ចូរបង្រៀនកូនរបស់អ្នក
‹គាត់បានកាន់ខ្ជាប់តាមព្រះយេហូវ៉ា›
តើធ្លាប់មានអ្នកណាប្រាប់អ្នកឲ្យកាន់អ្វីមួយយ៉ាងជាប់ឬទេ?—a ឪពុកឬម្ដាយរបស់អ្នកប្រហែលជាប្រាប់អ្នកឲ្យកាន់ដៃគាត់យ៉ាងជាប់ពេលឆ្លងថ្នល់។ គាត់ប្រាប់អ្នកបែបនេះដោយសារគាត់ស្រឡាញ់អ្នក និងមិនចង់ឲ្យអ្នកមានគ្រោះថ្នាក់។ ដូចគ្នាដែរ យើងចង់ពិចារណាអំពីបុគ្គលម្នាក់ដែលគម្ពីររៀបរាប់ថា‹គាត់បានកាន់ខ្ជាប់តាមព្រះយេហូវ៉ា›ដែលជាព្រះពិត។ បុគ្គលម្នាក់នោះឈ្មោះហេសេគា។ សូមឲ្យយើងមើលអ្វីដែលយើងអាចរៀនពីគំរូរបស់គាត់។
ពេលហេសេគានៅក្មេង គាត់រស់នៅក្នុងស្ថានភាពដ៏អាក្រក់។ ឪពុករបស់គាត់ អេហាសដែលជាស្តេចយូដា បានឈប់គោរពប្រណិប័តន៍ព្រះយេហូវ៉ា។ ពេលហេសេគានៅតូចនៅឡើយ អេហាសបាននាំមុខបណ្ដាជនក្នុងការគោរពបូជាព្រះមិនពិត។ យ៉ាងហោចណាស់អេហាសបានសម្លាប់និងបូជាកូនប្រុសរបស់ខ្លួន ដែលត្រូវជាប្អូនប្រុសរបស់ហេសេគាឲ្យព្រះនោះទៀតផង!
ទោះជាអេហាសបន្តធ្វើអាក្រក់យ៉ាងណាក៏ដោយ ហេសេគាបានស្ដាប់តាមព្រះយេហូវ៉ាជានិច្ច។ តើអ្នកគិតថា ការធ្វើដូច្នេះជាការពិបាកសម្រាប់គាត់ឬទេ?— ពិតជាពិបាកមែន។ ប៉ុន្តែហេសេគាមិនបានឈប់ព្យាយាមទេ! សូមឲ្យយើងរៀនអំពីរបៀបដែលគាត់អាចកាន់ខ្ជាប់តាមព្រះយេហូវ៉ា និងអំពីរបៀបដែលយើងអាចធ្វើដូចគាត់ដែរ។
ហេសេគាបានរៀនអំពីអ្នកឯទៀតដែលបានកាន់ខ្ជាប់តាមព្រះយេហូវ៉ា ពោលគឺដាវីឌ។ ទោះជាដាវីឌបានរស់នៅរាប់រយឆ្នាំមុនក៏ដោយ ហេសេគាអាចរៀនអំពីគាត់តាមរយៈបទគម្ពីរផ្សេងៗ។ ដាវីឌបានសរសេរថា៖ «បើកាលណាឪពុកម្ដាយលះចោលទូលបង្គំ នោះព្រះយេហូវ៉ាទ្រង់នឹងទទួលទូលបង្គំទុកវិញ»។
តើអ្នកគិតថាអ្វីបានជួយដាវីឌឲ្យស្ដាប់បង្គាប់ព្រះយេហូវ៉ា?— គឺជំនឿរបស់គាត់! ដាវីឌមានទំនុកចិត្តថា បើគាត់ស្ដាប់បង្គាប់ព្រះយេហូវ៉ា លោកនឹងជួយគាត់ជាមិនខាន។ ដាវីឌមិនដែលសង្ស័យអំពីរឿងនេះទេ! ពេលហេសេគារំពឹងគិតអំពីដាវីឌ នេះប្រាកដជាបានជួយគាត់ឲ្យកាន់ខ្ជាប់តាមព្រះយេហូវ៉ាដោយស្ដាប់បង្គាប់លោក។ អ្នកក៏អាចមានទំនុកចិត្តដែរថា បើអ្នកកាន់ខ្ជាប់តាមព្រះយេហូវ៉ាដោយស្ដាប់បង្គាប់លោក នោះលោកនឹងជួយអ្នកជាមិនខាន។
ប៉ុន្តែ ចុះយ៉ាងណាបើឪពុកឬម្ដាយរបស់អ្នកមិនមែនជាអ្នកគោរពប្រណិប័តន៍ព្រះយេហូវ៉ានោះ?— ព្រះប្រាប់ដល់កូនក្មេងទាំងអស់ថា ពួកគេគួរស្ដាប់បង្គាប់ឪពុកម្ដាយរបស់ពួកគេ។ ដូច្នេះ អ្នកគួរតែគោរពឪពុកម្ដាយរបស់អ្នក។ ក៏ប៉ុន្តែ បើឪពុកម្ដាយរបស់អ្នកប្រាប់អ្នកឲ្យធ្វើអ្វីមួយដែលព្រះហាម អ្នកអាចពន្យល់ពួកគាត់អំពីមូលហេតុដែលអ្នកមិនអាចធ្វើតាមបាន។ អ្នកមិនគួរនិយាយកុហក លួច ឬធ្វើអំពើអាក្រក់ណាដែលព្រះប្រាប់ថាជាការខុស មិនថាអ្នកណាជាអ្នកប្រាប់អ្នកឲ្យធ្វើក៏ដោយ។ គឺជាការត្រឹមត្រូវដែលអ្នកស្ដាប់បង្គាប់ព្រះ!
មានគំរូផ្សេងទៀតដែលអ្នកអាចយកតម្រាប់តាម។ ហេសេគាមិនគ្រាន់តែរៀនអំពីគំរូរបស់ដាវីឌប៉ុណ្ណោះទេ តែគាត់ក៏បានរៀនអំពីគំរូរបស់យ៉ូថាមដែលជាជីតារបស់គាត់ដែរ។ ហេសេគាអាចរៀនពីគំរូរបស់គាត់បាន ហើយនៅសព្វថ្ងៃនេះយើងក៏អាចធ្វើដូច្នេះតាមរយៈការអានគម្ពីរដែរ។ តើអ្នកអាចនឹកឃើញគំរូផ្សេងទៀតដែលយើងអាចយកតម្រាប់តាមឬទេ?—
ពិតមែនហើយ ក្នុងគម្ពីរអ្នកអាចរៀនអំពីកំហុសខ្លះៗដែលហេសេគា ដាវីឌ យ៉ូថាម និងមនុស្សដែលមិនល្អឥតខ្ចោះឯទៀតបានធ្វើ។ ប៉ុន្តែ មនុស្សទាំងនោះស្រឡាញ់ព្រះយេហូវ៉ា ហើយពួកគេបានសារភាពកំហុសរបស់ខ្លួន ថែមទាំងខំព្យាយាមធ្វើអ្វីដែលត្រឹមត្រូវដែរ។ សូមចាំថា មានតែលោកយេស៊ូដែលជាបុត្ររបស់ព្រះតែមួយប៉ុណ្ណោះដែលជាមនុស្សល្អឥតខ្ចោះ។ សូមយើងសិក្សាអំពីលោកជាពិសេស ហើយខំយកតម្រាប់តាមគំរូរបស់លោក។
សូមអានគម្ពីររបស់អ្នក
ពង្សាវតារក្សត្រទី២ ១៨:៦; របាក្សត្រទី២ ២៨:១-៣
ទំនុកតម្កើង ២៧:១០; អេភេសូរ ៦:១; កូឡុស ៣:២០
របាក្សត្រទី២ ២៧:១, ២; ពេត្រុសទី១ ២:២១
[កំណត់សម្គាល់]
a បើអ្នកអានជាមួយកូនតូច ហើយឃើញថាមានអូសបន្ទាត់ នេះជួយរំលឹកអ្នកឲ្យផ្អាក និងលើកទឹកចិត្តកូនឲ្យឆ្លើយ។