តើ«ត្រូវល្បងល»ដោយដូចម្ដេច?
១ ដោយមានការរីកធំឡើងក្នុងអង្គការរបស់ព្រះយេហូវ៉ា នោះមានសេចក្ដីត្រូវការជានិច្ចឲ្យមានបងប្អូនប្រុសដែលមានគុណវុឌ្ឍិដើម្បីបំរើជាអ្នកងារជំនួយ។ បងប្អូនប្រុសភាគច្រើនរួមបញ្ចូលក្មេងជំទង់ៗ ដែលមិនទាន់ត្រូវជ្រើសរើសទេ ប៉ុន្តែគេប៉ងប្រាថ្នាបំរើក្នុងក្រុមជំនុំ។ ពេលគេទទួលកិច្ចការបន្ថែម នោះគេមានអារម្មណ៍ថាខ្លួនមានប្រយោជន៍និងមានអារម្មណ៍ថាខ្លួនបានសម្រេចការយ៉ាងល្អ។ ជំនឿនតទៅទៀតរបស់គេ គឺពឹងពាក់ទៅលើការ«ល្បងល»។ (ធីម៉ូថេទី១ ៣:១០) តើនេះអាចត្រូវសម្រេចយ៉ាងដូចម្ដេចបាន?
២ តួនាទីរបស់ពួកអ្នកចាស់ទុំ: ជាផ្នែកនៃការប្រៀបបងប្រុសម្នាក់ទៅនឹងគុណវុឌ្ឍិក្នុងបទគម្ពីរសំរាប់អ្នកងារជំនួយដែលមាននៅធីម៉ូថេទី១ ៣:៨-១៣ ពួកអ្នកចាស់ទុំនឹងល្បងលសមត្ថភាពរបស់បងប្រុសម្នាក់ខាងការទទួលបន្ទុកការងារ។ ប្រហែលជាមុនដំបូង គេនឹងកំណត់ឲ្យគាត់ធ្វើកិច្ចបំរើដែលមានប្រយោជន៍ទាក់ទងនឹងការមើលខុសត្រូវទស្សនាវដ្ដីនិងប្រកាសនវត្ថុដើម្បីចែកដល់គេ រៀបចំមីក្រូ និងការថែសាលព្រះរាជាណាចក្រជាដើម។ ពួកអ្នកចាស់ទុំនិងមើលថាតើគាត់ធ្វើកិច្ចការរបស់គាត់យ៉ាងដូចម្ដេច។ ពួកគេនិងមើលលក្ខណៈមួយចំនួនគឺថា អាចពឹងពាក់បាន មកទៀងពេល មានវីរិយភាព ភាពរាបទាប សុខចិត្តជួយ និងមានសមត្ថភាពប្រស្រ័យទាក់ទងអ្នកដទៃ។ (ភីលីព ២:២០) តើគាត់ជាគំរូល្អចំពោះការស្លៀកពាក់និងការសំអិតសំអាងទេ? តើគាត់ចេះទទួលខុសត្រូវទេ? ពួកគេចង់ឃើញថាអ្នកនោះ«សំដែងចេញជាកិរិយាល្អ ដោយសារការដែលខ្លួនប្រព្រឹត្ត ដោយសេចក្ដីសុភាពនៃប្រាជ្ញា»។ (យ៉ាកុប ៣:១៣) តើគាត់ពិតជាខិតខំជួយក្នុងក្រុមជំនុំទេ? តើគាត់កំពុងតែធ្វើតាមសេចក្ដីបង្គាប់របស់ព្រះយេស៊ូឲ្យ«បញ្ចុះបញ្ចូលឲ្យមានសិស្ស» ដោយការចូលរួមយ៉ាងខ្នះខ្នែងក្នុងកិច្ចបំរើផ្សាយទេ?—ម៉ាថាយ ២៨:១៩; សូមមើលទស្សនាវដ្ដីប៉មយាម ថ្ងៃទី១ ខែកញ្ញា ឆ្នាំ១៩៩០ ទំព័រ១៨-២៨ (ភាសាអង់គ្លេស)។
៣ ទោះបីព្រះគម្ពីរគ្មានដាក់កំណត់អាយុសំរាប់ការជ្រើសរើសជាអ្នកងារជំនួយក៏ដោយ ព្រះគម្ពីរសំដៅទៅបងប្រុសបែបនេះជា«ពួកបុរសដែលធ្វើការបំរើ»។ យើងមិនគិតថាពួកនេះជាក្មេងជំទង់ឬក៏ពាក់កណ្ដាលយុវវ័យនោះទេ ជាពិសេសដែលបទគម្ពីរនិយាយថាគេប្រហែលជាមានប្រពន្ធនិងកូន។ (ធីម៉ូថេទី១ ៣:១២, ១៣, ព.ថ.) ពួកបុរសទាំងនេះមិនគួរបន្ទន់ទៅតាម«សេចក្ដីស្រើបស្រាលរបស់ក្មេងៗ» ក៏ប៉ុន្តែគួរប្រព្រឹត្តដោយចិត្តនឹងធឹង ទាំងមានឋានៈល្អនិងមនសិការជ្រះថ្លាចំពោះព្រះនិងមនុស្ស។—ធីម៉ូថេទី២ ២:២២
៤ ទោះបីសមត្ថភាពផ្ទាល់ខ្លួនគឺមានប្រយោជន៍ក៏ដោយ សំខាន់បំផុតគឺជាអាកប្បកិរិយានិងចិត្តគំនិតរបស់មនុស្សម្នាក់។ តើបងប្រុសម្នាក់ប៉ងប្រាថ្នាសរសើរព្រះយេហូវ៉ាដោយចិត្តសុភាព និងបំរើបងប្អូនរបស់គាត់ទេ? បើអ៊ីចឹង ព្រះយេហូវ៉ានិងប្រទានពរទៅដល់ការព្យាយាមរបស់គាត់ដើម្បីជឿនឡើងក្នុងក្រុមជំនុំ។