តើសាក្សីព្រះយេហូវ៉ាជាសាសនាចម្លែកមួយឬ?
មិនមែនទេ។ សាក្សីព្រះយេហូវ៉ាមិនមែនជាសាសនាចម្លែកឡើយ។ ផ្ទុយទៅវិញ យើងជាគ្រិស្តសាសនិកដែលខំអស់ពីសមត្ថភាពធ្វើតាមគំរូរបស់លោកយេស៊ូគ្រិស្ត និងរស់នៅស្របតាមសេចក្ដីបង្រៀនរបស់លោក។
តើអ្វីជាសាសនាចម្លែក?
ពាក្យ«សាសនាចម្លែក»មានន័យថាខុសប្លែកពីគេ។ ក៏ប៉ុន្តែ សូមពិចារណាអំពីគំនិតពីរយ៉ាងដែលមនុស្សទូទៅមានចំពោះសាសនាចម្លែក និងអំពីមូលហេតុដែលគំនិតទាំងនោះមិនទាក់ទងនឹងយើង។
មនុស្សខ្លះចាត់ទុកសាសនាចម្លែកជាសាសនាថ្មីឬមិនធម្មតា។ សាក្សីព្រះយេហូវ៉ាមិនមែនជាសាសនាថ្មីទេ។ ផ្ទុយទៅវិញ យើងគោរពប្រណិប័តន៍ព្រះតាមគំរូរបស់គ្រិស្តសាសនិកនៅសតវត្សរ៍ទី១ ហើយគំរូរបស់ពួកគេនិងសេចក្ដីបង្រៀនផ្សេងៗបានត្រូវកត់ទុកក្នុងគម្ពីរ។ (ធីម៉ូថេទី២ ៣:១៦, ១៧) យើងជឿថាគម្ពីរបរិសុទ្ធគួរជាមូលដ្ឋាននៃជំនឿរបស់យើង ស្ដីអំពីការគោរពប្រណិប័តន៍។
មនុស្សខ្លះគិតថាសាសនាចម្លែកជាសាសនាគ្រោះថ្នាក់ដែលមានមនុស្សជាអ្នកដឹកនាំ។ សាក្សីព្រះយេហូវ៉ាមិនចាត់ទុកមនុស្សជាអ្នកដឹកនាំរបស់ពួកគេទេ។ ផ្ទុយទៅវិញ យើងប្រព្រឹត្តស្របតាមខ្នាតតម្រាដែលលោកយេស៊ូទុកឲ្យពួកអ្នកកាន់តាមលោក ពេលលោកមានប្រសាសន៍ថា៖«អ្នកដឹកនាំរបស់អ្នករាល់គ្នាមានតែមួយទេ គឺជាគ្រិស្ត»។—ម៉ាថាយ ២៣:១០
ផ្ទុយស្រឡះពីសាសនាចម្លែក សាក្សីព្រះយេហូវ៉ាជាសាសនាដែលជួយអ្នករួមជំនឿនិងអ្នកឯទៀតក្នុងសហគមន៍ឲ្យទទួលប្រយោជន៍។ ជាឧទាហរណ៍ កិច្ចបម្រើរបស់យើងបានជួយមនុស្សយ៉ាងច្រើនឲ្យយកឈ្នះទម្លាប់ដែលនាំឲ្យមានគ្រោះថ្នាក់ ដូចជាគ្រឿងញៀន និងស្រាជាដើម។ បន្ថែមទៅទៀត យើងបើកថ្នាក់បង្រៀនអ្នកមិនចេះអក្សរនៅទូទាំងពិភពលោក ដោយជួយមនុស្សរាប់ពាន់នាក់ឲ្យចេះអាននិងសរសេរ។ ម្យ៉ាងទៀត យើងក៏ចូលរួមយ៉ាងសកម្មក្នុងការផ្ដល់ជំនួយដល់អ្នកដែលរងគ្រោះដោយមហន្តរាយធម្មជាតិដែរ។ យើងខំព្យាយាមមានគំនិតវិជ្ជមានចំពោះអ្នកឯទៀត ដូចអ្វីដែលលោកយេស៊ូបានបង្គាប់ដល់អ្នកកាន់តាមលោក។—ម៉ាថាយ ៥:១៣-១៦