ភាគទី៥
ការជាប់ឃុំឃាំងនៅស្រុកបាប៊ីឡូនរហូតដល់ការសង់កំផែងក្រុងយេរូសាឡិមឡើងវិញ
កាលដែលប្រជាជនអ៊ីស្រាអែលជាប់ឃុំឃាំងនៅស្រុកបាប៊ីឡូននោះ ជំនឿរបស់គេត្រូវបានសាកល្បងជាច្រើនដង។ សាដ្រាក់ មែសាក់ និងអ័បេឌ-នេកោត្រូវបានគេបោះទម្លាក់ទៅក្នុងគុកភ្លើងដែលឆេះយ៉ាងសន្ធៅ ប៉ុន្តែ ព្រះបានសង្គ្រោះពួកគេដោយយកគេចេញមកទាំងនៅរស់។ ក្រោយមក បន្ទាប់ពីពួកសាសន៍មេឌីនិងសាសន៍ពើស៊ីបានច្បាំងឈ្នះពួកបាប៊ីឡូន លោកដានីយ៉ែលត្រូវបានគេបោះទៅរូងសិង្ហ ប៉ុន្តែព្រះបានការពារលោក ដោយបិទមាត់សត្វសិង្ហទាំងនោះ។
នៅទីបំផុត ស្តេចស៊ីរូសជាសាសន៍ពើស៊ីបានដោះលែងពួកប្រជាជនអ៊ីស្រាអែល។ ពួកគេបានត្រឡប់ទៅមាតុភូមិគេវិញ ក្រោយពីបានតែ៧០ឆ្នាំពីគ្រាដែលពួកគេត្រូវបានចាប់យកទៅស្រុកបាប៊ីឡូនជាពួកឈ្លើយនោះ។ កិច្ចការដែលគេបានចាប់ផ្ដើមធ្វើមុនគេបង្អស់នៅពេលដែលគេត្រឡប់មកក្រុងយេរូសាឡិមវិញ គឺការសង់ព្រះវិហាររបស់ព្រះយេហូវ៉ា។ ប៉ុន្តែ បន្ដិចមកពួកសត្រូវបានបញ្ឈប់កិច្ចការរបស់គេ។ ដូច្នេះ ប្រហែលជា២២ឆ្នាំក្រោយពីពួកគេបានត្រឡប់មកក្រុងយេរូសាឡិមវិញ ទើបពួកគេបានសង់ព្រះវិហារហើយ។
បន្ទាប់ពីនេះ យើងនឹងរៀនអំពីការធ្វើដំណើររបស់លោកអែសរ៉ាត្រឡប់ទៅក្រុងយេរូសាឡិមវិញ ដើម្បីនឹងស្អាងព្រះវិហារ។ នេះគឺប្រមាណ៤៧ឆ្នាំក្រោយពីព្រះវិហារបានសង់ហើយ។ បន្ទាប់មក ១៣ឆ្នាំក្រោយពីការធ្វើដំណើររបស់លោកអែសរ៉ា នេហេមាបានជួយសង់កំផែងបាក់បែករបស់ក្រុងយេរូសាឡិមឡើងវិញ។ ភាគទីប្រាំរាយការណ៍អំពីប្រវត្ដិសាស្ត្ររវាង១៥២ឆ្នាំរហូតមកដល់គ្រានេះ។