តើជីវិតរបស់អ្នកអាចមានអត្ថន័យច្រើនជាងឬទេ?
តម្លៃពិតប្រាកដមិនតែងតែជាអ្វីដែលអាចមើលឃើញទេ។ ក្រដាសប្រាក់ដែលមានតម្លៃធំបំផុតដែលធ្លាប់ប្រើនៅសហរដ្ឋអាមេរិក នោះមានតម្លៃ១០.០០០ដុល្លារដែលចុះលើក្រដាសប្រាក់នោះ។ ក៏ប៉ុន្តែ ក្រដាសដែលបានត្រូវប្រើដើម្បីបោះពុម្ពប្រាក់នោះ មានតម្លៃតែពីរបីសេនប៉ុណ្ណោះ។
តើអ្នកធ្លាប់ឆ្ងល់ថា តើសន្លឹកក្រដាសដែលមានតម្លៃបន្ដិចបន្តួចប៉ុណ្ណោះ អាចនាំឲ្យជីវិតរបស់អ្នកមានន័យពិតប្រាកដទេ? មនុស្សជាច្រើននាក់គិតថាវាអាចនាំមកនូវអត្ថន័យពិតប្រាកដមែន។ មនុស្សរាប់លាននាក់ធ្វើការទាំងយប់ទាំងថ្ងៃ ដើម្បីឲ្យរកបានលុយច្រើនបំផុតដែលអាចធ្វើទៅបាន។ ជួនកាលការតាមរកលុយកាក់តម្រូវឲ្យលះបង់ចោលសុខភាពល្អ ពួកម៉ាក និងសូម្បីតែក្រុមគ្រួសាររបស់គេទៀតផង។ តើនេះមានប្រយោជន៍អ្វី? តើលុយឬក៏អ្វីៗដែលយើងអាចប្រើលុយទិញមកនោះ អាចនាំមកនូវការពេញចិត្តដ៏ពិតប្រាកដនិងជាស្ថាពរទេ?
យោងទៅតាមពួកអ្នកស្រាវជ្រាវ បើសិនជាយើងស្វែងរកកាន់តែខ្លាំង នូវការពេញចិត្តដោយផ្អែកទៅលើទ្រព្យសម្បត្ដិ នោះលទ្ធភាពរបស់យើងដើម្បីរកឃើញការពេញចិត្តគឺកាន់តែតិចដែរ។ អ្នកកាសែតម្នាក់ ឈ្មោះអាលហ្វី ខន បានសន្និដ្ឋានថា៖ «ការពេញចិត្តមិនមែនជាអ្វីដែលអាចទិញបានទេ . . . មនុស្សដែលចាត់ទុកភាពធូរធារជាអាទិភាពក្នុងជីវិត ច្រើនតែពិសោធនូវការតានតឹងក្នុងចិត្តនិងការធ្លាក់ទឹកចិត្តជាច្រើនខុសពីធម្មតា ថែមទាំងសុខុមាលភាពទូទៅមានកំរិតទាបជាងធម្មតាផងដែរ»។—អិនធើណាសិនណាល ហេរឺល ទ្រីព្យូន។
ទោះបីអ្នកស្រាវជ្រាវទទួលស្គាល់ថា ជីវិតមួយដែលប្រកបដោយអត្ថន័យតម្រូវនូវអ្វីៗផ្សេងទៀត ក្រៅពីលុយក៏ដោយ តែមនុស្សជាច្រើនមិនគិតអ៊ីចឹងទេ។ នេះមិនគួរឲ្យភ្ញាក់ផ្អើលទេ ពីព្រោះអ្នកដែលនៅបស្ចិមប្រទេសប្រហែលជាប្រទះឃើញការផ្សាយពាណិជ្ជកម្ម រហូតដល់៣.០០០ដងក្នុងមួយថ្ងៃ។ មិនថាការផ្សាយនេះឃោសនាពីការលក់រថយន្តឬក៏ស្ករគ្រាប់ក៏ដោយ ការឃោសនានោះចង់ផ្សាយថា៖ ‹ទិញវត្ថុនេះទៅ ហើយអ្នកនឹងសប្បាយចិត្តជាង›។
តើអ្វីជាលទ្ធផលពីការផ្សាយមិនឈប់ឈរពីតម្លៃនៃទ្រព្យសម្បត្ដិ? លទ្ធផលគឺអ្វីៗខាងវិញ្ញាណច្រើនតែត្រូវគេធ្វើព្រងើយ! យោងទៅតាមសេចក្ដីរាយការណ៍ក្នុងទស្សនាវដ្ដី ញូវវីក នៅពេលថ្មីៗនេះមេអេវ៉ែកនៅទីក្រុងកូឡូង ប្រទេសអាល្លឺម៉ង់ បានប្រកាសថា៖ «ក្នុងសង្គមរបស់យើង រឿងខាងព្រះបានលែងត្រូវគេយកមកពិភាក្សាទៀតហើយ»។
ប្រហែលជាអ្នកបានប្រមូលកម្លាំងរបស់អ្នកទៅលើការរកស៊ី។ ហើយក៏ប្រហែលជាអ្នកគិតថា អ្នកឥតសូវមានពេលសំរាប់អ្វីផ្សេងទៀតទេ។ ក៏ប៉ុន្តែ ប្រហែលជាយូរៗម្ដងអ្នកមានអារម្មណ៍ថា ជីវិតត្រូវតែមានច្រើនជាងការធ្វើកិច្ចការដដែលៗរហូតដល់សុខភាពរបស់អ្នកឬក៏អាយុរបស់អ្នកធ្វើឲ្យអ្នកឈប់។
តើការយកចិត្តទុកដាក់យ៉ាងខ្លាំងទៅលើអ្វីៗខាងវិញ្ញាណ អាចនាំឲ្យអ្នកសប្បាយចិត្តច្រើនជាងទេ? តើអ្វីដែលអាចធ្វើឲ្យជីវិតរបស់អ្នកមានអត្ថន័យច្រើនជាងបាន?