មហាសន្និបាតតាមតំបន់នៃស្មរបន្ទាល់ព្រះយេហូវ៉ាសំរាប់ឆ្នាំ២០០៣ មានប្រធាន«ចូរលើកតម្កើងសិរីរុងរឿងរបស់ព្រះ»
១ ព្រះយេហូវ៉ាចេញបង្គាប់តាមរយៈអេសាយដែលជាព្យាការីស្មោះត្រង់របស់ទ្រង់ថា៖«ឱរាស្ត្រអញអើយ! ចូរប្រុងស្ដាប់តាមអញ ឱសាសន៍របស់អញអើយ! ចូរផ្ទៀងត្រចៀកចំពោះអញចុះ!»។ (អេសា. ៥១:៤) នៅថ្ងៃជាន់ក្រោយបង្អស់នេះដែលចេះតែលំបាកទៅៗ យើងទាំងអស់គ្នាពិតជាយល់ស្របថា ការប្រុងស្ដាប់បង្គាប់ព្រះយេហូវ៉ាគឺសំខាន់ជាងមុនៗទៅទៀត មែនទេ? វិធីមួយដែលយើង«ផ្ទៀងត្រចៀក»ស្ដាប់ព្រះយេហូវ៉ា គឺដោយធ្វើតាមបង្គាប់ឲ្យជួបជុំគ្នាដើម្បីថ្វាយបង្គំទ្រង់។ យើងពិតជារំភើបចិត្តណាស់! នៅពេលដែលយើងរងចាំឱកាសដ៏ពិសេសដើម្បីធ្វើតាមបង្គាប់នេះនៅឯមហាសន្និបាតតាមតំបន់ប្រចាំឆ្នាំរបស់យើង មែនទេ? គណៈអភិបាលស្មរបន្ទាល់ព្រះយេហូវ៉ាបានរៀបចំឲ្យមានមហាសន្និបាតតាមតំបន់មួយទៀតនៅប្រទេសកម្ពុជានៅឆ្នាំ២០០៣នេះ។
២ ដូចដែលទស្សនាវដ្ដីប៉មយាមជាភាសាអង់គ្លេស ថ្ងៃទី១ ខែកក្កដា ឆ្នាំ២០០២ ប្រាប់នោះ សន្និបាតអន្តរជាតិនឹងមាននៅទីក្រុងមួយចំនួនដែលត្រូវបានជ្រើសរើសហើយ និងអ្នកដែលចូលរួមមកពីប្រទេសជាច្រើន។ ដោយសារទីក្រុងដែលមានសន្និបាតអន្តរជាតិមានចំនួនកំណត់ នោះមានតែក្រុមជំនុំដែលត្រូវបានចាត់ឲ្យទៅទេដែលមានលទ្ធភាពចូលរួម។ ប៉ុន្តែ មហាសន្និបាតតាមតំបន់គ្រប់ទាំងអស់ក៏នឹងមានលក្ខណៈអន្តរជាតិដែរ។ ពួកសាសនទូតនឹងមានវត្តមាននៅឯមហាសន្និបាតផ្សេងៗជាច្រើន ហើយយើងនឹងមានឱកាសស្ដាប់បទពិសោធន៍ខ្លះៗរបស់ពួកគាត់ដែរ។ តើយើងអាចធ្វើយ៉ាងណាដើម្បីទទួលប្រយោជន៍យ៉ាងពេញលេញពីមហាសន្និបាតនេះ?
៣ ចូលរួមរាល់ថ្ងៃ: ដើម្បីទទួលប្រយោជន៍ឲ្យបានពេញលេញពីការបង្រៀនដែលអ្នកបំរើស្មោះត្រង់មានវិនិច្ឆ័យល្អបានរៀបចំនោះ យើងត្រូវតែមានវត្តមាននៅកម្មវិធីទាំងអស់កុំខាន។ (ម៉ាថ. ២៤:៤៥) តើអ្នកត្រូវសុំច្បាប់នៅឯកន្លែងធ្វើការដើម្បីចូលរួមគ្រប់ថ្ងៃនៃមហាសន្និបាតឬទេ? មុននេហេមាសុំស្តេចអើថាស៊ើកសេសអនុញ្ញាតឲ្យគាត់ទៅយេរូសាឡិមដើម្បីកសាងកំផែងឡើងវិញ នោះនេហេមា«អធិស្ឋានដល់ព្រះនៃស្ថានសួគ៌»។ (នេ. ២:៤) ដូចគ្នាដែរអ្នកគប្បីអធិស្ឋានសុំព្រះយេហូវ៉ាជួយអ្នកឲ្យមានចិត្តក្លាហានដើម្បីសុំច្បាប់នៅឯកន្លែងធ្វើការចូលរួមគ្រប់បីថ្ងៃនៃមហាសន្និបាត។ ចុះបើនៅឯកន្លែងធ្វើការគេស្ទាក់ស្ទើរមិនចង់ឲ្យអ្នកឈប់? ប្រហែលជាពួកគេនឹងយល់ព្រមបើយើងពន្យល់ថា ការបង្រៀនដែលយើងទទួលនៅឯមហាសន្និបាតជួយនឹងយើងឲ្យទៅជាអ្នកធ្វើការដែលទៀងត្រង់ ឧស្សាហ៍ព្យាយាម និងគួរឲ្យទុកចិត្ត។ ម្យ៉ាងទៀត បើយើងមានសមាជិកក្រុមគ្រួសារដែលមិនជឿនោះ យើងបង្ហាញសេចក្ដីស្រឡាញ់ក្នុងការដោយប្រាប់ពួកគេឲ្យបានឆាប់បំផុតអំពីគម្រោងរបស់យើងស្តីអំពីមហាសន្និបាត។
៤ ការជួយអ្នកដែលមានសេចក្ដីត្រូវការពិសេស: តើមានអ្នកខ្លះក្នុងក្រុមជំនុំរបស់អ្នកដែលត្រូវការជំនួយដើម្បីចូលរួមមហាសន្និបាតតាមតំបន់ឬទេ? សេចក្ដីត្រូវការពិសេសរបស់អ្នកវ័យចាស់ អ្នកឈឺ ឬអ្នកបំរើពេញពេលច្រើនតែត្រូវដោះស្រាយដោយសមាជិកក្រុមគ្រួសារដែលជាគ្រីស្ទានជួយគ្នា ប៉ុន្តែអ្នកចាស់ទុំនិងបងប្អូនឯទៀតដែលស្គាល់កាលៈទេសៈរបស់បងប្អូនទាំងនេះក៏អាចបង្ហាញសេចក្ដីស្រឡាញ់ជួយដែរ។
៥ គណៈកម្មាធិការខាងកិច្ចបំរើក្រុមជំនុំនឹងពិនិត្យការស្នើសុំសំរាប់កន្លែងស្នាក់នៅរបស់អ្នកផ្សាយដែលមានសេចក្ដីត្រូវការពិសេស។ ដោយប្រើការណែនាំដែលមានលើប័ណ្ណស្នើសុំស្រាប់ នោះគណៈកម្មាធិការខាងកិច្ចបំរើគួរសម្រេចថា តើការស្នើសុំនិមួយៗជាសេចក្ដីត្រូវការពិសេសដែលមិនអាចត្រូវដោះស្រាយតាមតំបន់ឬយ៉ាងណា។ ការរៀបចំនេះគឺសំរាប់តែអ្នកផ្សាយដែលមានភាពខាងវិញ្ញាណល្អនិងកូនរបស់ពួកគាត់ដែលមានចរិយាល្អ។ បងប្អូនផ្នែកស្វែងរកកន្លែងស្នាក់នៅនឹងទាក់ទងលេខាក្រុមជំនុំ បើពួកគាត់មានសំនួរអំពីការស្នើសុំរបស់អ្នកដែលមានសេចក្ដីត្រូវការពិសេស។
៦ ការចូលរួមមហាសន្និបាតឯទៀត: បើកាលៈទេសៈបង្ខំឲ្យយើងចូលរួមមហាសន្និបាតមួយផ្សេងទៀតពីមហាសន្និបាតក្នុងក្រុមជំនុំយើង ហើយបើយើងត្រូវការបន្ទប់នៅសណ្ឋាគារមួយ នោះសូមទាក់ទងលេខាក្រុមជំនុំ។ គាត់អាចផ្ដល់ឲ្យអាស័យដ្ឋានទីចាត់ការមហាសន្និបាត ដែលត្រូវបោះពុម្ពខាងក្រោយប័ណ្ណនូវសេចក្ដីត្រូវការពិសេសផ្នែកស្នើសុំកន្លែងស្នាក់នៅ។ ផ្ញើការស្នើសុំរបស់អ្នកទៅឯអាស័យដ្ឋានត្រឹមត្រូវនិងភ្ជាប់ស្រោមសំបុត្រមួយទៀតដែលមានអាស័យដ្ឋានរបស់អ្នកហើយក៏ត្រូវមានបិទតែមផងដែរ។ បើមានមហាសន្និបាតច្រើននៅទីក្រុងមួយ កុំភ្លេចសរសេរលើការស្នើសុំរបស់អ្នកប្រាប់ពីថ្ងៃខែដែលអ្នកចង់ចូលរួម។ បន្ទាប់មក បងប្អូនផ្នែកស្វែងរកកន្លែងស្នាក់នៅ នៅទីក្រុងនោះនឹងផ្ញើឲ្យអ្នកនូវបញ្ជីថ្មីៗដែលមានឈ្មោះកន្លែងស្នាក់សំរាប់មហាសន្និបាតដែលអ្នកចង់ចូលរួម។
៧ យើងជាទីសំរាប់ឲ្យលោកីយបានមើលលេង: តើមនុស្សអាចមើលឃើញភាពខុសគ្នារវាងស្មរបន្ទាល់ព្រះយេហូវ៉ានិងមនុស្សលោកីយ៍បានឬទេ? ពិតជាអាចឃើញមែន! សូមកត់សម្គាល់នូវអ្វីដែលម្ចាស់សណ្ឋាគារខ្លះនៅទីក្រុងមួយបាននិយាយ៖«យើងតែងតែមានមនុស្សដែលចូលរួមមហាសន្និបាតស្នាក់នៅទីនេះ តែពួកអ្នកជាមនុស្សដែលចេះគួរសមនិងស្លូតជាងគេបំផុត»។ «សប្ដាហ៍មុនយើងមានក្រុមសាសនាមួយទៀតមកដែរ។ ភាពខុសគ្នារវាងពួកអ្នកនិងពួកគេគឺឃើញច្បាស់ក្រឡែត»។ «យើងដឹងថាពួកអ្នកនឹងជួយយើងហើយធ្វើតាមសំណូមពររបស់យើងជានិច្ច»។ ពាក្យសំដីទាំងនេះជួយឲ្យយើងយល់នូវរបៀបដែល«ប្រាជ្ញាដែលមកពីស្ថានលើ»មានឥទ្ធិពលល្អមកលើបុគ្គលិកលក្ខណៈរបស់យើង មែនទេ? (យ៉ា. ៣:១៧) ដោយសារយើងជា«ទីដែលសំរាប់ឲ្យលោកីយបានមើលលេង»នោះ សូមឲ្យចរិយារបស់យើងបង្ហាញឲ្យឃើញនូវកិត្ដិយសនិងភាពរុងរឿងនៃព្រះយេហូវ៉ាជាព្រះរបស់យើងជានិច្ច។—១កូ. ៤:៩
៨ ដោយព្រោះ‹គំរូនៃលោកីយនេះកំពុងតែផ្លាស់ទៅ›នោះ យើងត្រូវការមហាសន្និបាតដើម្បីជួយឲ្យយើងបន្តផ្ចង់អារម្មណ៍មកលើអ្វីៗខាងវិញ្ញាណ។ (១កូ. ៧:៣១) ការរៀបចំកាលៈទេសៈដើម្បីចូលរួមគ្រប់បីថ្ងៃតម្រូវឲ្យយើងខំប្រឹង តែផលប្រយោជន៍ដែលបានមកពីការខំប្រឹងនេះគឺពិតជាសមមែន។ មហាសន្និបាតតាមតំបន់ប្រធាន«ចូរលើកតម្កើងសិរីរុងរឿងរបស់ព្រះ»សំរាប់ឆ្នាំនេះ ត្រូវបានរៀបចំដើម្បីជួយឲ្យយើងកាន់ជំហរមាំមួននៅពេលដែលរងចាំព្រះយេហូវ៉ាសម្រេចតាមការជំនុំជំរះរបស់ទ្រង់មកលើលោកីយ៍របស់សាតាំង។ កុំបីឲ្យអ្វីមករារាំងយើងមិនឲ្យទទួលការបង្រៀនដែលព្រះយេហូវ៉ាបានរៀបចំសំរាប់យើង។—អេសា. ៥១:៤, ៥