ជំពូកទី៤
របៀបដែលក្រុមជំនុំបានត្រូវរៀបចំឡើង
ក្នុងសំបុត្រទី១ដែលសាវ័កប៉ូលបានសរសេរទៅកាន់គ្រិស្តសាសនិកនៅក្រុងកូរិនថូស គាត់បញ្ជាក់ការពិតដ៏សំខាន់មួយអំពីព្រះ។ ប៉ូលបានសរសេរថា៖ «ព្រះមិនមែនជាព្រះនៃការខ្វះសណ្ដាប់ធ្នាប់ទេ តែជាព្រះនៃសេចក្ដីសុខសាន្ត»។ រួចមក គាត់បានសរសេរថែមទៀតអំពីកិច្ចប្រជុំក្នុងក្រុមជំនុំថា៖ «ចូរឲ្យអ្វីៗទាំងអស់ប្រព្រឹត្តទៅយ៉ាងត្រឹមត្រូវ និងដោយរបៀបរៀបរយ»។—១កូ. ១៤:៣៣, ៤០
២ នៅដើមសំបុត្រនោះ សាវ័កប៉ូលបានទូន្មានក្រុមជំនុំកូរិនថូស ដោយសារមានការទាស់ទែងគ្នាក្នុងក្រុមជំនុំនោះ។ ប៉ូលបានដាស់តឿនបងប្អូននៅក្រុងកូរិនថូសឲ្យ«និយាយដូចគ្នាទាំងអស់»ហើយត្រូវមាន«គំនិតឯកភាព និងមានរបៀបគិតគូរតែមួយ»។ (១កូ. ១:១០, ១១) បន្ទាប់ពីនោះ គាត់បានឲ្យដំបូន្មានដល់ពួកគេអំពីរឿងផ្សេងៗដែលធ្វើឲ្យក្រុមជំនុំបែកបាក់សាមគ្គីភាព។ ប៉ូលក៏បានលើកឧទាហរណ៍អំពីអវយវៈនៃរូបកាយ ដើម្បីបញ្ជាក់ថាសាមគ្គីភាពនិងការសហការគ្នាគឺសំខាន់ចាំបាច់។ គាត់ជំរុញចិត្តបងប្អូនទាំងអស់ក្នុងក្រុមជំនុំគ្រិស្តសាសនិក ឲ្យយកចិត្តទុកដាក់ដោយសេចក្ដីស្រឡាញ់ចំពោះគ្នាទៅវិញទៅមក ទោះជាពួកគេមានតួនាទីអ្វីក៏ដោយ។ (១កូ. ១២:១២-២៦) ដូច្នេះ ត្រូវតែមានរបៀបរៀបចំល្អ ដើម្បីឲ្យពួកអ្នកក្នុងក្រុមជំនុំសហការគ្នាយ៉ាងជិតស្និទ្ធ។
៣ ប៉ុន្តែ តើក្រុមជំនុំគ្រិស្តសាសនិកបានត្រូវរៀបចំឡើងតាមរបៀបណា? តើនរណាជាអ្នករៀបចំ? តើក្រុមជំនុំគ្រិស្តសាសនិកនឹងមានការដឹកនាំបែបណា? តើអ្នកណានឹងត្រូវតែងតាំងឲ្យទទួលខុសត្រូវក្នុងក្រុមជំនុំ? យើងអាចបានចម្លើយយ៉ាងច្បាស់ក្នុងគម្ពីរ។—១កូ. ៤:៦
រៀបចំឡើងក្រោមការដឹកនាំរបស់ព្រះ
៤ ក្រុមជំនុំគ្រិស្តសាសនិកបានត្រូវបង្កើតឡើងនៅបុណ្យថ្ងៃទី៥០ ឆ្នាំ៣៣ គ.ស.។ តើយើងអាចរៀនអ្វីខ្លះអំពីក្រុមជំនុំនៅសតវត្សរ៍ទី១? យើងដឹងថាក្រុមជំនុំគ្រិស្តសាសនិកបានត្រូវរៀបចំឡើងក្រោមការដឹកនាំរបស់ព្រះ។ ព្រះបានដឹកនាំឲ្យគេសរសេរអំពីអ្វីដែលបានកើតឡើងនៅក្រុងយេរូសាឡិមជិត២.០០០ឆ្នាំមុន ទុកជាភ័ស្តុតាងដែលបញ្ជាក់យ៉ាងច្បាស់ថា ព្រះជាអ្នកបង្កើតក្រុមជំនុំនៃគ្រិស្តសាសនិកដែលលោកបានរើសតាំង។ (សកម្ម. ២:១-៤៧) ក្រុមជំនុំនោះប្រៀបដូចជាសំណង់ ឬក្រុមគ្រួសាររបស់លោក។ (១កូ. ៣:៩; អេភ. ២:១៩) សព្វថ្ងៃនេះ ក្រុមជំនុំគ្រិស្តសាសនិកបានត្រូវរៀបចំឡើងហើយមានដំណើរការតាមគំរូរបស់ក្រុមជំនុំនៅសតវត្សរ៍ទី១។
សព្វថ្ងៃនេះ ក្រុមជំនុំគ្រិស្តសាសនិកបានត្រូវរៀបចំឡើងហើយមានដំណើរការតាមគំរូរបស់ក្រុមជំនុំនៅសតវត្សរ៍ទី១។
៥ ក្រុមជំនុំនៅសម័យដើម បានចាប់ផ្ដើមដោយមានមនុស្សប្រហែលជា១២០នាក់។ សកម្មពលបរិសុទ្ធបានត្រូវចាក់លើអ្នកទាំងនោះមុនគេ ហើយនេះបានសម្រេចទំនាយនៅយ៉ូអែល ២:២៨, ២៩។ (សកម្ម. ២:១៦-១៨) ប៉ុន្តែ នៅថ្ងៃដដែលនោះ មនុស្សប្រហែលជា៣.០០០នាក់ទៀតបានទទួលការជ្រមុជទឹក ហើយបានចូលក្រុមជំនុំនៃពួកអ្នកដែលព្រះបានរើសតាំងដោយសកម្មពលបរិសុទ្ធ។ ពួកគេបានជឿបណ្ដាំរបស់ព្រះអំពីគ្រិស្ត ហើយបាន«បន្តប្រុងស្ដាប់សេចក្ដីបង្រៀនរបស់ពួកសាវ័ក»។ បន្ទាប់មក «ព្រះយេហូវ៉ាបានបន្តនាំអស់អ្នកដែលកំពុងត្រូវសង្គ្រោះឲ្យមកចូលរួមជាមួយនឹងពួកគេ»។—សកម្ម. ២:៤១, ៤២, ៤៧
៦ ក្រុមជំនុំនៅក្រុងយេរូសាឡិមបានចម្រើនកើនឡើងដល់ម្ល៉េះ បានជាសម្ដេចសង្ឃជនជាតិយូដាត្អូញត្អែរថា អ្នកកាន់តាមលោកយេស៊ូបានផ្សាយសេចក្ដីបង្រៀនរបស់ពួកគេពេញក្រុងយេរូសាឡិម។ អ្នកកាន់តាមថ្មីដែលបានចូលក្រុមជំនុំនៅក្រុងយេរូសាឡិម រួមមានសង្ឃជនជាតិយូដាជាច្រើននាក់។—សកម្ម. ៥:២៧, ២៨; ៦:៧
៧ លោកយេស៊ូបានមានប្រសាសន៍ថា៖ «អ្នករាល់គ្នានឹងធ្វើជាសាក្សីបញ្ជាក់អំពីខ្ញុំនៅក្រុងយេរូសាឡិម នៅតំបន់យូឌាទាំងមូល នៅស្រុកសាម៉ារី និងរហូតដល់កន្លែងឆ្ងាយបំផុតនៅផែនដី»។ (សកម្ម. ១:៨) អ្វីៗបានកើតឡើងដូចលោកមានប្រសាសន៍មែន ដ្បិតក្រោយស្ទេផានបានត្រូវគេសម្លាប់ មានការបៀតបៀនយ៉ាងខ្លាំងនៅក្រុងយេរូសាឡិម ដូច្នេះ អ្នកកាន់តាមលោកយេស៊ូដែលរស់នៅក្រុងយេរូសាឡិមបានត្រូវខ្ចាត់ខ្ចាយនៅពាសពេញក្នុងតំបន់យូឌានិងតំបន់សាម៉ារី។ ប៉ុន្តែ ទោះជាពួកគេទៅកន្លែងណាក៏ដោយ ពួកគេបានបន្តប្រកាសផ្សាយដំណឹងល្អហើយបង្កើនចំនួនអ្នកកាន់តាមលោកយេស៊ូ។ នេះក៏រួមបញ្ចូលអ្នកខ្លះពីជនជាតិសាម៉ារីដែរ។ (សកម្ម. ៨:១-១៣) ក្រោយមកទៀត ដំណឹងល្អបានត្រូវផ្សព្វផ្សាយដល់មនុស្សដែលមិនកាត់ចុងស្បែក ពោលគឺមនុស្សដែលមិនមែនជាជនជាតិយូដា ហើយការផ្សព្វផ្សាយនោះបានទទួលលទ្ធផលល្អប្រសើរ។ (សកម្ម. ១០:១-៤៨) សកម្មភាពផ្សព្វផ្សាយទាំងនេះ បាននាំឲ្យមនុស្សជាច្រើនក្លាយទៅជាអ្នកកាន់តាមលោកយេស៊ូ ហើយក៏មានក្រុមជំនុំថ្មីៗក្រៅក្រុងយេរូសាឡិមដែរ។—សកម្ម. ១១:១៩-២១; ១៤:២១-២៣
៨ នៅពេលនោះ តើពួកគេបានធ្វើយ៉ាងណាដើម្បីប្រាកដថាក្រុមជំនុំថ្មីនីមួយៗនឹងត្រូវរៀបចំឡើងហើយដឹកនាំតាមរបៀបរបស់ព្រះ? តាមរយៈសកម្មពលរបស់ព្រះ មានការរៀបចំដើម្បីតែងតាំងបុរសខ្លះឲ្យឃ្វាលហ្វូងចៀមរបស់លោក។ ពេលប៉ូលនិងបាណាបាសធ្វើដំណើរលើកទី១ជាសាសនទូត ពួកគាត់បានតែងតាំងបុរសខ្លះឲ្យធ្វើជាអ្នកចាស់ទុំក្នុងក្រុមជំនុំដែលពួកគាត់បានទៅ។ (សកម្ម. ១៤:២៣) អ្នកសរសេរគម្ពីរម្នាក់ឈ្មោះលូកា រៀបរាប់អំពីកិច្ចប្រជុំរបស់ប៉ូលជាមួយនឹងពួកអ្នកចាស់ទុំពីក្រុមជំនុំនៅក្រុងអេភេសូរ។ ប៉ូលបានប្រាប់ពួកគាត់ថា៖ «ចូរប្រយ័ត្នខ្លួនអ្នក ហើយមើលការខុសត្រូវហ្វូងចៀម ដែលក្នុងនោះសកម្មពលបរិសុទ្ធបានតែងតាំងអ្នករាល់គ្នាឲ្យធ្វើជាអ្នកត្រួតពិនិត្យ ដើម្បីឃ្វាលក្រុមជំនុំរបស់ព្រះ ដែលលោកបានទិញដោយឈាមរបស់បុត្រលោក»។ (សកម្ម. ២០:១៧, ២៨) ពួកបុរសទាំងនោះបានត្រូវតែងតាំងជាអ្នកចាស់ទុំ ដោយសារពួកគាត់បានបំពេញតម្រូវការពីព្រះ។ (១ធី. ៣:១-៧) ទីតុសដែលជាអ្នករួមការងារជាមួយប៉ូល បានទទួលសិទ្ធិអំណាចក្នុងការតែងតាំងបុរសខ្លះឲ្យធ្វើជាអ្នកចាស់ទុំក្នុងក្រុមជំនុំផ្សេងៗនៅកោះក្រេត។—ទីត. ១:៥
៩ នៅសតវត្សរ៍ទី១ កាលក្រុមជំនុំកើនឡើងកាន់តែច្រើន នោះពួកសាវ័កនិងពួកអ្នកចាស់ទុំនៅក្រុងយេរូសាឡិមបានបន្តត្រួតពិនិត្យក្រុមជំនុំទាំងឡាយនៅប្រទេសផ្សេងៗ។ ពួកគាត់បានបម្រើជាគណៈអភិបាលនៃក្រុមជំនុំគ្រិស្តសាសនិក។
១០ សាវ័កប៉ូលបានសរសេរសំបុត្រទៅកាន់ក្រុមជំនុំនៅក្រុងអេភេសូរ ហើយពន្យល់ថា បើក្រុមជំនុំគ្រិស្តសាសនិកធ្វើតាមការដឹកនាំនៃសកម្មពលរបស់ព្រះហើយគោរពលោកយេស៊ូគ្រិស្តជាប្រមុខ នោះក្រុមជំនុំអាចរក្សាសាមគ្គីភាព។ សាវ័កប៉ូលបានដាស់តឿនគ្រិស្តសាសនិកនៅទីនោះឲ្យបង្ហាញចិត្តរាបទាប ហើយរក្សា«សាមគ្គីភាពដែលមកពីសកម្មពលរបស់ព្រះ» ដោយមានសេចក្ដីសុខសាន្តជាមួយនឹងបងប្អូនទាំងអស់ក្នុងក្រុមជំនុំ។ (អេភ. ៤:១-៦) រួចមកគាត់ដកស្រង់ពីទំនុកតម្កើង ៦៨:១៨ ហើយបកស្រាយថានេះសំដៅលើរបៀបរៀបចំរបស់ព្រះយេហូវ៉ា ដើម្បីឲ្យបុរសដែលមានគុណសម្បត្តិគ្រប់គ្រាន់បំពេញសេចក្ដីត្រូវការរបស់ក្រុមជំនុំក្នុងតួនាទីជាសាវ័ក អ្នកប្រកាសទំនាយ អ្នកផ្សព្វផ្សាយដំណឹងល្អ គង្វាល និងអ្នកបង្រៀន។ បុរសដូចនេះជាអំណោយពីព្រះយេហូវ៉ា ដើម្បីពង្រឹងជំនឿរបស់គ្រិស្តសាសនិកក្នុងក្រុមជំនុំទាំងឡាយ ឲ្យមានជំនឿមាំមួនដែលនាំឲ្យព្រះពេញចិត្ត។—អេភ. ៤:៧-១៦
សព្វថ្ងៃនេះក្រុមជំនុំធ្វើតាមគំរូរបស់ពួកសាវ័ក
១១ សព្វថ្ងៃនេះ ក្រុមជំនុំទាំងឡាយរបស់សាក្សីព្រះយេហូវ៉ាមានរបៀបរៀបចំដូចខាងលើ។ ក្រុមជំនុំទាំងនេះរួមគ្នាជាក្រុមជំនុំដ៏ធំមួយទូទាំងផែនដី ដើម្បីគាំទ្របងប្អូនដែលព្រះបានរើសតាំង។ (សាក. ៨:២៣) នេះអាចកើតឡើងបាន ដោយសារលោកយេស៊ូគ្រិស្តបានធ្វើតាមសេចក្ដីសន្យារបស់លោក ហើយបានបង្ហាញភក្ដីភាពចំពោះពួកអ្នកដែលព្រះបានរើសតាំង ដោយនៅជាមួយនឹងពួកគេ«រាល់ថ្ងៃ រហូតដល់គ្រាចុងបញ្ចប់នៃរបៀបរបបពិភពលោកនេះ»។ ពួកអ្នកដែលចូលក្រុមជំនុំដែលកាន់តែរីកចម្រើននេះ គឺជាអ្នកដែលព្រមស្ដាប់ដំណឹងល្អ ប្រគល់ខ្លួនជូនព្រះយេហូវ៉ាដោយគ្មានល័ក្ខខ័ណ្ឌ ហើយទទួលការជ្រមុជទឹកជាអ្នកកាន់តាមលោកយេស៊ូ។ (ម៉ាថ. ២៨:១៩,២០; ម៉ាក. ១:១៤; សកម្ម. ២:៤១) ពួកគេទទួលស្គាល់ថា លោកយេស៊ូគ្រិស្តជា«គង្វាលល្អប្រសើរ»ដែលកំពុងដឹកនាំហ្វូងចៀមរបស់ព្រះ។ ហ្វូងចៀមនេះរួមមានគ្រិស្តសាសនិកដែលព្រះបានរើសតាំងផង និង«ចៀមឯទៀត»ផង។ (យ៉ូន. ១០:១៤, ១៦; អេភ. ១:២២, ២៣) «ហ្វូងតែមួយ»នោះរក្សាសាមគ្គីភាពដោយចុះចូលយ៉ាងស្មោះភក្ដីចំពោះការដឹកនាំរបស់គ្រិស្ត និងរបស់ខ្សែរយៈដែលលោកបានតែងតាំងក្នុងអង្គការព្រះ គឺ«ខ្ញុំបម្រើដ៏ស្មោះត្រង់ហើយចេះពិចារណា»។ ចូរឲ្យយើងបន្តគាំទ្រ ហើយបង្ហាញទំនុកចិត្តទាំងស្រុងទៅលើខ្ញុំបម្រើដ៏ស្មោះត្រង់នៅសព្វថ្ងៃនេះ។—ម៉ាថ. ២៤:៤៥
ការប្រើសាជីវកម្មខាងសាសនា
១២ ដើម្បីផ្ដល់សេចក្ដីបង្រៀនដែលប្រៀបដូចជាអាហារតាមត្រូវពេល និងដើម្បីផ្សាយដំណឹងល្អអំពីរាជាណាចក្ររបស់ព្រះឲ្យបានសព្វគ្រប់មុនទីបញ្ចប់មកដល់ នោះអង្គការព្រះបានបង្កើតសាជីវកម្មស្របច្បាប់មួយចំនួន។ សាជីវកម្មស្របច្បាប់ទាំងនេះបានត្រូវទទួលស្គាល់ដោយរដ្ឋាភិបាលនៅប្រទេសផ្សេងៗ ហើយសាជីវកម្មទាំងនេះសហការគ្នា។ សាជីវកម្មទាំងនេះជួយសម្រួលកិច្ចការផ្សព្វផ្សាយដំណឹងល្អនៅទូទាំងផែនដី។
របៀបរៀបចំនៃការិយាល័យសាខា
១៣ ពេលណាការិយាល័យសាខាមួយបានត្រូវបង្កើតឡើង នោះអ្នកចាស់ទុំយ៉ាងតិចបីនាក់នឹងត្រូវតែងតាំងឲ្យធ្វើជាគណៈកម្មាធិការការិយាល័យសាខា។ គណៈកម្មាធិការនេះមើលការខុសត្រូវលើកិច្ចបម្រើព្រះក្នុងប្រទេសដែលនៅក្រោមការត្រួតពិនិត្យរបស់ការិយាល័យសាខានោះ។ សមាជិកម្នាក់ពីគណៈកម្មាធិការនោះបម្រើជាអ្នកចាត់ចែងកិច្ចការគណៈកម្មាធិការការិយាល័យសាខា។
១៤ ក្រុមជំនុំផ្សេងៗដែលនៅក្រោមការត្រួតពិនិត្យនៃការិយាល័យសាខានីមួយៗ បានត្រូវរៀបចំឡើងជាមណ្ឌល។ មណ្ឌលមានទំហំខុសៗគ្នា អាស្រ័យទៅលើទីតាំងនិងភាសា ព្រមទាំងចំនួនក្រុមជំនុំក្នុងតំបន់ដែលការិយាល័យសាខាមើលការខុសត្រូវ។ អ្នកត្រួតពិនិត្យប្រចាំមណ្ឌលបានត្រូវតែងតាំង ដើម្បីបម្រើក្រុមជំនុំក្នុងមណ្ឌលនីមួយៗ។ ការិយាល័យសាខាផ្ដល់ការណែនាំដល់អ្នកត្រួតពិនិត្យប្រចាំមណ្ឌល ស្ដីអំពីរបៀបដែលពួកគាត់គួរបំពេញភារកិច្ចរបស់ខ្លួន។
១៥ ក្រុមជំនុំទាំងឡាយធ្វើតាមការរៀបចំរបស់អង្គការព្រះ ដែលបានធ្វើឡើងដើម្បីផ្ដល់ប្រយោជន៍ដល់បងប្អូនទាំងអស់គ្នា។ ក្រុមជំនុំទទួលស្គាល់ការតែងតាំងរបស់ពួកអ្នកចាស់ទុំ ដែលត្រួតពិនិត្យកិច្ចការក្នុងការិយាល័យសាខា មណ្ឌល និងក្រុមជំនុំ។ ក្រុមជំនុំពឹងផ្អែកលើខ្ញុំបម្រើដ៏ស្មោះត្រង់ហើយចេះពិចារណា ដើម្បីទទួលសេចក្ដីបង្រៀនដែលប្រៀបដូចជាអាហារត្រូវពេល។ នៅសព្វថ្ងៃនេះ ខ្ញុំបម្រើដ៏ស្មោះត្រង់ចុះចូលទាំងស្រុងចំពោះការដឹកនាំរបស់គ្រិស្ត កាន់តាមគោលការណ៍គម្ពីរ ហើយធ្វើតាមការណែនាំនៃសកម្មពលបរិសុទ្ធរបស់ព្រះ។ ពេលយើងទាំងអស់គ្នាបម្រើជាមួយគ្នាដោយសាមគ្គីភាព យើងទទួលលទ្ធផលស្រដៀងនឹងលទ្ធផលដែលក្រុមជំនុំនៅសតវត្សរ៍ទី១បានទទួលដែរ។ គម្ពីរចែងថា៖ «ជំនឿរបស់ក្រុមជំនុំនានាបានត្រូវពង្រឹង ហើយក្រុមជំនុំទាំងនោះក៏បានចម្រើនឡើងជារៀងរាល់ថ្ងៃ»។—សកម្ម. ១៦:៥