ចូររក្សាចំណងអាពាហ៍ពិពាហ៍ឲ្យដូច«ពួរ៣ធ្លុង»ចុះ!
«ពួរ៣ធ្លុងមិនងាយដាច់ទេ»។—សាស. ៤:១២
១. តើអ្នកណារៀបអាពាហ៍ពិពាហ៍ឲ្យគូស្វាមីភរិយាទី១?
បន្ទាប់ពីព្រះយេហូវ៉ាបង្កើតរុក្ខជាតិនិងសត្វ នោះទ្រង់បានបង្កើតមនុស្សទី១គឺអ័ដាម។ ក្រោយមក ព្រះធ្វើឲ្យអ័ដាមដេកលក់ ហើយទ្រង់ក៏យកឆ្អឹងជំនីរអ័ដាមមកបង្កើតអ្នកជំនួយដ៏ល្អឥតខ្ចោះម្នាក់។ ពេលក្រឡេកឃើញនាង អ័ដាមនិយាយថា៖ «នេះហើយជាឆ្អឹងពីឆ្អឹងអញ ជាសាច់ពីសាច់អញ»។ (លោ. ១:២៧; ២:១៨, ២១-២៣) ព្រះយេហូវ៉ាពេញចិត្តនឹងការនោះ ក៏ផ្សំផ្គុំគូស្វាមីភរិយាដំបូង និងប្រទានពរដល់ពួកគេផងដែរ។—លោ. ១:២៨; ២:២៤
២. តើសាតាំងបានធ្វើឲ្យអ័ដាមនិងអេវ៉ាមិនចុះសម្រុងគ្នាយ៉ាងដូចម្ដេច?
២ គួរឲ្យស្ដាយមែន អាពាហ៍ពិពាហ៍ដែលព្រះបានរៀបចំនោះមិនបានសម្រេចដូចបំណងទ្រង់ទេ។ ហេតុអ្វី? វិញ្ញាណកំណាចដែលត្រូវហៅថាសាតាំង បានល្បួងអេវ៉ាឲ្យបរិភោគផ្លែពីដើមដែលព្រះហាមឃាត់។ បន្ដិចក្រោយមក អ័ដាមបានចូលដៃនឹងប្រពន្ធបះបោរប្រឆាំងការគ្រប់គ្រងនិងការដឹកនាំដ៏ត្រឹមត្រូវរបស់ព្រះ។ (លោ. ៣:១-៧) នៅពេលដែលព្រះយេហូវ៉ាបានសួរប្ដីប្រពន្ធពីអ្វីដែលពួកគេបានធ្វើ នោះបញ្ជាក់ឲ្យឃើញយ៉ាងច្បាស់ថា ចំណងអាពាហ៍ពិពាហ៍របស់ពួកគេបានប្រេះឆារួចទៅហើយ។ អ័ដាមបន្ទោសភរិយាដោយនិយាយ៖ «ស្ត្រីដែលទ្រង់បានប្រទានឲ្យនៅជាមួយនឹងទូលបង្គំ វាឲ្យផ្លែឈើនោះមកទូលបង្គំ ទូលបង្គំក៏ទទួលទានទៅ»។—លោ. ៣:១១-១៣
៣. តើជនជាតិយូដាខ្លះមានគំនិតខុសឆ្គងបែបណា?
៣ ច្រើនសតវត្សរ៍កន្លងមក សាតាំងធ្លាប់ប្រើកលល្បិចផ្សេងៗដើម្បីឲ្យគូអាពាហ៍ពិពាហ៍មិនចុះសម្រុងគ្នា។ ជាឧទាហរណ៍ ជួនកាលសាតាំងបានប្រើមេនាំមុខសាសនា ដើម្បីបំផុសបំផុលទស្សនៈដែលមិនត្រឹមត្រូវតាមគោលការណ៍របស់ព្រះស្តីអំពីអាពាហ៍ពិពាហ៍។ មេនាំមុខសាសនាយូដាបានមើលស្រាលខ្នាតតម្រារបស់ព្រះ អនុញ្ញាតឲ្យប្ដីលែងប្រពន្ធដោយសាររឿងតូចតាច ដូចជាដោយសារម្ហូបប្រៃពេកជាដើម។ ព្រះយេស៊ូបញ្ជាក់ថា៖ «អ្នកណាដែលលែងប្រពន្ធ មិនមែនដោយព្រោះនាងនោះផិត ហើយទៅយកប្រពន្ធមួយទៀត អ្នកនោះឈ្មោះថាប្រព្រឹត្តសេចក្ដីកំផិតហើយ»។—ម៉ាថ. ១៩:៩
៤. តើអាពាហ៍ពិពាហ៍មានបញ្ហាយ៉ាងណាសព្វថ្ងៃនេះ?
៤ សាតាំងនៅតែជាប់រវល់ក្នុងការបំបែកបំបាក់ចំណងអាពាហ៍ពិពាហ៍។ អាពាហ៍ពិពាហ៍រវាងភេទដូចគ្នា រួមរស់ជាមួយគ្នាដោយឥតរៀបការ និងការងាយលះលែងគ្នា សឲ្យឃើញថាសាតាំងបានទទួលជោគជ័យយ៉ាងច្រើនក្នុងការនោះ។ (សូមអាន ហេព្រើរ ១៣:៤) ជាគ្រិស្តសាសនិក តើយើងអាចធ្វើអ្វីដើម្បីកុំឲ្យទស្សនៈខុសចំពោះអាពាហ៍ពិពាហ៍ មានឥទ្ធិពលមកលើយើង? សូមពិចារណាមើលនូវលក្ខណៈខ្លះដែលធ្វើឲ្យគូអាពាហ៍ពិពាហ៍មានសុភមង្គល។
សូមឲ្យមានព្រះយេហូវ៉ាក្នុងជីវិតអាពាហ៍ពិពាហ៍
៥. ក្នុងចំណងអាពាហ៍ពិពាហ៍ តើពាក្យ«ពួរ៣ធ្លុង»មានន័យអ្វី?
៥ ដើម្បីឲ្យគូអាពាហ៍ពិពាហ៍មានសុភមង្គល ពួកគេត្រូវតែមានព្រះយេហូវ៉ាក្នុងជីវិតអាពាហ៍ពិពាហ៍។ បណ្ដាំរបស់ទ្រង់ចែងថា៖ «ពួរ៣ធ្លុងមិនងាយដាច់ទេ»។ (សាស. ៤:១២) «ពួរ៣ធ្លុង»ជាន័យធៀប ដូច្នេះក្នុងចំណងអាពាហ៍ពិពាហ៍ ស្វាមីនិងភរិយាជាធ្លុងពីរដំបូង ដែលត្រូវវេញនឹងធ្លុងកណ្ដាល ពោលគឺព្រះយេហូវ៉ា។ កាលណាស្វាមីនិងភរិយាមានព្រះយេហូវ៉ាក្នុងអាពាហ៍ពិពាហ៍ខ្លួន នេះផ្ដល់កម្លាំងឲ្យពួកគេប្រឈមមុខនឹងបញ្ហាផ្សេងៗ ហើយក៏ជាគន្លឹះដែលឲ្យមានសុភមង្គលច្រើនបំផុតក្នុងចំណងអាពាហ៍ពិពាហ៍។
៦, ៧. (ក) តើគ្រិស្តសាសនិកអាចធ្វើអ្វី ដើម្បីឲ្យប្រាកដថាមានព្រះក្នុងចំណងអាពាហ៍ពិពាហ៍? (ខ) តើបងស្រីម្នាក់វាយតម្លៃប្ដីលើអ្វី?
៦ ក៏ប៉ុន្តែ តើគូស្វាមីភរិយាអាចធ្វើយ៉ាងណាដើម្បីឲ្យប្រាកដថា អាពាហ៍ពិពាហ៍របស់គេគឺដូចជាពួរបីធ្លុង? ដាវីឌជាអ្នកតែងបទទំនុកដំកើងបានច្រៀងថា៖ «ឱព្រះនៃទូលបង្គំអើយ! ទូលបង្គំមានសេចក្ដីអំណរ នឹងធ្វើតាមព្រះហឫទ័យទ្រង់ អើ ក្រិត្យវិន័យរបស់ទ្រង់ក៏នៅក្នុងចិត្តទូលបង្គំ»។ (ទំនុក. ៤០:៨) យ៉ាងដូច្នេះដែរ សេចក្ដីស្រឡាញ់ចំពោះព្រះជំរុញយើងឲ្យបម្រើទ្រង់ដោយចិត្តស្មោះចំពោះទ្រង់តែមួយ។ ដូច្នេះ គូស្វាមីភរិយាគប្បីបណ្ដុះឲ្យមានចំណងមេត្រីភាពជិតស្និទ្ធជាមួយព្រះយេហូវ៉ា និងមានចិត្តអរសប្បាយដើម្បីធ្វើតាមឆន្ទៈរបស់ទ្រង់។ គូស្វាមីភរិយាគួរព្យាយាមជួយគូរបស់ខ្លួនឲ្យបង្កើនសេចក្ដីស្រឡាញ់ចំពោះព្រះឲ្យបានកាន់តែខ្លាំងឡើង។—សុ. ២៧:១៧
៧ ប្រសិនបើក្រឹត្យវិន័យរបស់ទ្រង់ពិតជានៅក្នុងចិត្តយើងមែន នោះយើងនឹងបង្ហាញគុណសម្បត្ដិដូចជា ជំនឿ សេចក្ដីសង្ឃឹម និងសេចក្ដីស្រឡាញ់។ នេះនឹងជួយឲ្យចំណងអាពាហ៍ពិពាហ៍បានរឹងមាំជាក់ជាពុំខាន។ (១កូ. ១៣:១៣) គ្រិស្តសាសនិកឈ្មោះសាន់ដ្រាបានរៀបការអស់រយៈ៥០ឆ្នាំហើយ គាត់មានប្រសាសន៍ថា៖ «អ្វីដែលមានតម្លៃបំផុតចំពោះខ្ញុំ គឺប្ដីខ្ញុំចេះឲ្យការណែនាំនិងឱវាទដែលមានមូលដ្ឋានលើគម្ពីរ ហើយសេចក្ដីស្រឡាញ់ដែលគាត់មានចំពោះព្រះយេហូវ៉ា គឺខ្លាំងជាងគាត់មានចំពោះខ្ញុំទៅទៀត»។ ស្វាមីទាំងឡាយអើយ! តើភរិយារបស់អ្នកអាចនិយាយពាក្យដូចនេះអំពីអ្នកទេ?
៨. ដើម្បីទទួល«រង្វាន់យ៉ាងល្អ»ក្នុងចំណងអាពាហ៍ពិពាហ៍ តើស្វាមីភរិយាត្រូវធ្វើអ្វី?
៨ ជាស្វាមីភរិយា តើអ្នកចាត់ទុកចំណងមិត្តភាពជាមួយនឹងព្រះយេហូវ៉ា និងកិច្ចការខាងរាជាណាចក្ររបស់ព្រះ ជាអ្វីដ៏សំខាន់បំផុតក្នុងជីវិតទេ? ម្យ៉ាងវិញទៀត តើអ្នកចាត់ទុកគូអាពាហ៍ពិពាហ៍ជាដៃគូក្នុងការបម្រើព្រះយេហូវ៉ាទេ? (លោ. ២:២៤) ស្តេចសាឡូម៉ូនបានសរសេរថា៖ «មានគ្នា២នាក់ នោះវិសេសជាងនៅតែឯង ពីព្រោះគេមានរង្វាន់យ៉ាងល្អកើតពីការនឿយហត់របស់ខ្លួន»។ (សាស. ៤:៩) ប្រាកដមែន ស្វាមីភរិយាត្រូវខំព្យាយាមឲ្យបាន«រង្វាន់យ៉ាងល្អ» ពោលគឺចំណងអាពាហ៍ពិពាហ៍ដែលប្រកបទៅដោយសេចក្ដីស្រឡាញ់ និងស្ថិតស្ថេរដែលព្រះពេញចិត្ត។
៩. (ក) តើស្វាមីមានភារកិច្ចទទួលខុសត្រូវយ៉ាងណា? (ខ) យោងទៅតាមកូល៉ុស ៣:១៩ តើស្វាមីគួរប្រព្រឹត្តបែបណាជាមួយភរិយាខ្លួន?
៩ អ្វីដែលបញ្ជាក់ថាមានឬមិនមានព្រះនៅក្នុងអាពាហ៍ពិពាហ៍ គឺរបៀបដែលស្វាមីភរិយាខំព្យាយាមរស់នៅឲ្យសមស្របតាមសេចក្ដីតម្រូវរបស់ព្រះ។ ស្វាមីមានភារកិច្ចចម្បងក្នុងការផ្គត់ផ្គង់ខាងសម្ភារៈនិងជួយក្រុមគ្រួសារឲ្យមានចំណងមេត្រីភាពជាមួយនឹងព្រះ។ (១ធី. ៥:៨) ពួកគាត់ក៏តម្រូវឲ្យចេះយល់អារម្មណ៍និងចេះផ្គាប់ចិត្តភរិយាដែរ។ នៅកូល៉ុស ៣:១៩ យើងអានថា៖ «ពួកប្រុសៗអើយ ចូរស្រឡាញ់ប្រពន្ធចុះ កុំឲ្យមានចិត្តជិនឆ្អន់ឡើយ»។ អ្នកប្រាជ្ញខាងគម្ពីរម្នាក់និយាយថា៖ «ចិត្តជិនឆ្អន់» រួមបញ្ចូល«ពាក្យសម្ដីល្វីងជូរចត់ មិនបង្ហាញសេចក្ដីស្រឡាញ់ មើលថែរក្សា ផ្គត់ផ្គង់ ការពារ និងជួយគូខ្លួន»។ គឺច្បាស់ហើយ ការប្រព្រឹត្តបែបនេះមិនស័ក្ដិសមក្នុងក្រុមគ្រួសាររបស់គ្រិស្តសាសនិកទេ។ ប្រមុខភាពរបស់ស្វាមីដែលជាមេគ្រួសារ បើអនុវត្តដោយសេចក្ដីស្រឡាញ់ ភរិយាមិនពិបាកក្នុងការចុះចូលទេ។
១០. តើភរិយាជាគ្រិស្តសាសនិក គួរមានចិត្តគំនិតបែបណា?
១០ ភរិយាជាគ្រិស្តសាសនិកដែលចង់មានព្រះយេហូវ៉ាក្នុងជីវិតអាពាហ៍ពិពាហ៍ ក៏ត្រូវរស់នៅឲ្យស្របតាមសេចក្ដីតម្រូវរបស់ព្រះដែរ។ សាវ័កប៉ុលបានសរសេរថា៖ «ស្ត្រីរាល់គ្នាអើយ ចូរឲ្យចុះចូលចំពោះប្ដីខ្លួន ដូចជាចុះចូលនឹងព្រះអម្ចាស់ដែរ។ ដ្បិតប្ដីជាក្បាលនៃប្រពន្ធ ដូចជាព្រះគ្រីស្ទទ្រង់ជាសិរសានៃពួកជំនុំដែរ»។ (អេភ. ៥:២២, ២៣) សាតាំងបញ្ឆោតអេវ៉ា ដោយភូតភរថាការមិនពឹងផ្អែកព្រះនាំឲ្យមានសុភមង្គលរហូត។ សព្វថ្ងៃនេះមានស្មារតីមិនចុះចូលក្នុងអាពាហ៍ពិពាហ៍ជាច្រើន។ ប៉ុន្តែ ចំពោះស្ត្រីដែលកោតខ្លាចព្រះ ការចុះចូលនឹងប្ដីដែលចេះបង្ហាញសេចក្ដីស្រឡាញ់ គ្មានអ្វីគួរឲ្យស្អប់ខ្ពើមសោះ។ ពួកគាត់ចាំថាព្រះយេហូវ៉ាបានតែងតាំងអេវ៉ា ជា«ជំនួយ»សម្រាប់ប្ដីនាង ហើយព្រះចាត់ទុកមុខនាទីនេះជាកិត្ដិយសមែន។ (លោ. ២:១៨) ភរិយាដែលសុខចិត្តទទួលមុខនាទីដែលព្រះតម្រូវឲ្យនាង ពិតជា«មកុដ»ដល់ប្ដីខ្លួន។—សុ. ១២:៤
១១. តើបងប្រុសម្នាក់បាននិយាយយ៉ាងណា ស្តីអំពីអ្វីដែលបានជួយពង្រឹងចំណងអាពាហ៍ពិពាហ៍របស់គាត់?
១១ ជំនួយមួយទៀត ដើម្បីមានព្រះក្នុងអាពាហ៍ពិពាហ៍ គឺឲ្យស្វាមីភរិយាសិក្សាបណ្ដាំរបស់ទ្រង់ជាមួយគ្នា។ ចែរ៉ុលដែលបានរៀបការអស់៥៥ឆ្នាំហើយ មានប្រសាសន៍ថា៖ «ការអាននិងសិក្សាគម្ពីរជាមួយគ្នាជាឱសថដ៏ចំណាន ក្នុងការធ្វើឲ្យជីវិតអាពាហ៍ពិពាហ៍ប្រកបទៅដោយជោគជ័យ»។ គាត់និយាយបន្ថែមថា៖ «ការបំពេញភារកិច្ចជាមួយគ្នាជាពិសេសក្នុងកិច្ចបម្រើព្រះនាំឲ្យស្វាមីភរិយាមានភាពជិតដិត ហើយជិតស្និទ្ធនឹងព្រះយេហូវ៉ាដែរ»។ ការសិក្សាគម្ពីរជាមួយគ្នា ជួយគ្រួសារឲ្យរក្សាគោលការណ៍របស់ព្រះយេហូវ៉ា ធ្វើឲ្យចំណងមេត្រីភាពនឹងព្រះយេហូវ៉ាកាន់តែរឹងមាំឡើង និងជួយយើងឲ្យរីកចម្រើនជានិច្ច។
១២, ១៣. (ក) ការអធិដ្ឋានជាមួយគ្នា ហេតុអ្វីក៏សំខាន់ម្ល៉េះ? (ខ) តើកិច្ចការគ្រិស្តសាសនិកអ្វីទៀតដែលពង្រឹងចំណងអាពាហ៍ពិពាហ៍?
១២ ស្វាមីភរិយាដែលមានសុភមង្គលក៏អធិដ្ឋានជាមួយគ្នាដែរ។ ពេលប្ដីអធិដ្ឋានពីអ្វីដែលមាន‹ក្នុងចិត្ត› ដោយធ្វើសំណូមពរចំៗដែលទាក់ទងនឹងកាលៈទេសៈរបស់ពួកគេ ប្រាកដជាជួយពង្រឹងចំណងអាពាហ៍ពិពាហ៍។ (ទំនុក. ៦២:៨) ឧទាហរណ៍ ក្រោយពីយើងទាំងពីរនាក់សុំការណែនាំពីព្រះដែលមានព្រះចេស្ដាបំផុត នោះងាយជាងឲ្យយើងបំបាត់ចោលការខ្វែងគំនិតចេញ! (ម៉ាថ. ៦:១៤, ១៥) ស្វាមីភរិយាគួរធ្វើតាមសេចក្ដីអធិដ្ឋាននិងមានចិត្តចង់ជួយគូរបស់ខ្លួន «ហើយទ្រាំទ្រគ្នា ទាំងអត់ទោសទៅវិញទៅមក»។ (កូល. ៣:១៣) សូមចាំថា សេចក្ដីអធិដ្ឋានបង្ហាញពីទំនុកចិត្តរបស់យើងទៅលើព្រះ។ ស្តេចដាវីឌនិយាយថា៖ «ភ្នែករបស់មនុស្សទាំងអស់រង់ចាំតែទ្រង់»។ (ទំនុក. ១៤៥:១៥) នៅពេលដែលយើងពឹងពាក់ទៅលើព្រះយេហូវ៉ាតាមរយៈការអធិដ្ឋាន នោះយើងនឹងមានទុក្ខកង្វល់តិចដោយដឹងថា ‹ទ្រង់តែងយកព្រះទ័យទុកដាក់នឹងយើង›។—១ពេ. ៥:៧
១៣ វិធីមួយទៀតដែលជួយរក្សាឲ្យមានព្រះយេហូវ៉ាក្នុងអាពាហ៍ពិពាហ៍ គឺដោយចូលរួមប្រជុំនិងទៅផ្សព្វផ្សាយជាមួយគ្នា។ នៅឯកិច្ចប្រជុំ គូស្វាមីភរិយារៀនឲ្យចេះទប់ទល់នឹង«ឧបាយកលទាំងអម្បាលម៉ាន» ដែលសាតាំងប្រើដើម្បីបំបែកបំបាក់ក្រុមគ្រួសារ។ (អេភ. ៦:១១) ស្វាមីភរិយាដែលតែងតែធ្វើកិច្ចបម្រើផ្សាយជាមួយគ្នា បង្ហាត់ខ្លួនឲ្យ«កាន់យ៉ាងខ្ជាប់ខ្ជួនដោយឥតរង្គើ»។—១កូ. ១៥:៥៨
ពេលមានបញ្ហា
១៤. តើកត្ដាអ្វីខ្លះដែលធ្វើឲ្យអាពាហ៍ពិពាហ៍មានការលំបាក?
១៤ ពិតមែន ថ្វីបើយោបល់នៅខាងលើនេះមិនជាចម្លែកចំពោះអ្នកក្ដី សូមអញ្ជើញពិភាក្សាដោយចំហជាមួយគូខ្លួនចុះ។ ហើយពិនិត្យមើលក្រែងលោមានអ្វីដែលត្រូវកែប្រែ និងធ្វើតាមយោបល់ក្នុងអាពាហ៍ពិពាហ៍របស់អ្នក។ ប៉ុន្តែ គម្ពីរទទួលស្គាល់ថា ទោះអស់អ្នកដែលមានព្រះនៅក្នុងជីវិតអាពាហ៍ពិពាហ៍ក្ដី ក៏«នឹងមានសេចក្ដីទុក្ខព្រួយខាងសាច់ឈាម»ដែរ។ (១កូ. ៧:២៨) ចំណងអាពាហ៍ពិពាហ៍របស់អ្នកបម្រើស្មោះភក្ដីរបស់ព្រះក៏មានការពិបាកដែរ ដោយហេតុថាមនុស្សមានភាពមិនល្អឥតខ្ចោះ ឥទ្ធិពលអាក្រក់ពីមនុស្សក្នុងពិភពលោកដែលបំពានច្បាប់ និងកលល្បិចរបស់សាតាំង។ (២កូ. ២:១១) ក៏ប៉ុន្តែ ព្រះយេហូវ៉ាជួយយើងឲ្យស៊ូទ្រាំនឹងបញ្ហាទាំងនេះ។ មែនហើយ យើងក៏អាចស៊ូទ្រាំបាន! យ៉ូបជាអ្នកបម្រើស្មោះត្រង់ បានបាត់បង់ហ្វូងសត្វ ពួកបាវព្រាវ និងពួកកូនប្រុសកូនស្រីលោក។ ប៉ុន្តែ គម្ពីរចែងថា៖ «ក្នុងគ្រប់សេចក្ដីទាំងនេះយ៉ូបមិនបានធ្វើបាបឡើយ ក៏មិនបានប្រកាន់ទោសដល់ព្រះដែរ»។—យ៉ូប ១:១៣-២២
១៥. តើការថប់បារម្ភបណ្ដាលឲ្យមនុស្សប្រព្រឹត្តយ៉ាងណា? បើម្នាក់ខឹង តើម្នាក់ទៀតត្រូវធ្វើដូចម្ដេច?
១៥ ម្យ៉ាងវិញទៀត ប្រពន្ធយ៉ូបនិយាយថា៖ «អ្នកនៅតែរក្សាលក្ខណៈខ្លួនទៀតឬ? ចូរប្រមាថដល់ព្រះហើយស្លាប់ទៅចុះ!»។ (យ៉ូប ២:៩) ប្រាកដមែន ពេលមានសោកនាដកម្មឬកាលៈទេសៈលំបាកផ្សេងៗ ការថប់បារម្ភអាចបណ្ដាលឲ្យមនុស្សប្រព្រឹត្តដោយមិនគិត។ អ្នកប្រាជ្ញម្នាក់សង្កេតថា៖ «ការសង្កត់សង្កិនរមែងបណ្ដាលឲ្យមនុស្សដែលមានប្រាជ្ញា ទៅជាក្រឡកចិត្តវិញ»។ (សាស. ៧:៧) ប្រសិនបើភរិយាឬស្វាមីខឹង និយាយទ្រគោះបោះបោក ដោយសារមានភាពតានតឹង ឬ«ការសង្កត់សង្កិន» សូមខំអត់សង្កត់ចិត្ត។ កំហឹងទល់កំហល់អាចធ្វើឲ្យរឿងតូចទៅជារឿងធំ។ (សូមអាន ទំនុកដំកើង ៣៧:៨) ដូច្នេះ ចូរបំភ្លេចនូវការនិយាយ«ជ្រួសហួស»មកពីខកចិត្តឬការធ្លាក់ទឹកចិត្ត។—យ៉ូប ៦:៣
១៦. (ក) តើពាក្យរបស់ព្រះយេស៊ូនៅម៉ាថាយ ៧:១-៥ ទាក់ទងនឹងអាពាហ៍ពិពាហ៍យ៉ាងណា? (ខ) ហេតុអ្វីក៏ការមានតុល្យភាពសំខាន់ម្ល៉េះក្នុងរង្វង់អាពាហ៍ពិពាហ៍?
១៦ គូអាពាហ៍ពិពាហ៍ត្រូវមានគំនិតសមហេតុសមផល។ គូអាពាហ៍ពិពាហ៍ម្នាក់អាចសង្កេតឃើញលក្ខណៈម្យ៉ាងរបស់គូខ្លួន ហើយគិតថា ‹ខ្ញុំអាចធ្វើឲ្យគាត់ដូរបាន›។ ដោយស្រឡាញ់និងចេះអត់ធ្មត់ អ្នកប្រហែលជាអាចជួយគូរបស់អ្នកឲ្យកែប្រែបន្ដិចម្ដងៗ។ ប៉ុន្តែ ចូរកុំភ្លេចថា ព្រះយេស៊ូបានប្រដូចការចាប់កំហុសតូចតាចរបស់បងប្អូន ទៅនឹងមនុស្សម្នាក់ឃើញ«កំទេច»ក្នុងភ្នែកបងប្អូន តែមិនបានឃើញ«ធ្នឹម»ក្នុងភ្នែករបស់ខ្លួនទេ។ ព្រះយេស៊ូដាស់តឿនយើងថា៖ «កុំឲ្យថ្កោលទោសគេឡើយ ដើម្បីមិនឲ្យមានគេថ្កោលអ្នកវិញ»។ (សូមអាន ម៉ាថាយ ៧:១-៥) នេះមិនបានន័យថា គូអាពាហ៍ពិពាហ៍មិនគួរព្យាយាមកែប្រែគុណវិបត្ដិគ្នាទៅវិញទៅមកទេ។ រ៉ូបើតរៀបការជិត៤០ឆ្នាំហើយ គាត់មានប្រសាសន៍ថា៖ «ការនិយាយត្រង់ៗហើយសុខចិត្តទទួលយោបល់របស់គូខ្លួន នោះគូអាពាហ៍ពិពាហ៍ប្រហែលជាត្រូវតែមានការកែប្រែក្នុងជីវិត»។ យើងត្រូវតែមានតុល្យភាពចំពោះរឿងនេះ។ ជាជាងមិនសប្បាយចិត្តនឹងលក្ខណៈខ្លះៗនៃគូខ្លួន ចូររៀនឲ្យចេះអបអរនិងរីករាយនូវគុណសម្បត្ដិល្អៗដែលគូរបស់ខ្លួនមាននៅឥឡូវវិញ។—សាស. ៩:៩
១៧, ១៨. ពេលមានទុក្ខលំបាក តើយើងសូមជំនួយពីអ្នកណា?
១៧ ការលំបាកតែងតែកើតឡើងនៅពេលដែលមានកាលៈទេសៈប្រែប្រួល។ គូអាពាហ៍ពិពាហ៍ទំនងជាជួបប្រទះការលំបាកពេលមានកូន។ ប្ដីឬប្រពន្ធ ឬកូនអាចធ្លាក់ខ្លួនឈឺជាទម្ងន់។ មាតាបិតាចាស់ជរាប្រហែលជាត្រូវការការបីបាច់ថែទាំ។ ពេលដែលកូនៗធំពេញវ័យពួកគេអាចបែកចេញពីផ្ទះទៅរស់នៅឆ្ងាយពីឪពុកម្ដាយ។ ប្រហែលជាមានការប្រែប្រួលផ្សេងទៀត ដូចជាភារកិច្ចក្នុងក្រុមជំនុំជាដើម។ កាលៈទេសៈប្រែប្រួលទាំងអស់នេះអាចនាំឲ្យចំណងអាពាហ៍ពិពាហ៍មានភាពតានតឹង។
១៨ ប្រសិនបើភាពតានតឹងធ្វើឲ្យចំណងអាពាហ៍ពិពាហ៍ជិតបាក់បែក តើអ្នកត្រូវធ្វើដូចម្ដេច? (សុ. ២៤:១០) កុំរសាយព្យាយាមសោះឡើយ! សាតាំងចង់ឲ្យអ្នកបម្រើព្រះបោះបង់ចោលការថ្វាយបង្គំបរិសុទ្ធ។ វារឹតតែសប្បាយជាងទៅទៀត បើប្ដីនិងប្រពន្ធធ្វើដូច្នេះ។ ហេតុដូច្នេះហើយ ចូរខំប្រឹងឲ្យអស់ពីសមត្ថភាពដើម្បីរក្សាចំណងអាពាហ៍ពិពាហ៍ឲ្យបានមាំទាំដូចពួរបីធ្លុង។ គម្ពីរមានកំណត់ហេតុជាច្រើនស្តីពីមនុស្សដែលនៅតែស្មោះត្រង់ ទោះជាមានទុក្ខលំបាកយ៉ាងខ្លាំងក្ដី។ ឧទាហរណ៍ ដាវីឌសូមព្រះយេហូវ៉ាដោយអស់ពីចិត្តថា៖ «ឱព្រះអង្គអើយ! សូមទ្រង់អាណិតមេត្ដាដល់ទូលបង្គំ ដ្បិតមនុស្ស . . . គេសង្កត់សង្កិន . . . ទូលបង្គំ»ហើយ។ (ទំនុក. ៥៦:១) តើអ្នកដែលគិតថាមាន«មនុស្ស»សង្កត់សង្កិនអ្នកទេ? មិនថាអ្នកមានការតានតឹងដោយសារអ្វីដែលនៅឆ្ងាយ ឬមនុស្សជិតស្និទ្ធរបស់អ្នកក្ដី ចូរចាំថាដាវីឌមានកម្លាំងអាចស៊ូទ្រាំបាន។ យើងក៏អាចស៊ូទ្រាំបានដែរ។ ដាវីឌមានប្រសាសន៍ថា៖ «ខ្ញុំបានស្វែងរកព្រះយេហូវ៉ា ហើយទ្រង់ក៏ឆ្លើយតបមកខ្ញុំ ក៏ប្រោសឲ្យខ្ញុំរួចពីអស់ទាំងសេចក្ដីភិតភ័យរបស់ខ្ញុំ»។—ទំនុក. ៣៤:៤
ទទួលពរច្រើនថែមទៀត
១៩. តើតាមរបៀបណាដែលយើងអាចជៀសវាងពីកលល្បិចរបស់សាតាំងបាន?
១៩ ក្នុងពេលជាន់ក្រោយបង្អស់នេះ គូអាពាហ៍ពិពាហ៍ត្រូវ«កំសាន្ត ហើយស្អាងចិត្តគ្នាទៅវិញទៅមក»។ (១ថែ. ៥:១១) ចូរកុំភ្លេចឲ្យសោះ សាតាំងនៅតែចោទថា យើងមានភក្ដីភាពចំពោះព្រះយេហូវ៉ា ដោយសារយើងចង់បានប្រយោជន៍ផ្ទាល់ខ្លួន។ វាប្រើគ្រប់មធ្យោបាយ រួមទាំងធ្វើឲ្យចំណងអាពាហ៍ពិពាហ៍មានការប្រេះឆា ដើម្បីបំបែកបំបាក់ចិត្តស្មោះរបស់យើងចំពោះព្រះ។ ដើម្បីជៀសឲ្យផុតពីកិច្ចកលរបស់សាតាំង យើងត្រូវតែមានទំនុកចិត្តទាំងស្រុងទៅលើព្រះយេហូវ៉ា។ (សុ. ៣:៥, ៦) ប៉ុលបានសរសេរថា៖ «ខ្ញុំអាចនឹងធ្វើគ្រប់ទាំងអស់បាន ដោយសារព្រះគ្រីស្ទដែលទ្រង់ចំរើនកំឡាំងដល់ខ្ញុំ»។—ភី. ៤:១៣
២០. បើមានព្រះយេហូវ៉ាក្នុងចំណងអាពាហ៍ពិពាហ៍ តើយើងទទួលពរអ្វីខ្លះ?
២០ ការមានព្រះក្នុងចំណងអាពាហ៍ពិពាហ៍ គឺផ្ដល់ពរយ៉ាងច្រើន។ យ៉ូអែលនិងភរិយាដែលបានរៀបការអស់៥១ឆ្នាំហើយទទួលបានពរច្រើនមែន។ គាត់និយាយថា៖«ខ្ញុំអរគុណព្រះយេហូវ៉ាជារឿយៗចំពោះការមានសុភមង្គលក្នុងចំណងអាពាហ៍ពិពាហ៍។ ប្រពន្ធខ្ញុំពិតជាគូដែលល្អកម្ររកបាន»។ តើពួកគាត់រក្សាចំណងអាពាហ៍ពិពាហ៍បានរឹងមាំតាមរបៀបណា? «យើងរមែងខិតខំបង្ហាញចិត្តសប្បុរស អត់ធ្មត់ សេចក្ដីស្រឡាញ់គ្នាទៅវិញទៅមកជានិច្ច»។ នៅក្នុងរបៀបរបបពិភពលោកនេះ គ្មាននរណាម្នាក់អាចធ្វើល្អឥតខ្ចោះបានឡើយ។ យ៉ាងណាក៏ដោយ ចូរយើងខំប្រឹងអនុវត្តតាមគោលការណ៍របស់ព្រះក្នុងជីវិតអាពាហ៍ពិពាហ៍របស់យើង។ បើយើងអនុវត្តគោលការណ៍របស់ព្រះមែន នោះចំណងអាពាហ៍ពិពាហ៍ក្លាយទៅជាដូច«ពួរ៣ធ្លុងមិនងាយដាច់ទេ»។—សាស. ៤:១២
តើអ្នកនៅចាំទេ?
• តើការមានព្រះយេហូវ៉ាក្នុងចំណងអាពាហ៍ពិពាហ៍ មានន័យអ្វី?
• ពេលជួបការលំបាក តើគូអាពាហ៍ពិពាហ៍អាចធ្វើអ្វី?
• តើអាចដឹងថាមានព្រះក្នុងចំណងអាពាហ៍ពិពាហ៍យ៉ាងដូចម្ដេច?
[រូបភាពនៅទំព័រ២០]
ការអធិដ្ឋានជាមួយគ្នា ជួយគូអាពាហ៍ពិពាហ៍ឲ្យស៊ូទ្រាំពេលជួបការលំបាក