ត្រឡប់ទៅជួប
មេរៀនទី ៧
តស៊ូព្យាយាម
គោលការណ៍៖ «ពួកគាត់បន្តបង្រៀននិងប្រកាសដំណឹងល្អឥតឈប់»។—សកម្ម. ៥:៤២
អ្វីដែលប៉ូលធ្វើ
១. សូមមើល វីដេអូ ឬអានសកម្មភាព ១៩:៨-១០។ បន្ទាប់មក សូមពិចារណាសំណួរដូចតទៅ៖
ក. ទោះជាមនុស្សខ្លះបានប្រឆាំងប៉ូលក៏ដោយ គាត់មិនបានឈប់ផ្សព្វផ្សាយទេ។តើប៉ូលបានតស៊ូព្យាយាមក្នុងការជួយអស់អ្នកដែលបង្ហាញចំណាប់អារម្មណ៍យ៉ាងដូចម្ដេច?
ខ. តើប៉ូលបានត្រឡប់ទៅជួបដើម្បីបង្រៀនអ្នកចាប់អារម្មណ៍ទាំងនោះញឹកញាប់ប៉ុណ្ណា? ហើយតើគាត់បានធ្វើដូច្នេះអស់រយៈពេលប៉ុន្មាន?
តើគំរូប៉ូលបង្រៀនយើងយ៉ាងណា?
២. ដើម្បីបណ្ដុះចំណាប់អារម្មណ៍របស់ម្ចាស់ផ្ទះ និងរហូតដល់អាចបង្រៀនគម្ពីរគាត់ នោះតម្រូវឲ្យយើងខំប្រឹងប្រែង និងចំណាយពេលត្រឡប់ទៅជួប។
ធ្វើតាមប៉ូល
៣. ចេះផ្លាស់ប្ដូរកាលវិភាគ។ សូមសួរខ្លួនអ្នកថា៖ ‹តើពេលណា និងកន្លែងណាដែលគាត់ស្រួលនិយាយជាមួយនឹងខ្ញុំ? តើខ្ញុំអាចទាក់ទងគាត់តាមវិធីណាដែលស្រួលជាងសម្រាប់គាត់?›។ សុខចិត្តត្រឡប់ទៅជួបគាត់ ទោះជាពេលវេលានោះមិនងាយស្រួលសម្រាប់អ្នកក៏ដោយ។
៤. ណាត់ជួបម្ដងទៀត។ នៅរាល់ពេលបញ្ចប់ការសន្ទនា សូមសួរច្បាស់លាស់ថា ពេលណាអ្នកអាចនិយាយជាមួយគាត់ម្ដងទៀត។ រួចមក សូមទៅជួបគាត់តាមការណាត់។
៥. កុំឆាប់អស់សង្ឃឹម។ មិនត្រូវសន្និដ្ឋានភ្លាមៗថា បុគ្គលណាម្នាក់មិនចាប់អារម្មណ៍ដោយសារគាត់កម្រនៅផ្ទះ ឬគាត់ចេះតែរវល់នោះទេ។ (១កូ. ១៣:៤, ៧) ផ្ទុយទៅវិញ យើងត្រូវតស៊ូព្យាយាមដើម្បីជួបបុគ្គលនោះ តែយើងក៏ត្រូវចេះថ្លឹងថ្លែងដែរ ពីព្រោះយើងចង់ប្រើពេលវេលាដោយមានប្រាជ្ញា។—១កូ. ៩:២៦