Ուրախ Եղէք Լիակատար Վկայութիւն մը Տալով

¹ Բոլորս ալ հաճոյք կ’առնենք ընելով այն բաները որոնց մէջ հմուտ ենք։ Մարկոս 7։37–ն կ’ըսէ թէ բազմութիւնը Յիսուսի մասին ըսաւ. «Ամէն բաները աղէկ ըրաւ ասիկա»։ Զարմանալի չէ որ Յիսուս Եհովայի կամքը ընելուն մէջ ուրախութիւն գտաւ։ (Բաղդատել՝ Սաղմոս 40։8։) Հետեւեալ թելադրութիւններուն մասին մտածելով, մենք ալ ուրախութիւն պիտի գտնենք մինչ կը հնազանդինք Յիսուսի պատուէրին՝ որ «ժողովուրդին քարոզենք ու [«լիակատար», ՆԱ] վկայութիւն տանք»։ (Գործք 10։42) Յունուարին, պիտի ներկայացնենք 1985–էն առաջ հրատարակուած 192 էջնոց որեւէ գիրք որ ժողովքը ունի, կամ ալ՝ Յաւիտեան Ապրիլ գիրքը։ Այս գրականութիւնները ի՞նչպէս կրնանք գործածել լիակատար վկայութիւն մը տալու համար։

² Քանի որ մարդիկ յաճախ առողջապահական հարցերով մտահոգուած կ’ըլլան, կրնաք հետեւեալը ըսել.

◼ «Հակառակ բժշկական մարզին մէջ եղած յատկանշական իրագործումներուն, տակաւին հիւանդութիւնը շատ տառապանք կը պատճառէ։ Ձեր կարծիքով, պարագան ինչո՞ւ այսպէս է։ [Թոյլ տուէք որ պատասխանէ։] Յիսուս Քրիստոս ըսաւ որ հիւանդութիւնը վերջին օրերու երեսակներէն մէկը պիտի ըլլար։ (Ղուկ. 21։11) Այսուհանդերձ, Աստուածաշունչը կը բնութագրէ ժամանակ մը, երբ ա՛լ հիւանդութիւն պիտի չըլլայ։ [Կարդացէք Եսայեայ 33։24։] Նկատի առէք թէ այս գիրքը Աստուածաշունչի այդ հիմնական ուսուցումին հանդէպ ի՛նչպէս յոյս կը ներշնչէ»։ Ձեր առաջարկած գրքին մէջ գտնուող կարգ մը յարմար կէտեր աչքառու դարձնելէ ետք, զայն ներկայացուցէք։ Բացատրեցէք թէ մեր երկրածաւալ քարոզչութեան ի նպաստ եղած համեստ նուիրատուութիւն մը կ’ընդունինք։

³ Երբ անպաշտօն կերպով առեւտրական շրջաններու մէջ կը վկայէք, բարեւ մը տալէ ետք կրնաք հարցնել.

◼ «Կը խորհի՞ք որ այս օրերուն սղաճման պատճառաւ մեր շահածը այլեւս չի բաւեր մեր ծախսերուն։ [Թոյլ տուէք որ պատասխանէ։] Կը խորհի՞ք որ ժամանակ մը պիտի գայ, երբ տնտեսական իսկական ապահովութիւն պիտի ըլլայ»։ Թոյլ տուէք որ պատասխանէ։ Ապա ձեր ներկայացուցած գրքէն ցոյց տուէք յարմար համար մը։ Շարունակեցէք ըսելով. «Այս գիրքը ցոյց կու տայ թէ Աստուած իր Թագաւորութեան միջոցաւ ի՛նչպէս ներկայիս կեանքը դժուարացնող խնդիրները պիտի լուծէ»։ Գիրքը ներկայացուցէք, ու եթէ ընդունի զայն, պատեհութիւն տուէք անոր որ յօժարակամ համեստ նուիրատուութեամբ մը երկրածաւալ գործունէութեան թիկունք կանգնի։ Կրնաք իրեն ըսել թէ շատ ուրախացաք իր հետ խօսակցելով, ապա հարցնել. «Կերպ մը կա՞յ այս խօսակցութիւնը ուրիշ անգամ շարունակելու»։ Այս կերպով թերեւս կարենաք անհատին հեռաձայնի թիւը կամ տան հասցէն ձեռք ձգել։

⁴ Թերեւս պատեհութիւնը ունենաք համաշխարհային խաղաղութեան մասին հետեւեալ մօտեցումը փորձելու, գործածելով «Յաւիտեան Ապրիլ» գիրքը.

◼ «Ձեր կարծիքով, ինչո՞ւ դժուար է համաշխարհային խաղաղութիւն իրագործել։ [Թոյլ տուէք որ պատասխանէ, ապա 20-21–րդ էջերուն վրայ եղող պատկերը ցոյց տուէք։] Ասիկա Աստուածաշունչի Յայտնութիւն գրքին մէջ նկարագրուած մէկ դէպքին պատկերն է։ [17–րդ պարբերութեան մէջ կարդացէք Յայտնութիւն 12։7-9, 12։ Ապա պատկերին մեկնութիւնը կարդացէք։] Աշխարհը խաղաղութիւն չի վայելեր, քանի որ Բանսարկու երկիր նետուած է։ Այս գիրքը կարեւոր հարցումներու պատասխանը կը հայթայթէ, եւ ուրախ պիտի ըլլամ զայն մատչելի դարձնելով ձեզի, եթէ պիտի կարդաք զայն»։—Յաւիտեան Ապրիլ գիրքը ներկայացնելու ուրիշ ազդու կերպեր գտնելու համար, տեսէք Մեր Թագաւորութեան Ծառայութիւնը թերթիկին հետեւեալ թիւերուն վերջին էջերը՝ Սեպտեմբեր 1995, Փետրուար 1995, Սեպտեմբեր 1994, Սեպտեմբեր 1993 եւ Օգոստոս 1992։

⁵ Երբ հետաքրքրութիւն ցուցաբերող անհատներու քով կը վերադառնաք, ջանացէք Աստուածաշունչի ուսումնասիրութիւն մը սկսիլ, հետեւեալ մօտեցումը յարմարցնելով.

◼ «Վերջին անգամ երբ խօսակցեցանք, շատ հետաքրքրական միտք մը արտայայտեցիք։ [Անհատին ըսած մէկ արտայայտութիւնը յիշեցէք։] Ատոր մասին մտածեցի, եւ կը փափաքիմ այս նիւթին շուրջ ըրած հետազօտութիւններուս արդիւնքը ձեզի հետ բաժնեկցիլ։ [Յիշեցէք պատշաճ համար մը։] Ուսումնասիրութեան ձրի դասընթացք մը կը ներկայացնենք, որ միլիոնաւոր մարդոց օգնած է որ Աստուածաշունչի հիմնական ուսուցումները ճանչնան, կարճ ժամանակուան մը ընթացքին։ Այսպիսի քննարկութիւն մը Աստուծոյ խոստումներուն կատարման հանդէպ ձեր վստահութիւնը կրնայ կերտել»։ Աչքառու դարձուցէք պատասխանուելիք հարցումներէն ոմանք։ Եթէ անհատը Աստուածաշունչի ուսումնասիրութիւն մը մերժէ, բացատրեցէք թէ արագ դասընթացք մը ունինք, որ շաբաթը միայն 15 վայրկեան տրամադրելով՝ 16 շաբաթ կը տեւէ։ Ցոյց տուէք Ի՛նչ կը Պահանջէ գրքոյկը, բացէք առաջին դասը եւ հարցուցէք եթէ կարելի է առաջին դասը ցուցադրել։

⁶ Մի՛ Մոռնաք Յայտաթերթիկները Գործածել. Կրնաք զանոնք ձեր ներկայացումներուն մէջ ազդու կերպով գործածել, հոգեւոր բաներու հանդէպ հետաքրքրութիւն արթնցնելու համար, կամ կրնաք զանոնք ներկայացնել, երբ տանտէրը գրականութիւն չ’ընդունիր։ Հո՛ն ուր հետաքրքրութիւն ցուցաբերուի, յայտաթերթիկին ետեւի էջին վրայ եղած պատգամը գործածեցէք, անհատը քաջալերելու համար որ տան սուրբ գրային ուսումնասիրութիւն մը ընդունի ու մեր ժողովներուն գայ։

⁷ Ձեր գործին մէջ հմուտ եղէք, ու պիտի ուրախանաք զայն ընելով։ Լիակատար վկայութիւն տալու մէջ յարատեւ արթուն եղէք եւ ուրախացէք ծառայութեան բոլոր երեսակները լաւ կատարելով։—Ա. Տիմ. 4։16