Չնչին հետաքրքրութիւն ցուցաբերող բոլոր անհատներուն վերայցելէ
1 Մեզմէ շատեր ճշմարտութեան մէջ են այսօր, քանի որ անհատ մը Թագաւորութեան պատգամին հանդէպ մեր նպաստաւոր ընդառաջումը նկատեց եւ համբերութեամբ վերադարձաւ,– թերեւս մի քանի անգամ,– մեր հետաքրքրութիւնը մշակելու համար։ Մենք ալ խղճմտօրէն պէտք է վերայցելենք բոլոր անոնց՝ որոնք չնչին հետաքրքրութիւն կը ցուցաբերեն։ Արդարեւ վերայցելութիւններ ընելը պարփակուած է ‘աշակերտելու’ մեր յանձնարարութեան մէջ։—Մատթ. 28։19, 20
2 Հետաքրքրութիւնը զատորոշէ. Նոյնիսկ եթէ անհատը հրատարակութիւն մը չընդունի, իր դէմքի արտայայտութիւնը, ձայնի թոնը կամ բառերու ընտրութիւնը կրնայ Թագաւորութեան պատգամին հանդէպ որոշ գնահատութիւն յայտնել։ Ասոր հիման վրայ կրնանք վերայցելութիւն մը ընել։ Եղբայր մը հինգ յաջորդական շաբաթներ անհատի մը վերայցելեց առանց հրատարակութիւն մը բաշխելու։ Վեցերորդ այցելութեան, անհատը հրատարակութիւն մը ընդունեց, եւ ժամանակի ընթացքին՝ Աստուածաշունչի ուսումնասիրութիւն մը հաստատուեցաւ։
3 Եթէ հետաքրքրութիւն մը նկատես, փութով վերադարձիր, թերեւս մի քանի օր ետք։ «Չար»ին առիթ մի՛ տար որ անհատին սրտին մէջ ցանուածը յափշտակէ։ (Մատթ. 13։19) Եթէ վերայցելելու ժամադրութիւն նշանակես, խօսքիդ տէրը եղիր։—Մատթ. 5։37
4 Փողոցի քարոզչութեան մէջ. Փողոցի քարոզչութեան կամ անպաշտօն վկայութեան ընթացքին գտած հետաքրքրութիւնդ կը ջանա՞ս հետապնդել։ Խօսակցութեան աւարտին կրնաս ըսել. «Հաճելի խօսակցութիւն ունեցանք։ Ո՞ւր կրնամ քեզ տեսնել, որպէսզի նորէն խօսակցինք»։ Երբ յարմար է, կարգ մը հրատարակիչներ հետաքրքրուած անհատին կու տան իրենց հեռախօսի թիւը, կամ կը խնդրեն հեռախօսի թիւերը փոխանակել։ Եթէ փողոցի քարոզչութեան ընթացքին մարդիկ կանոնաւորաբար նոյն տեղը քեզ տեսնեն, անոնք պիտի չվարանին քեզի տալու իրենց հեռախօսի թիւը կամ հասցէն։ Նոյնիսկ եթէ անոնք մերժեն որեւէ տեղեկութիւն տալ, տակաւին կրնաս անոնց հետաքրքրութիւնը մշակել՝ երբ փողոցը կրկին անոնց հանդիպիս։
5 Մեր ջրած ու մշակած բոյսին ուռճանալը տեսնելով կ’ուրախանանք։ Նմանապէս մեծ ուրախութիւն է վերայցելութիւններ ընել ու անհատներու օգնել որ հոգեւորապէս յառաջդիմեն։ (Ա. Կորն. 3։6) Նպատակակէտդ դարձուր վերայցելել բոլոր անոնց՝ որոնք չնչին հետաքրքրութիւն կը ցուցաբերեն։