Abụ Ọma

72 Chineke, biko, mee ka eze mara mkpebi ikpe gị,+

Meekwa ka nwa eze mara ezi omume gị.+

 2 Ka o jiri ezi omume kpechite ọnụ ndị gị,+

Ka o jirikwa ikpe ziri ezi kpechite ọnụ ndị gị nọ n’ahụhụ.+

 3 Ka ugwu ukwu na ugwu nta bugara ndị gị udo,+

Bụ́ nke e nwetara site n’ezi omume.

 4 Ka o kpechitere ndị nọ n’ahụhụ n’etiti ndị gị ọnụ ha,+

Ka ọ zọpụta ụmụ onye ogbenye,

Ka o gwepịakwa onye nrigbu.

 5 Ha ga na-atụ egwu gị ogologo oge niile anyanwụ dị,+

Nakwa ogologo oge niile ọnwa dị, site n’ọgbọ ruo n’ọgbọ.+

 6 Ọ ga-agbadata dị ka mmiri ozuzo si ezokwasị ahịhịa a sụrụ asụ,+

Dị ka oké mmiri ozuzo nke na-ede ala.+

 7 N’oge ọchịchị ya, onye ezi omume ga na-ama pokopoko,+

Udo ga-adịkwa ebe niile ruo mgbe ọnwa na-agakwaghị adị.+

 8 Ọ ga-enwe ndị ọ na-achị malite n’oké osimiri ruo n’oké osimiri,+

Malitekwa n’Osimiri Yufretis+ ruo na nsọtụ ụwa.+

 9 Ndị bi n’ebe mmiri na-adịghị ga-akpọ isiala n’ihu ya,+

Ndị iro ya ga-arachakwa ájá.+

10 Ndị eze Tashish na ndị eze agwaetiti dị iche iche+—

Ha ga-atụ ụtụ.+

Ndị eze Shiba na ndị eze Siba—

Ha ga-eweta onyinye.+

11 Ndị eze niile ga-akpọrọ ya isiala;+

Mba niile ga-ejekwara ya ozi.+

12 N’ihi na ọ ga-anapụta ogbenye nke na-eti mkpu enyemaka,+

Nakwa onye nọ n’ahụhụ na onye ọ bụla na-enweghị onye na-enyere ya aka.+

13 Ọ ga-emere onye ọ na-enweghị ka ọ hà ya na ogbenye ebere,+

Ọ ga-azọpụtakwa mkpụrụ obi ndị ogbenye.+

14 Ọ ga-anapụta mkpụrụ obi ha ná mmegbu nakwa n’ihe ike,

Ọbara ha ga-adịkwa oké ọnụ ahịa n’anya ya.+

15 Ya dịrị ndụ,+ ka e nyekwa ya ụfọdụ n’ime ọlaedo Shiba.+

Ka a na-ekpekwa ekpere n’ihi ya mgbe niile;

Ka ọ bụrụ onye a gọziri agọzi ogologo ụbọchị dum.+

16 Ọka ga-ejupụta n’elu ụwa;+

Ọ ga-ejubiga ókè n’elu ugwu dị iche iche.+

Mkpụrụ ya ga na-eme nke ọma dị ka osisi ndị dị na Lebanọn,+

Ndị nọ n’obodo ya ga na-ama pokopoko dị ka ihe a kụrụ n’ala.+

17 Ka aha ya dịruo mgbe ebighị ebi;+

Ka aha ya dị ukwuu ruo ogologo oge niile anyanwụ dị,

Ka ha site n’aka ya gọzie onwe ha;+

Ka mba niile kpọọ ya onye obi ụtọ.+

18 Ka Jehova Chineke, bụ́ Chineke Izrel, bụrụ onye a gọziri agọzi,+

Onye naanị ya na-arụ ọrụ dị ebube.+

19 Ka aha ya nke dị ebube bụrụkwa ihe a gọziri agọzi ruo mgbe ebighị ebi,+

Ka ebube ya jupụtakwa ụwa dum.+

Amen na Amen.