ចូរត្រឡប់ទៅវិញកុំខាន!
១ «ការសន្ទនានោះគឺល្អមែន! ខ្ញុំត្រូវតែចាំត្រឡប់ទៅជួបគេម្ដងទៀត»។ តើអ្នកធ្លាប់និយាយអ៊ីចឹងហើយនៅទីបំផុតក៏ភ្លេចផ្ទះរបស់មនុស្សម្នាក់នោះ? បើអ៊ីចឹងមែន អ្នកដឹងថាវិធីតែមួយគត់ដែលអ្នកអាចនឹកចាំយ៉ាងប្រាកដក្នុងការត្រឡប់ទៅជួបគេវិញ គឺដោយកត់ត្រាសរសេរ។
២ សរសេរពត៌មានទាំងអស់: ពេលដែលអ្នកនៅចាំពីការសន្ទនាជាមួយអ្នកចាប់អារម្មណ៍នោះ ចូរឆ្លៀតពេលបន្ដិចបន្តួចដើម្បីកត់សរសេរពត៌មានទាំងអស់ដែលទាក់ទងនឹងអ្នកនោះ។ កត់សរសេរឈ្មោះរបស់គាត់ថែមទាំងរបៀបដែលអ្នកនឹងស្គាល់មុខគាត់។ កត់សរសេរអាស័យដ្ឋានរបស់គាត់ ក៏ប៉ុន្តែកុំធ្វើការប៉ាន់ស្មានលេខផ្ទះនោះទេ ចូរឆែកមើលឲ្យប្រាកដថាអ្វីដែលអ្នកសរសេរគឺត្រឹមត្រូវ។ កត់សរសេរប្រធានបទដែលអ្នកបានពិគ្រោះ និងបទគម្ពីរណាដែលអ្នកបានអាន ហើយប្រកាសនវត្ថុណាដែលបានត្រូវជូនឲ្យ។
៣ បើសិនជាអ្នកបានសួរគាត់នូវសំនួរមួយដោយទុកឆ្លើយនៅលើកក្រោយនោះ ចូរកត់សរសេរសំនួរនោះផង។ តើអ្នកបានរៀនដឹងអ្វីខ្លះអំពីបុគ្គលនោះ គ្រួសាររបស់គាត់ ឬក៏សាសនារបស់គាត់? បើអ៊ីចឹង ចូរកត់ត្រាចំណុចទាំងនោះ។ ពេលដែលអ្នកត្រឡប់ទៅជួបគេវិញ ការនិយាយពីចំណុចទាំងនោះនឹងបង្ហាញចំណាប់អារម្មណ៍របស់អ្នកផ្ទាល់ទៅលើគាត់។ ក្រោយបង្អស់ ចូរកត់សរសេរថ្ងៃនិងម៉ោងដែលអ្នកបានជួបគាត់លើកដំបូង ថែមទាំងពេលដែលអ្នកបានប្រាប់ថាអ្នកនឹងត្រឡប់មកជួបគាត់វិញ។ ដោយកត់ត្រាត្រឹមត្រូវច្បាស់លាស់ នោះអ្នកនឹងមានការរំឭកដ៏ច្បាស់លាស់ ហើយប្រហែលជានឹងកម្រភ្លេចពាក្យសន្យាថានឹងត្រឡប់ទៅជួបគាត់វិញ។—ធីម៉ូថេទី១ ១:១២
៤ ក្រោយពីកំណត់ត្រារបស់អ្នកបានត្រូវសរសេររួចហើយ ចូរដាក់វានៅជាមួយឧបករណ៍ផ្សាយផ្សេងទៀត ដូចជាកាតាបសៀវភៅ ព្រះគម្ពីរ សៀវភៅវែកញែក និងប្រកាសនវត្ថុ ដើម្បីឲ្យអ្នកស្រួលយកវាមកមើល។ គឺជាការល្អបំផុតបើសិនជាអ្នកកត់លេខផ្ទះដែលអត់មានម្ចាស់ផ្ទះនៅ សរសេរទៅលើក្រដាសបញ្ជីពីផ្ទះមួយទៅផ្ទះមួយ មួយសន្លឹកផ្សេងពីក្រដាសដែលអ្នកប្រើដើម្បីកត់ចំណាំត្រឡប់ទៅជួបគេវិញ។ ពិតមែន ទោះបីយើងប្រឹងប្រែងកត់ចំណាំត្រឡប់ទៅជួបគេវិញឲ្យត្រឹមត្រូវក៏ដោយ អ្វីដែលសំខាន់បំផុតគឺថា ចូរត្រឡប់ទៅវិញកុំខាន!
៥ ចូរគិតអំពីបុគ្គលនោះ: ពេលរៀបចំសំរាប់កិច្ចបំរើ ចូរមើលមួយសាទៀតនូវកំណត់របស់អ្នកខាងការត្រឡប់ទៅជួបគេវិញ។ ចូរគិតអំពីបុគ្គលនិមួយៗ និងពីរបៀបនិយាយដែលប្រហែលជាល្អប្រើពេលដែលអ្នកត្រឡប់ទៅជួបគេម្ដងទៀត។ គិតអំពីរបៀបដែលអ្នកអាចបណ្ដុះបណ្ដាលចំណាប់អារម្មណ៍របស់គាត់ ដើម្បីនាំឲ្យទៅជាការសិក្សាព្រះគម្ពីរ។ ការរៀបចំជាមុនបែបនេះអាចបង្កើននូវសមត្ថភាពបង្កើតផលក្នុងនាមជាអ្នកបំរើផ្នែកដំណឹងល្អ ហើយក៏នឹងបង្កើនអំណររបស់អ្នកផ្ទាល់ដែរ។—សុភាសិត ២១:៥ក
៦ ដូច្នេះ ថ្ងៃក្រោយពេលដែលអ្នកជួបគេដែលចង់ស្ដាប់ កុំស្មានថាអ្នកនឹងស្រួលចាំពីការត្រឡប់ទៅជួបនោះ។ ជាជាងនេះ ចូរកត់សរសេរពត៌មាននោះ សើរើនូវកំណត់របស់អ្នក រំពឹងគិតជានិច្ចអំពីបុគ្គលនោះ និងចូរត្រឡប់ទៅវិញកុំខាន!