កុំដាល់ខ្យល់ឡើយ
១. តើកូរិនថូសទី១ ៩:២៦ជាប់ទាក់ទងយ៉ាងណានឹងកិច្ចបម្រើផ្សាយ?
១ សាវ័កប៉ូលបានសរសេរថា៖ «របៀបដែលខ្ញុំកំពុងរត់ មិនមែនដូចជារត់ដោយគ្មានគោលដៅទេ។ របៀបដែលខ្ញុំដាល់ មិនដូចជាដាល់ខ្យល់ឡើយ»។ (១កូ. ៩:២៦) ប៉ូលបាននិយាយអំពីការប្រមូលអារម្មណ៍របស់គាត់ដើម្បីសម្រេចគោលដៅក្នុងការបម្រើព្រះយេហូវ៉ាឲ្យបានប្រសើរជាង។ ក៏ប៉ុន្តែ ជាគោលការណ៍ ពាក្យទាំងនេះក៏ទាក់ទងនឹងកិច្ចបម្រើផ្សាយដែរ។ យើងចង់«ដាល់» ឬខំប្រឹងធ្វើយ៉ាងណាដើម្បីឲ្យបានលទ្ធផលល្អបំផុត។ តើតាមរបៀបណា?
២. តើយើងអាចធ្វើតាមគំរូរបស់ប៉ូលនិងអ្នកផ្សាយនៅសតវត្សរ៍ទី១ ក្នុងការជ្រើសរើសពេល និងកន្លែងដើម្បីផ្សាយយ៉ាងដូចម្ដេច?
២ ទៅផ្សាយកន្លែងដែលមានមនុស្ស: ប៉ូលនិងអ្នកផ្សាយឯទៀតនៅសតវត្សរ៍ទី១ បានផ្សាយនៅកន្លែងដែលពួកគាត់រំពឹងថានឹងជួបមនុស្ស។ (សកម្ម. ៥:៤២; ១៦:១៣; ១៧:១៧) បើមនុស្សជាច្រើនក្នុងតំបន់ផ្សាយរបស់អ្នកនៅផ្ទះពេលល្ងាច នេះប្រហែលជាពេលល្អបំផុតដើម្បីផ្សព្វផ្សាយពីផ្ទះមួយទៅផ្ទះមួយ។ តើចំណតរថយន្តឬស្ថានីយរថភ្លើងក្នុងតំបន់ មានមនុស្សច្រើនពេលព្រលឹមនិងពេលល្ងាច ពេលដែលមនុស្សទៅធ្វើការឬត្រឡប់ទៅផ្ទះវិញឬទេ? តើតំបន់ដែលមានហាងមានមនុស្សច្រើននៅពេលណា? ការផ្សព្វផ្សាយតាមផ្លូវប្រហែលជាបានផលល្អបំផុតនៅពេលនោះ។
៣. តើយើងអាចផ្សព្វផ្សាយក្នុងតំបន់ផ្សាយរបស់យើងឲ្យបានលទ្ធផលល្អយ៉ាងដូចម្ដេច?
៣ ចាត់ចែងកិច្ចផ្សព្វផ្សាយឲ្យបានប្រយោជន៍ច្រើនបំផុត: គួរយកចិត្តទុកដាក់ចំពោះរបៀបដែលយើងផ្សព្វផ្សាយក្នុងតំបន់ផ្សាយរបស់យើងឲ្យបានលទ្ធផលល្អ។ ជាឧទាហរណ៍ ជាជាងយកមនុស្សច្រើនទៅកន្លែងតែមួយ ប្រហែលជាការប្រសើរជាងបើចែកជាក្រុមតូចៗ ដែលធ្វើឲ្យយើងងាយស្រួលមើលការខុសត្រូវ ហើយអាចមានតំបន់ផ្សាយគ្រប់គ្រាន់។ ស្រដៀងគ្នាដែរ ពេលផ្សព្វផ្សាយនៅតំបន់ផ្សាយក្នុងជនបទ យើងនឹងផ្សាយពេញតំបន់ផ្សាយលឿនជាង ហើយមានឱកាសផ្សាយច្រើនជាង បើយើងមិនទៅគ្នាច្រើនពេក។ តើយើងអាចមានតំបន់ផ្សាយផ្ទាល់ខ្លួនដែលជិតផ្ទះយើង ហើយមិនចំណាយពេលច្រើនក្នុងការធ្វើដំណើរឬទេ?
៤. តើអ្វីនឹងជួយយើងឲ្យទៅជា«អ្នកនេសាទមនុស្ស»ដែលមានជោគជ័យ?
៤ លោកយេស៊ូប្រដូចអ្នកផ្សាយទៅនឹង«អ្នកនេសាទមនុស្ស»។ (ម៉ាក. ១:១៧) គោលបំណងរបស់អ្នកនេសាទត្រីម្នាក់មិនគ្រាន់តែបោះសំណាញ់ទៅក្នុងទឹកប៉ុណ្ណោះទេ តែគឺដើម្បីចាប់ត្រី។ ហេតុនេះ អ្នកនេសាទដែលបានជោគជ័យទៅកន្លែងដែលមានត្រីនៅពេលដែលពួកគេរំពឹងថារកត្រីបាន ហើយចាប់ផ្ដើមនេសាទត្រីដោយមិនបង្អង់។ មែនហើយ ពួកគេខំប្រឹងធ្វើយ៉ាងណាដើម្បីឲ្យបានលទ្ធផលល្អ។ ស្រដៀងគ្នាដែរ សូមឲ្យយើងមានចិត្តឧស្សាហ៍ក្នុងកិច្ចបម្រើផ្សាយរបស់យើង។—ហេ. ៦:១១