មេរៀនទី១៣
ធីម៉ូថេចង់ជួយអ្នកឯទៀត
ធីម៉ូថេគឺជាបុរសវ័យក្មេងម្នាក់ដែលសប្បាយចិត្តជួយមនុស្ស។ គាត់បានធ្វើដំណើរទៅកន្លែងផ្សេងៗដើម្បីជួយអ្នកឯទៀត។ ដោយសារគាត់ធ្វើដូច្នេះ នោះជីវិតរបស់គាត់ពោរពេញទៅដោយបទពិសោធន៍ដ៏គួរឲ្យរំភើបចិត្តណាស់។ តើកូនចង់ដឹងអំពីរឿងនេះទេ?—
យាយនិងម្ដាយរបស់ធីម៉ូថេបានបង្រៀនគាត់អំពីព្រះយេហូវ៉ា
ធីម៉ូថេបានធំឡើងនៅទីក្រុងមួយហៅថា លីស្ដ្រា។ ពេលគាត់នៅក្មេង អឺនីសជាម្ដាយ និងឡូអ៊ីសជាយាយរបស់គាត់បានចាប់ផ្ដើមបង្រៀនគាត់អំពីព្រះយេហូវ៉ា។ កាលដែលធីម៉ូថេធំឡើង គាត់ចង់ជួយអ្នកឯទៀតឲ្យរៀនអំពីព្រះយេហូវ៉ា។
ពេលធីម៉ូថេនៅជាបុរសវ័យក្មេងនៅឡើយ ប៉ូលបានស្នើសុំឲ្យធីម៉ូថេធ្វើដំណើរជាមួយគាត់ដើម្បីទៅផ្សព្វផ្សាយនៅកន្លែងផ្សេងៗ។ ធីម៉ូថេបានឆ្លើយថា៖ ‹ខ្ញុំចង់ទៅ!›។ គាត់បានត្រៀមខ្លួនរួចជាស្រេចដើម្បីធ្វើដំណើរទៅជាមួយប៉ូល និងដើម្បីជួយអ្នកឯទៀត។
ធីម៉ូថេបានធ្វើដំណើរជាមួយប៉ូលទៅទីក្រុងមួយនៅប្រទេសក្រិចដែលហៅថា ថែស្សាឡូនិច។ ដើម្បីទៅដល់ទីនោះពួកគាត់ត្រូវដើរតាមផ្លូវយ៉ាងឆ្ងាយ ហើយបន្ទាប់មកជិះទូកទៀត។ ពេលពួកគាត់ទៅដល់ទីនោះហើយ ពួកគាត់បានជួយមនុស្សជាច្រើនឲ្យរៀនអំពីព្រះយេហូវ៉ា។ ប៉ុន្តែមនុស្សខ្លះបានខឹង ហើយចង់ធ្វើបាបពួកគាត់។ ដូច្នេះ ប៉ូលនិងធីម៉ូថេត្រូវតែចាកចេញពីទីនោះ ហើយទៅផ្សព្វផ្សាយនៅកន្លែងផ្សេងវិញ។
ធីម៉ូថេមានជីវិតដ៏សប្បាយ ហើយពោរពេញទៅដោយបទពិសោធន៍ដ៏គួរឲ្យរំភើបចិត្ត
ប៉ុន្មានខែក្រោយមក ប៉ូលបានសុំឲ្យធីម៉ូថេត្រឡប់ទៅទីក្រុងថែស្សាឡូនិចវិញ ដើម្បីសួរសុខទុក្ខបងប្អូន។ ដើម្បីត្រឡប់ទៅទីក្រុងដ៏គ្រោះថ្នាក់នោះ គាត់ត្រូវមានចិត្តក្លាហានយ៉ាងខ្លាំង! ទោះជាយ៉ាងនោះក៏ដោយ ធីម៉ូថេបានទៅ ដោយសារគាត់បារម្ភអំពីបងប្អូនដែលនៅទីនោះ។ ក្រោយបានជួបបងប្អូនហើយ គាត់ត្រឡប់ទៅជួបប៉ូលវិញទាំងមានដំណឹងល្អ។ តើដំណឹងល្អនោះជាអ្វី? គឺបងប្អូននៅទីក្រុងថែស្សាឡូនិចកំពុងបម្រើព្រះយ៉ាងស្មោះត្រង់!
ធីម៉ូថេបានផ្សព្វផ្សាយជាមួយប៉ូលអស់ជាច្រើនឆ្នាំ។ គាត់ស្រឡាញ់ព្រះយេហូវ៉ានិងស្រឡាញ់មនុស្សឯទៀត។ មានម្ដងនោះ ប៉ូលបានសរសេរថា ធីម៉ូថេជាមនុស្សល្អបំផុតដែលគាត់អាចចាត់ឲ្យទៅដើម្បីជួយក្រុមជំនុំផ្សេងៗ។
តើកូនស្រឡាញ់មនុស្សឯទៀត ហើយចង់ជួយពួកគេឲ្យរៀនអំពីព្រះយេហូវ៉ាឬទេ?— បើកូនចង់ធ្វើដូច្នេះមែន កូនអាចមានជីវិតដ៏សប្បាយ ហើយពោរពេញទៅដោយបទពិសោធន៍ដ៏គួរឲ្យរំភើបចិត្ត ដូចធីម៉ូថេដែរ!