ចូរឲ្យយើងទាំងអស់គ្នាលើកកិត្ដិយសចំពោះព្រះយេហូវ៉ានិងព្រះរាជបុត្រារបស់ទ្រង់
របៀបដែលអស់អ្នកចូលរួមពិធីបុណ្យរំឭកនៅថ្ងៃទី៨ ខែមេសា អាចទទួលប្រយោជន៍ជាច្រើនថែមទៀត
១ សព្វថ្ងៃនេះ តើគេលើកកិត្ដិយសពិសេសចំពោះអ្នកណាខ្លះ? គឺចំពោះអស់អ្នកដែលបានសម្រេចការដែលលោកីយ៍នេះចាត់ទុកថា ជាសំខាន់។ ក៏ប៉ុន្តែ ក្នុងករណីភាគច្រើន អ្នកដទៃឆាប់ភ្លេចអំពើរបស់អ្នកទាំងនោះវិញ។ ចុះយ៉ាងណាវិញ ចំពោះការប្រព្រឹត្តដែលពិតជាផ្ដល់ប្រយោជន៍ដល់មនុស្សជាតិទាំងឡាយ? យើងនឹងប្រុងស្មារតីចំពោះការប្រព្រឹត្តមួយដ៏ល្អអស្ចារ្យជាងគេ កាលដែលយើងរំឭកពីអាហារល្ងាចរបស់ព្រះអម្ចាស់ ក្រោយពីថ្ងៃលិចនៅថ្ងៃទី៨ ខែមេសា ឆ្នាំ២០០១។
២ តើនរណាដែលគួរនឹងទទួលកិត្ដិយសច្រើនជាងគេ? ព្រះគម្ពីរឆ្លើយថា៖ «[ព្រះយេហូវ៉ា]ទ្រង់គួរនឹងទទួលសិរីល្អ កិតិនាម នឹងព្រះចេស្ដា ដ្បិតទ្រង់បានបង្កើតរបស់សព្វសារពើមក»។ (វិវរណៈ ៤:១១) ជាអ្នកបង្កើតនោះ ព្រះយេហូវ៉ាក៏ជាព្រះមហាក្សត្រនៃសកលលោកទាំងមូល។ ទ្រង់នឹងមិនគួរលែងទទួលកិត្ដិយសទេ!—ធីម៉ូថេទី១ ១:១៧
៣ ព្រះរាជបុត្រារបស់ព្រះ គឺព្រះយេស៊ូគ្រីស្ទ បានធ្វើអំពើដ៏ល្អសមគួរដែលនឹងនាំឲ្យមនុស្សលោកមានប្រសិទ្ធិពរជាស្ថាពរ។ ទ្រង់បានធ្វើតម្រាប់តាមព្រះវរបិតាយ៉ាងពេញលេញ។ (យ៉ូហាន ៥:១៩) ពីព្រោះទ្រង់បានស្ដាប់បង្គាប់តាមរបៀបដ៏ឥតខ្ចោះ ព្រមទាំងបានបំរើព្រះដោយស្មោះត្រង់ នោះធ្វើឲ្យទ្រង់«គួរនឹងបានព្រះចេស្ដា ទ្រព្យសម្បត្ដិ ប្រាជ្ញា ឥទ្ធិឫទ្ធិ កិតិនាម សិរីល្អ នឹងព្រះពរ»។ (វិវរណៈ ៥:១២) ព្រះវរបិតាបានលើកកិត្ដិយសព្រះយេស៊ូ ដោយប្រគល់បល្ល័ង្កឲ្យទ្រង់គ្រប់គ្រងជាស្តេច។ (ទំនុកដំកើង ២:៦-៨) រីឯយើងវិញ ក៏មានឱកាសលើកកិត្ដិយសដល់ព្រះវរបិតាព្រមទាំងព្រះរាជបុត្រាទ្រង់ផងដែរ ពេលដែលយើងរំឭកពីអាហារពេលល្ងាចរបស់ព្រះអម្ចាស់ នៅថ្ងៃទី៨ ខែមេសា ឆ្នាំ២០០១។
៤ គួរឲ្យស្ដាយណាស់! ដែលមនុស្សចំនួនតែបន្ដិចបន្តួចទេក្នុងប្រវត្ដិសាស្ត្រ បានលើកកិត្ដិយសយ៉ាងត្រឹមត្រូវថ្វាយព្រះយេហូវ៉ានិងព្រះរាជបុត្រារបស់ទ្រង់។ មានគ្រាខ្លះដែលប្រជារាស្ត្រពីបុរាណរបស់ព្រះ គឺពួកអ៊ីស្រាអែល ក៏បានធ្វើកិច្ចបំរើដ៏ស្តួចស្តើងថ្វាយព្រះយេហូវ៉ា។ ការធ្វើដូចនោះជាការមិនគោរពទាល់តែសោះ។ (ម៉ាឡាគី ១:៦) ការគោរពគេយ៉ាងត្រឹមត្រូវនោះ តម្រូវឲ្យគេស្ដាប់បង្គាប់យ៉ាងស្មោះស្ម័គ្រ ដោយមានសេចក្ដីស្រឡាញ់ជាមូលដ្ឋាន ទាំងអបអរនឹងអ្វីៗទាំងអស់ដែលព្រះយេហូវ៉ានិងព្រះរាជបុត្រាទ្រង់បានសម្រេចដើម្បីជាប្រយោជន៍ដល់យើង។ ការលើកកិត្ដិយសនិងការគោរពបែបនោះមានន័យថា យើងបង្ហាញចិត្តកោតខ្លាចនិងចង់ថ្វាយបង្គំព្រះយេហូវ៉ា ដោយទទួលស្គាល់ព្រះយេហូវ៉ានិងព្រះយេស៊ូក្នុងគ្រប់ការទាំងអស់របស់យើង។ ក្រុមជំនុំគ្រីស្ទានខំបង្រៀននិងជួយអ្នកឯទៀតធ្វើដូច្នេះដែរ។
៥ ឱកាសដ៏ពិសេសដើម្បីបង្ហាញកិត្ដិយស: ជារៀងរាល់ឆ្នាំ ការធ្វើពិធីបុណ្យរំឭកជាវេលាជួបជុំគ្នាដ៏សំខាន់បំផុត របស់រាស្ត្រនៃព្រះយេហូវ៉ា។ នរណាម្នាក់ដែលមានចិត្តចង់បំរើ ព្រមទាំងលើកកិត្ដិយសថ្វាយព្រះយេហូវ៉ា នោះគួរតែចូលរួមដែរ។ (លូកា ២២:១៩) យើងសង្ឃឹមថា បន្ថែមទៅលើស្មរបន្ទាល់៦លាននាក់ដែលមានសកម្មភាពនោះ ក៏និងមានអ្នកចាប់អារម្មណ៍ដែលនឹងចូលរួមចំនួនកើនដល់លើសជាង១៤លាននាក់ទៅទៀត។ នេះជាឱកាសដ៏ល្អណាស់ហ្ន៎! ដើម្បីលើកកិត្ដិយសថ្វាយព្រះវរបិតារបស់យើងនៅស្ថានសួគ៌។ ទោះជាពិធីបុណ្យនេះចង្អុលបញ្ជាក់ពីព្រះយេស៊ូក៏ដោយ កិត្ដិយសនិងការគោរពចំពោះអ្វីដែលទ្រង់បានសម្រេច ក៏ថែមទាំងលើកកិត្ដិយសដល់ព្រះវរបិតាផងដែរ ដែលបានចាត់ឲ្យទ្រង់មក។—យ៉ូហាន ៥:២៣
៦ តើយើងអាចធ្វើអ្វីដើម្បីគាំទ្រខាងពិធីដ៏ពិសេសនេះ? យើងអាចជួយអ្នកថ្មីទទួលប្រយោជន៍យ៉ាងពេញលេញ។ សូមជំរុញចិត្តគេឲ្យចូលរួមដែរ និងបើត្រូវការ អញ្ជើញជួយគេក្នុងការធ្វើដំណើរទៅផង។ ពន្យល់អំពីគោលបំណងនៃសុន្ទរកថានោះ។ នាំឲ្យគេស្គាល់អ្នកដទៃទៀត។ អ្វីៗដែលគេឮនិងឃើញអាចជំរុញចិត្តគេឲ្យចង់ចូលរួមជាមួយយើងក្នុងការលើកកិត្ដិយសថ្វាយព្រះយេហូវ៉ាដែរ។
៧ កុំប៉ាន់ប្រមាណពីឥទ្ធិពលដែលកម្មវិធីនោះអាចមាន។ និស្សិតម្នាក់នៅសកលវិទ្យាល័យ បានមានអារម្មណ៍ថា៖ «ខ្ញុំធ្លាប់ទៅវិហារចូលរួមបុណ្យអភិបូជាច្រើនដងហើយ តែពិធីមួយនេះខុសគ្នាឆ្ងាយណាស់! ខ្ញុំឃើញថា ពិធីបែបនេះគឺដូចបេះបិទនឹងអ្វីដែលមានក្នុងគម្ពីរដែរ។ ខ្ញុំក៏មានគំនិតថា អ្នកមានសាសនាពិតមែន»។ គាត់បានចាប់ផ្ដើមទៅកិច្ចប្រជុំជាទៀងទាត់ និងមិនយូរប៉ុន្មានក្រោយមកបានទទួលបុណ្យជ្រមុជទឹកដែរ។
៨ ជួយអ្នកថ្មីលូតលាស់ទៅមុខ: សូមកត់សម្គាល់ពីអ្នកថ្មីដែលចូលរួមពិធីបុណ្យរំឭក និងទៅលេងគេឆាប់ៗ ដើម្បីសើរើឡើងវិញនូវអ្វីៗដែលគេបានរៀននិងឃើញនោះ ដែលជំរុញទឹកចិត្ត។ ជំរាបប្រាប់គេអំពីកិច្ចប្រជុំឯទៀត ជាកន្លែងដើម្បីបន្ថែមចំណេះខាងព្រះគម្ពីរ។ ការមើលសៀវភៅចំណេះ ជំពូកទី១៧ ដែលមានចំណងជើងថា៖ «ស្វែងរកសន្ដិសុខក្នុងចំណោមរាស្ត្ររបស់ព្រះ» នឹងបង្ហាញអំពីសំវិធានការខាងវិញ្ញាណជាច្រើនបែបច្រើនយ៉ាង ដែលផ្ដល់មកដោយក្រុមជំនុំ ក៏សំរាប់ខ្លួនគេផងដែរ។ រៀបចំកម្មវិធីឲ្យគេមើលកាសែតវីដេអូភាតរភាពទាំងមូលរបស់យើង ដើម្បីឲ្យគេឃើញដោយភ្នែកផ្ទាល់ នូវសាមគ្គីភាព អំណរអរ និងចិត្តខ្នះខ្នែងនៃរាស្ត្ររបស់ព្រះយេហូវ៉ា!
៩ គឺជាការសំខាន់ណាស់ដែលអ្នកចាប់អារម្មណ៍នោះ រៀនអំពីរបៀបដែលគេអាចបង្ហាញកិត្ដិយសផ្ទាល់ខ្លួនចំពោះព្រះយេហូវ៉ា និងគោរពទ្រង់។ សូមពន្យល់ថា ការអធិស្ឋានអស់ពីដួងចិត្ត នោះផ្គាប់ព្រះហឫទ័យរបស់ព្រះយេហូវ៉ា និងជាអ្វីដែលពង្រឹងទឹកចិត្តជានិច្ចខាងវិញ្ញាណ។ (យ៉ូហានទី១ ៥:១៤) ដោយប្រើមេរៀនទី៨ដល់១២ ពីសៀវភៅស្តើងតម្រូវ ចូរពិពណ៌នាអំពីចរិយាបែបណាដែលលើកកិត្ដិយសដល់ព្រះយេហូវ៉ា។ ដោយពិគ្រោះអំពីអ្វីដែលបានកត់ក្នុងសៀវភៅស្តើងមិត្តសំឡាញ់របស់ព្រះ! ទំព័រទី១៧ សូមលើកទឹកចិត្តអ្នកថ្មីឲ្យគិតអំពីលទ្ធភាពក្នុងការលើកកិត្ដិយសថ្វាយព្រះយេហូវ៉ា ដោយចូលរួមផ្ទាល់ខ្លួននឹងកិច្ចការផ្សព្វផ្សាយ។
១០ ការអបអរចំពោះយញ្ញបូជារបស់ព្រះយេស៊ូ និងចំពោះឯកសិទ្ធិបំរើជាសិស្សរបស់ទ្រង់ នោះលើកកិត្ដិយសដល់ព្រះវរបិតា និងនាំឲ្យអ្នកដទៃទទួលប្រសិទ្ធិពរដែរ។ ព្រះយេស៊ូបានសន្យាថា៖ «បើអ្នកណាបំរើខ្ញុំ ព្រះវរបិតានឹងលើកមុខអ្នកនោះ»។—យ៉ូហាន ១២:២៦