ឱពួកឪពុកម្ដាយអើយ! ចូរទុកគំរូដ៏ល្អសំរាប់កូនៗរបស់អ្នក
១ បន្ទូលរបស់ព្រះប្រាប់យើងថា «ឪពុក[និងម្ដាយ]នៃមនុស្សសុចរិត នឹងមានចិត្តរីករាយយ៉ាងខ្លាំង»។ (សុភាសិត ២៣:២៤, ២៥) គឺជាប្រសិទ្ធិពរយ៉ាងណាទៅហ្ន៎ ចំពោះឪពុកម្ដាយដែលបានទុកគំរូដ៏ល្អសំរាប់កូនៗរបស់គាត់នោះ! សមាជិកម្នាក់នៃគណៈកម្មាធិការនៅការិយាល័យសាខាមួយបាននិយាយអំពីឪពុកម្ដាយរបស់គាត់ថា៖ «ជីវិតទាំងមូលរបស់ពួកគាត់គឺបានសំដៅលើសេចក្ដីពិត ហើយខ្ញុំក៏ចង់ធ្វើអ៊ីចឹងនឹងជីវិតរបស់ខ្ញុំដែរ»។ តើកូនៗគួរតែឃើញលក្ខណៈអ្វីខ្លះរបស់ឪពុកម្ដាយគេ?
២ សុជីវធម៌ល្អនិងសេចក្ដីគោរពដ៏ជ្រាលជ្រៅ: គឺជាភារកិច្ចរបស់ឪពុកម្ដាយក្នុងការបំពាក់បំប៉ននូវលក្ខណៈត្រឹមត្រូវនៅក្នុងកូនៗរបស់គាត់។ សុជីវធម៌ល្អគឺរៀនបាន មិនគ្រាន់តែតាមសេចក្ដីបង្គាប់ដោយមាត់ ក៏ប៉ុន្តែដោយការពិនិត្យមើលនិងដោយការយកតម្រាប់តាម។ ដូច្នេះ តើសុជីវធម៌បែបណាដែលអ្នកសម្ដែងនោះ? តើកូនរបស់អ្នកឮអ្នកនិយាយថា «សូមអត់ទោស» «សូម» និង «អរគុណ»ឬទេ? នៅក្នុងក្រុមគ្រួសារ តើអ្នកប្រព្រឹត្តនឹងគ្នាដោយសេចក្ដីគោរពដ៏ជ្រាលជ្រៅឬទេ? តើអ្នកយកចិត្តទុកដាក់នៅពេលអ្នកដទៃនិយាយឬទេ? តើអ្នកស្ដាប់ឬទេ នៅពេលដែលកូនរបស់អ្នកនិយាយជាមួយនឹងអ្នកនោះ? តើយើងសម្ដែងលក្ខណៈល្អនេះនៅឯសាលព្រះរាជាណាចក្រ ព្រមទាំងកាលដែលដាច់ពីគេនៅក្នុងផ្ទះឬទេ?
៣ ភាពវិញ្ញាណមុតមាំនិងសកម្មភាពដ៏ខ្នះខ្នែង: បងប្រុសម្នាក់ដែលបានចំណាយពេលជាង៥០ឆ្នាំនៅក្នុងកិច្ចបំរើពេញពេល នឹកចាំថា៖ «ឪពុកម្ដាយខ្ញុំបានជាគំរូដ៏អស្ចារ្យ ខាងឯការអបអរចំពោះកិច្ចប្រជុំ ព្រមទាំងមានចិត្តខ្នះខ្នែងក្នុងកិច្ចបំរើផ្សាយដែរ»។ តើដោយរបៀបណាដែលអ្នកបង្ហាញឲ្យកូនៗរបស់អ្នកឃើញថា អ្នកមានការយកចិត្តទុកដាក់នឹងការពារនូវភាពវិញ្ញាណនៃបុគ្គលម្នាក់ៗ ដែលនៅក្នុងក្រុមគ្រួសាររបស់អ្នកនោះ? តើអ្នកមើលនូវខបទគម្ពីរប្រចាំថ្ងៃជាមួយគ្នាឬទេ? តើអ្នកមានការសិក្សាក្នុងគ្រួសារយ៉ាងទៀងទាត់ឬទេ? តើកូនរបស់អ្នកឃើញអ្នកអានព្រះគម្ពីរនិងប្រកាសនវត្ថុរបស់សមាគមយើងឬទេ? តើពួកគេឮអ្វីខ្លះនៅពេលអ្នកអធិស្ឋានជំនួសក្រុមគ្រួសារនោះ? តើអ្នកពិគ្រោះរឿងខាងវិញ្ញាណដ៏ស្អាងចិត្តជាមួយកូនរបស់អ្នក ដោយពិភាក្សារបស់ដ៏វិជ្ជមានអំពីសេចក្ដីពិតនិងក្រុមជំនុំឬទេ? តើអ្នកមានចិត្តខ្នះខ្នែងទៅកិច្ចប្រជុំទាំងអស់ ហើយចូលរួមកិច្ចបំរើផ្សាយជាក្រុមគ្រួសារឬទេ?
៤ ឱពួកឪពុកម្ដាយអើយ ចូរនឹកគិតពីគំរូបែបណាដែលអ្នកកំពុងតែទុកសំរាប់កូនរបស់អ្នកចុះ។ ចូរធ្វើឲ្យគំរូនោះជាអ្វីដ៏ប្រសើរបំផុត ហើយគេនឹងរក្សាទុកជាទីសំខាន់អស់មួយជីវិតរបស់គេ។ ប្រពន្ធរបស់អ្នកធ្វើដំណើរត្រួតពិនិត្យម្នាក់ ដែលឥឡូវមានអាយុជាង៧០ឆ្នាំទៅហើយ បាននិយាយថា៖ «ខ្ញុំនៅតែទទួលប្រយោជន៍ពីគំរូដ៏ល្អពីឪពុកម្ដាយគ្រីស្ទាន ដែលប្រកបដោយសេចក្ដីស្រឡាញ់។ ហើយជាសេចក្ដីអធិស្ឋានដ៏អស់ពីចិត្តរបស់ខ្ញុំ ដែលខ្ញុំនឹងសឲ្យឃើញនូវការអបអរដ៏ពេញលេញរបស់ខ្ញុំសំរាប់កេរ្ដិ៍មរតកនេះ ដោយប្រើឲ្យបានត្រឹមត្រូវនៅគ្រាខាងមុខជានិច្ច»។