មហាសន្និបាតតាមតំបន់នៃស្មរបន្ទាល់ព្រះយេហូវ៉ាឆ្នាំ២០០២ដែលមានប្រធានថា«អ្នកប្រកាសដ៏ខ្នះខ្នែងអំពីព្រះរាជាណាចក្ររបស់ព្រះ»
១ «កាលគេនិយាយមកខ្ញុំថា ចូរយើងចូលទៅក្នុងដំណាក់នៃព្រះយេហូវ៉ា នោះខ្ញុំមានសេចក្ដីអំណរអរណាស់»។ (ទំនុក. ១២២:១) ពេលអ្នកវិភាគមើលសំដីរបស់អ្នកតែងបទទំនុកដំកើងនេះ សូមកត់សម្គាល់នូវ (១) អារម្មណ៍របស់គាត់ពេលគាត់ត្រូវអញ្ជើញឲ្យចូលរួមក្នុងការថ្វាយបង្គំព្រះយេហូវ៉ា (២) មិត្តសំឡាញ់ដ៏ល្អរបស់គាត់ ក៏ចាប់អារម្មណ៍យ៉ាងខ្លាំងទៅលើការថ្វាយបង្គំពិតដែរ (៣) ហើយមានការរៀបចំគម្រោងជាច្រើនដែលគេបានធ្វើឡើងដើម្បីអញ្ជើញគាត់មកជួបជុំគ្នា និងដើម្បីធ្វើដំណើរទៅដំណាក់របស់ព្រះ។
២ យើងក៏មានអារម្មណ៍ដូចជាអ្នកតែងបទទំនុកដំកើងដែរ ពេលយើងឮថាមានគម្រោងសំរាប់មហាសន្និបាតមួយទៀត មែនទេ? យើងទន្ទឹងចាំដោយក្ដីរំភើបរីករាយ ពេលយើងនឹកពីអំណរ ដែលយើងបានទទួលនៅឯមហាសន្និបាតមុនៗ ហើយគិតអំពីលទ្ធភាពដែលអាចមានវត្តមានម្ដងទៀតនៅឯប្រជុំពិសេសជាមួយអ្នកដទៃដែលស្រឡាញ់ព្រះយេហូវ៉ា។ នាឆ្នាំ២០០២នេះ មានគម្រោងសំរាប់មហាសន្និបាតតាមតំបន់ ប្រធាន«អ្នកប្រកាសដ៏ខ្នះខ្នែងអំពីព្រះរាជាណាចក្ររបស់ព្រះ»អស់បីថ្ងៃនៅរាជធានីភ្នំពេញ។ យើងត្រូវរៀបចំដើម្បីត្រៀមលក្ខណៈឲ្យហើយឥឡូវនេះ ដើម្បីមានវត្តមាននិងដើម្បីទទួលប្រយោជន៍ច្រើនបំផុតពីជប់លៀងខាងវិញ្ញាណនេះដែលជិតមកដល់ហើយនោះ។
៣ «ដំរួតការដែលស្មោះត្រង់ មានមារយាទល្អ» បានចាប់ផ្ដើមរៀបចំហើយជាស្រេចនូវម្ហូបអាហារខាងវិញ្ញាណដែលនឹងត្រូវផ្ដល់នៅឯមហាសន្និបាតនេះ។ (លូ. ១២:៤២) បងប្អូនប្រុសៗជាច្រើនបានចាប់ផ្ដើមរៀបចំផ្នែកផ្សេងៗនៃមហាសន្និបាត ដើម្បីឲ្យមហាសន្និបាតនេះអាចដំណើរការ«តាមបែបគួរសម ហើយដោយលំដាប់លំដោយផង»។ (១កូ. ១៤:៤០) ដោយឃើញថាមានអ្វីជាច្រើនដែលបានត្រូវរៀបចំជាស្រេចដើម្បីបំរើប្រយោជន៍យើងនោះ តើយើងផ្ទាល់អាចធ្វើអ្វីខ្លះដើម្បីរៀបចំសំរាប់មហាសន្និបាតនេះ?
៤ ចូររៀបចំពីឥឡូវនេះដើម្បីអាចចូលរួមបានទាំងបីថ្ងៃ: តើអ្នកត្រូវសុំច្បាប់និយោជករបស់អ្នក ដើម្បីមានវត្តមានគ្រប់ទាំងបីថ្ងៃនៃមហាសន្និបាតនេះឬទេ? ព្រះយេហូវ៉ាយល់ដឹងថា មាននិយោជកខ្លះជា«ចៅហ្វាយដែលកាច»។ (១ពេ. ២:១៨) ប៉ុន្តែ មហាសន្និបាតរបស់យើងគឺសំខាន់ណាស់ ហើយយើងត្រូវខំប្រឹងព្យាយាមដើម្បីមានវត្តមាននៅគ្រប់កម្មវិធីទាំងអស់។ ចូរអធិស្ឋានទូលថ្វាយព្រះយេហូវ៉ាពីរឿងនេះ ហើយសុំការណែនាំពីទ្រង់ដើម្បីធ្វើយ៉ាងណាឲ្យបានលទ្ធផលល្អ។—នេ. ២:៤
៥ យកចិត្តទុកដាក់ជាមួយបងប្អូនក្នុងក្រុមជំនុំ: បើសិនជាយើងឃើញថា បងប្អូនម្នាក់មានសេចក្ដីត្រូវការខាងរាងកាយឬក៏ខាងសំភារៈដែលធ្វើឲ្យគាត់ពិបាកទៅមហាសន្និបាត តើយើងអាច«បើកចិត្តឲ្យទូលាយឡើង»ដោយបង្ហាញសេចក្ដីស្រឡាញ់និងជួយគាត់បានឬទេ? (២កូ. ៦:១២, ១៣; ចោទិ. ១៥:៧) ប៉ុលបានលើកទឹកចិត្តយើងឲ្យមានស្មារតីបែបនេះនៅកូរិនថូសទី២ ៨:១៤។ អ្នកក៏អាចអញ្ជើញអ្នកទាំងនេះឲ្យធ្វើដំណើរទៅមហាសន្និបាតជាមួយអ្នកដែរ។ បើសិនជាគេជាអ្នកត្រួសត្រាយ ទំនងជាគេមានបទពិសោធន៍ល្អៗជាច្រើនដែលគេអាចរៀបរាប់ប្រាប់ក្នុងកំឡុងដែលអ្នកធ្វើដំណើរ។ បើសិនជាពួកគេជាបងប្អូនវ័យចាស់ នោះគេប្រហែលជាអាចរៀបរាប់អំពីប្រវត្ដិសាស្ត្រខាងអង្គការយើងដែលអ្នកមិនធ្លាប់ឮពីមុន។ ការសំណេះសំណាលជាមួយបងប្អូនទាំងនេះ នឹងមានអានុភាពល្អទៅលើអ្នកនិងក្រុមគ្រួសាររបស់អ្នក មែនទេ? ពួកគេនឹងមានកតញ្ញូធម៌ចំពោះចិត្តសទ្ធារបស់អ្នក ហើយព្រះយេហូវ៉ានិងប្រទានរង្វាន់ចំពោះអ្នកផងដែរ។—សុ. ២៨:២៧; ម៉ាថ. ១០:៤២
៦ ទោះជាអ្នកដែលមានសេចក្ដីត្រូវការពិសេស ច្រើនតែត្រូវជួយដោយញាតិមិត្តដែលជាគ្រីស្ទានគ្នីគ្នាក៏ដោយ អ្នកចាស់ទុំនិងអ្នកឯទៀតក្នុងក្រុមជំនុំដែលដឹងពីសេចក្ដីត្រូវការរបស់គេ ក៏អាចបង្ហាញសេចក្ដីស្រឡាញ់និងជួយគេរៀបចំផងដែរ។—១ធី. ៥:៤
៧ ចូរស្ម័គ្រចិត្តជួយ: ក្នុងកំឡុងពេលមហាសន្និបាត អ្នកស្ម័គ្រចិត្តជាច្រើននាក់ជួយក្នុងដំណើរការនៃផ្នែកផ្សេងៗ។ អ្នកឆ្មាំនៅក្នុងសាល និងនៅចំណតយានយន្ត ជួយណែនាំ រកកន្លែងអង្គុយនិងជួយយាមមើលឡាននិងម៉ូតូរបស់យើងក្នុងកំឡុងពេលប្រជុំ។ ផ្នែកការសំអាតមានឯកសិទ្ធិគាំទ្រកិត្ដិនាមរបស់យើងជាអ្នកស្អាតស្អំ ដោយសំអាតកន្លែងដែលយើងប្រជុំនោះឲ្យស្អាតជាងពេលដែលយើងទើបតែចូលទៅទៀត។ តើយើងអាចជួយផ្នែកនេះឬផ្នែកផ្សេងទៀតដែលត្រូវការជំនួយពីយើងបានទេ? តើអ្នកនឹងស្ម័គ្រចិត្តជួយបំរើ«ព្រមចិត្តគ្នា»ជាមួយបងប្អូនរបស់អ្នកឬទេ?—សេផា. ៣:៩
៨ តើមនុស្សពិតជាកត់សម្គាល់ការប្រព្រឹត្តរបស់យើងឬទេ?: ក្នុងកំឡុងមហាសន្និបាតឆ្នាំមុន បុរសម្នាក់ដែលបានឈប់សិក្សាជាមួយស្មរបន្ទាល់ព្រះយេហូវ៉ាជាង២០ឆ្នាំទៅហើយនោះ គាត់ធ្វើការនៅសណ្ឋាគារមួយ។ គាត់ប្រាប់ស្មរបន្ទាល់ខ្លះថា ឥឡូវគាត់គិតចង់ចាប់ផ្ដើមសិក្សាព្រះគម្ពីរនិងទៅកិច្ចប្រជុំម្ដងទៀត។ ហេតុអ្វី? ដោយព្រោះសេចក្ដីស្រឡាញ់ដែលស្មរបន្ទាល់បានបង្ហាញចំពោះគាត់ពេលគេស្នាក់នៅសណ្ឋាគារនោះ។
៩ បុគ្គលិកនៅសណ្ឋាគារមួយបានរៀបរាប់អំពីបងប្អូនរបស់យើងថា៖ «អ្នកគឺជាក្រុមមនុស្សល្អបំផុតដែលធ្លាប់ស្នាក់នៅសណ្ឋាគាររបស់យើង។ អ្នកដែលកាន់សាសនាអ្នកគឺអត់ធ្មត់និងមានសុជីវធម៌ល្អ»។ នេះពិតជាធ្វើឲ្យព្រះវរបិតាសួគ៌ារបស់យើងមានព្រះទ័យរីករាយណាស់ ពេលទ្រង់ទតឃើញយើងអនុវត្តតាមដំបូន្មានពីព្រះយេស៊ូដែលចែងថា៖ «ចូរឲ្យពន្លឺរបស់អ្នករាល់គ្នា បានភ្លឺនៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្នករាល់គ្នាប្រព្រឹត្ត រួចសរសើរដំកើង ដល់ព្រះវរបិតានៃអ្នករាល់គ្នា ដែលគង់នៅស្ថានសួគ៌»។—ម៉ាថ. ៥:១៦
១០ ចូរឲ្យយើងមានអារម្មណ៍ដូចជាស្តេចដាវីឌដែរ ដែលទ្រង់ទន្ទឹងចាំទៅដំណាក់របស់ព្រះយេហូវ៉ាដើម្បីថ្វាយបង្គំដោយក្ដីរំភើបរីករាយ។ មហាសន្និបាតតាមតំបន់របស់យើងគឺជាប្រភពសំខាន់ដែលផ្គត់ផ្គង់ម្ហូបអាហារខាងវិញ្ញាណដល់យើង ព្រមទាំងផ្ដល់ឱកាសដ៏ល្អបំផុតឲ្យយើងសំណេះសំណាលជាមួយបងប្អូនរបស់យើងដោយសេចក្ដីស្រឡាញ់។ ដូច្នេះ យើងអញ្ជើញអ្នកយ៉ាងកក់ក្ដៅឲ្យចាប់ផ្ដើមរៀបចំឲ្យហើយជាស្រេច ដើម្បីមានវត្តមានគ្រប់ទាំងបីថ្ងៃនៃមហាសន្និបាតតាមតំបន់ឆ្នាំនេះដែលមានប្រធានថា«អ្នកប្រកាសដ៏ខ្នះខ្នែងអំពីព្រះរាជាណាចក្ររបស់ព្រះ»!
[ប្រអប់នៅទំព័រ៥]
កម្មវិធី
ថ្ងៃសុក្រនិងថ្ងៃសៅរ៍
៨:៣០ព្រឹក—៤:០០ល្ងាច
ថ្ងៃអាទិត្យ
៨:៣០ព្រឹក—៣:០០ល្ងាច