ចូរទទួលប្រយោជន៍យ៉ាងពេញលេញ ពីប្រជុំសម្រាប់កិច្ចបម្រើផ្សាយ
១ ប្រជុំសម្រាប់កិច្ចបម្រើផ្សាយដែលមានប្រសិទ្ធភាពផ្ដល់ឲ្យយើងនូវការលើកទឹកចិត្តពិតៗ និងការណែនាំដែលផ្ដល់ប្រយោជន៍ មុនពេលចេញទៅបំពេញកិច្ចបម្រើផ្សាយ។ ប្រជុំនេះធ្វើឲ្យយើងមានលទ្ធភាពចូលរួមកិច្ចបម្រើផ្សាយជាក្រុម ពេលនោះយើងអាចផ្សព្វផ្សាយជាមួយអ្នកឯទៀតដើម្បីជួយគាំទ្រគ្នានិងទទួលការហាត់រៀនពីគ្នាទៅវិញទៅមក។ (សុ. ២៧:១៧; សាស. ៤:៩, ១០) តើយើងអាចធ្វើអ្វីដើម្បីទទួលប្រយោជន៍ពីប្រជុំទាំងនេះ?
២ អ្នកដឹកនាំ: នៅកិច្ចប្រជុំទាំងនោះធម្មតាមិនមានព័ត៌មានច្បាស់លាស់ដែលបានគ្រោងទុកជាមុន ដើម្បីយកមកពិចារណាទេ។ ហេតុដូច្នេះហើយ បើអ្នកនឹងត្រូវដឹកនាំ ជាចាំបាច់ត្រូវចំណាយពេលសិក្សាស្រាវជ្រាវចំណុចខ្លះៗឲ្យបានល្អ។ នៅប្រជុំសម្រាប់កិច្ចបម្រើផ្សាយកុំឲ្យយកការពិនិត្យបទគម្ពីរប្រចាំថ្ងៃទៅជាទម្លាប់ ក៏ប៉ុន្តែ អាចពិគ្រោះបទគម្ពីរនោះបើអ្នកប្រហែលជាគិតថាមាន ទាក់ទងទៅនឹងកិច្ចបម្រើផ្សាយ។ ចូរគិតអំពីអ្វីដែលនឹងផ្ដល់ប្រយោជន៍ដល់អស់អ្នកដែលចេញទៅផ្សព្វផ្សាយថ្ងៃនោះ។ ជាឧទាហរណ៍ អ្នកអាចពិភាក្សាឬបង្ហាញគំរូពីពាក្យផ្សាយ។ អ្នកប្រហែលជាគិតថានឹងមើលសាឡើងវិញនូវចំណុចខ្លះៗពីកូនសៀវភៅសេចក្ដីបង្រៀនបឋមនៃព្រះគម្ពីរ វិធីបង្កើនសមត្ថភាពនិយាយនិងបង្រៀន ឬផ្នែកណាមួយនៃការប្រជុំអប់រំកិច្ចបម្រើពេលថ្មីៗ។ នៅពេលមួយផ្សេងទៀតអ្នកប្រហែលជាគិតពីរបៀបដោះស្រាយបញ្ហាដែលអាចកើតឡើងនៅតំបន់ផ្សាយ ឬក៏អ្នកអាចពិភាក្សាពីរបៀបដែលអាចបណ្ដុះឲ្យមានចំណាប់អារម្មណ៍និងចាប់ផ្ដើមការសិក្សាព្រះគម្ពីរ ជាពិសេសបើមានអ្នកផ្សព្វផ្សាយច្រើននឹងធ្វើការត្រឡប់ទៅជួប។ ចូររក្សាឲ្យមានចិត្តរំភើប និងធ្វើអ្វីដែលនាំឲ្យទាំងអស់គ្នាទទួលប្រយោជន៍ មិនថាយើងបានពិភាក្សាអំពីអ្វីក៏ដោយ។
៣ ចូរចាប់ផ្ដើមប្រជុំឲ្យទៀងពេល សូម្បីតែអ្នកដឹងថាបងប្អូនខ្លះនឹងមកយឺតក៏ដោយ។ សូមយកចិត្តទុកដាក់ក្នុងការរៀបចំដៃគូផ្សព្វផ្សាយ និងប្រាប់តំបន់ផ្សាយដល់អស់អ្នកដែលត្រូវការ។ រយៈពេលប្រជុំមិនគួរលើសពី១០ទៅ១៥នាទី ហើយបើធ្វើឡើងបន្ទាប់ពីកិច្ចប្រជុំក្រុមជំនុំនោះគួរតែខ្លីជាង។ បងប្អូនទាំងអស់គ្នាគួរតែដឹងថាទៅជាមួយអ្នកណា និងកន្លែងណា មុនពេលដែលអ្នកបញ្ចប់ប្រជុំ។ ប្រជុំត្រូវបញ្ចប់ដោយសេចក្ដីអធិស្ឋាន។
៤ អ្នកអាចផ្ដល់ជំនួយ: ដូចគ្នានឹងកិច្ចប្រជុំក្រុមជំនុំ យើងបង្ហាញសេចក្ដីគោរពចំពោះព្រះយេហូវ៉ា និងបង្ហាញថាយើងចេះគិតដល់អ្នកដទៃដោយមកឲ្យទាន់ម៉ោង។ ចូរចូលរួមការពិភាក្សា។ អ្នកអាចទុកឲ្យអ្នកដឹកនាំរើសដៃគូផ្សព្វផ្សាយ ឬមុនពេលប្រជុំអ្នកប្រហែលជាចង់ណាត់ទៅផ្សព្វផ្សាយជាមួយបងប្អូនណាម្នាក់។ បើអ្នកចង់រៀបចំដោយខ្លួនឯង ចូរខំ«បើកចិត្តឲ្យទូលាយឡើង»ដោយផ្សព្វផ្សាយជាមួយបងប្អូនផ្សេងៗ ជាជាងទៅជាមួយមិត្តជិតស្និទ្ធរបស់ខ្លួនរាល់តែដង។ (២កូ. ៦:១១-១៣) ពេលប្រជុំចប់សព្វគ្រប់ហើយ ជៀសវាងផ្លាស់ប្ដូរដៃគូនិងចូរចេញដំណើរភ្លាមៗឆ្ពោះទៅតំបន់ផ្សាយ។
៥ ប្រជុំសម្រាប់កិច្ចបម្រើផ្សាយមានគោលបំណងដូចគ្នានឹងកិច្ចប្រជុំផ្សេងៗទៀត។ កិច្ចប្រជុំទាំងនោះត្រូវបានរៀបចំឡើងឲ្យយើងអាច«ពិចារណាមើលគ្នាទៅវិញទៅមកដែរ ដើម្បីនឹងបណ្ដាលឲ្យមានសេចក្ដីស្រឡាញ់ ហើយឲ្យប្រព្រឹត្តការល្អផង»។ (ហេ. ១០:២៤, ២៥) បើយើងខំប្រឹងស្វះស្វែងដើម្បីទទួលប្រយោជន៍ពីប្រជុំទាំងនេះ នោះនឹងជួយយើងឲ្យបំពេញកិច្ចបម្រើផ្សាយរបស់យើងដែលជា‹កិច្ចការល្អ›បានជាប្រាកដ!
[សំណួរសម្រាប់អត្ថបទសិក្សា]
១. តើប្រជុំសម្រាប់កិច្ចបម្រើផ្សាយជួយយើងតាមរបៀបណាខ្លះ?
២. តើអ្នកដឹកនាំអាចលើកមកពិភាក្សាពីចំណុចអ្វីខ្លះ?
៣. តើប្រជុំគួរមានរយៈពេលប៉ុន្មាន? និងតើអ្វីគួរសម្រេចឡើងក្នុងរយៈពេលនោះ?
៤. តើអ្វីនឹងជួយយើងទាំងអស់គ្នាឲ្យទទួលប្រយោជន៍យ៉ាងពេញលេញពីប្រជុំសម្រាប់កិច្ចបម្រើផ្សាយ?
៥. តើប្រជុំសម្រាប់កិច្ចបម្រើផ្សាយមានគោលបំណងអ្វី?