ប្រអប់សំនួរ
◼ តើអ្នកណាទទួលខុសត្រូវសំរាប់ការសំអាតសាលព្រះរាជាណាចក្រ?
សាលព្រះរាជាណាចក្រមួយដ៏ស្អាតហើយទាក់ទាញភ្នែកនោះ មានអានុភាពល្អទៅលើសារដែលយើងផ្សព្វផ្សាយ។ (ប្រៀបមើល ពេត្រុសទី១ ២:១២) ការថែរក្សាទុកឲ្យសាលប្រជុំមានរបៀបរៀបរយហើយស្អាតបាតគឺជាចាំបាច់ ហើយទាំងអស់គ្នាអាចរួមចំណែកក្នុងការថែទាំនោះ។ យើងមិនគួរសង្ឃឹមថាមនុស្សពីរបីនាក់នឹងទទួលបន្ទុកទាំងមូលទេ។ តាមធម្មតា ការសំអាតត្រូវរៀបចំតាមក្រុមសិក្សាសៀវភៅតាមក្រុមជំនុំ ដោយមានអ្នកដឹកនាំការសិក្សាឬក៏អ្នកជំនួយរបស់គាត់នាំមុខ។ ក្នុងសាលប្រជុំដែលមានក្រុមជំនុំច្រើនជាងមួយ នោះពួកអ្នកចាស់ទុំនិងរៀបចំឲ្យក្រុមជំនុំទាំងអស់មានចំណែកក្នុងការថែទាំ។
តើយ៉ាងដូចម្ដេចដែលយើងអាចបំពេញភារកិច្ចនេះតាមរបៀបល្អបំផុត? សាលព្រះរាជាណាចក្រត្រូវបានសំអាតតាមកាលវិភាគមួយដ៏ទៀងទាត់។ គ្រឿងផ្គត់ផ្គង់ប្រើប្រាស់និងប្រដាប់ប្រដារគួរមានសព្វគ្រប់ដើម្បីប្រើក្នុងការសំអាត។ ក្រដាសកំណត់មួយដែលរៀបរាប់អំពីអ្វីដែលត្រូវតែធ្វើ គួររៀបដាក់នៅកន្លែងមួយដែលអ្នកសំអាតអាចមើលដើម្បីឲ្យបានការណែនាំ។ ប្រហែលជាអាចមានកំណត់ពីរ គឺមួយសំរាប់ការសំអាតស្រាលៗបន្ទាប់ពីប្រជុំនិមួយៗ ហើយកំណត់មួយទៀតសំរាប់ការសំអាតដ៏ពេញលេញជាប្រចាំសប្ដាហ៍។ អ្នកដឹកនាំការសិក្សាសៀវភៅតាមក្រុម គួរណាត់ថ្ងៃនិងម៉ោងដែលស្រួលសំរាប់អស់អ្នកដែលនឹងចូលរួមការសំអាតយ៉ាងហ្មត់ចត់នោះ។ គួរយកចិត្តទុកដាក់យ៉ាងទៀងទាត់នឹងស្មៅ ដើមផ្កា និងគុម្ពបន្លា។ ចិញ្ចើមថ្នល់និងទីធ្លាផ្ញើឡាន គួរគ្មានសំរាម។ ជារៀងរាល់ឆ្នាំ ការសំអាតជាទូទៅគួរនឹងធ្វើឡើង ប្រហែលជាមុនពិធីបុណ្យរំឭកបន្ដិច។ នេះប្រហែលជាអាចរួមបញ្ចូលការលាងបង្អួចនិងជញ្ជាំង បោកសំអាតព្រំ និងការបោកវាំងនន។
ច្បាស់ហើយ យើងទាំងអស់គ្នាអាចសម្រាលបន្ទុកនេះ ដោយមិនទម្លាក់ស្ករកៅស៊ូនិងសំរាមក្នុងឬក៏ខាងក្រៅសាលប្រជុំ។ យើងអាចទុកបន្ទប់ទឹកស្អាតសំរាប់អ្នកណាដែលចូលក្រោយពីយើង។ ប្រុងប្រយ័ត្នកុំធ្វើឲ្យបែកនូវប្រដាប់ប្រដារឬក៏ធ្វើឲ្យខូចខាតនូវគ្រឿងតុទូ។ ចូរកត់សម្គាល់បើព្រំមានស្នាមប្រឡាក់ កៅអីណាខូចខាត មានបញ្ហាចំពោះប្រព័ន្ធបំពង់ទឹក ឬអំពូលភ្លើងបានឆេះដាច់ជាដើម សូមប្រាប់យ៉ាងឆាប់នូវបងប្រុសដែលទទួលខុសត្រូវផ្នែកការថែទាំសាលព្រះរាជាណាចក្រ។
ចូរឲ្យយើងទាំងអស់គ្នាមានចិត្តស្មោះស្ម័គ្រសុខចិត្តរួមចំណែក។ នេះនាំឲ្យមានកន្លែងថ្វាយបង្គំដ៏ពេញចិត្តហើយសម្គាល់យើងដោយឡែក ជាមនុស្សស្អាតស្អំដែលឲ្យកិត្ដិយសចំពោះព្រះយេហូវ៉ា។—ពេត្រុសទី១ ១:១៦