៨៣
កំផែងក្រុងយេរូសាឡិម
សូមក្រឡេកមើលកិច្ចការទាំងនេះដែលគេកំពុងតែធ្វើនៅទីនេះ។ ប្រជាជនអ៊ីស្រាអែលកំពុងតែជាប់រវល់សង់កំផែងក្រុងយេរូសាឡិម។ នៅពេលស្តេចនេប៊ូក្នេសាបានកំទេចក្រុងយេរូសាឡិម១៥២ឆ្នាំមុននេះ ទ្រង់បានរំលំកំផែង ហើយបានដុតចោលទ្វារធំនៃទីក្រុងជាច្រើនដែរ។ ប្រជាជនអ៊ីស្រាអែលមិនបានសង់កំផែងឡើងវិញទេ នៅពេលដែលគេត្រឡប់មកពីក្រុងបាប៊ីឡូននោះ។
តើអ្នកគិតថាប្រជាជនមានអារម្មណ៍យ៉ាងណាដែរ ក្នុងការរស់នៅទីនេះជាយូរឆ្នាំមកហើយ ដោយគ្មានកំផែងព័ទ្ធជុំវិញក្រុងរបស់គេនោះ? គេមិនបានមានអារម្មណ៍សុខសាន្តទេ។ សត្រូវរបស់គេអាចមកវាយលុកគេបានយ៉ាងស្រួល។ ប៉ុន្តែ ឥឡូវនេះ បុរសម្នាក់នេះឈ្មោះ នេហេមាកំពុងតែជួយប្រជាជនសង់កំផែងឡើងវិញ។ តើអ្នកដឹងថានេហេមាជាអ្នកណាទេ?
នេហេមាជាប្រជាជនអ៊ីស្រាអែលដែលមកពីក្រុងស៊ូសាន ជាកន្លែងដែលម៉ាដេកាយនិងនាងអេសធើររស់នៅ។ នេហេមាធ្វើការនៅក្នុងវាំងរបស់ស្តេច ដូច្នេះ លោកប្រហែលជាមិត្តសំឡាញ់ដ៏ល្អនឹងម៉ាដេកាយហើយនិងមហាក្សត្រីអេសធើរហើយ។ ប៉ុន្តែ ព្រះគម្ពីរមិនបានចែងថានេហេមាបានធ្វើការឲ្យស្វាមីរបស់នាងអេសធើរ ស្តេចអ័ហាស៊ូរុសនោះទេ។ លោកបានធ្វើការឲ្យស្តេចបន្ទាប់ គឺស្តេចអើថាស៊ើកសេស។
នៅចាំទេ អើថាស៊ើកសេសជាស្តេចដ៏ល្អមួយអង្គ ដែលបានប្រទានប្រាក់ជាច្រើនឲ្យអែសរ៉ាយកទៅឯក្រុងយេរូសាឡិម ដើម្បីនឹងជួសជុលព្រះវិហាររបស់ព្រះយេហូវ៉ា។ ប៉ុន្តែអែសរ៉ាមិនបានសង់កំផែងក្រុងដែលបានបាក់បែកនោះទេ។ សូមឲ្យយើងពិនិត្យមើល នូវមូលហេតុដែលនេហេមាបានមកធ្វើកិច្ចការនេះ។
អស់រយៈពេល១៣ឆ្នាំហើយ តាំងពីស្តេចអើថាស៊ើកសេសបានប្រទានប្រាក់ឲ្យអែសរ៉ា មកជួសជុលព្រះវិហារនោះ។ ឥឡូវនេះនេហេមាជាមេកាន់ពែងសំរាប់ស្តេចអើថាស៊ើកសេស។ នេះមានសេចក្ដីថាលោកយកស្រាមកថ្វាយស្តេច ហើយរ៉ាប់រងមិនឲ្យអ្នកណាមួយព្យាយាមបំពុលស្តេចឡើយ។ នេះជាកិច្ចការដ៏សំខាន់ណាស់។
នៅថ្ងៃមួយ ហាណានីជាប្អូនរបស់នេហេមានិងពួកបុរសឯទៀតពីស្រុកអ៊ីស្រាអែល បានមកលេងនឹងនេហេមា។ ពួកគេប្រាប់លោកអំពីហេតុការណ៍ដែលប្រជាជនអ៊ីស្រាអែលកំពុងតែពិសោធ ហើយអំពីកំផែងក្រុងយេរូសាឡិមនៅបាក់បែកនៅឡើយ។ នេះធ្វើឲ្យនេហេមាស្រងូតស្រងាត់ចិត្តណាស់ ហើយលោកក៏អធិស្ឋានទូលទៅព្រះយេហូវ៉ាអំពីរឿងនេះ។
នៅថ្ងៃមួយ ស្តេចបានទតឃើញនេហេមាមានទឹកមុខព្រួយ ហើយក៏មានបន្ទូលសួរថា៖ ‹ហេតុអ្វីក៏ឯងមានទឹកមុខព្រួយដូច្នេះ›? នេហេមាទូលប្រាប់ទ្រង់ថា គឺដោយសារតែក្រុងយេរូសាឡិមនៅមានស្ថានភាពដ៏អាក្រក់ ហើយកំផែងនៅតែបាក់បែកនៅឡើយ។ ស្តេចក៏សួរទៀតថា៖ ‹តើអ្នកចង់បានអ្វី›?
នេហេមាទូលឆ្លើយថា៖ ‹សូមទ្រង់ចាត់ទូលបង្គំឲ្យទៅឯក្រុងយេរូសាឡិម ដើម្បីឲ្យទូលបង្គំអាចសង់កំផែងនោះឡើងវិញ›។ ស្តេចអើថាស៊ើកសេសមានព្រះទ័យល្អណាស់។ ទ្រង់មានបន្ទូលថានេហេមាអាចទៅបាន ហើយទ្រង់ក៏ជួយលោករកឈើសំរាប់សង់អាគារខ្លះ។ បន្ដិចក្រោយមក កាលដែលនេហេមាបានមកដល់ក្រុងយេរូសាឡិម លោកក៏ប្រាប់ប្រជាជនអំពីគម្រោងការណ៍របស់លោក។ ពួកគេចូលចិត្តគំនិតនោះណាស់ ហើយនិយាយថា៖ ‹ចូរឲ្យយើងចាប់ផ្ដើមសង់ទៅ›។
នៅពេលដែលពួកសត្រូវរបស់ប្រជាជនអ៊ីស្រាអែលឃើញកំផែងកំពុងតែសង់នោះ គេនិយាយថា៖ ‹យើងនឹងទៅសម្លាប់ពួកវា ហើយបញ្ឈប់ការសង់នោះ›។ ប៉ុន្តែ នេហេមាបានឮអំពីរឿងនេះ ហើយលោកក៏ឲ្យដាវ និងលំពែងដល់ពួកអ្នកធ្វើការ។ ហើយលោកនិយាយថា៖ ‹ចូរកុំខ្លាចពួកសត្រូវរបស់យើងឡើយ។ ចូរប្រយុទ្ធដើម្បីបងប្អូនអ្នក ដើម្បីកូនចៅអ្នក ប្រពន្ធអ្នក ហើយដើម្បីទីលំនៅរបស់អ្នកផង›។
ប្រជាជនមានចិត្តក្លាហានណាស់។ គេបានត្រៀមអាវុធរបស់គេចាំជាស្រេច ទាំងយប់ទាំងថ្ងៃ ហើយគេនៅតែខំសង់ទៅទៀត។ ដូច្នេះ គ្រាន់តែក្នុងរវាង៥២ថ្ងៃ កំផែងនោះក៏បានសង់រួច។ ឥឡូវនេះ ប្រជាជនអាចមានអារម្មណ៍សុខសាន្តនៅខាងក្នុងក្រុង។ នេហេមានិងអែសរ៉ាបានបង្រៀនប្រជាជនអំពីច្បាប់របស់ព្រះ ហើយពួកគេសប្បាយចិត្តណាស់។
ប៉ុន្តែអ្វីៗមិនបានដូចពីមុនគេយកប្រជាជនអ៊ីស្រាអែលជាឈ្លើយទៅក្រុងបាប៊ីឡូននោះទេ។ ស្តេចនៃសាសន៍ពើស៊ីគ្រប់គ្រងប្រជាជន ហើយពួកគេត្រូវតែបំរើទ្រង់។ ប៉ុន្តែ ព្រះយេហូវ៉ាបានសន្យាថាទ្រង់នឹងចាត់ឲ្យស្តេចថ្មីមួយ ហើយស្តេចនេះនឹងនាំឲ្យមានសន្ដិភាពដល់ប្រជារាស្ត្រទ្រង់។ តើស្តេចនេះជាអ្នកណា? តើទ្រង់នឹងនាំឲ្យមានសន្ដិភាពមកលើផែនដីនេះដោយរបៀបណា? ទាល់តែប្រមាណ៤៥០ឆ្នាំកន្លងទៅទៀត ទើបដឹងថែមទៀតអំពីស្តេចនេះ។ នៅពេលនោះ នឹងមានកំណើតទារកដ៏សំខាន់មួយ។ ប៉ុន្តែ នោះជារឿងផ្សេងមួយទៀត។
នេហេមា ជំពូកទី១ ទៅ ជំពូកទី៦