշ մը աւելի հաճելի է երբ բարեկամներով կ’ուտենք։ (Առ. 15։17) Նմանապէս, մեր եղբայրներուն ու քոյրերուն հետ ընկերակցիլը, համաժողովը աւելի հաճելի կը դարձնէ։ Հետեւաբար, դադարի միջոցին ո՜րքան հաճելի պիտի ըլլայ երբ նախաձեռնութիւնը առնելով այլ պատուիրակներու ծանօթանանք եւ անոնց ընկերակցութիւնը վայելենք։ (Սաղ. 133։1) Երբ ատենապետը ազնուօրէն մեզ հրաւիրէ որ երաժշտութիւնը սկսելէ առաջ մեր տեղերը նստինք, պէտք է մեր զրոյցները ընդհատենք եւ նստելով յայտագրին հետեւինք։
6. Քեզի հետ պատահած փորձառութիւն մը պատմէ, որ ցոյց կու տայ թէ ի՛նչպէս կրնանք համաժողովի քաղաքին մէջ բնակողներուն վկայութիւն տալ։
6 Վկայելու առիթներուն արթուն եղիր. Սովորաբար համաժողովները վկայութիւն մը տալու հոյակապ առիթներ կը հայթայթեն։ Համաժողովի նիստերէն ետք ճաշարաններ յաճախող պատուիրակներէն շատեր, սպասեակներու կամ ուրիշներու կողմէ կը հարցուին լանջանշանին վրայ նշուած բնաբանին մասին։ Ասիկա զրոյցներու դուռ բացած է եւ ճշմարտութեան մասին ընտիր վկայութիւն մը տուած է։ Հարցնողներէն ոմանք համաժողովի հրաւիրուած եւ ներկայ գտնուած են։
7. Մօտալուտ նահանգային համաժողովին ինչո՞ւ պէտք է ներկայ գտնուինք։
7 Յայտագիրները պատրաստելու, համաժողովի վայրերը կարգադրելու, համաժողովի բաժանմունքները կազմակերպելու եւ դասախօսութիւնները պատրաստելու համար հազարաւոր ժամեր կը տրամադրուին։ Այս հոգեւոր կոչունքը պատրաստելու համար թափուած բոլոր սիրալիր ջանքերը, իր ժողովուրդին հանդէպ Եհովայի գորովալից հոգածութիւնը ցոյց կու տան։ Բոլորս ալ ներկայ գտնուինք եւ ո՛րքան որ կրնանք անկէ ճաշակենք։ Մինչ ասիկա կ’ընենք, աշխարհին հակառակը, ‘սրտի ուրախութեամբ պիտի ցնծանք’։—Եսա. 65։14