យើងផ្សព្វផ្សាយដំណឹងល្អ
១ យើងមានឯកសិទ្ធិល្អម្ល៉េះហ្ន៎! ដើម្បីធ្វើជាអ្នកជូនឲ្យ«ដំណឹងល្អ ពីសេចក្ដីសុខសាន្ត»។ (រ៉ូម ១០:១៥) យើងមានសារមួយដែលកំសាន្តចិត្តដើម្បីប្រាប់ដល់មនុស្សដែលត្រូវរុំព័ទ្ធដោយការច្របូកច្របល់និងការអស់សង្ឃឹម។ តើដោយដូចម្ដេចដែលយើងអាចជួយពួកគេទទួលស្គាល់ថា យើងកំពុងតែស្នើជូនឲ្យ«ដំណឹងល្អពីការប្រសើរ»ជាង?—អេសាយ ៥២:៧
២ រៀបចំសារមួយដ៏ប្រកបដោយសេចក្ដីសង្ឃឹម: ការសន្ទនារបស់យើងក្នុងកិច្ចផ្សាយនឹងមានអានុភាពដ៏ល្អ បើសិនជាយើងផ្ដោតអារម្មណ៍ទៅលើអ្វីដ៏ល្អ។ ដូច្នេះ ពេលដែលយើងរៀបចំពាក្យផ្សាយរបស់យើង ហើយកំពុងតែមើលប្រកាសនវត្ថុដែលយើងនឹងស្នើផ្ដល់ នោះយើងក៏ត្រូវតែបញ្ជាក់នូវទិដ្ឋភាពនៃសារនោះដែលប្រកបដោយសេចក្ដីសង្ឃឹម។ ដោយការប្រាប់ពីសេចក្ដីសង្ឃឹមរបស់យើងដែលមានមូលដ្ឋានលើព្រះគម្ពីរដោយចិត្តជឿមុតមាំនិងចិត្តរំភើប នោះយើងអាចរង់ចាំនូវលទ្ធផលដែលជាទីលើកទឹកចិត្ត។—សុភាសិត ២៥:១១
៣ ទោះបីយើងមានចិត្តអាណិតអាសូរពេលមនុស្សប្រាប់អំពីរបៀបដែលស្ថានភាពពិភពលោកកំពុងតែចុះអន់ថយបានមានអានុភាពលើគេក៏ដោយ យើងគួរតែបញ្ជាក់ថាដំណោះស្រាយពិតប្រាកដចំពោះបញ្ហាមនុស្សជាតិគឺជាព្រះរាជាណាចក្ររបស់ព្រះ។ សូម្បីតែក្នុងពេលដែលពិភាក្សានូវថ្ងៃ«សងសឹក»របស់ព្រះយេហូវ៉ានាពេលខាងមុខនេះក៏ដោយ នោះយើងចង់បង្ហាញនៅរបៀបដែលនេះពិតជា«ដំណឹងល្អដល់មនុស្ស[រាបសា, ព.ថ.]»។ (អេសាយ ៦១:១, ២) យើងអាចជួយអ្នកស្ដាប់របស់យើងឲ្យទុកចិត្តថា អ្វីៗទាំងអស់ដែលព្រះយេហូវ៉ាប្រព្រឹត្ត នោះនៅទីបំផុតនឹងនាំមកនូវសុភមង្គលដ៏បរិបូរហើយនិងលទ្ធផលដ៏ល្អបំផុត។
៤ ប្រាប់សេចក្ដីពិតដោយអំណរដ៏ពិត: ពេលមនុស្សកត់សម្គាល់នូវទឹកមុខសប្បាយរបស់យើងនិងសូរសម្លេងដែលបង្ហាញជំនឿស៊ប់ នោះគេប្រហែលជាចង់ស្ដាប់ជាង។ បើសិនជាយើងសម្ដែងទស្សនៈដ៏សុទិដ្ឋិនិយម អ្នកស្ដាប់របស់យើងនឹងយល់ថាយើង«អរសប្បាយ ដោយមានសង្ឃឹម»។ (រ៉ូម ១២:១២) ដូច្នេះពួកគេប្រហែលជានឹងមានទំនោរចិត្តជាង ដើម្បីធ្វើតាមដំណឹងល្អ។ ពិតមែនហើយ យើងមានហេតុដ៏ល្អឲ្យបង្ហាញជារៀងរហូតនូវអាកប្បកិរិយាមួយដ៏ប្រកបដោយសេចក្ដីសង្ឃឹមនឹងអំណរក្នុងគ្រប់ទិដ្ឋភាពនៃកិច្ចបំរើរបស់យើង។
៥ ជាអ្នកផ្សាយដំណឹងល្អ យើងសម្រេចការបានច្រើនជាង មិនគ្រាន់តែផ្ដល់ពត៌មានប៉ុណ្ណោះ។ ការផ្សព្វផ្សាយរបស់យើងផ្ដល់ឲ្យសេចក្ដីសង្ឃឹមពិតប្រាកដមួយ ខាងឯជីវិតដ៏ល្អជាងនៅឥឡូវនេះនិងនៅនាអនាគតផងដែរ។ (ធីម៉ូថេទី១ ៤:៨) ពេលយើងជួបមនុស្សម្នាក់ៗ គំនិតរបស់យើងដែលប្រកបដោយសេចក្ដីសង្ឃឹមនោះ នឹងត្រូវសឲ្យឃើញដោយអ្វីដែលយើងនិយាយហើយនឹងជួយមនុស្សទទួលដំណឹងល្អ។ ដោយយកចិត្តទុកដាក់លើអ្វីដែលយើងនិយាយនិងរបៀបនិយាយរបស់យើង ចូរឲ្យយើងបញ្ចុះបញ្ចូលអ្នកដែលមានចិត្តស្មោះស ឲ្យទទួលដំណឹងល្អដ៏គួរឲ្យរំភើបចិត្តដែលយើងផ្សព្វផ្សាយ!