តើអ្នកចង់ធ្វើឲ្យបានច្រើនជាងទេ?
១ ព្រះយេស៊ូបានប្រៀបព្រះរាជាណាចក្រទៅនឹងរតនៈសម្បត្ដិដែលមានតម្លៃច្រើនលើសលប់។ (ម៉ាថាយ ១៣:៤៤-៤៦) កិច្ចផ្សព្វផ្សាយសារព្រះរាជាណាចក្រក៏ជារតនៈសម្បត្ដិថ្លៃថ្លាដែរ។ កិច្ចបំរើនេះគួរជាអាទិភាពក្នុងជីវិតរបស់យើង សូម្បីតែបើសិនជាការរួមចំណែកយ៉ាងពេញលេញ តម្រូវឲ្យធ្វើពលិកម្មក៏ដោយ។ (ម៉ាថាយ ៦:១៩-២១) តើអ្នកចង់ធ្វើឲ្យបានច្រើនជាងក្នុងកិច្ចបំរើព្រះរាជាណាចក្រទេ?
២ សូមពិចារណានូវសេចក្ដីត្រូវការខ្លះៗនេះ: មានសេចក្ដីត្រូវការមួយចំនួនដែលចាំបាច់ ដើម្បីឲ្យយើងពង្រីកចំណែកខ្លួនក្នុងកិច្ចបំរើ : (១) តាំងចិត្តទុកអ្វីៗខាងព្រះរាជាណាចក្រជាអាទិភាពក្នុងជីវិតអ្នក។ (ម៉ាថាយ ៦:៣៣) (២) អនុវត្តជំនឿនិងពឹងពាក់ទៅលើព្រះយេហូវ៉ា។ (កូរិនថូសទី២ ៤:១, ៧) (៣) អធិស្ឋានទូលព្រះយ៉ាងស្មោះអស់ពីចិត្តនិងដោយឥតឈប់ឈរឲ្យបានជំនួយ។ (លូកា ១១:៨-១០) (៤) អនុវត្តតាមនិងប្រព្រឹត្តសមស្របតាមសេចក្ដីអធិស្ឋានរបស់យើង។—យ៉ាកុប ២:១៤, ១៧
៣ របៀបដែលយើងអាចពង្រីកកិច្ចបំរើរបស់យើង: យើងម្នាក់ៗអាចមានគោលបំណងចូលរួមជាទៀងទាត់រៀងរាល់ខែក្នុងកិច្ចបំរើ។ ក៏ប៉ុន្តែ តើអ្នកបានប្រុងប្រៀបចាប់យកគ្រប់ឱកាសផ្សព្វផ្សាយក្រៅផ្លូវការ ទាំងខិតខំប្រើពាក្យផ្សព្វផ្សាយដែលមានខ្លឹមសារជាង ដើម្បីបង្កើនប្រសិទ្ធិភាពរបស់អ្នក ពេលយើងធ្វើការត្រឡប់ទៅជួប និងដោយខិតខំមានការសិក្សាព្រះគម្ពីរដែលរីកចំរើនទេ? តើអ្នកអាចត្រួសត្រាយពេញពេលឬក៏ជំនួយ ឬបំរើនៅកន្លែងមួយដែលមានសេចក្ដីត្រូវការខ្លាំងជាងទេ? បើសិនជាអ្នកគឺបងប្រុសម្នាក់ដែលបានទទួលបុណ្យជ្រមុជទឹកហើយ តើអ្នកខិតខំបំពេញតម្រូវការដើម្បីធ្វើជាអ្នកងារជំនួយឬអ្នកចាស់ទុំម្នាក់ទេ? (ធីម៉ូថេទី១ ៣:១, ១០) តើអ្នកអាចពង្រីកកិច្ចបំរើរបស់អ្នកដោយចុះឈ្មោះខំចូលបំរើនៅបេតអែល ចូលសាលាបង្ហាត់ខាងកិច្ចបំរើ ឬក៏ទទួលការបង្ហាត់បង្រៀនជាសាសនទូតម្នាក់នៅឯសាលាគីលាតទេ?—លូកា ១០:២
៤ បងប្រុសម្នាក់ដែលធ្លាប់ធ្វើការពេញពេលបានប្រើពេលជាច្រើនក្នុងការលេងកីឡា ហើយត្រូវគេលើកទឹកចិត្តឲ្យផ្សព្វផ្សាយពេញពេល។ គាត់ចាប់ផ្ដើមត្រួសត្រាយជំនួយនិងក្រោយមកកែប្រែកាលៈទេសៈរបស់គាត់ដើម្បីចូលកិច្ចបំរើពេញពេល។ ក្រោយមក គាត់ចូលរួមសាលាបង្ហាត់ខាងកិច្ចបំរើ ដែលបានជួយគាត់ឲ្យទៅជាអ្នកត្រួតពិនិត្យតាមមណ្ឌលឥឡូវ។ គាត់មានចិត្តសប្បាយដែលគាត់បានប្រព្រឹត្តតាមសេចក្ដីលើកទឹកចិត្ត ដែលគាត់បានទទួលនោះ និងប្រាកដក្នុងចិត្តថា គាត់គឺសប្បាយជាងដោយព្រោះគាត់បានសម្រេចចិត្តធ្វើឲ្យបានច្រើនជាងក្នុងកិច្ចបំរើព្រះរាជាណាចក្រ។
៥ ព្រះយេហូវ៉ាប្រទានពរចំពោះអស់អ្នកដែលប្រគល់ខ្លួនក្នុងការបំពេញកិច្ចបំរើ។ (អេសាយ ៦:៨) កុំឲ្យអ្វីសោះរារាំងអ្នកពីការពង្រីកកិច្ចបំរើរបស់អ្នក និងពីការទទួលនូវការពេញចិត្តថែមទាំងអារម្មណ៍ធូរស្រាលខ្លាំងជាងនោះ។