«អ្នករាល់គ្នានឹងធ្វើជាសាក្សីបញ្ជាក់អំពីខ្ញុំ»
«លោក[យេស៊ូ]មានប្រសាសន៍ទៅពួកគាត់ថា៖ . . . ‹អ្នករាល់គ្នានឹងធ្វើជាសាក្សី បញ្ជាក់អំពីខ្ញុំ . . . រហូតដល់កន្លែងឆ្ងាយបំផុតនៅផែនដី›»។—សកម្ម. ១:៧, ៨
១, ២. (ក) តើអ្នកណាជាសាក្សីប្រសើរបំផុតរបស់ព្រះយេហូវ៉ា? (ខ) តើនាមយេស៊ូមានអត្ថន័យយ៉ាងណា ហើយតើលោកបានធ្វើអ្វីដើម្បីជួយជនជាតិយូដាឲ្យទទួលការពេញចិត្តពីព្រះយេហូវ៉ាឡើងវិញ?
ពេលលោកយេស៊ូបានត្រូវគេកាត់ទោស លោកបានប្រាប់អភិបាលតំបន់យូឌាដែលជាជនជាតិរ៉ូម ឈ្មោះប៉ុនទាសពីឡាតថា៖ «ខ្ញុំបានកើតមក ក៏បានចូលក្នុងពិភពលោកដើម្បីការនោះឯង ពោលគឺដើម្បីធ្វើជាសាក្សីបញ្ជាក់អំពីសេចក្ដីពិត»។ (សូមអាន យ៉ូហាន ១៨:៣៣-៣៧) ប៉ុន្មានឆ្នាំក្រោយមក សាវ័កប៉ូលបានហៅលោកយេស៊ូជាសាក្សីដែល«ប្រកាសយ៉ាងប្រសើរនៅមុខប៉ុនទាសពីឡាត»។ (១ធី. ៦:១៣) យើងរស់នៅក្នុងពិភពលោកដែលនៅក្រោមអំណាចរបស់សាថាន ហើយដែលពោរពេញដោយមនុស្សស្អប់គ្នា។ ដើម្បីបន្តផ្សព្វផ្សាយ យើងត្រូវមានចិត្តក្លាហានយ៉ាងខ្លាំងដូចលោកយេស៊ូដែលជា«សាក្សីស្មោះត្រង់និងពិតត្រង់»។—បប. ៣:១៤
២ ជនជាតិយូដាទាំងអស់បានត្រូវហៅជាសាក្សីរបស់ព្រះយេហូវ៉ា ប៉ុន្តែលោកយេស៊ូនឹងទៅជាសាក្សីដែលប្រសើរបំផុត។ (អេ. ៤៣:១០) មុនលោកយេស៊ូបានកើតមក ទេវតាមួយរូបបានប្រាប់យ៉ូសែបដែលជាឪពុកចិញ្ចឹមរបស់លោកថា៖ «អ្នកត្រូវឲ្យនាមបុត្រនោះថាយេស៊ូ ព្រោះលោកនឹងសង្គ្រោះមនុស្សឲ្យរួចពីការខុសឆ្គងរបស់ពួកគេ»។ (ម៉ាថ. ១:២០, ២១ កំណត់សម្គាល់) នាមយេស៊ូជាភាសាហេប្រឺមានអត្ថន័យថា«ព្រះយេហូវ៉ាជាសេចក្ដីសង្គ្រោះ»។ ព្រះយេហូវ៉ានឹងប្រើលោកយេស៊ូដើម្បីសង្គ្រោះមនុស្សជាតិពីភាពខុសឆ្គងនិងសេចក្ដីស្លាប់។ លោកយេស៊ូបានប្រាប់ជនជាតិយូដាថាពួកគេត្រូវប្រែចិត្តពីអំពើខុសឆ្គងរបស់ពួកគេដើម្បីអាចទទួលការពេញចិត្តពីព្រះយេហូវ៉ាឡើងវិញ។ (ម៉ាថ. ១០:៦; ១៥:២៤; លូក. ១៩:១០) លោកបានផ្សព្វផ្សាយអំពីរាជាណាចក្ររបស់ព្រះ។ ម៉ាកុសបានសរសេរថា៖ «លោកយេស៊ូបានទៅស្រុកកាលីឡេ ហើយផ្សព្វផ្សាយដំណឹងល្អរបស់ព្រះ ដោយពោលថា៖ ‹គ្រាកំណត់បានមកដល់ហើយ រាជាណាចក្ររបស់ព្រះគឺជិតដល់ហើយ។ ចូរប្រែចិត្ត ហើយមានជំនឿលើដំណឹងល្អចុះ›»។ (ម៉ាក. ១:១៤, ១៥) លោកយេស៊ូបានផ្សព្វផ្សាយដោយចិត្តខ្នះខ្នែងនិងចិត្តក្លាហាន។ ដោយចិត្តក្លាហាន លោកថែមទាំងផ្ដន្ទាទោសមេដឹកនាំសាសនាយូដាដែលមានអំណាចទៀតផង នេះជាមូលហេតុមួយដែលមេដឹកនាំសាសនាយូដាសម្លាប់លោក។—ម៉ាក. ១១:១៧, ១៨; ១៥:១-១៥
«ការដ៏រុងរឿងរបស់ព្រះ»
៣. បីថ្ងៃក្រោយពីលោកយេស៊ូបានស្លាប់ តើមានអ្វីបានកើតឡើង?
៣ បីថ្ងៃក្រោយពីលោកយេស៊ូបានស្លាប់ដោយឈឺចាប់យ៉ាងខ្លាំង អ្វីមួយដ៏អស្ចារ្យបានកើតឡើង។ ព្រះយេហូវ៉ាបានប្រោសលោកឲ្យរស់ឡើងវិញ មិនមែនដោយមានរូបកាយដូចមនុស្សទេ ប៉ុន្តែដោយមានរូបកាយជាវិញ្ញាណវិញ។ (១ពេ. ៣:១៨) លោកយេស៊ូបានបង្ហាញឲ្យអ្នកកាន់តាមលោកឃើញថាលោកមានជីវិតឡើងវិញ ពេលលោកលេចមកឲ្យពួកគេឃើញជាមនុស្ស។ នៅថ្ងៃដដែល កាលដែលលោកបានត្រូវប្រោសឲ្យរស់ឡើងវិញ លោកបានលេចមកឲ្យអ្នកកាន់តាមលោកឃើញ យ៉ាងហោចណាស់ប្រាំដង។—ម៉ាថ. ២៨:៨-១០; លូក. ២៤:១៣-១៦, ៣០-៣៦; យ៉ូន. ២០:១១-១៨
៤. តើអ្វីបានកើតឡើង នៅពេលលោកយេស៊ូបានលេចមកឲ្យពួកអ្នកកាន់តាមលោកឃើញ ហើយតើលោកបានបង្គាប់ពួកគេឲ្យធ្វើអ្វី?
៤ កាលលោកយេស៊ូបានលេចមកជាលើកទី៥ ពួកសាវ័ករបស់លោកនិងអ្នកឯទៀតបានជួបជុំគ្នា។ បន្ទាប់មក លោកបានជួយពួកគេឲ្យយល់ថាមរណភាពនិងការប្រោសលោកឲ្យរស់ឡើងវិញបានត្រូវទាយទុកក្នុងបទគម្ពីរ។ នៅចុងបញ្ចប់នៃកិច្ចប្រជុំដ៏សំខាន់នោះ លោកយេស៊ូបានប្រាប់អ្នកកាន់តាមលោកនូវអ្វីដែលពួកគេត្រូវធ្វើ។ លោកបានមានប្រសាសន៍ថា៖ «ក្នុងគ្រប់ប្រជាជាតិនឹងមានការផ្សព្វផ្សាយថា ពួកគេត្រូវប្រែចិត្តដើម្បីទទួលការអភ័យទោសចំពោះការខុសឆ្គង ដោយសារនាមរបស់លោក។ ដោយចាប់ផ្ដើមនៅក្រុងយេរូសាឡិម»។ ក្រោយមក លោកយេស៊ូបានបង្គាប់ពួកគេថា៖ «អ្នករាល់គ្នាត្រូវធ្វើជាសាក្សី ពីការទាំងនេះ»។—លូក. ២៤:៤៤-៤៨
៥, ៦. (ក) តើអ្នកកាន់តាមលោកយេស៊ូបានធ្វើជាសាក្សីបញ្ជាក់អំពីអ្នកណា? (ខ) តើអ្នកកាន់តាមលោកយេស៊ូធ្វើជាសាក្សីបញ្ជាក់អំពីអ្វី?
៥ ដូច្នេះ៤០ថ្ងៃក្រោយមក ពេលលោកយេស៊ូបានលេចមកជាលើកចុងក្រោយ ពួកសាវ័កបានយល់យ៉ាងច្បាស់នូវបង្គាប់មួយទៀតរបស់លោកដែលថា៖ «អ្នករាល់គ្នានឹងធ្វើជាសាក្សីបញ្ជាក់អំពីខ្ញុំនៅក្រុងយេរូសាឡិម នៅតំបន់យូឌាទាំងមូល នៅស្រុកសាម៉ារី និងរហូតដល់កន្លែងឆ្ងាយបំផុតនៅផែនដី»។ (សកម្ម. ១:៨) ដោយសារពួកអ្នកកាន់តាមលោកគឺជាជនជាតិអ៊ីស្រាអែល ពួកគេបានធ្វើជាសាក្សីបញ្ជាក់អំពីព្រះយេហូវ៉ារួចហើយ។ ឥឡូវ ពួកគេក៏នឹងធ្វើជាសាក្សីបញ្ជាក់អំពីលោកយេស៊ូដែរ។ តើនេះមានអត្ថន័យយ៉ាងណា?
៦ ពួកគេនឹងចាប់ផ្ដើមប្រកាសផ្សាយថាឥឡូវព្រះយេហូវ៉ាកំពុងប្រើលោកយេស៊ូដើម្បីសង្គ្រោះមនុស្សជាតិ។ របៀបសង្គ្រោះនេះគឺអស្ចារ្យជាងរបៀបដែលព្រះយេហូវ៉ាបានសង្គ្រោះជនជាតិអ៊ីស្រាអែលនៅសម័យមុន។ មរណភាពនិងការប្រោសលោកយេស៊ូគ្រិស្តឲ្យរស់ឡើងវិញអាចរំដោះមនុស្សពីភាពខុសឆ្គងនិងសេចក្ដីស្លាប់។ ពេលអ្នកកាន់តាមលោកយេស៊ូបានត្រូវរើសតាំងដោយសកម្មពលបរិសុទ្ធនៅបុណ្យថ្ងៃទី៥០ ឆ្នាំ៣៣ គ.ស. ពួកគេបានចាប់ផ្ដើមធ្វើជាសាក្សីបញ្ជាក់អំពី«ការដ៏រុងរឿងរបស់ព្រះ»។ មនុស្សជាច្រើនដែលបានឮដំណឹងនេះបានប្រែចិត្ត បានជឿលើគ្រឿងបូជារបស់លោកយេស៊ូ ហើយបានទទួលការជ្រមុជទឹក។ លោកយេស៊ូដែលបានត្រូវប្រោសឲ្យរស់ឡើងវិញបានទទួលអំណាចថ្មីនៅស្ថានសួគ៌ ហើយព្រះយេហូវ៉ាកំពុងប្រើលោកឲ្យសង្គ្រោះមនុស្សរាប់ពាន់នាក់នៅផែនដី។—សកម្ម. ២:៥, ១១, ៣៧-៤១
«ថ្លៃលោះមនុស្សជាច្រើន»
៧. តើព្រឹត្ដិការណ៍ដែលបានកើតឡើងនៅបុណ្យថ្ងៃទី៥០ ឆ្នាំ៣៣ គ.ស.បានបញ្ជាក់អំពីអ្វី?
៧ ព្រឹត្ដិការណ៍នៅបុណ្យថ្ងៃទី៥០ ឆ្នាំ៣៣ គ.ស.បានបញ្ជាក់ថាព្រះយេហូវ៉ាបានទទួលយកគ្រឿងបូជាដ៏ល្អឥតខ្ចោះរបស់លោកយេស៊ូជាថ្លៃលោះដែលចាំបាច់សម្រាប់រំដោះមនុស្សពីភាពខុសឆ្គង។ (ហេ. ៩:១១, ១២, ២៤) លោកយេស៊ូបានពន្យល់ថាលោកបានមកដើម្បី«ឲ្យជីវិតខ្លួនជាថ្លៃលោះមនុស្សជាច្រើន»។ (ម៉ាថ. ២០:២៨) តើមានតែជនជាតិយូដាប៉ុណ្ណោះដែលនឹងទទួលប្រយោជន៍ពីថ្លៃលោះឬ? មិនមែនទេ ថ្លៃលោះ«ដកយកភាពខុសឆ្គងរបស់ពិភពលោកចេញ»។ គឺជាបំណងប្រាថ្នារបស់ព្រះដែលឲ្យ«មនុស្សគ្រប់ប្រភេទទទួលសេចក្ដីសង្គ្រោះ»។—១ធី. ២:៤-៦; យ៉ូន. ១:២៩
៨. តើអ្នកកាន់តាមលោកយេស៊ូនៅសម័យដើមអាចបន្តធ្វើជាសាក្សីបញ្ជាក់អំពីលោកដោយសារអ្វី ហើយតើពួកគេបានសម្រេចអ្វី?
៨ អ្នកកាន់តាមលោកយេស៊ូនៅសម័យដើមបានបន្តធ្វើជាសាក្សីបញ្ជាក់អំពីលោកដោយចិត្តក្លាហាន។ តើនេះបានកើតឡើងយ៉ាងដូចម្ដេច? គឺមិនមែនដោយសារកម្លាំងរបស់ពួកគេទេ។ ពួកគេបានសុំព្រះយេហូវ៉ាផ្ដល់ឲ្យសកម្មពលបរិសុទ្ធរបស់លោកដើម្បីពួកគេអាចមានចិត្តក្លាហានដែលពួកគេត្រូវការដើម្បីបន្តផ្សព្វផ្សាយ។ (សូមអាន សកម្មភាព ៥:៣០-៣២) ប្រហែលជា២៧ឆ្នាំក្រោយពីពួកអ្នកកាន់តាមលោកយេស៊ូបានចាប់ផ្ដើមផ្សព្វផ្សាយ ពួកគេបានផ្សព្វផ្សាយ«អំពីសេចក្ដីពិត ពោលគឺដំណឹងល្អ» ដល់ជនជាតិយូដានិងជនជាតិដទៃ«ក្នុងចំណោមមនុស្សទាំងអស់នៅក្រោមមេឃ»។—កូឡ. ១:៥, ២៣
៩. ដូចបានប្រកាសទុកជាមុន តើអ្វីបានកើតឡើងដល់ក្រុមជំនុំគ្រិស្តសាសនិក?
៩ គួរឲ្យស្ដាយណាស់ កាលដែលពេលវេលាកន្លងទៅ សមាជិកក្រុមជំនុំបានចាប់ផ្ដើមបង្រៀនអ្វីដែលមិនពិត។ (សកម្ម. ២០:២៩, ៣០; ២ពេ. ២:២, ៣; យូ. ៣, ៤) ក្រោយមក អ្នកបង្រៀនសេចក្ដីមិនពិតទាំងនេះបានបង្ខូចក្រុមជំនុំទាំងមូល។ លោកយេស៊ូបានប្រកាសទុកជាមុនថាការក្បត់ជំនឿនេះនឹងបន្តរហូតដល់«ទីបញ្ចប់របៀបរបបពិភពលោកនេះ»។ (ម៉ាថ. ១៣:៣៧-៤៣) នៅខែតុលា ឆ្នាំ១៩១៤ ព្រះយេហូវ៉ាបានតែងតាំងលោកយេស៊ូជាស្តេចលើមនុស្សជាតិ។ នៅពេលនោះ ទីបញ្ចប់ ឬ«គ្រាចុងក្រោយបង្អស់»នៃពិភពលោករបស់សាថានបានចាប់ផ្ដើម។—២ធី. ៣:១
១០. (ក) តើគ្រិស្តសាសនិកដែលបានត្រូវរើសតាំងបានផ្សព្វផ្សាយអំពីខែឆ្នាំណា? (ខ) តើអ្វីបានកើតឡើងនៅខែតុលា ឆ្នាំ១៩១៤ ហើយតើតាមរបៀបណាយើងដឹងថាអ្វីនោះបានកើតឡើងមែន?
១០ ជាង៣០ឆ្នាំមុនខែតុលា ឆ្នាំ១៩១៤ គ្រិស្តសាសនិកដែលបានត្រូវរើសតាំងបានចាប់ផ្ដើមផ្សព្វផ្សាយថារាជាណាចក្រព្រះនឹងចាប់ផ្ដើមគ្រប់គ្រងនៅខែឆ្នាំដ៏សំខាន់នោះ ពោលគឺខែតុលា ឆ្នាំ១៩១៤។ ការយល់ដឹងរបស់ពួកគាត់គឺផ្អែកទៅលើទំនាយរបស់ដានីយ៉ែលស្តីអំពីដើមឈើដ៏ធំមួយដែលបានត្រូវកាប់រំលំ ហើយនឹងដុះឡើងវិញក្រោយមួយរយៈពេល។ (ដាន. ៤:១៦) លោកយេស៊ូបានរៀបរាប់អំពីសញ្ញាសម្គាល់ដែលនឹងជួយអ្នកកាន់តាមលោកឲ្យដឹងថាលោកបានក្លាយទៅជាស្តេច ហើយថាគ្រាចុងក្រោយបង្អស់បានចាប់ផ្ដើម។ ព្រឹត្ដិការណ៍ពិភពលោកចាប់តាំងពីឆ្នាំ១៩១៤បានបញ្ជាក់យ៉ាងច្បាស់ថាលោកយេស៊ូជាស្តេច។ (ម៉ាថ. ២៤:៣, ៧, ១៤; លូក. ២១:២៤) សព្វថ្ងៃនេះ «ការដ៏រុងរឿងរបស់ព្រះ»ដែលយើងផ្សព្វផ្សាយរួមបញ្ចូលហេតុការណ៍ពិតដែលបញ្ជាក់ថាព្រះយេហូវ៉ាបានតែងតាំងលោកយេស៊ូជាស្តេចនៃរាជាណាចក្រនៅឆ្នាំ១៩១៤។
១១, ១២. (ក) តើអ្វីបានកើតឡើងនៅឆ្នាំ១៩១៩? (ខ) នៅឆ្នាំ១៩៣៥ តើយើងបានដឹងច្បាស់អំពីអ្វី? (សូមមើលរូបភាពនៅដើមអត្ថបទ)។
១១ នៅឆ្នាំ១៩១៤ ពេលលោកយេស៊ូគ្រិស្តបានក្លាយទៅជាស្តេច លោកបានចាប់ផ្ដើមរំដោះអ្នកកាន់តាមលោក ដែលបានត្រូវរើសតាំងពី«បាប៊ីឡូនដ៏ខ្លាំងក្លា» ពោលគឺសាសនាមិនពិត។ (បប. ១៨:២, ៤) នៅឆ្នាំ១៩១៩ មិនយូរប៉ុន្មានក្រោយពីសង្គ្រាមលោកលើកទី១បានចប់ទៅ អ្នកដែលបានត្រូវរើសតាំងមានសេរីភាពច្រើនជាងដើម្បីផ្សព្វផ្សាយទូទាំងពិភពលោក។ ពួកគាត់បានធ្វើជាសាក្សីបញ្ជាក់អំពីដំណឹងល្អនៃរាជាណាចក្រព្រះ ហើយថាថ្លៃលោះមានអំណាចសង្គ្រោះជីវិត។ ជាលទ្ធផល មនុស្សរាប់ពាន់នាក់ទៀតបានរៀនអំពីសេចក្ដីពិត ហើយបានត្រូវរើសតាំងឲ្យធ្វើជាស្តេចជាមួយនឹងគ្រិស្តនៅស្ថានសួគ៌។
១២ នៅឆ្នាំ១៩៣៥ គឺច្បាស់ណាស់ថាគ្រិស្តបានចាប់ផ្ដើមប្រមូល«ចៀមឯទៀត»របស់លោករួចហើយ។ សព្វថ្ងៃនេះ ចៀមឯទៀតទាំងនេះមានចំនួនរាប់លាននាក់ដែលមកពីទូទាំងពិភពលោក។ ចៀមឯទៀតទាំងនេះជាមួយនឹងពួកអ្នកដែលបានត្រូវរើសតាំង ធ្វើតាមគំរូរបស់គ្រិស្តស្តីអំពីចិត្តក្លាហាន ហើយផ្សព្វផ្សាយដល់អ្នកឯទៀត។ ចៀមឯទៀតក៏មានជំនឿដែរថាគ្រឿងបូជារបស់លោកយេស៊ូគឺជាវិធីតែមួយគត់ដែលពួកគេអាចទទួលសេចក្ដីសង្គ្រោះ។ ពួកគេដឹងថា បើពួកគេស៊ូទ្រាំក្នុងកិច្ចការផ្សព្វផ្សាយ ហើយប្រើជីវិតរបស់ពួកគេដើម្បីធ្វើឲ្យព្រះយេហូវ៉ាពេញចិត្ត នោះពួកគេអាចរួចជីវិតនៅ«គ្រាទុក្ខវេទនាដ៏ខ្លាំង» ហើយរស់នៅក្នុងពិភពលោកថ្មីរបស់ព្រះ។—យ៉ូន. ១០:១៦; បប. ៧:៩, ១០, ១៤
យើងផ្សព្វផ្សាយដំណឹងល្អដោយចិត្តក្លាហាន
១៣. ក្នុងនាមជាសាក្សីព្រះយេហូវ៉ា តើយើងតាំងចិត្តធ្វើអ្វី? ហើយតើតាមរបៀបណាយើងអាចយកតម្រាប់គ្រិស្តសាសនិកដែលបានរស់នៅសតវត្សរ៍ទី១?
១៣ គឺជាឯកសិទ្ធិដ៏ខ្ពង់ខ្ពស់ដោយផ្សព្វផ្សាយដល់អ្នកឯទៀតអំពី«ការដ៏រុងរឿង»ដែលព្រះយេហូវ៉ាបានធ្វើនិងអំពីសេចក្ដីសន្យារបស់លោកសម្រាប់ពេលអនាគត។ មែនហើយ គឺមិនតែងតែស្រួលឲ្យបន្តធ្វើកិច្ចការនេះទេ។ មនុស្សប្រហែលជាមិនព្រមទទួលយកដំណឹងដែលយើងផ្សព្វផ្សាយទេ ឬថែមទាំងបៀតបៀនយើងទៀតផង។ ប្រសិនបើដូច្នេះ យើងអាចយកតម្រាប់សាវ័កប៉ូលនិងដៃគូរបស់គាត់។ ប៉ូលបាននិយាយថា៖ «យើងបានតាំងចិត្តក្លាហានដោយសារព្រះរបស់យើង ដើម្បីប្រាប់ដំណឹងល្អរបស់ព្រះដល់អ្នករាល់គ្នា ដោយខំតស៊ូយ៉ាងខ្លាំង»។ (១ថែ. ២:២) យើងត្រូវរក្សាពាក្យដែលយើងបានសន្យានៅពេលយើងប្រគល់ខ្លួនជូនព្រះ។ យើងចង់រក្សាភក្ដីភាពចំពោះព្រះយេហូវ៉ាក្នុងអំឡុងពេលពិភពលោករបស់សាថាន«វិនាសហិនហោចអស់»នៅថ្ងៃមុខ។ (អេ. ៦:១១; ខ.ស.) យើងមិនអាចធ្វើដូច្នេះដោយពឹងលើកម្លាំងរបស់យើងទេ។ ដូចគ្រិស្តសាសនិកនៅសតវត្សរ៍ទី១ យើងត្រូវសុំព្រះយេហូវ៉ាផ្ដល់សកម្មពលបរិសុទ្ធរបស់លោកដើម្បីយើងអាចមាន«ឫទ្ធានុភាពដែលលើសពីធម្មតា»។—សូមអាន កូរិនថូសទី២ ៤:១, ៧; លូក. ១១:១៣
១៤, ១៥. (ក) នៅសតវត្សរ៍ទី១ តើគេបានប្រព្រឹត្តយ៉ាងណាទៅលើគ្រិស្តសាសនិក ហើយតើពេត្រុសបានលើកទឹកចិត្តគ្រិស្តសាសនិកយ៉ាងដូចម្ដេច? (ខ) បើគេបៀតបៀនយើងដោយសារយើងជាសាក្សីព្រះយេហូវ៉ា តើយើងគួរចាំអំពីអ្វី?
១៤ សព្វថ្ងៃនេះ មនុស្សរាប់លាននាក់និយាយថាពួកគេជាគ្រិស្តសាសនិក ប៉ុន្តែពួកគេធ្វើអ្វីដែលព្រះស្អប់ ហើយមិនបានទទួលការពេញចិត្តពីលោកឡើយ។ (ទីត. ១:១៦) នៅសតវត្សរ៍ទី១ មនុស្សភាគច្រើនមិនគោរពប្រណិប័តន៍ព្រះតាមរបៀបដែលលោកពេញចិត្តទេ។ តាមពិត គ្រិស្តសាសនិកពិតនៅពេលនោះបានត្រូវមនុស្សជាច្រើនដែលនៅជុំវិញពួកគេស្អប់។ ដើម្បីលើកទឹកចិត្តគ្រិស្តសាសនិកទាំងនោះ សាវ័កពេត្រុសបាននិយាយថា៖ «ប្រសិនបើគេជេរប្រមាថអ្នករាល់គ្នាដោយសារនាមរបស់គ្រិស្ត នោះអ្នករាល់គ្នាមានសុភមង្គលហើយ»។ ហេតុអ្វីពួកគេអាចមានសុភមង្គល? ពីព្រោះពួកគេបានទទួលការពេញចិត្តពីព្រះ ហើយមានសកម្មពលបរិសុទ្ធរបស់លោក។—១ពេ. ៤:១៤
១៥ តើសព្វថ្ងៃនេះ សាក្សីព្រះយេហូវ៉ាបានត្រូវគេ«ជេរប្រមាថ . . . ដោយសារនាមរបស់គ្រិស្ត»ឬទេ? មែន យើងបានត្រូវគេជេរប្រមាថ ពីព្រោះយើងមិនត្រឹមតែធ្វើជាសាក្សីបញ្ជាក់អំពីព្រះយេហូវ៉ាប៉ុណ្ណោះទេ យើងក៏និយាយអំពីលោកយេស៊ូដែរ ហើយផ្សព្វផ្សាយថាលោកជាស្តេចនៃរាជាណាចក្រព្រះ។ លោកយេស៊ូក៏បានត្រូវគេបៀតបៀនដែរដោយសារលោកជាសាក្សីរបស់ព្រះយេហូវ៉ា។ លោកបានប្រាប់ពួកអ្នកប្រឆាំងលោកថា៖ «ខ្ញុំបានមកក្នុងនាមបិតារបស់ខ្ញុំ ប៉ុន្តែអ្នករាល់គ្នាមិនទទួលខ្ញុំទេ»។ (យ៉ូន. ៥:៤៣) ដូច្នេះ លើកក្រោយពេលមនុស្សបៀតបៀនអ្នកដោយសារអ្នកកំពុងផ្សព្វផ្សាយ សូមចាំថាព្រះពេញចិត្តនឹងអ្នក ហើយថាអ្នកមានសកម្មពលបរិសុទ្ធរបស់លោក។
១៦, ១៧. (ក) តើរាស្ត្ររបស់ព្រះយេហូវ៉ាទូទាំងពិភពលោកមានអារម្មណ៍យ៉ាងណាចំពោះកិច្ចការផ្សព្វផ្សាយ? (ខ) តើអ្នកតាំងចិត្តធ្វើអ្វី?
១៦ សូមចាំដែរថានៅទូទាំងពិភពលោក មនុស្សជាច្រើនកំពុងចូលមកក្នុងសេចក្ដីពិត។ ទោះជាយើងរស់នៅទីណាក៏ដោយ សូម្បីតែនៅតំបន់ដែលយើងផ្សព្វផ្សាយជាញឹកញាប់ក្ដី មានមនុស្សដែលសុខចិត្តស្ដាប់ដំណឹងដ៏អស្ចារ្យរបស់យើង។ ដូច្នេះ ពេលយើងរកឃើញមនុស្សដែលចាប់អារម្មណ៍ ចូរយើងធ្វើឲ្យប្រាកដថាយើងត្រឡប់ទៅជួបពួកគេ ហើយព្យាយាមសិក្សាគម្ពីរជាមួយនឹងពួកគេ។ ពេលនោះ យើងអាចជួយពួកគេឲ្យស្គាល់ព្រះយេហូវ៉ា ដើម្បីពួកគេអាចប្រគល់ជីវិតរបស់ពួកគេជូនលោក ហើយទទួលការជ្រមុជទឹក។ តើអ្នកមានអារម្មណ៍យ៉ាងណាពេលអ្នកធ្វើកិច្ចការនេះ? បងស្រីសារីនៅប្រទេសអាហ្វ្រិកខាងត្បូង ដែលជាសាក្សីរបស់ព្រះយេហូវ៉ាអស់ជាង៦០ឆ្នាំហើយ និយាយថា៖ «ខ្ញុំមានអំណរគុណយ៉ាងជ្រាលជ្រៅដែលតាមរយៈគ្រឿងបូជាលោះរបស់លោកយេស៊ូ ខ្ញុំអាចមានចំណងមិត្តភាពដ៏ល្អជាមួយនឹងព្រះយេហូវ៉ា ដែលជាមហាក្សត្រសកលលោក ហើយខ្ញុំសប្បាយចិត្តដែលខ្ញុំអាចប្រកាសផ្សាយអំពីនាមដ៏រុងរឿងរបស់លោក»។ គាត់និងប្ដីរបស់គាត់ឈ្មោះម៉ាទីនឺសបានជួយកូនបីនាក់របស់ពួកគាត់និងមនុស្សជាច្រើនទៀតឲ្យក្លាយទៅជាអ្នកគោរពប្រណិប័តន៍ព្រះយេហូវ៉ា។ គាត់បន្ថែមថា៖ «គ្មានកិច្ចការឯទៀតណាដែលនាំឲ្យមានការស្កប់ចិត្តច្រើនជាងនេះទេ ហើយតាមរយៈសកម្មពលបរិសុទ្ធរបស់លោក ព្រះយេហូវ៉ាផ្ដល់ឲ្យយើងទាំងអស់គ្នានូវកម្លាំងដែលយើងត្រូវការដើម្បីបន្តធ្វើកិច្ចការនេះដែលសង្គ្រោះជីវិត»។
១៧ ទោះជាយើងបានទទួលការជ្រមុជទឹកហើយ ឬមិនទាន់ក៏ដោយ យើងគួរដឹងគុណចំពោះឯកសិទ្ធិដែលយើងអាចចូលរួមជាមួយនឹងសាក្សីព្រះយេហូវ៉ា។ ដូច្នេះ ចូរបន្តធ្វើជាសាក្សីបញ្ជាក់យ៉ាងសព្វគ្រប់ជាមួយនឹងរាស្ត្ររបស់លោកទូទាំងពិភពលោក ហើយរក្សាខ្លួនអ្នកឲ្យស្អាតស្អំពីពិភពលោករបស់សាថាន។ បើអ្នកធ្វើដូច្នេះ អ្នកនឹងនាំឲ្យបិតារបស់យើងដែលប្រកបដោយសេចក្ដីស្រឡាញ់ដែលនៅស្ថានសួគ៌ ពោលគឺព្រះយេហូវ៉ាដែលយើងជាតំណាង ទទួលការសរសើរតម្កើង។