តើគេជឿអ្វីខ្លះ? — បណ្ណាល័យអ៊ីនធឺណិតរបស់ប៉មយាម

តើគេជឿអ្វីខ្លះ?

ស្មរបន្ទាល់ព្រះយេហូវ៉ាជឿទៅលើព្រះដែលមានគ្រប់ព្រះចេស្ដា គឺព្រះយេហូវ៉ាជាអ្នកដែលបង្កើតផ្ទៃមេឃនិងផែនដី។ អត្ថិភាពនៃរបស់អស្ចារ្យជាច្រើន ដែលបានគូរប្លង់មកយ៉ាងស្មុគស្មាញនៅក្នុងសកលលោក ដែលមានជុំវិញយើងសម្ដែងយ៉ាងសមហេតុសមផល ថាអ្នកបង្កើតដែលមានគ្រប់ព្រះចេស្ដា ហើយដែលមានបញ្ញាដ៏ឧត្តមបំផុត បានបង្កើតរបស់សព្វសារពើទាំងនោះមែន។ ដូចកិច្ចការរបស់មនុស្សប្រុសនិងស្រីសម្ដែងគុណសម្បត្ដិរបស់គេ គឺយ៉ាងដូច្នោះដែរ កិច្ចការរបស់ព្រះយេហូវ៉ាសម្ដែងគុណសម្បត្ដិរបស់ទ្រង់។ ព្រះគម្ពីរចែងប្រាប់យើងថា⁠៖ «អ្វីៗរបស់ទ្រង់ដែលរកមើលមិនឃើញតាំងពីកំណើតលោកីយមក ទោះទាំងព្រះចេស្ដាដ៏នៅអស់កល្បជានិច្ច នឹងនិស្ស័យជាព្រះរបស់ទ្រង់ នោះឃើញច្បាស់វិញ ដោយពិចារណាយល់របស់ទាំងប៉ុន្មាន ដែលទ្រង់បានបង្កើតមក»។ ថែមទៅទៀត ដោយគ្មានសំឡេងឬក៏ពាក្យសំដីអ្វីឡើយ នោះ «ផ្ទៃមេឃសំដែងពីសិរីល្អនៃព្រះ»។—⁠រ៉ូម ១:⁠២០; ទំនុកដំកើង ១៩:១-៤

មនុស្សមិនមែនសូនធ្វើឆ្នាំងពីដីឥដ្ឋ ឬធ្វើទូរទស្សន៍ និងកុំព្យូទ័រ ដោយគ្មានបំណងអ្វីឡើយ។ ផែនដីនិងរបស់ដែលបានបង្កើតនៅលើនោះ គឺរុក្ខជាតិហើយសត្វមានភាពអស្ចារ្យយ៉ាងក្រៃលែងជាងវត្ថុទាំងនោះទៅទៀត។ រូបកាយមនុស្សដែលមានកោសិកាច្រើនសែនកោដិ គឺពិតជាហួសពីសមត្ថភាពនៃការយល់របស់មនុស្សយើង—⁠សូម្បី តែខួរក្បាលដែលយើងប្រើដើម្បី គិតក៏អស្ចារ្យក្រៃលែងដល់ម្ល៉េះ ដែលយើងមិនអាចយល់ដែរ! បើសិនជាមនុស្សលោកមានគោលបំណងក្នុងការបង្កើតដ៏តូចតាចរបស់គេដែលមិនសូវសំខាន់ នោះព្រះយេហូវ៉ាពិតជាមានគោលបំណងដែរ ចំពោះរបស់ដែលទ្រង់បានបង្កើតមកដែលមានភាពស្ញប់ស្ញែងណាស់! សុភាសិត ១៦:៤ បានសម្ដែងថាទ្រង់ពិតជាមានរាជបំណងមែន⁠៖ «ព្រះយេហូវ៉ាទ្រង់បានធ្វើគ្រប់របស់ទាំងអស់ ឲ្យសមនឹងប្រយោជន៍នៃរបស់នោះឯង»។

ព្រះយេហូវ៉ាបានបង្កើតផែនដីដើម្បីបំពេញគោលបំណងមួយ ដូចទ្រង់បានមានបន្ទូលទៅមនុស្សមួយគូដំបូងនោះថា⁠៖ «ចូរបង្កើតកូនឲ្យចំរើនជាច្រើនឡើង ឲ្យមានពេញពាសលើផែនដីចុះ ត្រូវបង្ក្រាបផែនដីហើយមានអំណាចលើត្រីសមុទ្រ សត្វហើរលើអាកាស នឹងជីវិតផងទាំងឡាយដែលកំរើកនៅផែនដីផង»។ (លោកុប្បត្តិ ១:⁠២៨) ដោយព្រោះតែគេបានក្លាយទៅជាមនុស្សមិនស្ដាប់បង្គាប់នោះ មនុស្សមួយគូនេះមិនបានបំពេញផែនដីដោយគ្រួសារដ៏សុចរិត ដែលនឹងថែរក្សាផែនដីនិងរុក្ខជាតិ និងសត្វដោយសេចក្ដីស្រឡាញ់នោះទេ។ ក៏ប៉ុន្តែការទទួលបរាជ័យរបស់គេនោះ មិនធ្វើឲ្យព្រះយេហូវ៉ាគ្មានជោគជ័យចំពោះគោលបំណងរបស់ទ្រង់ឡើយ។ រាប់ពាន់ឆ្នាំក្រោយរឿងនេះបានត្រូវសរសេរមកថា⁠៖ «ព្រះយេហូវ៉ាដែលបានបង្កើត . . . ហើយប្រតិស្ឋានផែនដី ក៏តាំងឡើង មិនមែនបង្កើតមកឲ្យនៅទទេទេ»។ ទ្រង់ក៏ «បានជបសូនបង្កើតឲ្យជាទីអាស្រ័យនៅ»។ ផែនដីនេះមិនត្រូវបំផ្លាញឡើយពីព្រោះ «ផែនដីស្ថិតស្ថេរនៅជាដរាប»។ (អេសាយ ៤៥:⁠១៨; សាស្ដា ១:៤) គោលបំណងរបស់ព្រះយេហូវ៉ាចំពោះផែនដីនឹងត្រូវបានសម្រេចឡើង⁠៖ «គំនិតសំរេចរបស់អញនឹងស្ថិតស្ថេរនៅ អញនឹងធ្វើតាមបំណងចិត្តអញគ្រប់ប្រការ»។—⁠អេសាយ ៤៦:⁠១០

ហេតុដូច្នេះហើយ ស្មរបន្ទាល់ព្រះយេហូវ៉ាជឿថា ផែនដីនឹងស្ថិតស្ថេរនៅជារៀងរហូត ហើយថាមនុស្សទាំងអស់ទាំងមនុស្សនៅរស់និងមនុស្សស្លាប់ ដែលនឹងសុខចិត្តធ្វើស្របនឹងគោលបំណងរបស់ព្រះយេហូវ៉ា ចំពោះផែនដីដែលនឹងត្រូវបានលាងស្អាតជាទីអាស្រ័យនៅ នោះអាចរស់នៅលើនោះជានិរន្តរ៍។ មនុស្សទាំងអស់បានទទួលភាពឥតគ្រប់ល័ក្ខណ៍ពីអ័ដាមនិងអេវ៉ា ហើយដោយហេតុនេះគ្រប់គ្នាជាអ្នកមានបាប។ (រ៉ូម ៥:⁠១២) ព្រះគម្ពីរចែងប្រាប់យើងថា⁠៖ «ឈ្នួលរបស់អំពើបាប នោះជាសេចក្ដីស្លាប់»។ «មនុស្សដែលរស់ គេដឹងថាខ្លួននឹងស្លាប់ជាមិនខាន តែមនុស្សស្លាប់ឥតដឹងអ្វីឡើយ»។ «ឯព្រលឹងណាដែលធ្វើបាប គឺព្រលឹងនោះឯងនឹងត្រូវស្លាប់វិញ»។ (រ៉ូម ៦:⁠២៣; សាស្ដា ៩:៥; អេសេគាល ១៨:៤, ២០) បើអ៊ីចឹងមែន តើដោយរបៀបណាដែលពួកគេអាចមានជីវិតរស់ឡើងវិញបាន ដើម្បីឲ្យមានចំណែកក្នុងពរទាំងប៉ុន្មាននៅលើផែនដីនេះ? ដោយសារតែវិធីមួយនេះឯង គឺយញ្ញបូជាតម្លៃលោះរបស់ព្រះយេស៊ូគ្រីស្ទ ដ្បិតទ្រង់មានបន្ទូលថា⁠៖ «ខ្ញុំជាសេចក្ដីរស់ឡើងវិញ ហើយជាជីវិតអ្នកណាដែលជឿដល់ខ្ញុំ ទោះបើបានស្លាប់ហើយ គង់តែនឹងរស់ឡើងវិញដែរ»។ «អស់ទាំងខ្មោចនៅក្នុងផ្នូរនឹងឮសំឡេងទ្រង់ ហើយនឹងចេញមក»។—⁠យ៉ូហាន ៥:២៨, ២៩; ១១:២៥; ម៉ាថាយ ២០:២៨

តើរឿងទាំងនេះនឹងកើតមានឡើងតាមរបៀបណា? រឿងនេះបានត្រូវពន្យល់ក្នុង «ដំណឹងល្អពីនគរ» ដែលព្រះយេស៊ូបានចាប់ផ្ដើមប្រកាសក្នុងកាលដែលទ្រង់គង់នៅផែនដីនេះ។ (ម៉ាថាយ ៤:១៧-២៣) ប៉ុន្តែ សព្វថ្ងៃនេះស្មរបន្ទាល់ព្រះយេហូវ៉ាកំពុងផ្សព្វផ្សាយដំណឹងល្អនេះ ដោយវិធីយ៉ាងពិសេសណាស់។

[តារាងនៅទំព័រ១៣]

ជំនឿជាច្រើនរបស់ស្មរបន្ទាល់ព្រះយេហូវ៉ា

ជំនឿ មូលហេតុពីព្រះគម្ពីរ

ព្រះគម្ពីរជាបន្ទូលរបស់ព្រះ ធីម៉ូថេទី២ ៣:១៦, ១៧; ពេត្រុសទី២

ហើយជាសេចក្ដីពិត ១:២០, ២១; យ៉ូហាន ១៧:⁠១៧

ព្រះគម្ពីរជាប្រភពដែលអាចពឹង ម៉ាថាយ ១៥:៣; កូល៉ុស ២:⁠៨

ទៅលើបានជាងប្រពៃណីទៅទៀត

ព្រះនាមរបស់ព្រះគឺជាយេហូវ៉ា ទំនុកដំកើង ៨៣:១៨; អេសាយ ២៦:⁠៤;

៤២:៨, និក្ខមនំ ៦:៣

ព្រះគ្រីស្ទជាព្រះរាជបុត្រនៃព្រះ ម៉ាថាយ ៣:១៧; យ៉ូហាន ៨:៤២; ១៤:២៨;

ហើយជាអ្នកក្រោមបង្គាប់ទ្រង់ ២០:១៧; កូរិនថូសទី១ ១១:៣; ១៥:⁠២៨

ព្រះគ្រីស្ទជាអ្នកដែលព្រះបាន កូល៉ុស ១:១៥; វិវរណៈ ៣:⁠១៤