តើរាជ្យរបស់ព្រះនឹងធ្វើអ្វី?
ពេលព្រះយេស៊ូបានផ្សព្វផ្សាយ តើលោកបានបង្រៀនអំពីអ្វីច្រើនជាងគេ? យោងទៅតាមព្រះយេស៊ូ នគរឬរាជ្យរបស់ព្រះជារឿងសំខាន់ចម្បង។ (លូកា ៤:៤៣; ខ.ស.) ពេលបណ្ដាជនបានស្ដាប់ព្រះយេស៊ូ ច្រើនដងច្រើនសាពួកគេបានស្ដាប់លោកពោលពាក្យដែលសំដៅទៅលើរាជ្យរបស់ព្រះ។ ពេលឮពាក្យនោះ តើពួកគេឆ្ងល់អំពីអត្ថន័យទេ? តើពួកគេបានសួរព្រះយេស៊ូថា នគរឬរាជ្យនោះជាអ្វីទេ? យោងទៅតាមកំណត់ហេតុនីមួយៗក្នុងគម្ពីរ ដែលរៀបរាប់អំពីទង្វើនិងសេចក្ដីបង្រៀនរបស់ព្រះយេស៊ូ បណ្ដាជនមិនដែលឆ្ងល់ឬសួរដូចនោះឡើយ។ តើនេះមានន័យថា ពួកគេធ្លាប់ឮអំពីនគរឬរាជ្យរបស់ព្រះទេ?
តាមការពិត គម្ពីរបុរាណដែលជនជាតិយូដាចាត់ទុកថាជាធម៌បរិសុទ្ធ រៀបរាប់យ៉ាងល្អិតល្អន់អំពីនគររបស់ព្រះ និងអ្វីដែលរាជ្យនោះនឹងសម្រេច។ យើងអាចរៀនច្រើនជាងពួកយូដាទៅទៀតអំពីរាជ្យរបស់ព្រះ ដោយសិក្សាគម្ពីរដែលយើងមានសព្វថ្ងៃនេះ។ សូមឲ្យយើងពិនិត្យមើលចំណុច៧យ៉ាង ដែលគម្ពីររៀបរាប់ស្តីអំពីនគរឬរាជ្យរបស់ព្រះ។ ជនជាតិយូដានៅសម័យព្រះយេស៊ូ ក៏ដូចជីដូនជីតារបស់ពួកគាត់មុនសម័យលោកទៅទៀត ធ្លាប់ដឹងចំណុច១ដល់៣រួចទៅហើយ។ ចំណុច៤ដល់៦ ព្រះយេស៊ូគ្រិស្តនិងសាវ័ករបស់លោកបានបង្រៀននៅសតវត្សរ៍ទីមួយ។ រីឯចំណុចទី៧វិញ ចំណុចនេះទើបតែបានឃើញច្បាស់នៅសម័យនេះ។
១. រាជ្យរបស់ព្រះជារដ្ឋាភិបាលមួយដែលនឹងស្ថិតស្ថេរជារៀងរហូត។ ទំនាយទីមួយក្នុងគម្ពីរបង្ហាញឲ្យដឹងថា ព្រះយេហូវ៉ានឹងចាត់អ្នកសង្គ្រោះម្នាក់ដើម្បីប្រោសមនុស្សស្មោះត្រង់ឲ្យរួចពីទុក្ខវេទនា។ ទំនាយនោះសំដៅទៅលើអ្នកសង្គ្រោះជា«ពូជ»មួយអង្គដែលនឹងកែប្រែស្ថានភាពអាក្រក់ ដែលចាប់ផ្ដើមឡើងពេលអ័ដាម អេវ៉ានិងសាតាំងបានបះបោរប្រឆាំងនឹងព្រះ។ (លោកុប្បត្តិ ៣:១៥) រាប់រយឆ្នាំក្រោយមក ស្តេចល្អម្នាក់នៅប្រទេសអ៊ីស្រាអែល ឈ្មោះដាវីឌ បានទទួលដំណឹងដ៏អស្ចារ្យអំពី«ពូជ»នោះ ថាជាអ្នកដែលព្រះរើសតាំងឲ្យទទួលអំណាចជាស្តេចក្នុងរាជាណាចក្ររបស់លោក។ រាជរដ្ឋាភិបាលនោះនឹងមានលក្ខណៈខុសប្លែកពីរដ្ឋាភិបាលឯទៀត ហើយនឹងស្ថិតស្ថេរជាដរាប។—សាំយូអែលទី២ ៧:១២-១៤
២. រាជ្យរបស់ព្រះត្រូវជំនួសការគ្រប់គ្រងរបស់មនុស្ស។ លោកដានីយ៉ែលជាអ្នកប្រកាសទំនាយរបស់ព្រះ ហើយគាត់បានឃើញក្នុងគំនិតនូវមហាអំណាចនីមួយៗដែលមានតៗគ្នា តាំងពីសម័យដើមរហូតមកដល់សម័យយើង។ អ្វីដែលគាត់ឃើញនៅទីបញ្ចប់ គឺអស្ចារ្យណាស់! គាត់សរសេរថា៖ «ក្នុងរជ្ជកាលរបស់ស្តេចទាំងនោះ» ដែលសំដៅទៅលើអ្នកគ្រប់គ្រងនាសម័យចុងក្រោយនេះ ព្រះនៅស្ថានសួគ៌«នឹងធ្វើអោយរាជាណាចក្រមួយទៀតកើតឡើង ដែលមិនរលាយហើយក៏មិនធ្លាក់ទៅក្រោមអំណាចគ្រប់គ្រងរបស់ប្រជាជាតិណាមួយឡើយ។ រាជាណាចក្រមួយនេះនឹងកំទេចរាជាណាចក្រឯទៀតៗទាំងប៉ុន្មានដែលមានពីមុនអោយវិនាសសូន្យ ហើយរាជាណាចក្រនេះនឹងនៅស្ថិតស្ថេររហូតតទៅ»។ នេះបានសេចក្ដីថា រាជាណាចក្រនិងរដ្ឋាភិបាលទាំងឡាយក្នុងពិភពលោកនេះ ដែលចេះតែពុករលួយ សង្កត់សង្កិនមនុស្សជាតិ និងបង្កបង្កើតឲ្យមានសង្គ្រាម ត្រូវវិនាសទៅទាំងស្រុង។ បទទំនាយរបស់ដានីយ៉ែលបង្ហាញថា បន្ដិចទៀតរាជាណាចក្ររបស់ព្រះនឹងគ្រប់គ្រងលើផែនដីទាំងមូល។ (ដានីអែល ២:៤៤, ៤៥, ខ.ស.) បន្តបន្ទាប់ទៀត មានតែរាជាណាចក្ររបស់ព្រះប៉ុណ្ណោះ ដែលនឹងគ្រប់គ្រងលើមនុស្សជាតិ។
៣. រាជ្យរបស់ព្រះនឹងទប់ស្កាត់សង្គ្រាម ជំងឺតម្កាត់និងទុរ្ភិក្ស ព្រមទាំងសេចក្ដីស្លាប់ផង។ ក្នុងគម្ពីរ មានទំនាយជាច្រើនដ៏គួរឲ្យរំភើបចិត្តស្តីអំពីអ្វីដែលរាជ្យរបស់ព្រះនឹងសម្រេចនៅផែនដី។ អ្វីៗដែលស្តេចនិងរដ្ឋាភិបាលនានារបស់មនុស្សមិនធ្លាប់សម្រេច ហើយគ្មានលទ្ធភាពសម្រេច នោះរាជរដ្ឋាភិបាលរបស់ព្រះនឹងសម្រេចជាពុំខាន។ សូមគិតទៅមើល គ្រឿងសស្ដ្រាវុធនឹងលែងមានទៀត! រាជ្យរបស់ព្រះនឹង«បណ្ដាលឲ្យការសង្គ្រាមស្ងប់រំងាប់ រហូតដល់ចុងផែនដី»។ (ទំនុកដំកើង ៤៦:៩) គ្រូពេទ្យ មន្ទីរពេទ្យនិងជំងឺគ្រប់បែបយ៉ាងក៏នឹងលែងមានដែរ។ មនុស្ស«នឹងមិនថា ‹ខ្ញុំឈឺ› ទៀតឡើយ!»។ (អេសាយ ៣៣:២៤) ការអត់បាយនិងទុរ្ភិក្សក៏នឹងលែងមានទៀតផង ពីព្រោះប្រទេសទាំងឡាយ«នឹងមានស្រូវជាបរិបូរនៅក្នុងស្រុក»។ (ទំនុកដំកើង ៧២:១៦) បុណ្យខ្មោចព្រមទាំងកន្លែងបូជានិងទីកប់សពនឹងមិនមានទៀតទេ ហើយមនុស្សនឹងលែងយំសោកជានិច្ច។ សេចក្ដីស្លាប់ដែលធ្លាប់តែយាយីមនុស្សជាតិក៏នឹងលែងមានដែរ។ ព្រះយេហូវ៉ា‹នឹងបំផ្លាញសេចក្ដីស្លាប់ឲ្យសូន្យបាត់ទៅជាដរាប ហើយជូតទឹកភ្នែកពីមុខមនុស្សទាំងអស់›។—អេសាយ ២៥:៨
៤. ព្រះយេហូវ៉ាបានរើសតាំងស្តេចមួយអង្គឲ្យកាន់អំណាចក្នុងរាជ្យរបស់លោក។ ស្តេចក្នុងរាជ្យរបស់ព្រះ មិនតែងតាំងខ្លួនឡើង ហើយមនុស្សក៏មិនរើសតាំងស្តេចនោះឲ្យគ្រប់គ្រងទេ។ គឺព្រះយេហូវ៉ាដែលរើសតាំងស្តេចថ្មីឲ្យមានមុខតំណែងជាមេស្ស៊ីឬគ្រិស្ត។ ពាក្យភាសាហេព្រើរនិងភាសាក្រិចទាំងនេះ មានន័យថា «អ្នករើសតាំង»។ នេះបានន័យថា ព្រះយេហូវ៉ាបានរើសតាំងស្តេចនោះឲ្យបំពេញភារកិច្ចសំខាន់។ ស្តីអំពីអ្នកដែលបានរើសតាំងនោះ ព្រះយេហូវ៉ាមានប្រសាសន៍ថា៖ «លោកនេះហើយ ជាអ្នកបំរើដែលយើងគាំទ្រ ជាអ្នកដែលយើងបានជ្រើសរើស និងជាទីគាប់ចិត្តរបស់យើង។ យើងដាក់[សកម្មពល]របស់យើងលើលោក។ លោកនឹងបង្ហាញអោយប្រជាជាតិទាំងឡាយស្គាល់ការវិនិច្ឆ័យ»។ (អេសាយ ៤២:១, ខ.ស.; ម៉ាថាយ ១២:១៧, ១៨) ប្រាកដណាស់! មានតែព្រះដែលជាអ្នកបង្កើតរបស់សព្វសារពើ ដែលអាចជ្រើសរើសអ្នកគ្រប់គ្រងដ៏ល្អបំផុតឲ្យយើង មែនទេ?
៥. ស្តេចនៃរាជាណាចក្ររបស់ព្រះបានបង្ហាញរួចហើយថា លោកគួរនឹងទទួលអំណាចគ្រប់គ្រងមែន។ ភ័ស្តុតាងបង្ហាញថា បុរសឈ្មោះយេស៊ូដែលបានកើតមកនៅក្រុងណាសារ៉ែត នាប្រទេសអ៊ីស្រាអែល បានសម្រេចទំនាយនានាស្តីអំពីអ្នកដែលមានមុខតំណែងជាមេស្ស៊ី។ ជីដូនជីតាតៗគ្នារបស់ព្រះយេស៊ូសុទ្ធតែជាអ្នកដែលព្រះយេហូវ៉ាបានជ្រើសរើសពីដើមមក។ (លោកុប្បត្តិ ២២:១៨; របាក្សត្រទី១ ១៧:១១; ម៉ាថាយ ១:១) ពេលនៅផែនដី ព្រឹត្ដិការណ៍ជាច្រើនក្នុងជីវិតរបស់ព្រះយេស៊ូបំពេញទំនាយដែលបានសរសេររាប់រយឆ្នាំមុន ស្តីអំពីអ្នកដែលជាមេស្ស៊ី។ សូម្បីតែព្រះយេហូវ៉ានៅឯស្ថានសួគ៌បានសម្គាល់ព្រះយេស៊ូជាអ្នកដែលមានមុខតំណែងជាមេស្ស៊ី។ តើព្រះយេហូវ៉ាធ្វើដូច្នេះដោយវិធីណាខ្លះ? វិធីម្យ៉ាង គឺអស់ពីរបីដងដែលព្រះយេហូវ៉ាបានបញ្ចេញសំឡេងថា ព្រះយេស៊ូជាបុត្ររបស់លោក។ វិធីមួយទៀត ពួកទេវតាបានប្រាប់មនុស្សថា ព្រះយេស៊ូជាមេស្ស៊ីស្របទៅតាមទំនាយ។ ណាមួយទៀត ព្រះយេស៊ូបានធ្វើអព្ភូតហេតុ ជួនកាលនៅមុខមនុស្សរាប់រយនាក់ ឬរហូតដល់រាប់ពាន់នាក់ក៏មាន ដែលជាសាក្សីថា អំណាចរបស់ព្រះយេស៊ូពិតជាមកពីព្រះនៅស្ថានសួគ៌មែន!a ម្ដងហើយម្ដងទៀតព្រះយេស៊ូបានបង្ហាញថា លោកមានលក្ខណៈល្អដើម្បីធ្វើជាអ្នកគ្រប់គ្រង។ ព្រះយេស៊ូមិនគ្រាន់តែមានអំណាចជួយមនុស្សប៉ុណ្ណោះ តែលោកក៏មានចិត្តចង់ជួយផងដែរ។ (ម៉ាថាយ ៨:១-៣) ព្រះយេស៊ូមិនដែលរកប្រយោជន៍ខ្លួនឯង ហើយមានចិត្តរាបទាប ក្ដួលអាណិតនិងក្លាហានផង។ ជីវប្រវត្ដិរបស់ព្រះយេស៊ូនៅផែនដី បានកត់ទុកក្នុងគម្ពីរដើម្បីយើងរាល់គ្នាអាចអានបាន។
៦. មនុស្ស១៤៤.០០០នាក់នឹងគ្រប់គ្រងជាមួយព្រះយេស៊ូគ្រិស្តក្នុងរាជាណាចក្ររបស់ព្រះ។ ព្រះយេស៊ូបានឲ្យដឹងថា មនុស្សដទៃដែលរួមបញ្ចូលសាវ័ករបស់លោក នឹងគ្រប់គ្រងជាមួយលោកនៅឯស្ថានសួគ៌។ ព្រះយេស៊ូបានហៅអ្នកគ្រប់គ្រងទាំងនោះថា ជា«ហ្វូងតូច»។ (លូកា ១២:៣២) ក្រោយព្រះយេស៊ូបានទទួលមរណភាព សាវ័កយ៉ូហានបានទទួលព័ត៌មានបន្ថែមទៀតថា មនុស្សហ្វូងតូចនោះនឹងមានចំនួនតែ១៤៤.០០០នាក់ប៉ុណ្ណោះ។ នៅឯស្ថានសួគ៌ ពួកហ្វូងតូចនឹងទទួលកិច្ចការដ៏គួរឲ្យអស្ចារ្យណាស់! ពោលគឺ គ្រប់គ្រងជាស្តេចនិងបម្រើការជាសង្ឃជាមួយព្រះយេស៊ូគ្រិស្ត។—វិវរណៈ ៥:៩, ១០; ១៤:១, ៣
៧. រាជ្យរបស់ព្រះមានអំណាចនៅស្ថានសួគ៌ ហើយបន្ដិចទៀតនឹងគ្រប់គ្រងលើផែនដីទាំងមូលដែរ។ ចំណុចទី៧នេះ គួរនាំឲ្យមានចិត្តរីករាយរំភើបណាស់! មានទីសំអាងច្រើនក្នុងគម្ពីរដែលបង្ហាញថា ព្រះយេស៊ូបានទទួលអំណាចជាស្តេចនៅឯស្ថានសួគ៌រួចទៅហើយ។ ព្រះយេស៊ូកំពុងគ្រប់គ្រងលើស្ថានសួគ៌ ហើយមិនយូរប៉ុន្មានទៀត គឺនៅសម័យយើងនេះ ព្រះយេស៊ូក៏នឹងចាប់ផ្ដើមគ្រប់គ្រងលើផែនដីផងដែរ និងបំពេញតាមបទទំនាយដ៏អស្ចារ្យទាំងឡាយដែលបានរៀបរាប់នៅខាងលើ។ ប៉ុន្តែ ធ្វើដូចម្ដេចឲ្យយើងដឹងប្រាកដថា រាជាណាចក្ររបស់ព្រះកំពុងគ្រប់គ្រងឥឡូវនេះមែន? តើរាជាណាចក្ររបស់ព្រះនឹងចាប់ផ្ដើមគ្រប់គ្រងលើផែនដីទាំងមូលនៅពេលណា?
[កំណត់សម្គាល់]
a ជាឧទាហរណ៍ សូមមើលសៀវភៅម៉ាថាយ ៣:១៧; លូកា ២:១០-១៤; យ៉ូហាន ៦:៥-១៤។