Աշակերտելու Ստիպողական Գործին Հանդէպ Յառաջդիմական Տեսակէտ մը

¹ Երկրէն չմեկնած, Յիսուս իր հետեւորդներուն պատուիրեց որ ‘բոլոր ազգերէն եղող մարդիկ աշակերտեն’։ Ասիկա պահանջեց որ քարոզչութեան եւ ուսուցումի հսկայ արշաւ մը կատարեն եւ իրենց գործունէութիւնը ընդլայնեն երկրին բոլոր մասերը։ (Մատթ. 28։19, 20, ՆԱ. Գործք 1։8) Անոնք այս յանձնարարութիւնը ծանր բեռ մը նկատեցի՞ն։ Ո՛չ, ըստ Յովհաննէս առաքեալի։ Որպէս աշակերտող 65 տարի ծառայելէն ետք, ան գրեց. «Ասիկա է Աստուծոյ սէրը, որ անոր պատուիրանքները պահենք եւ անոր պատուիրանքները ծանր բան չեն»։—Ա. Յովհ. 5։3

² Նախկին Քրիստոնեաներու գործունէութեան սուրբ գրային արձանագրութիւնը կ’ապացուցանէ որ անոնք Յիսուս Քրիստոսի աշակերտներ ընելու իրենց յանձնարարութիւնը ստիպողականօրէն կատարեցին։ (Բ. Տիմ. 4։1, 2) Անոնք ասիկա ըրին ոչ միայն առ ի պարտականութիւն, այլ, քանի որ Աստուած փառաբանելու եւ փրկութեան յոյսը ուրիշներու մատուցանելու սիրալիր փափաքը ունէին։ (Գործք 13։47-49) Քրիստոնէական ժողովքը առաջին դարուն արագօրէն աճեցաւ, քանի որ բոլոր աշակերտուողները իրենք ալ աշակերտողներ եղան։—Գործք 5։14. 6։7. 16։5

³ Աշակերտելու Գործը կ’Արագանայ. Այս Ի. դարուն մէջ աշակերտելու մեծագոյն գործը կը կատարուի։ Մինչեւ հիմա, միլիոնաւոր անհատներ բարի լուրը ընդունած եւ անոր համաձայն գործած են։ (Ղուկ. 8։15) Քանի որ իրերու ներկայ դրութիւնը արագօրէն իր վախճանին կը մօտենայ, «հաւատարիմ ու իմաստուն ծառան» մեզի հայթայթած է գործիքներ, որոնք կարելի կը դարձնեն որ պարկեշտ սիրտ ունեցող անհատներ ճշմարտութիւնը արագօրէն սորվին։—Մատթ. 24։45

⁴ 1995–ին ստացանք Գիտութիւնը որ Յաւիտենական Կեանքի կ’Առաջնորդէ գիրքը, իսկ 1996–ին՝ Աստուած Ի՛նչ կը Պահանջէ Մեզմէ գրքոյկը։ Գիտութիւն գրքին նկատմամբ, Դիտարան 1 Ապրիլ 1996, էջ 22–ը ըսաւ. «Այս 192 էջնոց գիրքը յարաբերաբար կարճ ժամանակուան մէջ կարելի է ուսումնասիրել եւ ‘յաւիտենական կեանքի համար սահմանուած’ անհատները պիտի կարենան բաւարար գիտութիւն ստանալ, որպէսզի Եհովայի նուիրուին ու մկրտուին»։—Գործք 13։48

⁵ Յունիս 1996–ի Մեր Թագաւորութեան Ծառայութիւնը թերթիկին յաւելուածականը, որու խորագիրն է՝ «Գիտութիւն Գրքով Ի՛նչպէս Աշակերտել», մեզի այս նպատակակէտը դրաւ. «Աշակերտին պարագաներուն ու ընդունակութեան համաձայն, կրնաք գլուխը մէկ նիստով ծածկել, մօտաւորապէս մէկ ժամուան ընթացքին, առանց աճապարելու։ Աշակերտները աւելի լաւ պիտի յառաջդիմեն, երբ թէ՛ ուսուցիչը եւ թէ աշակերտը ամէն շաբաթ ուսումնասիրութեան ժամադրութիւնը կը յարգեն»։ Յօդուածը շարունակեց ըսելով. «Կ’ակնկալուի որ երբ անհատ մը Գիտութիւն գրքին ուսումնասիրութիւնը ամբողջացնէ, իր անկեղծութիւնը ու Աստուծոյ ծառայելու իր հետաքրքրութեան խորութիւնը բացայայտ եղած պիտի ըլլան»։ Հոկտեմբեր 1996–ի Մեր Թագաւորութեան Ծառայութիւնը թերթիկին Հարցումի Տուփը բացատրեց. «Կ’ակնկալուի որ յարաբերաբար կարճ ժամանակամիջոցի մը մէջ հմուտ ուսուցիչ մը կարենայ սովորական անկեղծ աշակերտի մը օգնել որ բաւարար գիտութիւն ստանայ Եհովայի ծառայելու խոհեմ որոշում մը առնելու համար»։

⁶ Գիտութիւն Գիրքը Արդիւնքներ կու Տայ. Երիտասարդ կին մը իր մկրտութեան առիթով պատմեց թէ Գիտութիւն գրքով ուսումնասիրելուն նկատմամբ ի՛նչ էր իր զգացումը։ Ան որոշ ժամանակ Յաւիտեան Ապրիլ գիրքը կ’ուսումնասիրէր։ Երբ Գիտութիւն գիրքը լոյս տեսաւ, անոր հետ դաս վարող քոյրը որոշեց նոր գրքին անցնիլ։ Շատ չանցած, ան հասկցաւ որ վերջապէս որոշում մը պէտք էր տար, ուստի սկսաւ արագօրէն յառաջդիմել։ Այս երիտասարդուհին որ հիմա մեր քոյրն է, կ’ըսէ. «Յաւիտեան Ապրիլ գիրքը ինծի օգնեց Եհովան սիրելու, բայց Գիտութիւն գիրքը ինծի օգնեց որ անոր ծառայելու որոշումը առնեմ»։

⁷ Նկատի առէք թէ ուրիշ կին մը ո՛րքան արագօրէն ճշմարտութիւնը սորվեցաւ։ Իր երկրորդ ուսումնասիրութենէն ետք, շրջանային տեսուչին այցելութեան ընթացքին, ան Թագաւորութեան Սրահին մէջ ժողովի մը ներկայ գտնուեցաւ։ Այդ շաբաթ, իր երրորդ ուսումնասիրութեան, ան տեսուչին ըսաւ որ ինք Եհովայի նուիրուած էր եւ կ’ուզէր չմկրտուած հրատարակիչ մը ըլլալ։ Ան երէցներուն հետ տեսակցութիւն մը ունեցաւ, որոնք հաւանութիւն տուին որ հրատարակիչ մը ըլլայ, եւ յաջորդ շաբաթ սկսաւ դաշտի ծառայութեան մասնակցիլ։ Ան իր Աստուածաշունչի ուսումնասիրութեամբ ա՛յնքան կլանուեցաւ որ գործէն արձակուրդ առաւ, որպէսզի կարենայ շաբաթը երկու կամ երեք անգամ ուսումնասիրել եւ ծառայութեան աւելի ժամանակ տրամադրել։ Երբեմն, անոնք մէկ նիստով երկու կամ երեք գլուխ կը ծածկէին։ Կինը իր կեանքի բոլոր մարզերուն մէջ սկսաւ իր սորվածը կիրարկել, Գիտութիւն գիրքը չորս շաբթուան ընթացքին ամբողջացուց, եւ յառաջդիմեց դէպի մկրտութիւն։

⁸ Քրոջ մը ամուսինը իր անձին մասին կ’ըսէր որ «սովորական անհաւատ կողակից» մըն էր։ Օր մը, եղբայր մը առաջարկեց իր հետ Գիտութիւն գիրքը ուսումնասիրել, այն պայմանով որ առաջին դասէն ետք կամ որեւէ ատեն կրնար ուսումնասիրութիւնը դադրեցնել։ Ամուսինը ուզեց փորձել, հակառակ որ դպրոցական օրերուն ուշիմ աշակերտ մը չէր եւ աւելի քան 20 տարիէ ի վեր որեւէ կրօնական գրականութիւն չէր սերտած։ Գիտութիւն գրքով ուսումնասիրելու նկատմամբ ի՞նչ հակազդեցութիւն ունեցաւ։ Ան ըսաւ. «Իսկական հաճոյք էր գիտնալ թէ Աստուածաշունչի ուսումնասիրութեան օժանդակող այս գիրքը այսքան պարզութեամբ գրուած էր։ Տեղեկութիւնները այնքան յստակօրէն եւ տրամաբանականօրէն ներկայացուած էին, որ շատ չանցած մեծ ակնկալութեամբ կը սպասէի յաջորդ ուսումնասիրութեան։ Ուսուցիչս հմտօրէն կիրարկեց Ընկերութեան կողմէ հայթայթուած աշակերտելու մեթոտները, եւ Եհովայի հոգիին օգնութեամբ, չորս ամիս ետք մկրտուեցայ։ Իրապէս կրնամ ըսել որ եթէ աշակերտելու գործին հանդէպ սէր մշակենք, շարունակենք դաշտի ծառայութեան մէջ պարկեշտ սիրտ ունեցողները փնտռել, գործածենք Գիտութիւն գիրքը եւ Ընկերութեան հայթայթած Աստուածաշունչի օժանդակող միւս գիրքերը, եւ ամենակարեւորը, աղօթենք Եհովայի առաջնորդութեան համար, աշակերտելու մէջ մեր բաժինը բերելու մասնայատուկ առանձնաշնորհումը կրնանք ունենալ»։ Վերոյիշեալները բացառիկ փորձառութիւններ են։ Մեր աշակերտներուն մեծամասնութիւնը այսքան արագ ճշմարտութեան չեն գար։

⁹ Աշակերտները Իրարմէ Տարբեր Արագութեամբ կը Յառաջդիմեն. Պէտք է ընդունինք որ Աստուծոյ Խօսքը ուսուցանողներուն եւ աշակերտուողներուն կարողութիւնները որոշ չափով իրարմէ կը տարբերին։ Հոգեւոր յառաջդիմութիւնը կրնայ կամաց կամ արագ ըլլալ։ Աշակերտներէն ոմանք մի քանի ամսուան մէջ շատ աւելի արագ կը յառաջդիմեն քան՝ ուրիշներ։ Անհատի մը հոգեւոր աճումը կախեալ է իր ուսման մակարդակէն, հոգեւոր բաներու հանդէպ իր գնահատութեան տարողութենէն եւ Եհովայի հանդէպ իր նուիրումին խորութենէն։ Մեզի հետ ուսումնասիրող ամէն անհատ Աստուածաշունչը ամէն օր ուսումնասիրելու ‘կատարեալ յօժարութիւնը’ չունի, ինչպէս էր պարագան վաղեմի Բերիացիներուն, որոնք հաւատացեալներ դարձան։—Գործք 17։11, 12

¹⁰ Անոր համար Ապրիլ 1998–ի Մեր Թագաւորութեան Ծառայութիւնը թերթիկին յաւելուածականը, որու խորագիրն է՝ «Աստուածաշունչի Յաւելեալ Ուսումնասիրութիւններ կ’Ուզուին», հետեւեալ իրապաշտ ուղղութիւնը կու տայ. «Անշուշտ, Աստուածաշունչի բոլոր աշակերտները միեւնոյն արագութեամբ չեն յառաջդիմեր։ Ոմանք հոգեւոր հակումներ չունին ինչպէս ուրիշներ, իսկ ոմանք ալ շուտով չեն ըմբռներ իրենց սորված բաները։ Ոմանք շատ զբաղած ըլլալով թերեւս չկարենան պէտք եղած ժամանակը տրամադրել ամէն շաբաթ լման գլուխ մը ուսումնասիրելու համար։ Հետեւաբար, կարգ մը պարագաներուն, կրնանք անհրաժեշտ նկատել գլուխներէն ոմանք ուսումնասիրելու համար մէկէ աւելի նիստեր ունենալ եւ քանի մը ամիս աւելի առնել գիրքը ամբողջացնելու համար»։

¹¹ Աշակերտողները Հաւասարակշռուած Տեսակէտ մը կը Պահեն. Անհրաժեշտ է ուսումնասիրութեան արագութիւնը յարմարցնել աշակերտին պարագաներուն եւ ընդունակութեան։ Քանի որ մեզի քաջալերութիւն կը տրուի Ի՛նչ կը Պահանջէ գրքոյկով ուսումնասիրութիւններ սկսիլ, երկու կամ երեք ամիս կրնայ առնել մինչեւ որ Գիտութիւն գրքին անցնինք։ Եթէ Յունիս 1996–ի Մեր Թագաւորութեան Ծառայութիւնը թերթիկի յաւելուածականին բոլոր թելադրութիւնները գործադրենք, վեցէն ինը ամիս կ’ուզէ որպէսզի Գիտութիւն գիրքը ամբողջանայ։ Անոնք որոնք Գիտութիւն գրքով ուսումնասիրութիւն մը նոր հաստատած էին, անցան Ի՛նչ կը Պահանջէ գրքոյկը ուսումնասիրելու, աշակերտին օգնելու համար որ Աստուածաշունչի հիմնական ճշմարտութիւնները աւելի արագօրէն սորվի։ Հետագային վերսկսան ուսումնասիրել Գիտութիւն գիրքը։ Իսկ եթէ ուսումնասիրութիւնը Գիտութիւն գրքով սկսուեցաւ եւ լաւ կերպով ընթացաւ, օգտակար կ’ըլլայ զայն ամբողջացնելէ ետք Ի՛նչ կը Պահանջէ գրքոյկը ուսումնասիրել, Աստուծոյ Խօսքին հիմնական ճշմարտութիւնները արագօրէն վերաքաղ ընելով։ Երկու պարագաներուն ալ, արագ ընելու սիրոյն, ճշգրիտ գիտութեան մէջ աշակերտին յառաջդիմութիւնը պէտք չէ զոհել։ Ամէն աշակերտ Աստուծոյ Խօսքին հանդէպ իր նորագիւտ հաւատքին համար հաստատ հիմի կարիքը ունի։

¹² Նկատի ունենալով ժամանակի հոսանքին մէջ մեր ո՛ւր գտնուիլը, ամէն ժամանակէ աւելի ստիպողական է որ ուրիշներուն օգնենք ճշմարտութիւնը սորվելու։ Աստուածաշունչի ուսումնասիրութիւններ սկսելու համար շարունակաբար աղօթելու կողքին, թող որ աղօթենք հիմա իսկ մեր հետ ուսումնասիրողներուն համար։ Այն ատեն պիտի ուրախանանք շարունակելով աւելի շատ աշակերտներ մկրտել ‘ամէն օր մինչեւ աշխարհիս վերջը’։—Մատթ. 28։20