ភាគទី៣
ការរំដោះពីស្រុកអេស៊ីព្ទរហូតដល់ស្តេចទីមួយនៃសាសន៍អ៊ីស្រាអែល
លោកម៉ូសេបាននាំប្រជាជនអ៊ីស្រាអែលចេញពីសេវកភាពនៅស្រុកអេស៊ីព្ទទៅភ្នំស៊ីណាយ ជាកន្លែងដែលព្រះទ្រង់បានប្រទានច្បាប់របស់ទ្រង់ទៅពួកគេ។ ក្រោយមក លោកម៉ូសេបានចាត់បុរស១២នាក់ឲ្យទៅស៊ើបមើលស្រុកកាណាន។ ប៉ុន្តែ ពួកគេ១០នាក់បានត្រឡប់មកវិញ ដោយមានសេចក្ដីរាយការណ៍ដ៏អាក្រក់មួយ។ ពួកគេបានបណ្ដាលឲ្យប្រជាជនចង់ត្រឡប់ទៅស្រុកអេស៊ីព្ទវិញ។ ដោយព្រោះតែប្រជាជនអ៊ីស្រាអែលខ្វះជំនឿ ព្រះទ្រង់បានដាក់ទណ្ឌកម្មដល់ពួកគេ ដោយធ្វើឲ្យពួកគេដើរតត្រកអស់រយៈ៤០ឆ្នាំក្នុងទីរហោស្ថាន។
នៅទីបំផុត លោកយ៉ូស្វេបានត្រូវគេជ្រើសរើសឲ្យដឹកនាំប្រជាជនអ៊ីស្រាអែលទៅស្រុកកាណាន។ ដើម្បីនឹងជួយពួកគេឲ្យចាប់យកស្រុកនោះបាន ព្រះយេហូវ៉ាបានបណ្ដាលឲ្យមានអព្ភូតហេតុជាច្រើនកើតឡើង។ ទ្រង់បានធ្វើឲ្យទន្លេយ័រដាន់ឈប់ហូរ កំផែងក្រុងយេរីខូររលំបាក់ ហើយឲ្យថ្ងៃឈប់ទ្រឹងក្នុងមួយថ្ងៃ។ ប្រាំមួយឆ្នាំក្រោយមក ស្រុកនោះបានត្រូវយកចេញពីសាសន៍កាណាន។
ចាប់ផ្ដើមពីលោកយ៉ូស្វេមក សាសន៍អ៊ីស្រាអែលបានត្រូវគ្រប់គ្រង៣៥៦ឆ្នាំដោយពួកចៅហ្វាយ។ យើងនឹងរៀនអំពីពួកគេជាច្រើន ដែលរួមទាំងបារ៉ាក គេឌាន យែបថា សាំសុន និងសាំយូអែល។ ហើយយើងនឹងអានអំពីស្ត្រីទាំងឡាយផងដែរ ដូចជារ៉ាហាប ដេបូរ៉ា យ៉ាអែល នាងរស់ ន៉ាអូមី និងដេលីឡា។ បើរាប់ទាំងអស់ទៅ ក្នុងភាគទីបីនេះមានប្រវត្ដិសាស្ត្រ៣៩៦ឆ្នាំត្រូវបានរាយការណ៍មក។