៣៨
ពួកឈ្លប១២នាក់
សូមមើលផ្លែឈើដែលបុរសទាំងនេះកំពុងតែសែង។ សូមមើលផ្លែទំពាំងបាយជូរមួយចង្កោមដ៏ធំនេះ។ ផ្លែទំពាំងបាយជូរមួយចង្កោមនេះធំដ៏ម្ល៉េះ ទាល់តែមានមនុស្សពីរនាក់ ទើបសែងរួច។ ហើយសូមមើលផ្លែល្វា និងផ្លែទទឹមដែរ។ តើផ្លែឈើដ៏ល្អនេះត្រូវបានយកពីណាមក? គឺត្រូវបានយកមកពីស្រុកកាណាន។ នៅចាំទេ ស្រុកកាណានជាកន្លែងដែលអ័ប្រាហាំ អ៊ីសាក និងយ៉ាកុបធ្លាប់រស់នៅពីមុន។ ក៏ប៉ុន្តែដោយសារតែការអត់បាយនៅទីនោះ យ៉ាកុបនិងគ្រួសាររបស់គាត់ក៏រើទៅនៅស្រុកអេស៊ីព្ទ។ ឥឡូវនេះ ប្រហែលជា២១៦ឆ្នាំក្រោយមក ម៉ូសេកំពុងតែនាំប្រជាជនអ៊ីស្រាអែលត្រឡប់ទៅស្រុកកាណានវិញ។ ពួកគេបានមកដល់កន្លែងមួយក្នុងទីរហោស្ថាន ដែលហៅថាកាដេស។
ពួកមនុស្សអាក្រក់រស់នៅក្នុងស្រុកកាណាន។ ដូច្នេះ ម៉ូសេក៏ចាត់ពួកឈ្លប១២នាក់ ហើយប្រាប់ពួកគេថា៖ ‹ចូរស្វែងរកមើល តើមានមនុស្សប៉ុន្មាននាក់រស់នៅទីនោះ ហើយតើគេខ្លាំងពូកែយ៉ាងណា។ ចូរស្វែងរកមើល បើសិនជាដីមានជីជាតិល្អសំរាប់ដាំដំណាំ។ ហើយត្រូវនាំយកផលផ្លែមកវិញកុំបីខានឡើយ›។
នៅពេលដែលពួកឈ្លបត្រឡប់មកដល់កាដេសវិញ គេប្រាប់ម៉ូសេថា៖ ‹នោះជាស្រុកដ៏ល្អណាស់›។ ហើយដើម្បីបង្ហាញភស្តុតាងនោះ គេក៏បង្ហាញម៉ូសេនូវផ្លែឈើខ្លះៗ។ ប៉ុន្តែ ពួកឈ្លប១០នាក់និយាយថា៖ ‹ពួកមនុស្សដែលនៅទីនោះ មានមាឌធំហើយមានកម្លាំងខ្លាំងពូកែទៀត។ យើងនឹងត្រូវស្លាប់ជាមិនខាន បើសិនជាយើងទៅវាយយកស្រុកនោះ›។
ប្រជាជនអ៊ីស្រាអែលមានសេចក្ដីភ័យខ្លាចនៅពេលគេឮរឿងនេះ។ គេនិយាយថា៖ ‹ស៊ូឲ្យយើងស្លាប់នៅស្រុកអេស៊ីព្ទ ឬក៏នៅក្នុងទីរហោស្ថាននេះវិញ។ យើងនឹងត្រូវស្លាប់នៅក្នុងការច្បាំងជាមិនខាន ហើយគេនឹងច្បាស់ជាចាប់យកប្រពន្ធកូនរបស់យើងហើយ។ ចូរឲ្យយើងរើសយកអ្នកដឹកនាំថ្មីមួយទៀតជំនួសលោកម៉ូសេ ហើយត្រឡប់ទៅស្រុកអេស៊ីព្ទវិញ›!
ប៉ុន្តែ ឈ្លបពីរនាក់ទុកចិត្តលើព្រះយេហូវ៉ា ហើយបានខំប្រឹងធ្វើឲ្យប្រជាជនស្ងប់ចិត្តទៅ។ ឈ្មោះរបស់គេជា យ៉ូស្វេ និងកាលែប។ ពួកគេនិយាយថា៖ ‹ចូរកុំខ្លាចឡើយ ដ្បិតព្រះយេហូវ៉ាគង់ជាមួយនឹងយើង។ ហើយនឹងអាចយកស្រុកនោះបានដោយស្រួល›។ ប៉ុន្តែមនុស្សទាំងឡាយមិនស្ដាប់ទេ។ គេព្រមទាំងចង់សម្លាប់យ៉ូស្វេនិងកាលែបផង។
នេះធ្វើឲ្យព្រះយេហូវ៉ាមានព្រះហឫទ័យខ្ញាល់ណាស់ ហើយទ្រង់មានបន្ទូលប្រាប់ម៉ូសេថា៖ ‹គ្មានមនុស្សណាមួយដែលមានអាយុ២០ឆ្នាំឡើងទៅ នឹងអាចចូលទៅក្នុងស្រុកកាណានបានឡើយ។ ពួកគេបានឃើញនូវអព្ភូតហេតុជាច្រើនដែលអញបានធ្វើនៅស្រុកអេស៊ីព្ទ ហើយនៅទីរហោស្ថាន ប៉ុន្តែ គេនៅតែមិនទុកចិត្តនឹងអញទៀត។ ដូច្នេះ គេនឹងដើរតត្រកនៅក្នុងទីរហោស្ថាននេះអស់៤០ឆ្នាំ ទាល់តែបុគ្គលក្រោយបង្អស់ស្លាប់ទៅ។ មានតែយ៉ូស្វេហើយនិងកាលែបទេ ដែលនឹងចូលទៅក្នុងស្រុកកាណានបាន›។