មហាសន្និបាតតាមតំបន់នៃស្មរបន្ទាល់ព្រះយេហូវ៉ាសំរាប់ឆ្នាំ២០០៤ មានប្រធាន«ចូរដើរជាមួយនឹងព្រះ»
១ ចំពោះអ្នក តើអ្វីដែលធ្វើឲ្យមហាសន្និបាតតាមតំបន់ជាគ្រាដ៏ពិសេសនោះ? តើដោយសារសុន្ទរកថាដែលលើកទឹកចិត្តនិងឈុតសម្ដែងដែលរៀបចំសំរាប់យើងដោយ‹អ្នកបំរើស្មោះត្រង់ដែលមានវិនិច្ឆ័យល្អ›ឬ? (ម៉ាថ. ២៤:៤៥-៤៧) ឬតើជាប្រកាសនវត្ថុថ្មីដែលមានអាហារខាងវិញ្ញាណតាមត្រូវពេលនោះ? ឬក៏ដោយសារបងប្អូនប្រាប់នូវរបៀបដែលព្រះគម្ពីរបានកែប្រែជីវិតរបស់គេឲ្យប្រសើរជាង? ឬមួយដោយសាររបាយការណ៍អំពីកិច្ចការផ្សព្វផ្សាយសារព្រះរាជាណាចក្រ កំពុងរីកចំរើនច្រើននៅប្រទេសផ្សេងៗ? ឬក៏ដោយព្រោះការសេពគប់នឹងអ្នកជឿគ្នីគ្នាដែលមានទាំងចាស់ទាំងក្មេងនោះ? មែនហើយ យើងទន្ទឹងចាំមហាសន្និបាតរបស់យើងដោយក្ដីរីករាយដោយសារមូលហេតុទាំងនេះ និងមូលហេតុជាច្រើនឯទៀត!
២ ចូលរួមទាំងបីថ្ងៃ: ព្រះយេហូវ៉ាបានបង្គាប់តាមរយៈម៉ូសេថា៖ «ត្រូវឲ្យប្រមូលបណ្ដាជន . . . ដើម្បីឲ្យគេស្ដាប់ ហើយបានរៀន»។ (ចោទិ. ៣១:១២) តាមរយៈអ្នកបំរើស្មោះត្រង់ដែលមានវិនិច្ឆ័យល្អ ព្រះយេហូវ៉ាបានរៀបចំកម្មវិធីអប់រំដ៏ពិសេសសំរាប់យើងនៅថ្ងៃនិមួយៗនៅឯមហាសន្និបាត។ ដោយសារទ្រង់បង្រៀនយើងឲ្យ«ទទួលប្រយោជន៍» នោះយើងចង់ចូលរួមរាល់ថ្ងៃដើម្បីទទួលការបង្រៀនរបស់ទ្រង់។ (អេសា. ៤៨:១៧) បើអ្នកត្រូវសុំច្បាប់នៅឯកន្លែងធ្វើការដើម្បីចូលរួមគ្រប់ទាំងបីថ្ងៃនៃមហាសន្និបាត សូមយកតម្រាប់តាមគំរូរបស់នេហេមា ដោយអធិស្ឋានថ្វាយព្រះយេហូវ៉ាអំពីរឿងនេះ រួចទៅសុំច្បាប់និយោជករបស់អ្នក។ (នេ. ១:១១; ២:៤) ម្យ៉ាងវិញទៀត គឺជាការសមរម្យដែរ បើយើងជំរាបសមាជិកដែលឥតរួមជំនឿនឹងយើងឲ្យបានរហ័សអំពីគម្រោងមហាសន្និបាតរបស់យើង។
៣ សេចក្ដីត្រូវការពិសេស: សាវ័កប៉ុលបានរំឭកក្រុមជំនុំនៅស្រុកកាឡាទីឲ្យ«ធ្វើល្អដល់មនុស្សទាំងអស់ ហើយគឺដល់ពួកអ្នកជឿជាដើម»។ (កា. ៦:១០) បងប្អូនប្រុសស្រីវ័យចាស់ អ្នកឈឺ មាតាឬបិតាដែលគ្មានគូ ឬអ្នកបំរើពេញពេល ប្រហែលជាពុំសុំជំនួយពីយើងទេ ប៉ុន្តែ ពួកគាត់ប្រហែលជាត្រូវយកឈ្នះនូវការពិបាកផ្សេងៗដើម្បីចូលរួមមហាសន្និបាត។ តើអ្នកអាច«ធ្វើល្អ»ដល់ពួកគាត់ដោយផ្ដល់នូវជំនួយខ្លះៗបានឬទេ? អ្នកចាស់ទុំនិងបងប្អូនសាច់ញាតិគួរដឹងអំពីកាលៈទេសៈរបស់បងប្អូនទាំងនេះ។
៤ បើអ្នកផ្សាយម្នាក់បានដាក់ពាក្យស្នើសុំសំរាប់កន្លែងស្នាក់នៅ នោះគណៈកម្មាធិការខាងកិច្ចបំរើក្រុមជំនុំនឹងពិនិត្យមើលការស្នើសុំនេះដោយប្រើការណែនាំដែលមានលើប័ណ្ណស្នើសុំស្រាប់។ គណៈកម្មាធិការខាងកិច្ចបំរើគួរសម្រេចថា តើការស្នើសុំនោះជាសេចក្ដីត្រូវការដែលអាចដោះស្រាយតាមតំបន់ឬយ៉ាងណា។ ការរៀបចំនេះគឺសំរាប់តែអ្នកផ្សាយដែលមានភាពខាងវិញ្ញាណល្អនិងកូនរបស់ពួកគាត់ដែលមានចរិយាល្អ។ បងប្អូនដែលទទួលខុសត្រូវផ្នែកស្វែងរកកន្លែងស្នាក់នៅនឹងទាក់ទងលេខាក្រុមជំនុំ បើពួកគាត់មានសំនួរអំពីការស្នើសុំរបស់អ្នកដែលមានសេចក្ដីត្រូវការពិសេស។
៥ នៅឯការប្រជុំនៃរាស្ត្ររបស់ព្រះយេហូវ៉ាដែលបានធ្វើឡើងជិត២៥០០ឆ្នាំកន្លងមកហើយ នោះអែសរ៉ានិងពួកលេវីបានអានព្រះបន្ទូលរបស់ព្រះនិងបានបកស្រាយអត្ថន័យនៃអំនាននោះឲ្យបងប្អូនដែលមកប្រជុំបានយល់។ តើមានលទ្ធផលយ៉ាងណា? នេហេមា ៨:១២ ប្រាប់យើងថា«[បណ្ដា]ជនក៏នាំគ្នាទៅ . . . តាំងចិត្តអរសប្បាយឡើងជាខ្លាំង ដោយព្រោះបានយល់ន័យសេចក្ដីទាំងប៉ុន្មានដែលបានថ្លែងប្រាប់ដល់ខ្លួន»។ ដូចអែសរ៉ានិងពួកលេវី នោះក្រុមអ្នកបំរើចាក់ប្រេងតាំងប្រើព្រះបន្ទូលរបស់ព្រះពន្យល់សាច់រឿង ព្រមទាំងបង្ហាញយើងនូវរបៀបអនុវត្តតាមក្នុងជីវិតយើងដែរ។ យើងក៏មានចិត្តកតញ្ញូចំពោះពួកគាត់ណាស់ មែនទេ? ដោយធ្វើដូច្នេះ ក្រុមអ្នកបំរើនេះបង្ហាញនូវសេចក្ដីស្រឡាញ់ដ៏ស្មោះរបស់ព្រះយេហូវ៉ា និងការយកព្រះទ័យទុកដាក់ដល់រាស្ត្រទាំងអស់របស់ទ្រង់។ ចូរអ្នកតាំងចិត្តចូលរួមជារៀងរាល់ថ្ងៃនូវមហាសន្និបាតតាមតំបន់ ដែលមានប្រធាន«ចូរដើរជាមួយនឹងព្រះ»!
[ប្រអប់នៅទំព័រ៦]
កម្មវិធី
ថ្ងៃសុក្រនិងថ្ងៃសៅរ៍
៩:០០ព្រឹក—៤:១០ល្ងាច
ថ្ងៃអាទិត្យ
៩:០០ព្រឹក—៣:០៥ល្ងាច