ប្រអប់សំនួរ
▪ នៅឯប្រជុំសំរាប់កិច្ចផ្សាយបំរើនោះ តើពត៌មានអ្វីខ្លះដែលគួរលើកយកមកពិចារណាមើល?
គោលបំណងនៃប្រជុំសំរាប់កិច្ចផ្សាយបំរើគឺដើម្បីជួយយើងផ្ដោតអារម្មណ៍ទៅលើសកម្មភាពនៃកិច្ចបំរើផ្សាយដែលយើងនឹងចូលរួមបន្ទាប់ពីប្រជុំនោះ។ ម្ល៉ោះហើយ អ្នកដឹកនាំគួររៀបចំឲ្យបានល្អ និងប្រុងប្រៀបលើកឡើងចំណុចណាដែលលើកទឹកចិត្ត ដែលជាក់លាក់ និងជាអ្វីប្រើប្រាស់បាន។ បើសិនជាខគម្ពីរសំរាប់ថ្ងៃនោះទាក់ទងយ៉ាងចំៗនឹងសកម្មភាពកិច្ចផ្សព្វផ្សាយ នោះខគម្ពីរអាចត្រូវអាននិងពិគ្រោះយ៉ាងខ្លី។ ក៏ប៉ុន្តែ ការប្រជុំគ្នានោះគួរបញ្ជាក់អំពីកិច្ចការផ្សព្វផ្សាយ និងជួយទាំងអស់គ្នាដែលនឹងចេញដំណើរទៅផ្សព្វផ្សាយនោះ ឲ្យមានសមត្ថភាពច្រើនជាងដើម្បីបំពេញកិច្ចបំរើនៅថ្ងៃនោះ។—ធីម៉ូថេទី២ ៤:៥
ចំណុចពាក់ព័ន្ធពីកិច្ចបំរើព្រះរាជាណាចក្រយើង អាចត្រូវពិគ្រោះ ដើម្បីឲ្យទាំងអស់គ្នាដឹងពីឧបករណ៍ផ្សាយសំរាប់ពេលនោះ ហើយរបៀបស្នើផ្ដល់នោះដែរ។ នៅថ្ងៃស្នើផ្ដល់ទស្សនាវដ្ដី អាចមានគេធ្វើការសម្ដែងនូវពាក្យផ្សព្វផ្សាយពី«អ្វីដែលយើងអាចនិយាយអំពីទស្សនាវដ្ដីយើង»។ ពេលមានប្រតិបត្ដិការផ្សាយប្រកាសផ្សេងទៀត ពាក្យផ្ដើមមួយឬពីរដែលសមនឹងតំបន់ផ្សាយអាចត្រូវបញ្ជាក់ពីសៀវភៅរបៀបចាប់ផ្ដើមនិងបន្តការពិគ្រោះគ្នាអំពីព្រះគម្ពីរ។ លក្ខណៈមួយនៃកិច្ចផ្សព្វផ្សាយអាចត្រូវពិគ្រោះ ដូចជារបៀបប្រើព្រះគម្ពីរពេលជួបម្ចាស់ផ្ទះ របៀបតបឆ្លើយនឹងពាក្យដែលអាចរារាំងការសន្ទនា របៀបអញ្ជើញគេសិក្សាព្រះគម្ពីរ និងរបៀបធ្វើការត្រឡប់ទៅជួប។
ការប្រជុំសំរាប់កិច្ចបំរើផ្សាយមិនគួរលើសពី១០ដល់១៥នាទី រួមទាំងការរៀបចំក្រុមនិមួយៗ ការកំណត់តំបន់ផ្សាយ និងសេចក្ដីអធិស្ឋាន។ នៅពេលចេញដំណើរទៅ ទាំងអស់គ្នាត្រូវដឹងហើយថា គេនឹងផ្សព្វផ្សាយជាមួយអ្នកណា និងដឹងថាគេនឹងផ្សព្វផ្សាយនៅកន្លែងណា ហើយត្រូវចេញទៅតំបន់ផ្សាយយ៉ាងឆាប់។ ដោយព្រោះប្រជុំនោះខ្លីដូច្នេះ គឺសំខាន់ដែលទាំងអស់គ្នាទៅឲ្យទាន់ពេល។ ពេលប្រជុំសំរាប់កិច្ចបំរើផ្សាយគឺបន្ទាប់ពីប្រជុំក្រុមជំនុំ ដូចជាការសិក្សាទស្សនាវដ្ដីប៉មយាមនោះ ការប្រជុំសំរាប់កិច្ចបំរើផ្សាយត្រូវតែខ្លីជាង ហើយមិនចាំបាច់ពិគ្រោះបទគម្ពីរសំរាប់ថ្ងៃនោះទេ ពីព្រោះទើបតែមានការពិគ្រោះដ៏ប្រសើរខាងបទគម្ពីររួចហើយនោះ។
បងប្អូនប្រុសៗដែលបានទទួលបុណ្យជ្រមុជទឹកហើយ និងមានលក្ខណៈគ្រប់គ្រាន់ ត្រូវកំណត់ជាមុនឲ្យដឹកនាំប្រជុំសំរាប់កិច្ចបំរើផ្សាយនិមួយៗ។ បើសិនជាគ្មានបងប្អូនប្រុសណាដែលអាចដឹកនាំនៅថ្ងៃណាមួយ នោះអ្នកចាស់ទុំគួរកំណត់ថា បងប្អូនស្រីណាខ្លះអាចដឹកនាំបើសិនជាចាំបាច់នោះ។ ពេលនៅអង្គុយនៅឡើយ បងឬប្អូនស្រីនោះអាចចាប់ធ្វើការពិគ្រោះនូវបទគម្ពីរប្រចាំថ្ងៃ ឬចំណុចណាផ្សេងទៀតដែលទាក់ទងនឹងកិច្ចផ្សព្វផ្សាយ ដោយនិយាយយ៉ាងខ្លី។ គាត់ក៏នឹងពាក់អ្វីលើក្បាលដែរ។
ការប្រជុំសំរាប់កិច្ចបំរើផ្សាយគឺជាឱកាសល្អដើម្បីទទួលសេចក្ដីលើកទឹកចិត្ត និងបង្កើនសមត្ថភាពក្នុងកិច្ចបំរើ។ កាលបើអ្នកដឹកនាំរៀបចំកាន់តែល្អ នោះទាំងអស់គ្នានឹងបានប្រយោជន៍កាន់តែច្រើនដែរ។