៨១
ការទុកចិត្តនឹងជំនួយរបស់ព្រះ
មនុស្សជាច្រើនពាន់នាក់ធ្វើដំណើរយ៉ាងឆ្ងាយ ពីក្រុងបាប៊ីឡូនទៅក្រុងយេរូសាឡិម។ ប៉ុន្តែនៅពេលដែលគេមកដល់ គេឃើញយេរូសាឡិមជាក្រុងដ៏ហិនហោចយ៉ាងធំមួយ។ គ្មានអ្នកណាមួយរស់នៅទីនោះសោះ។ ប្រជាជនអ៊ីស្រាអែលត្រូវតែសង់របស់ទាំងអស់ជាសារថ្មីឡើងវិញ។
របស់ទីមួយដែលគេសង់នោះ គឺជាអាសនា។ នេះជាកន្លែងដែលគេអាចថ្វាយសត្វជាយញ្ញបូជា ឬថ្វាយតង្វាយជូនព្រះយេហូវ៉ា។ ពីរបីខែក្រោយមក ប្រជាជនអ៊ីស្រាអែលចាប់ផ្ដើមសង់ព្រះវិហារ។ ប៉ុន្តែ ពួកសត្រូវដែលរស់នៅស្រុកជិតខាងនោះ មិនចង់ឲ្យប្រជាជនអ៊ីស្រាអែលសង់ទេ។ ដូច្នេះ គេរកវិធីបន្លាចប្រជាជនអ៊ីស្រាអែលដើម្បីឲ្យគេឈប់សង់។ នៅទីបំផុត ពួកសត្រូវនេះបានធ្វើឲ្យស្តេចថ្មីរបស់សាសន៍ពើស៊ីបង្កើតច្បាប់មួយដើម្បីបញ្ឈប់កិច្ចការសង់នោះ។
ជាច្រើនឆ្នាំបានកន្លងទៅ។ ឥឡូវនេះ បាន១៧ឆ្នាំហើយតាំងពីប្រជាជនអ៊ីស្រាអែលបានត្រឡប់ពីក្រុងបាប៊ីឡូនវិញ។ ព្រះយេហូវ៉ាបានចាត់ព្យាការីរបស់ទ្រង់ឈ្មោះ ហាកាយនិងសាការីដើម្បីមកប្រាប់ប្រជាជនឲ្យចាប់ផ្ដើមសង់ម្ដងទៀត។ ប្រជាជនទុកចិត្តនឹងជំនួយរបស់ព្រះ ហើយគេក៏គោរពតាមពួកព្យាការីនោះ។ ពួកគេក៏ចាប់ផ្ដើមសង់ម្ដងទៀត ទោះបីច្បាប់ចែងថាគេមិនអាចធ្វើក៏ដោយ។
ដូច្នេះ ចៅហ្វាយខេត្តម្នាក់ឈ្មោះថាថ្នាយក៏មកសួរប្រជាជនអ៊ីស្រាអែល តើពួកគេមានសិទ្ធិអ្វីនឹងសង់ព្រះវិហារនោះ។ ប្រជាជនអ៊ីស្រាអែលប្រាប់លោកថា កាលដែលគេនៅក្រុងបាប៊ីឡូន ស្តេចស៊ីរូសបានមានបន្ទូលប្រាប់គេថា៖ ‹ចូរទៅឯក្រុងយេរូសាឡិមហើយសង់ព្រះវិហាររបស់ព្រះយេហូវ៉ា ជាព្រះរបស់ឯងចុះ›។
លោកថាថ្នាយក៏ផ្ញើសំបុត្រមួយទៅក្រុងបាប៊ីឡូន ហើយសួរបើស្តេចស៊ីរូស ដែលបានទទួលមរណភាពហើយនោះ ពិតជាបានមានបន្ទូលដូចនោះមែន។ បន្ដិចក្រោយមក សំបុត្រមួយពីស្តេចនៃសាសន៍ពើស៊ីថ្មីក៏មកដល់។ សំបុត្រនោះបានចែងប្រាប់ថា ស្តេចស៊ីរូសបានមានបន្ទូលដូច្នោះមែន។ ដូច្នេះស្តេចនោះក៏សរសេរទៀតថា៖ ‹ចូរឲ្យប្រជាជនអ៊ីស្រាអែលសង់ព្រះវិហារនៃព្រះរបស់គេចុះ។ ហើយយើងបង្គាប់អ្នកឲ្យជួយដល់ពួកគេផង›។ អស់រយៈប្រហែលជាបួនឆ្នាំ ទើបព្រះវិហារនោះបានសង់រួច ហើយប្រជាជនអ៊ីស្រាអែលមានចិត្តរីករាយណាស់។
ជាច្រើនឆ្នាំទៀតបានកន្លងទៅ។ ឥឡូវនេះ ជិត៤៨ឆ្នាំហើយ តាំងពីបានសង់ព្រះវិហារនោះរួច។ ប្រជាជននៅក្រុងយេរូសាឡិមមានសេចក្ដីក្រណាស់ ហើយក្រុងនិងព្រះវិហាររបស់ព្រះមើលទៅមិនស្អាតសោះ។ នៅឯក្រុងបាប៊ីឡូនវិញ ជនអ៊ីស្រាអែលម្នាក់ឈ្មោះអែសរ៉ា បានដឹងនូវការខ្វះខាតក្នុងការជួសជុលព្រះវិហារ។ ដូច្នេះ តើអ្នកដឹងលោកធ្វើយ៉ាងណាទេ?
អែសរ៉ាបានទៅជួបនឹងស្តេចនៃសាសន៍ពើស៊ីនាមអើថាស៊ើកសេស ហើយស្តេចដ៏ល្អនេះបានប្រទានឲ្យអែសរ៉ា នូវអំណោយជាច្រើនដើម្បីនឹងយកទៅក្រុងយេរូសាឡិម។ អែសរ៉ាបានសុំឲ្យប្រជាជនអ៊ីស្រាអែលនៅក្រុងបាប៊ីឡូន ជួយលោកយកអំណោយទាំងនេះទៅក្រុងយេរូសាឡិម។ ប្រហែលជា៦.០០០នាក់និយាយថាគេនឹងទៅ។ ពួកគេនាំយកប្រាក់ មាស និងរបស់ដ៏មានតម្លៃជាច្រើនទៅជាមួយគេ។
អែសរ៉ាមានចិត្តព្រួយ ពីព្រោះមានពួកមនុស្សអាក្រក់នៅតាមផ្លូវ។ ពួកមនុស្សអាក្រក់ទាំងនេះអាចប្លន់យកប្រាក់ និងមាសរបស់គេ ហើយសម្លាប់គេផង។ ដូច្នេះ អែសរ៉ាក៏ហៅប្រជាជនមកមូលគ្នា ដូចជាអ្នកអាចឃើញនៅក្នុងរូបភាពនេះ។ បន្ទាប់មក គេក៏អធិស្ឋានដល់ព្រះយេហូវ៉ាសូមឲ្យការពារពួកគេនៅតាមផ្លូវឆ្ងាយត្រឡប់ទៅក្រុងយេរូសាឡិមវិញ។
ព្រះយេហូវ៉ាបានការពារពួកគេ។ ហើយក្រោយពីបានធ្វើដំណើរអស់បួនខែមក គេក៏មកដល់ក្រុងយេរូសាឡិមដោយឥតគ្រោះថ្នាក់។ តើរឿងនេះមិនបង្ហាញថាព្រះយេហូវ៉ាអាចការពារពួកណា ដែលទុកចិត្តលើទ្រង់ឲ្យជួយទេឬ?