ខ្ញុំចង់បានសិស្សព្រះគម្ពីរម្នាក់!
១ យើងជាច្រើននាក់បានសម្ដែងនូវសេចក្ដីប្រាថ្នានេះ ហើយនេះជាមូលហេតុល្អមែន។ កិច្ចការបង្រៀនសិស្សព្រះគម្ពីរនេះហើយ ជារបៀបដែលយើងសម្រេចនូវគោលដៅរបស់យើង ក្នុងការធ្វើឲ្យមានសិស្សថ្មីនោះ។ (ម៉ាថាយ ២៨:១៩, ២០) ប៉ុន្តែជាច្រើនខែ ប្រហែលជាច្រើនឆ្នាំផង ដែលយើងជាច្រើននាក់ ឥតដែលមានការពិសោធន៍នូវអំណរដ៏ពិសេស ដែលមានមកពីការបង្រៀនអ្នកណាម្នាក់អំពីសេចក្ដីពិតនោះឡើយ។ តើយើងអាចធ្វើយ៉ាងណាអំពីរឿងនេះ ក្នុងកំឡុងខែវិច្ឆិកានេះ? ដោយព្រោះសៀវភៅរស់នៅជានិរន្តរ៍នឹងយកមកបង្ហាញក្នុងកិច្ចផ្សាយយើងខែនេះ នោះយើងអាចខំប្រឹងយ៉ាងពិសេស ឲ្យប្រើសៀវភៅនេះ ដើម្បីចាប់ផ្ដើមបង្រៀនសិស្សព្រះគម្ពីរថ្មី។
២ ឆ្លៀតទុកពេលមួយឬច្រើនសប្ដាហ៍: យើងសូមលើកទឹកចិត្តគ្រប់គ្នាឲ្យឆ្លៀតទុកពេលក្នុងខែនេះ ដើម្បីយកចិត្តទុកដាក់នឹងចាប់ផ្ដើមបង្រៀនសិស្សព្រះគម្ពីរថ្មី។ អ្នកដឹកនាំខាងការសិក្សាតាមក្រុមជំនុំត្រូវរើសយកសប្ដាហ៍ណាមួយឬខ្លះ សំរាប់គោលបំណងនេះ ហើយរួចមក រៀបចំក្រុមឲ្យយកចិត្តទុកដាក់ក្នុងការត្រឡប់ទៅជួបគេវិញ។
៣ ចូរយកបញ្ជីការត្រឡប់ទៅជួប ជាមួយនឹងអ្នកទៅឯប្រជុំមួយៗសំរាប់កិច្ចផ្សាយ។ រួចមក ទៅជួបអស់អ្នកដែលបានចាប់អារម្មណ៍ ដែលបានទទួលប្រកាសនវត្ថុ ឬដែលបានមកឯកិច្ចប្រជុំ។ ចូរចាត់ទុកការត្រឡប់ទៅជួបនិមួយៗ ដោយមានបំណងចង់ចាប់ផ្ដើមការសិក្សា។
៤ សម្ដែងនូវរបៀបសិក្សាព្រះគម្ពីរ: នៅឯកិច្ចប្រជុំសំរាប់កិច្ចផ្សាយ នោះចូរឲ្យមានការសម្ដែងមួយដែលបានរៀបចំយ៉ាងល្អ ដែលបង្ហាញនូវរបៀបចាប់ផ្ដើមសិក្សាពេលត្រឡប់ទៅជួបគេវិញ។ អ្នកប្រហែលជាអាចនិយាយថា៖ «មនុស្សជាច្រើនមានព្រះគម្ពីរ ប៉ុន្តែគេឥតបានដឹងថា ព្រះគម្ពីរមានចម្លើយចំពោះសំនួរសំខាន់ៗ ដែលយើងគ្រប់គ្នាប្រឈមមុខក្នុងជីវិតនេះឡើយ។ [បង្ហាញមាតិកាក្នុងសៀវភៅរស់នៅជានិរន្តរ៍ ហើយអានចំណងជើងនៃជំពូក ៤, ៧, ៨ និង៩]។ ដោយប្រើឧបករណ៍សិក្សានេះអស់រយៈមួយម៉ោងក្នុងមួយសប្ដាហ៍ នោះអ្នកអាចទទួលចំណេះដ៏សំខាន់ៗពីព្រះគម្ពីរ គ្រាន់តែក្នុងបីបួនខែប៉ុណ្ណោះ។ ប្រសិនបើអ្នកចង់រើសយកប្រធានមួយពីប្រធានទាំងនេះ នោះខ្ញុំនឹងសប្បាយរីករាយដើម្បីបង្ហាញអ្នកអំពីកម្មវិធីនេះ»។ ប្រសិនបើបុគ្គលនោះមានចិត្តស្ទាក់ស្ទើរ ដោយព្រោះមានតារាងពេលដ៏រវល់ ចូរពន្យល់ថាអ្នកក៏មានកម្មវិធីដ៏សង្ខេបដែរ។ ចូរបង្ហាញសៀវភៅស្តើង សេចក្ដីតម្រូវ ហើយអញ្ជើញឲ្យគេសិក្សា ដោយរៀនមេរៀនមួយក្នុងមួយសប្ដាហ៍ ដែលមានរយៈ១៥-៣០នាទី។
៥ ប្រសិនបើយើងខំប្រឹងរួមដៃគ្នា ដើម្បីចាប់ផ្ដើមបង្រៀនសិស្សថ្មី ហើយប្រសិនបើយើងអធិស្ឋានរកពរពីព្រះយេហូវ៉ា ទៅលើគោលបំណងរបស់យើង នោះប្រាកដជាយើងនឹងមានសិស្សព្រះគម្ពីរថ្មីហើយ! (យ៉ូហានទី១ ៥:១៤, ១៥) ប្រសិនបើអ្នកចង់បានសិស្សព្រះគម្ពីរម្នាក់ នេះប្រហែលជាឱកាសរបស់អ្នកក្នុងការចាប់ផ្ដើមហើយ។