យេស៊ូគ្រិស្ត តើលោកជាអ្នកណា?
«ពេលដែលលោកចូលក្រុងយេរូសាឡិម នោះអ្នកក្រុងទាំងឡាយបានរំជើបរំជួល ក៏បានសួរគ្នាថា៖ ‹តើអ្នកនេះជានរណា?› ហើយបណ្ដាជនបានប្រកាសហើយប្រកាសទៀតថា៖ ‹នេះជាលោកយេស៊ូ ពីក្រុងណាសារ៉ែត នៅស្រុកកាលីឡេ! លោកជាអ្នកប្រកាសទំនាយដែលបានត្រូវសន្យា!›»។—ម៉ាថាយ ២១:១០, ១១
នៅថ្ងៃមួយនាឆ្នាំ៣៣ គ.ស. លោកយេស៊ូaបានចូលក្រុងយេរូសាឡិម។ ហេតុអ្វីនេះបានធ្វើឲ្យមនុស្សរំជើបរំជួលជាខ្លាំង? ព្រោះមនុស្សជាច្រើនក្នុងទីក្រុងនោះបានឮអំពីលោកយេស៊ូ ហើយអំពីការដ៏អស្ចារ្យដែលលោកបានធ្វើ។ បន្ថែមទៅទៀត ពួកគេខំប្រាប់អ្នកឯទៀតអំពីលោកផងដែរ។ (យ៉ូហាន ១២:១៧-១៩) ក៏ប៉ុន្តែ ពួកគេមិនបានដឹងទេថា លោកយេស៊ូជាបុរសម្នាក់ដែលនឹងជះឥទ្ធិពលទៅលើមនុស្សនៅទូទាំងពិភពលោក រហូតមកដល់សព្វថ្ងៃនេះ!
សូមពិចារណាឧទាហរណ៍ខ្លះដែលលោកយេស៊ូបានមានឥទ្ធិពលទៅលើប្រវត្ដិសាស្ត្រមនុស្ស។
▪ ស្ទើរតែគ្រប់ប្រទេស ប្រតិទិនដែលគេប្រើទូទៅគឺផ្អែកលើឆ្នាំដែលគេបានគិតថាលោកយេស៊ូបានកើតមក។
▪ មនុស្សជាងពីរពាន់លាននាក់ដែលជាចំនួនមួយភាគបីនៃមនុស្សទូទាំងពិភពលោក បានចាត់ទុកខ្លួនគេថាជាគ្រិស្តសាសនិក។
▪ សាសនាអ៊ីស្លាមដែលមានសមាជិកជាងមួយពាន់លាននាក់ទូទាំងផែនដី បង្រៀនថាលោកយេស៊ូជា«អ្នកប្រកាសទំនាយដែលឧត្តមជាងអាប្រាហាំ ណូអេ និងម៉ូសេ»។
▪ មនុស្សបានយកប្រសាសន៍ដ៏ល្អជាច្រើនរបស់លោកយេស៊ូ មកប្រើនៅសព្វថ្ងៃនេះ ដែលមានដូចជា:
‹ចូរបែរឲ្យគេទះកំផ្លៀងម្ខាងទៀត›។—ម៉ាថាយ ៥:៣៩
«ការឲ្យគេ នោះនឹងផ្ដល់សុភមង្គលច្រើនជាងការទទួល»។—សកម្មភាព ២០:៣៥
«គ្មានអ្នកណាអាចជាខ្ញុំបម្រើរបស់ម្ចាស់ពីរបានឡើយ»។—ម៉ាថាយ ៦:២៤
‹កុំបោះគជ់ខ្យងនៅមុខសត្វជ្រូកឡើយ›។—ម៉ាថាយ ៧:៦
«អ្នកចង់ឲ្យមនុស្សប្រព្រឹត្តយ៉ាងណាចំពោះអ្នក អ្នកក៏ត្រូវប្រព្រឹត្តយ៉ាងនោះចំពោះពួកគេដែរ»។—ម៉ាថាយ ៧:១២
«បើថា‹មែន› គឺមែន បើថា‹ទេ› គឺទេ»។—ម៉ាថាយ ៥:៣៧
គ្មានការសង្ស័យឡើយ លោកយេស៊ូបានមានឥទ្ធិពលខ្លាំងណាស់ទៅលើប្រវត្ដិសាស្ត្ររបស់មនុស្សជាតិ។ ប៉ុន្តែ មនុស្សមានទស្សនៈនិងជំនឿផ្សេងៗពីគ្នាស្តីអំពីលោក។ ដូច្នេះ លោកអ្នកប្រហែលជាឆ្ងល់ថា‹តើលោកយេស៊ូគ្រិស្តជាអ្នកណា?›។ មានតែគម្ពីរទេដែលឆ្លើយសំណួរដូចជា តើលោកមកពីណា? តើលោកមានរបៀបរស់នៅបែបណា? និងហេតុអ្វីបានជាលោកស្លាប់? ការដឹងសេចក្ដីពិតអំពីលោកអាចមានឥទ្ធិពលខ្លាំងទៅលើជីវិតរបស់លោកអ្នកទាំងពេលបច្ចុប្បន្នទាំងពេលអនាគត។
[កំណត់សម្គាល់]
a «យេស៊ូ»ជាឈ្មោះរបស់អ្នកប្រកាសទំនាយនេះដែលមកពីក្រុងណាសារ៉ែត ហើយឈ្មោះលោកមានន័យថា«ព្រះយេហូវ៉ាជាសេចក្ដីសង្គ្រោះ»។ «គ្រិស្ត»ជាឋានៈមួយដែលមានន័យថា«អ្នកដែលបានត្រូវរើសតាំង» ដែលបញ្ជាក់ថាព្រះបានរើសតាំងលោកយេស៊ូ ឬតែងតាំងលោកឲ្យមានឋានៈពិសេសមួយ។