មេរៀនទី៥៦
ចូររក្សាសាមគ្គីភាពក្នុងក្រុមជំនុំ
ពេលដែលយើងនៅក្នុងចំណោមបងប្អូនរួមជំនឿ យើងមានអារម្មណ៍ដូចស្ដេចដាវីឌ ដែលបាននិយាយថា៖ «ពេលបងប្អូននៅជាមួយគ្នាដោយសាមគ្គីភាព នោះជាការល្អប្រពៃ និងគួរឲ្យរីករាយខ្លាំងណាស់!»។ (ចម្រៀងសរសើរព្រះ ១៣៣:១) សាមគ្គីភាពរបស់យើងមិនបានកើតឡើងដោយស្វ័យប្រវត្តិឡើយ។ យើងម្នាក់ៗមានតួនាទីជួយរក្សាសាមគ្គីភាព។
១. ក្នុងចំណោមរាស្ត្ររបស់ព្រះ តើមានអ្វីដែលលេចធ្លោគួរឲ្យកត់សម្គាល់?
ប្រសិនបើអ្នកចូលរួមកិច្ចប្រជុំក្រុមជំនុំនៅប្រទេសផ្សេង អ្នកប្រហែលជាមិនយល់ភាសានោះទេ តែអ្នកមិនចាំបាច់ភ័យឡើយ។ ហេតុអ្វី? ដោយសារយើងសិក្សាគម្ពីរដោយប្រើសៀវភៅដូចគ្នានៅគ្រប់ទីកន្លែង។ ម្យ៉ាងទៀត យើងខិតខំបង្ហាញសេចក្ដីស្រឡាញ់ចំពោះគ្នាទៅវិញទៅមក។ ទោះជាយើងរស់នៅកន្លែងណាក៏ដោយ យើងទាំងអស់គ្នា‹ហៅរកនាមយេហូវ៉ា និងគោរពប្រណិប័តន៍លោកដោយសាមគ្គីភាព›។—សេផានា ៣:៩
២. តើអ្នកអាចធ្វើអ្វីដើម្បីជួយឲ្យមានសាមគ្គីភាព?
គម្ពីរចែងថា៖ «ចូរស្រឡាញ់គ្នាឲ្យខ្លាំងដោយស្មោះពីចិត្ត»។ (ពេត្រុសទី១ ១:២២) តើអ្នកអាចធ្វើតាមឱវាទនេះយ៉ាងដូចម្ដេច? ចូរកុំផ្ដោតអារម្មណ៍ទៅលើគុណវិបត្តិរបស់អ្នកឯទៀត។ ផ្ទុយទៅវិញ ចូរស្វែងរកគុណសម្បត្តិរបស់ពួកគេ។ ជាជាងសេពគប់តែជាមួយបងប្អូនដែលមានចំណង់ចំណូលចិត្តដូចអ្នក សូមព្យាយាមស្គាល់បងប្អូនដែលមានមជ្ឈដ្ឋានខុសពីអ្នក។ ម្យ៉ាងទៀត យើងអាចខំប្រឹងបំបាត់ចោលការរើសអើងដែលប្រហែលជាមាននៅក្នុងចិត្តយើង។—សូមអាន ពេត្រុសទី១ ២:១៧a
៣. ពេលអ្នកខ្វែងគំនិតជាមួយនឹងបងប្អូនរួមជំនឿ តើអ្នកចង់ធ្វើអ្វី?
ទោះជាយើងមានសាមគ្គីភាពក៏ដោយ យើងក៏នៅតែជាមនុស្សមិនល្អឥតខ្ចោះដែរ។ ដូច្នេះ ជួនកាលយើងធ្វើឲ្យអ្នកឯទៀតឈឺចិត្តឬខកចិត្ត។ ហេតុនេះ បណ្ដាំរបស់ព្រះប្រាប់យើងឲ្យបន្ត«អភ័យទោសឲ្យគ្នាទៅវិញទៅមក» ដោយសារ«ព្រះយេហូវ៉ាបានអភ័យទោសឲ្យអ្នករាល់គ្នាដោយគ្មានល័ក្ខខ័ណ្ឌ។ ម្ល៉ោះហើយ អ្នករាល់គ្នាត្រូវធ្វើដូច្នោះដែរ»។ (សូមអាន កូឡុស ៣:១៣) យើងធ្វើឲ្យព្រះយេហូវ៉ាឈឺចិត្តច្រើនដងរាប់មិនអស់ តែលោកនៅតែអភ័យទោសឲ្យយើង។ ដូច្នេះ លោកតម្រូវឲ្យយើងអភ័យទោសឲ្យបងប្អូនរបស់យើង។ បើអ្នកដឹងថាអ្នកបានធ្វើឲ្យអ្នកណាម្នាក់ឈឺចិត្ត សូមទៅរកគាត់ជាមុនដើម្បីដោះស្រាយបញ្ហានោះ។—សូមអាន ម៉ាថាយ ៥:២៣, ២៤b
បង្កើនចំណេះ
សូមស្វែងរកវិធីផ្សេងៗដែលអ្នកអាចជួយឲ្យមានសាមគ្គីភាពនិងសេចក្ដីសុខសាន្តក្នុងក្រុមជំនុំ។
តើអ្នកអាចធ្វើអ្វីដើម្បីនាំឲ្យមានសេចក្ដីសុខសាន្ត?
៤. ចូរយកឈ្នះការរើសអើង
យើងចង់ស្រឡាញ់បងប្អូនទាំងអស់ ប៉ុន្តែយើងប្រហែលជាពិបាកស្រឡាញ់អ្នកណាម្នាក់ដែលមើលទៅខុសពីយើង។ តើអ្វីអាចជួយយើងបាន? សូមអាន សកម្មភាព ១០:៣៤, ៣៥ រួចពិភាក្សាសំណួរដូចតទៅ៖
ព្រះយេហូវ៉ាទទួលយកមនុស្សគ្រប់ប្រភេទឲ្យធ្វើជាសាក្សីរបស់លោក។ តើនេះគួរធ្វើឲ្យអ្នកមានទស្សនៈយ៉ាងណាចំពោះពួកអ្នកដែលមានមជ្ឈដ្ឋានខុសពីអ្នក?
តើក្នុងតំបន់ដែលអ្នករស់នៅមានការរើសអើងណាខ្លះ? ហេតុអ្វីអ្នកចង់ជៀសវាង?
សូមអាន កូរិនថូសទី២ ៦:១១-១៣ រួចពិភាក្សាសំណួរនេះ៖
តើតាមរបៀបណាអ្នកអាចរៀនស្រឡាញ់បងប្អូនប្រុសស្រីទាំងអស់ដែលមកពីមជ្ឈដ្ឋានផ្សេងៗ?
៥. ចូរអភ័យទោសឲ្យគ្នាដោយគ្មានល័ក្ខខ័ណ្ឌ ហើយធ្វើឲ្យមានសេចក្ដីសុខសាន្ត
ព្រះយេហូវ៉ាអភ័យទោសឲ្យយើងដោយគ្មានល័ក្ខខ័ណ្ឌ ទោះជាលោកមិនដែលត្រូវការឲ្យយើងអភ័យទោសឲ្យលោកក៏ដោយ។ សូមអាន ចម្រៀងសរសើរព្រះ ៨៦:៥ រួចពិភាក្សាសំណួរដូចតទៅ៖
តាមខនេះ តើអ្នករៀនអ្វីពីការអភ័យទោសរបស់ព្រះយេហូវ៉ា?
ហេតុអ្វីអ្នកដឹងគុណព្រះយេហូវ៉ា ដោយសារលោកអភ័យទោសឲ្យយើង?
តើមានស្ថានភាពអ្វីខ្លះដែលនាំឲ្យយើងពិបាករក្សាសាមគ្គីភាពជាមួយនឹងអ្នកឯទៀត?
យើងអាចយកតម្រាប់ព្រះយេហូវ៉ានិងរក្សាសាមគ្គីភាពជាមួយបងប្អូនរួមជំនឿ។ តើតាមរបៀបណា? សូមអាន សុភាសិត ១៩:១១ រួចពិភាក្សាសំណួរនេះ៖
ពេលអ្នកណាម្នាក់ធ្វើឲ្យអ្នកឈឺចិត្តឬទើសចិត្ត តើអ្នកអាចធ្វើអ្វី?
ជួនកាល យើងធ្វើឲ្យអ្នកឯទៀតឈឺចិត្ត។ ពេលរឿងនោះកើតឡើង តើយើងគួរធ្វើអ្វី? លេងវីដេអូ រួចពិភាក្សាសំណួរដូចតទៅ៖
ក្នុងវីដេអូ តើបងស្រីនោះបានធ្វើអ្វីដើម្បីនាំឲ្យមានសន្តិភាព?
៦. ចូរស្វែងរកលក្ខណៈល្អរបស់បងប្អូន
ពេលយើងស្គាល់បងប្អូនរបស់យើងកាន់តែច្បាស់ នោះយើងក៏កាន់តែស្គាល់គុណសម្បត្តិនិងគុណវិបត្តិរបស់ពួកគាត់ដែរ។ តើយើងអាចផ្ដោតអារម្មណ៍ទៅលើគុណសម្បត្តិរបស់ពួកគាត់យ៉ាងដូចម្ដេច? លេងវីដេអូ រួចពិភាក្សាសំណួរដូចតទៅ៖
តើអ្នកអាចធ្វើអ្វីដើម្បីឃើញគុណសម្បត្តិរបស់បងប្អូន?
ព្រះយេហូវ៉ាផ្ដោតអារម្មណ៍ទៅលើគុណសម្បត្តិរបស់យើង។ សូមអាន ប្រវត្តិហេតុទី២ ១៦:៩ក រួចពិភាក្សាសំណួរដូចតទៅ៖
ពេលដឹងថាព្រះយេហូវ៉ាផ្ដោតអារម្មណ៍ទៅលើគុណសម្បត្តិរបស់អ្នក តើនេះធ្វើឲ្យអ្នកមានអារម្មណ៍យ៉ាងណា?
សូម្បីតែត្បូងពេជ្រដ៏សែនស្អាត ក៏នៅតែមិនល្អគ្រប់ជ្រុងជ្រោយដែរ ប៉ុន្តែវានៅតែមានតម្លៃ។ ស្រដៀងគ្នាដែរ បងប្អូនទាំងអស់របស់យើងជាមនុស្សមិនល្អឥតខ្ចោះ ប៉ុន្តែពួកគាត់នៅតែមានតម្លៃចំពោះព្រះយេហូវ៉ា
មនុស្សខ្លះនិយាយថា៖ «ខ្ញុំអាចអភ័យទោសឲ្យគាត់បាន លុះត្រាតែគាត់ធ្វើអ្វីមួយដើម្បីសុំទោសខ្ញុំ»។
ហេតុអ្វីយើងគួរឆាប់អភ័យទោសឲ្យអ្នកឯទៀត?
សេចក្ដីសង្ខេប
អ្នកអាចជួយរក្សាសាមគ្គីភាពក្នុងក្រុមជំនុំ ដោយចេះអភ័យទោសនិងបង្ហាញសេចក្ដីស្រឡាញ់ដល់បងប្អូនទាំងអស់។
រៀនសាឡើងវិញ
តើអ្នកអាចយកឈ្នះការរើសអើងតាមរបៀបណា?
ពេលអ្នកខ្វែងគំនិតជាមួយនឹងបងប្អូនរួមជំនឿ តើអ្នកចង់ធ្វើអ្វី?
ហេតុអ្វីអ្នកចង់យកតម្រាប់ព្រះយេហូវ៉ាក្នុងការអភ័យទោសឲ្យអ្នកឯទៀត?
ស្វែងយល់ថែមទៀត
សូមរៀនពីឧទាហរណ៍មួយរបស់លោកយេស៊ូដែលអាចជួយយើងកុំឲ្យវិនិច្ឆ័យអ្នកឯទៀត។
ទោះជាយើងគិតថាយើងមិនបានធ្វើអ្វីខុសក៏ដោយ ហេតុអ្វីយើងនៅតែត្រូវសុំទោស?
សូមមើលអំពីរបៀបដែលអ្នកខ្លះបានរៀនប្រព្រឹត្តចំពោះអ្នកឯទៀតដោយមិនរើសមុខ។
សូមពិចារណាអំពីរបៀបដែលអ្នកអាចដោះស្រាយទំនាស់ជាមួយអ្នកឯទៀត មុននឹងទំនាស់នោះបង្ខូចសេចក្ដីសុខសាន្តក្នុងក្រុមជំនុំ។
«ចូរដោះស្រាយការទាស់ទែងគ្នាដោយសេចក្ដីស្រឡាញ់» (ទស្សនាវដ្ដីប៉មយាម ខែឧសភា ឆ្នាំ២០១៦)
a ក្នុងកំណត់នៅចុងសៀវភៅលេខ៦ ប្រាប់អំពីសេចក្ដីស្រឡាញ់ជាអ្វីដែលជំរុញចិត្តគ្រិស្តសាសនិកមិនឲ្យចម្លងជំងឺដល់អ្នកឯទៀត។
b ក្នុងកំណត់នៅចុងសៀវភៅលេខ៧ ប្រាប់អំពីរបៀបដោះស្រាយបញ្ហាខាងជំនួញនិងខាងច្បាប់។