គោលដៅដ៏ល្អសម្រាប់ឆ្នាំកិច្ចបម្រើថ្មី
១ ដើម្បីឲ្យកិច្ចបម្រើព្រះមានការរីកចម្រើនយើងត្រូវកំណត់គោលដៅ។ តើអ្នកមានគោលដៅអ្វីសម្រាប់ឆ្នាំកិច្ចបម្រើថ្មី? គោលដៅដ៏ល្អមួយគឺបម្រើជាអ្នកត្រួសត្រាយជំនួយសម្រាប់មួយខែឬច្រើនខែ។ កិច្ចការដ៏រីករាយនេះ តម្រូវឲ្យយើងធ្វើគម្រោងទុកជាមុន ហើយជាការល្អបើយើងចាប់ផ្ដើមគិតពីឥឡូវនេះទៅ។ ហេតុអ្វីគួរពិចារណាអំពីការត្រួសត្រាយជំនួយជាគោលដៅ?
២ មូលហេតុបម្រើជាអ្នកត្រួសត្រាយជំនួយ : ដោយចំណាយពេលច្រើនជាងក្នុងកិច្ចបម្រើផ្សាយ ការត្រួសត្រាយជំនួយជួយយើងផ្គាប់ចិត្តព្រះវរបិតានៅស្ថានសួគ៌របស់យើងឲ្យ«កាន់តែខ្លាំងឡើង»។ (១ថែ. ៤:១) ពេលយើងពិចារណាអ្វីដែលព្រះយេហូវ៉ាបានធ្វើសម្រាប់យើង ចិត្តយើងជំរុញយើងឲ្យប្រាប់អ្នកដទៃអំពីទ្រង់។ (ទំនុក. ៣៤:១, ២) ព្រះយេហូវ៉ាយកចិត្តទុកដាក់ និងឲ្យតម្លៃលើការលះបង់ប្រយោជន៍ផ្ទាល់ខ្លួនរបស់យើង ដើម្បីអាចចំណាយពេលច្រើនទៀតក្នុងកិច្ចបម្រើផ្សាយ។ (ហេ. ៦:១០) ដោយដឹងថា កិច្ចការដែលយើងខំធ្វើគឺគាប់ចិត្តព្រះយេហូវ៉ា នោះនាំឲ្យយើងមានអំណរជាខ្លាំង។—១របា. ២៩:៩
៣ ពេលយើងធ្វើអ្វីមួយកាន់តែច្រើនឡើងៗ ធម្មតានេះនាំឲ្យយើងធ្វើអ្វីនោះកាន់តែស្រួល ហើយយើងក៏ចូលចិត្តធ្វើការនោះថែមទៀតដែរ។ ការចំណាយពេលច្រើនជាងក្នុងកិច្ចបម្រើផ្សាយ នឹងជួយអ្នកឲ្យមានអារម្មណ៍ស្រួលជាងពេលនិយាយជាមួយម្ចាស់ផ្ទះ។ អ្នកនឹងមានការស្ទាត់ជំនាញក្នុងការប្រើគម្ពីរ ហើយចាប់ផ្ដើមការសន្ទនា។ នៅពេលអ្នកនិយាយប្រាប់អំពីជំនឿរបស់អ្នកកាន់តែច្រើនឡើង ជំនឿនោះក៏កាន់តែមាំមួនដែរ។ បងប្អូនជាច្រើនដែលមិនមានសិស្សព្រះគម្ពីរពីមុន បានចាប់ផ្ដើមមានសិស្សនៅពេលត្រួសត្រាយជំនួយ។
៤ ការត្រួសត្រាយជំនួយក៏ប្រហែលជាវិធីដែលលើកទឹកចិត្តយើង ឲ្យមានទម្លាប់ល្អក្នុងកិច្ចបម្រើព្រះ។ បងប្រុសម្នាក់ដែលធ្លាប់បម្រើជាអ្នកត្រួសត្រាយពេញពេល បានយល់ឃើញថាគាត់កំពុងតែចំណាយពេលច្រើនពេកក្នុងការងារ បានសម្រេចចិត្តបម្រើជាអ្នកត្រួសត្រាយជំនួយសម្រាប់មួយខែ។ គាត់បានមានប្រសាសន៍ថា៖ «ខ្ញុំនឹកស្មានមិនដល់សោះ ថាការត្រួសត្រាយជំនួយតែមួយខែនោះ បានពង្រឹងកម្លាំងចិត្តខ្ញុំក្នុងកិច្ចបម្រើព្រះ! ខ្ញុំបានសម្រេចចិត្តបម្រើជាអ្នកត្រួសត្រាយជំនួយជាបន្តបន្ទាប់ ហើយនៅទីបំផុត នាំឲ្យខ្ញុំបម្រើជាអ្នកត្រួសត្រាយពេញពេលម្ដងទៀត»។
៥ ចូរយកឈ្នះលើឧបសគ្គ : បងប្អូនខ្លះប្រហែលស្ទាក់ស្ទើរចុះឈ្មោះជាអ្នកត្រួសត្រាយជំនួយដោយសារមានអារម្មណ៍ថាខ្លួនខ្វះសមត្ថភាពជាអ្នកផ្សព្វផ្សាយ។ ប្រសិនបើអ្នកគិតថាអ្នកមិនអាចត្រួសត្រាយជំនួយដោយសារហេតុនេះ ព្រះយេហូវ៉ាអាចជួយអ្នក ដូចទ្រង់បានជួយលោកយេរេមាដែរ។ (យេ. ១:៦-១០) ទោះបីលោកម៉ូសេ«មានមាត់រឹង ហើយអណ្ដាតក៏ដំឡាន់ផង»ក៏ដោយ ព្រះយេហូវ៉ាបានប្រើលោកឲ្យបំពេញឆន្ទៈរបស់ទ្រង់។ (និក្ខ. ៤:១០-១២) ប្រសិនបើអ្នកមានអារម្មណ៍ថាខ្លួនគ្មានសមត្ថភាព ចូរអធិស្ឋានសុំព្រះយេហូវ៉ាឲ្យអ្នកមានចិត្តក្លាហាន។
៦ តើអ្នកស្ទាក់ស្ទើរចុះឈ្មោះជាអ្នកត្រួសត្រាយជំនួយដោយសារអ្នកមានបញ្ហាសុខភាព ឬជាប់រវល់ពេកទេ? ប្រសិនបើអ្នកឈឺ ការផ្សព្វផ្សាយតាមកម្រិតនៃកម្លាំងរបស់អ្នកជាសម្រួល ប្រហែលអាចជួយអ្នកឲ្យបម្រើជាអ្នកត្រួសត្រាយជំនួយបាន។ ប្រសិនបើអ្នកជាប់រវល់ពេក អ្នកប្រហែលអាចពន្យារកិច្ចការដែលមិនសូវសំខាន់ទៅធ្វើនៅខែផ្សេងទៀត។ បងប្អូនខ្លះដែលធ្វើការងារពេញពេល បានលៃយកឱកាសដើម្បីត្រួសត្រាយជំនួយ ដោយសុំច្បាប់ឈប់សម្រាកពីការងារមួយឬពីរថ្ងៃ។—កូល. ៤:៥
៧ របៀបដែលអាចត្រួសត្រាយជំនួយ : សូមអធិស្ឋានអំពីបំណងរបស់អ្នកដើម្បីត្រួសត្រាយជំនួយ ហើយសុំព្រះយេហូវ៉ាឲ្យប្រទានពរដល់ការព្យាយាមរបស់អ្នកដើម្បីពង្រីកកិច្ចបម្រើផ្សាយ។ (រ៉ូម ១២:១១, ១២) ទ្រង់នឹងជួយអ្នកឲ្យធ្វើការសម្រេចចិត្តដោយប្រាជ្ញា ស្តីអំពីរបៀបផ្លាស់ប្ដូរកាលវិភាគរបស់អ្នក។ (យ៉ា. ១:៥) ប្រសិនបើអ្នកមិនសូវចង់ត្រួសត្រាយជំនួយទេ ចូរសុំព្រះយេហូវ៉ាជួយអ្នកឲ្យមានចិត្តរីករាយក្នុងកិច្ចផ្សព្វផ្សាយ។—លូ. ១០:១, ១៧
៨ សូមពិគ្រោះជាមួយក្រុមគ្រួសារអំពីគោលដៅធ្វើជាអ្នកត្រួសត្រាយជំនួយ។ (សុ. ១៥:២២) ប្រហែលសមាជិកម្នាក់អាចត្រួសត្រាយជំនួយដោយមានការគាំទ្រពីសមាជិកឯទៀត។ សូមពិគ្រោះអំពីបំណងរបស់អ្នកជាមួយបងប្អូនឯទៀតក្នុងក្រុមជំនុំ ជាពិសេសជាមួយអស់អ្នកដែលមានកាលៈទេសៈដូចអ្នក។ នេះប្រហែលបង្កើតឲ្យមានអារម្មណ៍រំភើបថែមទៀតចំពោះការត្រួសត្រាយជំនួយ។
៩ ពេលអ្នកពិនិត្យមើលកាលវិភាគខាងកិច្ចផ្សព្វផ្សាយសម្រាប់ឆ្នាំកិច្ចបម្រើថ្មី តើអ្នកគិតថា អ្នកអាចត្រួសត្រាយជំនួយនៅខែណា? ប្រសិនបើអ្នកធ្វើការពេញពេល រៀននៅសាលា អ្នកប្រហែលគិតអំពីខែដែលមានថ្ងៃឈប់បុណ្យ ឬខែដែលមានថ្ងៃសៅរ៍ឬថ្ងៃអាទិត្យប្រាំ។ ជាឧទាហរណ៍ ខែកញ្ញា ខែធ្នូ ខែមីនា និងខែសីហា មានថ្ងៃសៅរ៍និងថ្ងៃអាទិត្យប្រាំ។ ខែឧសភាមានថ្ងៃសៅរ៍ប្រាំ ហើយខែមិថុនាមានថ្ងៃអាទិត្យប្រាំ។ ប្រសិនបើអ្នកមានបញ្ហាសុខភាព សូមគិតអំពីខែដែលធម្មតាមានធាតុអាកាសល្អ។ អ្នកប្រហែលជាអាចត្រួសត្រាយនៅខែដែលក្រុមជំនុំមានទស្សនកិច្ចរបស់អ្នកត្រួតពិនិត្យមណ្ឌលផងដែរ។ នៅអំឡុងទស្សនកិច្ចនោះ មានកិច្ចប្រជុំសម្រាប់អ្នកត្រួសត្រាយពេញពេល ហើយអ្នកក៏អាចចូលរួមនៅផ្នែកទីមួយក្នុងកិច្ចប្រជុំនោះដែរ។ ដោយសារពិធីបុណ្យរំលឹកត្រូវនឹងថ្ងៃទី២២ ខែមីនានៅឆ្នាំក្រោយ ដូច្នេះខែមីនា ខែមេសា និងខែឧសភាជាខែល្អសម្រាប់ធ្វើត្រួសត្រាយជំនួយ។ នៅពេលអ្នកបានជ្រើសរើសខែមួយឬច្រើនខែ ដែលអ្នកចង់ត្រួសត្រាយជំនួយនោះ សូមចាប់ផ្ដើមធ្វើកាលវិភាគមួយដែលនឹងអាចបង្គ្រប់ម៉ោងបាន។
១០ សូម្បីតែអ្នកមានអារម្មណ៍ថាមិនអាចត្រួសត្រាយជំនួយក្នុងអំឡុងឆ្នាំកិច្ចបម្រើថ្មីខាងមុខនេះក៏ដោយ អ្នកអាចនៅតែមានចិត្តខ្នះខ្នែងក្នុងកិច្ចបម្រើផ្សាយដែរ។ ចូរបន្តធ្វើអស់ពីសមត្ថភាពក្នុងកិច្ចបម្រើផ្សាយ ហើយដោយធ្វើដូចនេះអ្នកអាចមានទំនុកចិត្តថា ព្រះយេហូវ៉ាពេញចិត្តនឹងការព្យាយាមអស់ពីចិត្តរបស់អ្នក។ (កា. ៦:៤) ចូរគាំទ្រ និងលើកទឹកចិត្តអស់អ្នកដែលអាចត្រួសត្រាយជំនួយ។ ប្រហែលអ្នកអាចកែប្រែកាលវិភាគរបស់អ្នកឲ្យមានថ្ងៃមួយទៀតក្នុងអំឡុងសប្ដាហ៍ ដើម្បីអាចចូលរួមក្នុងកិច្ចផ្សព្វផ្សាយជាមួយអ្នកដែលកំពុងតែត្រួសត្រាយ។
១១ រាស្ត្ររបស់ព្រះយេហូវ៉ាទទួលស្គាល់ថានេះជាគ្រាបន្ទាន់។ ការផ្សព្វផ្សាយដំណឹងល្អជាកិច្ចការមួយដែលត្រូវបំពេញ។ កិច្ចការនេះទាក់ទងនឹងជីវិតស្លាប់រស់ ហើយពេលវេលាដែលនៅសល់ក៏កាន់តែខ្លី។ (១កូ. ៧:២៩-៣១) សេចក្ដីស្រឡាញ់ចំពោះព្រះនិងអ្នកជិតខាង នឹងជំរុញយើងឲ្យខំធ្វើអស់ពីសមត្ថភាពក្នុងកិច្ចបម្រើផ្សាយ។ ដោយមានការព្យាយាមនិងរៀបចំគម្រោងបានល្អ យើងប្រហែលអាចត្រួសត្រាយជំនួយ យ៉ាងហោចណាស់មួយខែក្នុងអំឡុងឆ្នាំកិច្ចបម្រើថ្មី។ នេះពិតជាគោលដៅដ៏ល្អមែន!
[សំណួរសម្រាប់អត្ថបទសិក្សា]
១. តើយើងអាចពិចារណាគោលដៅអ្វីសម្រាប់ឆ្នាំកិច្ចបម្រើថ្មី?
២. តើមានមូលហេតុអ្វីខ្លះដែលយើងទុកការត្រួសត្រាយជំនួយជាគោលដៅ?
៣, ៤. តើយើងទទួលប្រយោជន៍ពីការត្រួសត្រាយជំនួយយ៉ាងដូចម្ដេច?
៥. តើយើងអាចយកឈ្នលើអារម្មណ៍ថាខ្លួនគ្មានសមត្ថភាពដោយដូចម្ដេច?
៦. ទោះជាមានបញ្ហាសុខភាពឬជាប់រវល់ក្ដី តើអាចបម្រើជាអ្នកត្រួសត្រាយជំនួយបានដោយដូចម្ដេច?
៧. ហេតុអ្វីមានប្រយោជន៍ឲ្យយើងអធិស្ឋានជានិច្ចអំពីការត្រួសត្រាយជំនួយ?
៨. តើការអនុវត្តតាមសុភាសិត ១៥:២២ អាចជួយអ្នកឲ្យត្រួសត្រាយជំនួយយ៉ាងដូចម្ដេច?
៩. តើអ្នកអាចជ្រើសរើសខែណាមួយដើម្បីត្រួសត្រាយជំនួយ?
១០. តើអ្នកអាចធ្វើអ្វីខ្លះបើមិនអាចត្រួសត្រាយជំនួយ?
១១. ហេតុអ្វីយើងគួរទទួលស្គាល់ថានេះជាគ្រាបន្ទាន់?