ខែមេសា ជាពេលធ្វើការល្អយ៉ាងឧស្សាហ៍!
១ ពេលខ្យល់ព្យុះមួយធ្វើដំណើរឆ្ពោះទៅដល់កន្លែងដែលមានប្រជាជននៅ នោះភាពចាំបាច់ក្នុងការព្រមានអំពីគ្រោះថ្នាក់ដែលជិតកើតឡើងនោះគឺកាន់តែបន្ទាន់។ ដែលខ្យល់ព្យុះនោះធ្វើដំណើរឆ្ពោះមកដល់កាន់តែជិត នោះការព្រមានត្រូវបន្លឺកាន់តែខ្លាំងឡើងដែរ។ ហេតុអ្វី? ពីព្រោះនេះទាក់ទងរឿងជីវិតស្លាប់រស់! មនុស្សខ្លះប្រហែលជាមិនបានឮការព្រមានដែលបានត្រូវផ្សាយមុនៗនោះទេ។ អ្នកខ្លះប្រហែលជាបានឮ តែមិនបានយកចិត្តទុកដាក់ធ្វើតាមទេ។ គឺដូចគ្នាដែរ ខាងការព្រមានពីព្រះដែលយើងបានត្រូវបង្គាប់ឲ្យផ្សព្វផ្សាយ មុននឹង«ខ្យល់កួច»ដែលជាសេចក្ដីខ្ញាល់ដ៏សុចរិតរបស់ព្រះ មកកំទេចគ្រប់ផ្នែកនៃលោកីយ៍ដ៏ទុច្ចរិតនេះចោល។ (សុភាសិត ១០:២៥) ជីវិតដ៏និរន្តរ៍របស់មនុស្សរាប់រយកោដិនាក់ត្រូវជាប់ជំពាក់នឹងរឿងនេះ! ការព្រមានត្រូវតែផ្សព្វផ្សាយ។ យើងត្រូវតែ«ឧស្សាហ៍ធ្វើការល្អ»។—ទីតុស ២:១១-១៤
២ អស់ប៉ុន្មានទសវត្សមកហើយ រាស្ត្ររបស់ព្រះយេហូវ៉ាធ្លាប់មានការជំរុញទឹកចិត្ត ដោយធ្វើឲ្យខែដែលប្រារព្ធពិធីបុណ្យរំឭក ទៅជាពេលមួយសំរាប់សេចក្ដីឧស្សាហ៍ជាពិសេសក្នុងកិច្ចបំរើ។ ក្នុងកំឡុងនិទាឃរដូវនៃឆ្នាំ១៩៣៩ ឯកសារនៃអ្នករាយការណ៍ ដែលជាឯកសារដែលក្រោយមកមានឈ្មោះកិច្ចបំរើព្រះរាជាណាចក្រយើង បានផ្ដល់ឲ្យសេចក្ដីលើកទឹកចិត្តដោយថា៖ «និទាឃរដូវគឺជិតមកដល់ហើយ ថែមទាំងមានអាកាសធាតុល្អផងដែរ នោះយើងគួរសង្ឃឹមថា ម៉ោងចំណាយក្នុងកិច្ចផ្សាយនឹងកើនឡើងមួយជាពីរ ពីចំណោមអ្នកផ្សាយក្នុងក្រុមជំនុំ និងចំនួនម៉ោងផ្សាយរបស់អ្នកត្រួសត្រាយគួរកើនឡើងយ៉ាងច្រើនដែរ។ ខែមេសាជាខែមួយដែលមានថ្ងៃអាទិត្យដល់ទៅប្រាំដង។ ខែនេះក៏មានថ្ងៃសៅរ៍ប្រាំដងដែរ។ ចូរឆ្លៀតរៀងរាល់ថ្ងៃសៅរ៍និងថ្ងៃអាទិត្យក្នុងកំឡុងខែមេសា . . . ធ្វើជាពេលសំរាប់ការផ្សព្វផ្សាយពិសេស»។ នេះគឺជាគោលដៅមួយដែលត្រូវខិតខំអស់ពីសមត្ថភាព ដែលបានត្រូវកំណត់សំរាប់បងប្អូនអស់៦០ឆ្នាំមកហើយ! នៅឆ្នាំនេះ ក៏ដូចនឹងឆ្នាំ១៩៣៩ដែរ ដែលខែមេសាមានថ្ងៃសៅរ៍ថ្ងៃអាទិត្យប្រាំដង។ តើអ្នកមានគម្រោងអ្វីខ្លះសំរាប់ខែនេះ? តើអ្នកបានសរសេរអ្វីខ្លះទៅលើប្រក្រតិទិនរបស់អ្នកសំរាប់ខែមេសាឆ្នាំ២០០០? ចូររៀបចំរួមចំណែកដែលប្រកបដោយខ្លឹមសារក្នុងការល្អ រួមជាមួយរាស្ត្រឯទៀតរបស់ព្រះយេហូវ៉ាក្នុងខែពិសេសនេះ ខាងសកម្មភាពផ្នែកវិញ្ញាណឲ្យរឹតតែខ្លាំងឡើង។
៣ អ្វីដែលយើងចង់សម្រេច: ថ្ងៃសំខាន់បំផុតក្នុងឆ្នាំ២០០០ គឺមានក្នុងខែនេះ។ ថ្ងៃនោះគឺជាថ្ងៃទី១៩ ខែមេសា ជាថ្ងៃខួបនៃការសោយទិវង្គតរបស់ព្រះយេស៊ូ។ ចូរឲ្យយើងខំប្រឹងជាពិសេសដើម្បីអញ្ជើញមនុស្សជាច្រើននាក់ដែលយើងអាចអញ្ជើញបាន ឲ្យមកដល់ពិធីបុណ្យរំឭក។ ដូចយើងបានជូនយោបល់នៅខែមុន ចូរធ្វើបញ្ជីឈ្មោះមួយអំពីអស់អ្នកដែលប្រហែលជានឹងមកចូលរួមពិធីបុណ្យរំឭក និងឆែកមើលឲ្យប្រាកដថាមិនបានភ្លេចអ្នកណាម្នាក់ទេ។ អ្នកដែលគួរត្រូវអញ្ជើញគឺជាអ្នកផ្សាយណាដែលឥតសកម្មភាព អ្នកសិក្សាព្រះគម្ពីរគ្រប់រូប ពួកអ្នកដែលយើងត្រឡប់ទៅជួប អ្នកដែលធ្លាប់សិក្សាពីមុន អ្នកដែលធ្វើការជាមួយយើង មិត្តរួមថ្នាក់ អ្នកជិតខាង ញាតិសន្ដាន និងអ្នកឯទៀតដែលយើងស្គាល់។ តើអ្នកទាំងអស់ដែលចង់ចូលរួមមានយានសំរាប់ធ្វើដំណើរទេ? បើសិនជាគ្មាន តើអ្នកអាចបង្ហាញសេចក្ដីស្រឡាញ់ដោយជួយគេទេ? នៅយប់នៃពិធីបុណ្យរំឭក យើងទាំងអស់គ្នានឹងមានឯកសិទ្ធិទទួលស្វាគមន៍នូវអស់អ្នកដែលចូលរួម។ ក្រោយពីពិធីបុណ្យរំឭក យើងអាចបន្តទាក់ទងឲ្យជំនួយខាងវិញ្ញាណជាបន្ថែម ចំពោះអ្នកទាំងនេះដែលមានចំណាប់អារម្មណ៍។
៤ ដែលយើង«ឧស្សាហ៍ធ្វើការល្អ»ក្នុងកំឡុងប៉ុន្មានថ្ងៃមុន និងក្រោយពីពិធីបុណ្យរំឭកនោះ គឺជាវិធីមួយដ៏ល្អដើម្បីបង្ហាញឲ្យព្រះយេហូវ៉ាជ្រាបថា យើងពិតជាដឹងគុណពីអ្វីដែលទ្រង់បានប្រព្រឹត្តដើម្បីយើង។ យើងជាច្រើននាក់នឹងអាចបង្កើនសកម្មភាពផ្សព្វផ្សាយរបស់យើង ពីព្រោះម៉ោងដែលមានពន្លឺថ្ងៃគឺច្រើនជាង និងនៅកន្លែងខ្លះគឺមានអាកាសធាតុល្អជាងផងដែរ។ បើសិនជាអ្នកកំពុងតែត្រួសត្រាយជំនួយ អ្នកគួរខិតខំអស់ពីសមត្ថភាពដើម្បីឲ្យបានចំនួន៥០ម៉ោងឬច្រើនជាងនោះក្នុងកិច្ចបំរើ។ (ម៉ាថាយ ៥:៣៧) កាន់តាមយ៉ាងហ្មត់ចត់នូវកាលវិភាគដែលអ្នកបានរៀបចំនៅដើមខែ។ (សាស្ដា ៣:១; កូរិនថូសទី១ ១៤:៤០) ចូរឲ្យយើងទាំងអស់គ្នាធ្វើយ៉ាងណាដើម្បីគាំទ្រអ្នកត្រួសត្រាយទាំងអស់ ដោយលើកទឹកចិត្តពួកគេនិងដោយផ្សព្វផ្សាយជាមួយនឹងគេផងដែរ។ (ប្រៀបមើល ពង្សាវតារក្សត្រទី២ ១០:១៥, ១៦) បើសិនជាយើងធ្វើការសាបព្រោះដោយចិត្តឧស្សាហ៍ក្នុងកំឡុងខែមេសា នោះយើងអាចសង្ឃឹមបានអំណរជាខ្លាំងនិងពរពីព្រះយេហូវ៉ា។ (ម៉ាឡាគី ៣:១០) ប្រហែលជានេះនឹងធ្វើជាជំហានមួយទៅដល់ការត្រួសត្រាយជំនួយបន្តមិនឈប់ ឬក៏ការត្រួសត្រាយពេញពេល។ ចូរឲ្យល្បឿនខាងសកម្មភាពផ្នែកវិញ្ញាណដែលយើងបង្កើតក្នុងកំឡុងខែមេសា បន្តទៅខែទាំងប៉ុន្មានជាបន្តបន្ទាប់ ពេលដែលយើងបន្តធ្វើជាអ្នកផ្សាយយ៉ាងទៀងទាត់ខាងព្រះរាជាណាចក្រ។
៥ ពិតប្រាកដហើយ ក្នុងខែនេះរាស្ត្ររបស់ព្រះយេហូវ៉ារាប់ពាន់នាក់នឹងចាប់ផ្ដើមការសិក្សាព្រះគម្ពីរតាមផ្ទះច្រើនជាង។ តើអ្នកចង់ចាប់ផ្ដើមការសិក្សាមួយទេ? ចូរអធិស្ឋានដោយនិយាយត្រង់ៗ សូមឲ្យបានអ្នកសិក្សាព្រះគម្ពីរម្នាក់ និងប្រព្រឹត្តសមស្របតាមសេចក្ដីអធិស្ឋាននោះ។ អ្នកអាចជឿជាក់ថា ព្រះយេហូវ៉ាទ្រង់អបអរនឹងសំណូមពរដ៏រាបសារបស់អ្នក ឲ្យបានជំនួយក្នុងការរកបង្រៀនអ្នកណាម្នាក់ដែលមានចិត្តស្មោះស។—យ៉ូហានទី១ ៣:២២
៦ នេះគឺជាវិធីនិយាយដែលបានប្រើយ៉ាងជោគជ័យក្នុងការផ្ដើមការសន្ទនា។ អ្នកចាប់ផ្ដើមដោយសួរថា៖ «តើអ្នកគិតថាអំពើហិង្សាទាំងប៉ុន្មានដែលមានក្នុងសាលា ជាលទ្ធផលពីសកម្មភាពរបស់ពួកព្រាយបិសាចឬក៏កង្វះខាងការបង្ហាត់បង្រៀនពីមាតាបិតា?» ចាំឲ្យគេឆ្លើយ។ បើសិនជាគេនិយាយថា៖ «សកម្មភាពពួកព្រាយបិសាច» សូមអានវិវរណៈ ១២:៩, ១២ និងបញ្ជាក់ពីនាទីនៃអារក្សក្នុងការបណ្ដាលឲ្យមានភាពជ្រួលច្របល់ក្នុងលោកីយ៍នេះ។ ក្រោយនោះ បើកសៀវភៅស្តើងតម្រូវ មើលមេរៀនទី៤ និងសួរថា តើធ្លាប់ឆ្ងល់ថាអារក្សមកពីណាទេ? បន្តដោយអាននិងពិគ្រោះពីរវគ្គនៅដើមមេរៀននោះ។ បើសិនជាគេឆ្លើយថា៖ «កង្វះខាងការបង្ហាត់បង្រៀនពីមាតាបិតា» ជាហេតុដែលមានអំពើហិង្សាក្នុងសាលារៀន នោះសូមអានធីម៉ូថេទី២ ៣:១-៣ និងបញ្ជាក់ពីលក្ខណៈដែលច្បាស់ជានាំមកនូវបញ្ហានេះ។ ក្រោយនោះ បើកសៀវភៅស្តើងតម្រូវ មើលមេរៀនទី៨ អានវគ្គទី៥ និងបន្តពិគ្រោះ។ បើសិនជាអ្នកអាចរៀបចំត្រឡប់មកវិញ អ្នកប្រហែលជាបានបើកផ្លូវមួយដើម្បីមានការសិក្សាព្រះគម្ពីរជាទៀងទាត់ជាមួយគេ។ ពេលដែលអ្នកត្រឡប់ទៅជួបគេវិញ ចូរសួរគេថា តើអ្នកស្គាល់បុគ្គលឯទៀតដែលប្រហែលជានឹងចាប់អារម្មណ៍ស្ដាប់នូវខ្លឹមសារដែលអ្នកកំពុងតែរៀននោះដែរទេ?
៧ វិធីមួយទៀតដែលអ្នកអាច«ឧស្សាហ៍ធ្វើការល្អ»ក្នុងកំឡុងខែមេសា គឺដោយចូលរួមក្នុងវិធីផ្សាយផ្សេងៗ។ តើអ្នកធ្លាប់គិតអំពីការផ្សព្វផ្សាយនៅឯសួនច្បារមួយឬក៏នៅឯកន្លែងចតឡានទេ? ហើយនៅកន្លែងចាំឡានក្រុងឬក៏ស្ថានីយរទេះភ្លើងទេ? ឬក៏តើអ្នកប្រហែលជាចង់សាកផ្សព្វផ្សាយតាមទូរស័ព្ទ តាមថ្នល់ឬក៏តាមហាង? សូមអនុវត្តគំនិតទាំងនោះក្នុងខែនេះទៅ។ ព្រះយេហូវ៉ានិងជួយអ្នកប្រមូលផ្ដុំភាពក្លាហានដែលត្រូវការជាចាំបាច់។ (កិច្ចការ ៤:៣១; ថែស្សាឡូនីចទី១ ២:២ខ) ប្រហែលជាអ្នកអាចរៀបចំផ្សព្វផ្សាយជាមួយអ្នកត្រួសត្រាយម្នាក់ឬក៏អ្នកផ្សាយម្នាក់ដែលមានបទពិសោធន៍ក្នុងវិធីផ្សាយទាំងនេះ។
៨ អ្នកណាដែលចង់បង្កើនចំណែកខ្លួនក្នុងការធ្វើបន្ទាល់ គួរចូលរួមការធ្វើបន្ទាល់ក្រៅផ្លូវការ។ នេះច្រើនតែតម្រូវឲ្យយើងចាប់ផ្ដើមការសន្ទនាយ៉ាងរាក់ទាក់ជាមួយមនុស្សម្នាក់។ គ្រាន់តែយករឿងមួយមកនិយាយដែលគេយកចិត្តទុកដាក់ទៅលើនោះ ប្រហែលជាដោយប្រើវិធីនិយាយក្នុងវគ្គទី៦។ សូម្បីតែរយៈពេលខ្លីប៉ុណ្ណោះក៏គួរនឹងប្រើដែរ ពីព្រោះពុំនោះទេ ពេលនោះនឹងត្រូវបាត់បង់។ យើងមិនបោះចោលលុយដែលមានតម្លៃតិចទេ សូម្បីតែតែវាមិនគ្រប់មួយដុល្លារផង។ សូមឆ្លៀតយកប្រយោជន៍ពីពេលសូម្បីតែប្រាំនាទី ដប់នាទី ឬក៏១៥នាទីដោយធ្វើបន្ទាល់ក្រៅផ្លូវការ។
៩ ពេលមួយសំរាប់ការជញ្ជឹងគិត: ចូរគិតអំពីចំណុចដែលត្រូវបានបញ្ជាក់ក្នុងល្ខោននៅមហាសន្និបាតតាមតំបន់ពីឆ្នាំមុន ដែលមានប្រធាន«បន្ទូលរបស់ព្រះខាងឯទំនាយ»។ ល្ខោនដែលមានចំណងជើង ការអបអរនឹងកេរ្ដិ៍មរតកខាងវិញ្ញាណរបស់យើង បានធ្វើឲ្យយើងគិតយ៉ាងហ្មត់ចត់អំពីភាពខុសគ្នារវាងយ៉ាកុបនិងអេសាវ។ អេសាវបាននិយាយថា គាត់មានចំណាប់អារម្មណ៍ដូចគ្នានឹងយ៉ាកុបទៅលើអ្វីខាងវិញ្ញាណ ក៏ប៉ុន្តែ ការប្រព្រឹត្តរបស់អេសាវមិនបានបង្ហាញនោះទេ។ (លោកុប្បត្តិ ២៥:២៩-៣៤) នេះជាការព្រមានដ៏ខ្លាំងចំពោះយើងណាស់ហ្ន៎! ដូចនឹងយ៉ាកុប ចូរឲ្យយើងប្រុងប្រៀបប្រយុទ្ធ និងតស៊ូពុះពារដើម្បីទទួលពរពីព្រះយេហូវ៉ា។ (លោកុប្បត្តិ ៣២:២៤-២៩) សូមប្រើខែមេសាព្រមទាំងខែជាបន្ទាប់ ដើម្បីបង្កើតសេចក្ដីឧស្សាហ៍របស់យើងសាជាថ្មី ដោយមិនចាត់ទុកកេរ្ដិ៍ដំណែលរបស់យើងខាងវិញ្ញាណជាអ្វីដែលមិនសំខាន់នោះទេ។
១០ «ថ្ងៃដ៏ធំរបស់ព្រះយេហូវ៉ាជិតមកដល់។ គឺបានមកជិតហើយ ក៏ប្រញឹកណាស់ដែរ»។ (សេផានា ១:១៤) ដំណឹងល្អអំពីព្រះរាជាណាចក្រត្រូវតែផ្សាយឡើង។ ជីវិតមនុស្សគឺជាប់ជំពាក់នឹងរឿងនេះ! សូមឲ្យខែនេះប្រកបដោយពរជាពិសេស ចំពោះរាស្ត្ររបស់ព្រះយេហូវ៉ាគ្រប់ៗរូប ពេលដែលយើងបង្ហាញដោយឯកភាពថា យើង«ឧស្សាហ៍ធ្វើការល្អ»។
[ប្រអប់នៅទំព័រ៤]
កំណត់ចំណាំអំពីពិធីបុណ្យរំឭក
ពិធីបុណ្យរំឭកនៅឆ្នាំនេះ គឺចំនឹងថ្ងៃពុធ ទី១៩ ខែមេសា។ អ្នកចាស់ទុំគួរយកចិត្តទុកដាក់នឹងរឿងទាំងប៉ុន្មានដូចតទៅនេះ៖
◼ ក្នុងការកំណត់ម៉ោងសំរាប់ប្រជុំនោះ សូមយកចិត្តទុកដាក់ដើម្បីឲ្យប្រាកដថា វត្ថុតំណាងនឹងមិនត្រូវជូន ទាល់តែក្រោយពីថ្ងៃលិច។
◼ មនុស្សទាំងអស់ រួមបញ្ចូលអ្នកថ្លែងសុន្ទរកថា គួរទទួលដំណឹងជាក់ច្បាស់ពីម៉ោងនិងកន្លែងនៃពិធីនេះ។
◼ នំប៉័ងនិងស្រាប្រភេទត្រឹមត្រូវ គួរត្រូវទទួលនិងរៀបចំ។—សូមមើលទស្សនាវដ្ដីប៉មយាម ថ្ងៃទី១៥ ខែកុម្ភៈ ឆ្នាំ១៩៨៥ ទំព័រ១៩ (ភាសាអង់គ្លេស)។
◼ ចាន កែវ តុនិងកម្រាលតុដ៏សមរម្យ គួរត្រូវយកមកសាលប្រជុំហើយតម្រៀបនៅកន្លែងជាមុន។
◼ សាលប្រជុំ ឬក៏កន្លែងផ្សេងដែលនឹងត្រូវប្រើសំរាប់ប្រជុំ គួរត្រូវសំអាតយ៉ាងហ្មត់ចត់ជាមុន។
◼ អ្នកទទួលភ្ញៀវនិងអ្នកជូនវត្ថុតំណាង គួរត្រូវជ្រើសនិងជំរាបជាមុនអំពីមុខងាររបស់ពួកគេនិងទម្រង់ការត្រឹមត្រូវ។
◼ ពិធីគួររៀបចំឡើង ដើម្បីជូនវត្ថុតំណាងដល់ពួកអ្នកចាក់ប្រេងតាំងណាដែលឈឺនិងចូលរួមមិនបាន។
◼ ពេលមានក្រុមជំនុំច្រើនដែលនឹងប្រើសាលប្រជុំដដែល នោះគួរមានរបៀបរៀបចំល្អរវាងក្រុមជំនុំ ដើម្បីជៀសវាងការកកស្ទះនៅបរិវេណខាងមុខឬកន្លែងចូល តាមចិញ្ចើមថ្នល់ និងនៅកន្លែងផ្ញើឡានជាដើម។