ទ្វារបើកចំហយ៉ាងធំសំរាប់សកម្មភាព
១ ជាអ្នកផ្សាយដ៏ខ្នះខ្នែងនៃដំណឹងល្អ ប៉ុលបានខំស្វែងរកតំបន់ដែលត្រូវការអ្នកផ្សាយជាងគេ ហើយអេភេសូរគឺជាទីក្រុងមួយ។ គាត់មានការជោគជ័យក្នុងការផ្សាយនៅទីនោះ ដែលគាត់បានសរសេរទៅពួកគ្រីស្ទានគ្នីគ្នាថា៖ «មានទ្វារយ៉ាងធំ ហើយស្រួលបានបើកឲ្យខ្ញុំ»។ (កូរិនថូសទី១ ១៦:៩) ប៉ុលបានបន្តផ្សាយនៅតំបន់នោះ ហើយគាត់បានជួយពួកអេភេសូរជាច្រើនក្លាយទៅជាអ្នកជឿ។—កិច្ចការ ១៩:១-២០, ២៦
២ សព្វថ្ងៃនេះ ទ្វារដ៏ធំសំរាប់សកម្មភាពបានបើកចំហសំរាប់យើង។ យើងមានសេចក្ដីអញ្ជើញឲ្យជួយក្រុមជំនុំណា ដែលមិនអាចផ្សាយគ្រប់ទីកន្លែងរបស់គេជារៀងរាល់ឆ្នាំ។ ដូច្នេះ ការខំប្រឹងរបស់យើងអាចទូទាត់សេចក្ដីត្រូវការដែលមាននៅតំបន់ខ្លះៗ។—ប្រៀបធៀប កូរិនថូសទី២ ៨:១៣-១៥
៣ តើអ្នកអាចបំរើនៅកន្លែងដែលត្រូវការខ្លាំងទេ? តើអ្នកបានគិតនៃការបំរើនៅកន្លែងផ្សេងទេ? អ្នកប្រហែលអាចជួយ ក្រុមជំនុំណាមួយក្នុងក្រុងរបស់អ្នក។ ហេតុអ្វីក៏មិននិយាយជាមួយអ្នកត្រួតពិនិត្យមណ្ឌលអំពីរឿងនេះ ហើយចាំមើលតើគាត់មានយោបល់យ៉ាងណាដែរ? ឬក៏នៅក្នុងតំបន់ក្រុមជំនុំរបស់អ្នក គឺមានអ្នកថ្លង់ច្រើន ឬមានប្រជាជនបរទេសដែលមិនទាន់មានអ្នកណាទៅផ្សាយប្រាប់។ ដើម្បីបំពេញសេចក្ដីត្រូវការនេះ តើអ្នកអាចខំប្រឹងរៀនភាសារបស់គេទេ? ម្យ៉ាងទៀត ប្រហែលជាមានក្រុមភាសាឯទៀត ឬក្រុមជំនុំនៅជិតៗ ដែល‹សូមអង្វរដល់ព្រះអម្ចាស់ឲ្យមានអ្នកធ្វើការខាងព្រះរាជាណាចក្រ›។ (ម៉ាថាយ ៩:៣៧, ៣៨) ប្រសិនជាមែននោះ តើអ្នកអាចជួយទេ?
៤ នៅទសវត្សថ្មីៗនេះ ពួកគ្រីស្ទានរាប់ពាន់គ្រួសារបានរើទៅប្រទេសឯទៀត ដើម្បីឲ្យមានចំណែកពេញលេញក្នុងកិច្ចការផ្សាយ។ ប្ដីប្រពន្ធមួយគូដែលបានធ្វើនេះ មានប្រសាសន៍ថា៖ «យើងចង់បំរើព្រះយេហូវ៉ានៅកន្លែងណាដែលយើងអាចជួយបានច្រើន»។ ប្រសិនបើអ្នកមានបំណងបែបនេះ ហើយគិតថាអាចផ្លាស់ទៅកន្លែងផ្សេងក្នុងស្រុកនេះ ឬប្រសិនបើអ្នកមានសមត្ថភាពទៅបំរើនៅប្រទេសឯទៀត ទីមួយត្រូវពិគ្រោះគម្រោងការណ៍នេះជាមួយអ្នកចាស់ទុំនៃក្រុមជំនុំរបស់អ្នក។
៥ ប្រសិនបើអ្នកចង់សួរសមាគមអំពីកន្លែងដែលត្រូវការអ្នកផ្សាយជាងគេនោះ ចូរផ្ដល់សំបុត្រមួយដល់គណៈកម្មាធិការកិច្ចបំរើក្រុមជំនុំ ដែលរៀបរាប់អំពីគោលបំណងរបស់អ្នក។ ពួកគេនឹងភ្ជាប់ពាក្យសំដីរបស់គេជាមួយនឹងសំបុត្រនោះ ហើយផ្ញើទៅសមាគម។ ទោះជាយ៉ាងណាក៏ដោយ ឲ្យតែនៅមានទ្វារបើកចំហសំរាប់សកម្មភាព សូមយើងទាំងអស់គ្នាជាប់រវល់ជានិច្ចក្នុងកិច្ចបំរើរបស់ព្រះយេហូវ៉ា។—កូរិនថូសទី១ ១៥:៥៨