ចូរបង្រៀនកូនរបស់អ្នក
លោកយេស៊ូគ្រិស្ត តើលោកកំពុងធ្វើអ្វីនៅឥឡូវនេះ?
នៅខែធ្នូ មនុស្សជាច្រើនទូទាំងពិភពលោកឃើញរូបភាពឬរូបសំណាកលោកយេស៊ូជាទារកម្នាក់។ លោកនៅក្នុងស្នូក ដែលជាប្រអប់ដ៏ធំមួយសម្រាប់ដាក់ចំណីសត្វ។ ប៉ុន្តែ តើយើងគួរនឹកចាំលោកយេស៊ូគ្រាន់តែជាទារកម្នាក់ប៉ុណ្ណោះឬ?—a មានវិធីដ៏សំខាន់ជាងដើម្បីឲ្យយើងនឹកចាំអំពីលោក។ យើងអាចរៀនអំពីរឿងនេះតាមរយៈអ្វីដែលបានកើតឡើងចំពោះពួកគង្វាលមួយក្រុមដែលនៅឯវាលនាយប់មួយក្បែរក្រុងបេថ្លេហិម។
ភ្លាមៗនោះ មានទេវតាមួយរូបបានលេចមកជួបពួកគង្វាល។ ទេវតានោះប្រាប់ពួកគេថា៖ «ថ្ងៃនេះអ្នកដែលនឹងសង្គ្រោះអ្នករាល់គ្នា គឺគ្រិស្តដ៏ជាម្ចាស់ បានកើតមក»។ ទេវតាក៏បានប្រាប់ដែរថា ពួកគេនឹងឃើញលោកយេស៊ូ«រុំដោយចម្រៀកសំពត់ ហើយកំពុងដេកនៅក្នុងស្នូក»។ រំពេចនោះ មានទេវតាផ្សេងទៀតជាច្រើនបានលេចមកហើយចាប់ផ្ដើម«សរសើរព្រះ»។
បើកូនបានស្ដាប់ឮពួកទេវតាកំពុងសរសើរព្រះ តើកូននឹងមានអារម្មណ៍យ៉ាងណា?— ពួកគង្វាលសប្បាយចិត្តណាស់! ពួកគេបាននិយាយថា៖ «ចូរយើងទៅក្រុងបេថ្លេហិមភ្លាម ហើយមើលអ្វីដែលបានកើតឡើងនៅទីនោះ»។ នៅទីនោះពួកគេឃើញ«ម៉ារៀនិងយ៉ូសែប ហើយក៏ឃើញទារកនោះកំពុងដេកនៅក្នុងស្នូក»។
ពេលពួកគង្វាលប្រាប់អ្នកឯទៀតអំពីអ្វីដែលបានកើតឡើង ពួកគេទាំងអស់គ្នាក៏នឹកអស្ចារ្យក្នុងចិត្ត។ តើកូនសប្បាយចិត្តដោយដឹងអំពីអ្វីដ៏អស្ចារ្យទាំងនេះទេ?— យើងទាំងអស់គ្នាដែលស្រឡាញ់ព្រះ ពិតជាសប្បាយចិត្តមែន។ ឥឡូវសូមយើងពិគ្រោះអំពីមូលហេតុដែលកំណើតរបស់លោកយេស៊ូធ្វើឲ្យយើងមានសុភមង្គលក្រៃលែង។ ដើម្បីធ្វើដូច្នោះ សូមគិតឡើងវិញអំពីពេលដែលម៉ារៀមិនទាន់រៀបការ។
នៅថ្ងៃមួយទេវតាមួយរូបឈ្មោះកាព្រីយ៉ែលបានទៅជួបម៉ារៀ។ គាត់សន្យាថា នាងនឹងមានបុត្រមួយដែល«នឹងធំឧត្តម ក៏នឹងត្រូវហៅថាបុត្ររបស់ព្រះដ៏ខ្ពង់ខ្ពស់បំផុត»។ ទេវតាកាព្រីយ៉ែលក៏បាននិយាយទៀតថា៖ «លោកក៏នឹងគ្រប់គ្រងជាស្តេច . . . ហើយរាជាណាចក្ររបស់លោកនឹងមិនសាបសូន្យឡើយ»។
ម៉ារៀចង់ដឹងថា តើតាមរបៀបណារឿងនេះអាចកើតឡើងបាន? ពីព្រោះនាងមិនធ្លាប់រួមរស់ជាមួយបុរសណាទេ។ ដូច្នេះ កាព្រីយ៉ែលពន្យល់នាងថា៖ «ឫទ្ធានុភាពរបស់ព្រះដ៏ខ្ពង់ខ្ពស់បំផុតនឹងគ្របបាំងនាង» ហើយ«កូនដែលនឹងកើតមកនោះ នឹងត្រូវហៅថាជាបរិសុទ្ធ និងជាបុត្ររបស់ព្រះ»។ ព្រះបានផ្ទេរជីវិតបុត្ររបស់លោកពីស្ថានសួគ៌ ហើយដាក់ទៅក្នុងផ្ទៃម៉ារៀដើម្បីឲ្យកើតជាទារកម្នាក់។ នោះពិតជាការអស្ចារ្យណាស់!
តើកូនធ្លាប់ឃើញរូបភាពឬការសម្ដែងអំពី«អ្នកប្រាជ្ញ»បីនាក់កំពុងទៅជួបទារកយេស៊ូជាមួយនឹងពួកគង្វាលទេ?— រឿងបែបនោះបានត្រូវគេស្គាល់ជាទូទៅ នៅពេលមានបុណ្យណូអែល។ ប៉ុន្តែនោះមិនមែនជារឿងត្រឹមត្រូវទេ។ តាមពិត«អ្នកប្រាជ្ញ»ទាំងនោះជាពួកហោរាសាស្ត្រ ហើយពួកគេធ្វើអ្វីដែលព្រះយេហូវ៉ាស្អប់។ សូមយើងពិនិត្យមើលអ្វីដែលបានកើតឡើងពេលពួកគេបានទៅដល់ទីនោះ។ គម្ពីរចែងថា៖ «លុះបានចូលក្នុងផ្ទះនោះហើយ ពួកគេឃើញកូនតូចជាមួយនឹងម៉ារៀជាម្ដាយ»។ ដូច្នេះ នៅពេលនោះលោកយេស៊ូមិនមែនជាទារកដែលនៅក្នុងស្នូកទេ។ ផ្ទុយទៅវិញ លោកជាកូនតូចមួយរូបដែលកំពុងនៅក្នុងផ្ទះជាមួយយ៉ូសែបនិងម៉ារៀ!
តើតាមរបៀបណាពួកហោរាសាស្ត្របានរកឃើញលោកយេស៊ូ?— ពួកគេបានត្រូវដឹកនាំដោយ«ផ្កាយ»មួយ។ មុនដំបូងផ្កាយនោះមិនបាននាំពួកគេទៅក្រុងបេថ្លេហិមទេ តែនាំទៅជួបស្តេចហេរ៉ូឌនៅក្រុងយេរូសាឡិមវិញ។ គម្ពីរចែងថាហេរ៉ូឌចង់រកលោកយេស៊ូដើម្បីសម្លាប់ចោល។ ឥឡូវសូមគិតអំពីរឿងនេះ។ តើកូនគិតថាអ្នកណាដែលធ្វើឲ្យផ្កាយលេចមកដើម្បីនាំពួកហោរាសាស្ត្រទៅជួបហេរ៉ូឌ?— ច្បាស់ជាមិនមែនព្រះយេហូវ៉ាទេ ប៉ុន្តែគឺមេកំណាចសាថានដែលជាសត្រូវរបស់លោក!
នៅសព្វថ្ងៃនេះ សាថានព្យាយាមធ្វើឲ្យមនុស្សនឹកចាំអំពីលោកយេស៊ូគ្រាន់តែជាកូនង៉ែតម្នាក់ប៉ុណ្ណោះ។ ប៉ុន្តែ ទេវតាកាព្រីយ៉ែលបានប្រាប់ម៉ារៀថា៖ «លោកក៏នឹងគ្រប់គ្រងជាស្តេច . . . ហើយរាជាណាចក្ររបស់លោកនឹងមិនសាបសូន្យឡើយ»។ ឥឡូវនេះ លោកយេស៊ូកំពុងគ្រប់គ្រងជាស្តេចនៅស្ថានសួគ៌ ហើយមិនយូរទៀតលោកនឹងបំផ្លាញចោលសត្រូវទាំងអស់របស់ព្រះ។ នោះជាអ្វីដែលយើងគួរនឹកចាំអំពីលោកយេស៊ូ ហើយយើងក៏ត្រូវប្រាប់រឿងនេះដល់អ្នកឯទៀតដែរ។
សូមអានពីគម្ពីររបស់អ្នក
ម៉ាថាយ ២:៧-១២; ពេត្រុសទី១ ៥:៨
ការបើកបង្ហាញ ១៩:១៩-២១; យ៉ូហានទី១ ២:១៧
[កំណត់សម្គាល់]
a បើអ្នកអានជាមួយកូនតូច ហើយឃើញថាមានអូសបន្ទាត់ នេះជួយរំលឹកអ្នកឲ្យផ្អាក និងលើកទឹកចិត្តកូនឲ្យឆ្លើយ។
[រូបភាពនៅទំព័រ១៤]
[រូបភាពនៅទំព័រ១៥]
[រូបភាពនៅទំព័រ១៤]