មហាសន្និបាតតាមតំបន់នៃស្មរបន្ទាល់ព្រះយេហូវ៉ាសម្រាប់ឆ្នាំ២០០៦ មានប្រធាន«សេចក្ដីសង្គ្រោះជិតណាស់ហើយ»

^១ ស្តេចហេសេគានៅស្រុកយូដាពីបុរាណបានប្រើពួករត់សំបុត្រឲ្យយកសំបុត្រទៅឲ្យប្រជារាស្ត្រដើម្បីហៅពួកគេមកប្រជុំគ្នានៅក្រុងយេរូសាឡិម។ (២របា. ៣០:៦, ១៣) ប្រតិកម្មរបស់ប្រជារាស្ត្រចំពោះសំបុត្រនោះបង្ហាញនូវចិត្តគំនិតរបស់ពួកគេស្តីអំពីការថ្វាយបង្គំពិត។ (២របា. ៣០:១០-១២) ប៉ុន្មានខែខាងមុខទៀត អ្នកបម្រើរបស់ព្រះយេហូវ៉ាសព្វថ្ងៃនេះនឹងមានឱកាសដូចគ្នាដើម្បីបង្ហាញនូវការអបអរដ៏ស្មោះពីចិត្តចំពោះឯកសិទ្ធិក្នុងការប្រជុំគ្នានិងថ្វាយបង្គំព្រះយេហូវ៉ា។ សំបុត្រមួយបានផ្ញើទៅក្រុមជំនុំដើម្បីអញ្ជើញអ្នកឲ្យមកចូលរួមមហាសន្និបាតតាមតំបន់មានប្រធានថា«សេចក្ដីសង្គ្រោះជិតណាស់ហើយ»។ តើអ្នកនឹងមានប្រតិកម្មយ៉ាងណាចំពោះការអញ្ជើញនេះ?

^២ សូមគ្រោងទុកពីឥឡូវ: ដើម្បីទទួលប្រយោជន៍ឲ្យបានពេញលេញពីកម្មវិធីខាងវិញ្ញាណនេះ ដែលត្រូវបានរៀបចំប្រកបដោយក្ដីស្រឡាញ់នោះ យើងត្រូវមានវត្តមានក្នុងកម្មវិធីទាំងមូល។ ជាការល្អបើឥឡូវនេះអ្នកចាប់ផ្ដើមធ្វើការរៀបចំអ្វីដែលចាំបាច់ ដើម្បីឲ្យអ្នកនិងគ្រួសាររបស់អ្នកអាចចូលរួមគ្រប់ទាំងបីថ្ងៃ។ (សុ. ២១:៥) ការរៀបចំបែបនេះ រួមបញ្ចូលការសុំច្បាប់ឈប់សំរាកពីនិយោជករបស់អ្នក ការពិភាក្សាអំពីគម្រោងការអ្នកជាមួយនឹងគូរបស់អ្នកដែលមិនមែនជាអ្នកជឿនោះ។ ប្រហែលអ្នកត្រូវការកក់បន្ទប់និងឈ្មោះសណ្ឋាគារឬផ្ទះសម្នាក់ព្រមទាំងជួយសិស្សព្រះគម្ពីររបស់អ្នកឲ្យរៀបចំជាស្រេចដើម្បីមានវត្តមានគ្រប់ទាំងបីថ្ងៃ។ ចំពោះរឿងសំខាន់ៗទាំងនេះ សូមកុំរង់ចាំរហូតដល់កៀកថ្ងៃនោះឡើយ។ សូមអធិស្ឋានទូលដល់ព្រះយេហូវ៉ាអំពីរឿងទាំងនោះដោយទុកចិត្តដល់ព្រះយេហូវ៉ា ថា«ទ្រង់នឹងប្រោសឲ្យបានសំរេច»។—ទំនុក. ៣៧:៥

^៣ អង្គការរបស់ព្រះយេហូវ៉ាបានខំប្រឹងរៀបចំដើម្បីឲ្យមានកន្លែងស្នាក់នៅគ្រប់គ្រាន់នៅក្នុងក្រុងនីមួយៗដែលមានមហាសន្និបាត។ បើយើងអបអរការខំប្រឹងទាំងនឿយហត់នៃបងប្អូន ដែលខំធ្វើការរៀបចំនេះ និងបង្ហាញការយកចិត្តទុកដាក់ដល់បងប្អូនឯទៀតដែលចូលរួមមហាសន្និបាត និងការគោរពចំពោះរបៀបរៀបរយរបស់ព្រះ នេះគួរជំរុញយើងឲ្យធ្វើតាមការណែនាំដែលត្រូវផ្ដល់មកក្នុងអត្ថបទនេះ។—១កូ. ១៣:៥; ១ថែ. ៥:១២, ១៣; ហេ. ១៣:១៧

^៤ កន្លែងស្នាក់នៅ: គឺសំខាន់ណាស់ដែលយើងកក់តែបន្ទប់ដែលអ្នកនឹងប្រើក្នុងកំលុងមហាសន្និបាតនោះ។ សូមកុំកក់បន្ទប់ឲ្យបងប្អូនឯទៀត លុះត្រាតែអ្នកនិងបងប្អូនឯទៀតបានយល់ព្រមរួចហើយ ព្រមទាំងមានឈ្មោះរបស់បងប្អូននោះដែរ។ នេះនឹងធ្វើឲ្យមានការកក់បន្ទប់នោះកាន់តែច្រើនឡើង និងបងប្អូនឯទៀតមានការពិបាកកក់បន្ទប់ផ្សេងទៀត។ បន្ទប់នីមួយៗត្រូវកក់ទុកក្នុងឈ្មោះនៃបុគ្គលដែលនឹងស្នាក់នៅក្នុងបន្ទប់នោះ។

^៥ សេចក្ដីត្រូវការពិសេស: សុភាសិត ៣:២៧ចែងថា៖ «កាលណាឯងមានកំឡាំងដៃ អាចធ្វើគុណឲ្យអ្នកណា ដែលគួរផ្ដល់ឲ្យ នោះកុំឲ្យបង្ខាំងទុកឡើយ»។ ស្តីអំពីមហាសន្និបាត តើអ្នកអាចធ្វើគុណដល់អ្នកឯទៀតយ៉ាងណា? អ្នកផ្សាយដែលមានវ័យចាស់ អ្នកពិការ អ្នកបម្រើពេញពេល និងអ្នកឯទៀតដែលត្រូវការជំនួយស្តីពីការរកកន្លែងស្នាក់នៅឬមធ្យោបាយធ្វើដំណើរទៅកន្លែងមហាសន្និបាត។ ញាតិសន្ដានមានករណីយកិច្ចជាបឋមក្នុងការមើលថែទាំអ្នកទាំងនោះ។ (១ធី. ៥:៤) បើពួកគាត់មិនអាចជួយបានទេនោះ អ្នកជឿគ្នីគ្នាប្រហែលជាអាចជួយបានដែរ។ (កា. ៦:១០) អ្នកត្រួតពិនិត្យក្រុមសិក្សាត្រូវពិនិត្យមើលក្នុងក្រុមរបស់គាត់ឲ្យដឹងថាតើនរណាខ្លះដែលត្រូវការជំនួយពិសេសដើម្បីឲ្យប្រាកដថាគម្រោងការចូលរួមមហាសន្និបាតរបស់ពួកគេបានរៀបចំល្អហើយ។

^៦ ចូរស្ម័គ្រចិត្តជួយ: ប្រាកដហើយ បងប្អូនដែលចូលរួមមហាសន្និបាតនឹងមានអំណរច្រើន ហើយទទួលប្រយោជន៍ពីអាហារខាងវិញ្ញាណ និងមានឱកាសសំណេះសំណាលគ្នាដែលលើកទឹកចិត្តដែរ។ យើងនឹងមានសុភមង្គលកាន់តែច្រើនទៀត បើយើងស្ម័គ្រចិត្តជួយធ្វើកិច្ចការផ្សេងៗ ដើម្បីឲ្យមហាសន្និបាតមានដំណើរការល្អ។ (កិច្ច. ២០:៣៥) បន្ដិចទៀត គណៈកម្មាធិការខាងមហាសន្និបាតនឹងអញ្ជើញអ្នកឯទៀតឲ្យចូលរួមក្នុងកិច្ចការនេះ។ តើយើងអាចជួយបានទេ?—ទំនុក. ១១០:៣

^៧ ក្មេងប្រុសអាយុប្រាំឆ្នាំដែលចូលរួមក្នុងមហាសន្និបាតមួយ បានពោលថា៖ «មហាសន្និបាតជាផ្នែកដ៏សំខាន់នៃការថ្វាយបង្គំព្រះយេហូវ៉ា»។ ពំនោលដ៏ស្មោះពីចិត្តនេះជួយយើងគ្រប់គ្នាឲ្យយល់ថា យើងចូលចិត្តចូលរួមមហាសន្និបាតប្រចាំឆ្នាំ។ នេះគឺពិតជាដូចអ្នកតែងបទទំនុកដំកើងបានច្រៀងថា៖ «ដ្បិត១ថ្ងៃនៅក្នុងព្រះលាននៃទ្រង់ នោះវិសេសជាង១ពាន់ថ្ងៃណាទៀត»។ (ទំនុក. ៨៤:១០) តាមរយៈចម្រៀងនោះដាវីឌបានបង្ហាញនូវសេចក្ដីប្រាថ្នាចង់‹នៅក្នុងដំណាក់នៃព្រះយេហូវ៉ា រាល់តែថ្ងៃអស់មួយជីវិតគាត់ដើម្បីនឹងរំពឹងមើលសេចក្ដីលំអនៃព្រះយេហូវ៉ា›។ (ទំនុក. ២៧:៤) ដាវីឌសប្បាយចិត្តណាស់ដែលស្ថិតនៅក្នុងចំណោមអ្នកថ្វាយបង្គំព្រះយេហូវ៉ា។ ចូរឲ្យយើងយកតម្រាប់តាមដាវីឌ ដោយមានអំណរចំពោះការថ្វាយបង្គំពិត ដោយចូលរួមគ្រប់ទាំងបីថ្ងៃនៅមហាសន្និបាតតាមតំបន់មានប្រធាន«សេចក្ដីសង្គ្រោះជិតណាស់ហើយ»។

[សំណួរសម្រាប់អត្ថបទសិក្សា]

១. នៅសម័យបុរាណ តើរាស្ត្ររបស់ព្រះបានបង្ហាញនូវការអបអរចំពោះការថ្វាយបង្គំយ៉ាងណា? សព្វថ្ងៃនេះ តើយើងមានឱកាសដូចគ្នាយ៉ាងណា?

២. ដើម្បីទទួលប្រយោជន៍ឲ្យបានពេញលេញពីមហាសន្និបាត តើយើងអាចធ្វើអ្វីខ្លះពីឥឡូវនេះ?

៣. ហេតុអ្វីក៏យើងត្រូវធ្វើតាមការរៀបចំស្តីពីកន្លែងស្នាក់នៅ?

៤. ពេលយើងកក់បន្ទប់ក្នុងសណ្ឋាគារឬផ្ទះសម្នាក់ តើយើងត្រូវចងចាំនូវចំណុចសំខាន់ណាខ្លះ? ហេតុអ្វី?

៥. តើអាចជួយបងប្អូនដែលមានសេចក្ដីត្រូវការពិសេសយ៉ាងដូចម្ដេច?

៦. តើអ្វីជាវិធីមួយដែលយើងអាចជួយផ្ដល់នូវអំណរចំពោះមហាសន្និបាតនៅឆ្នាំនេះ?

៧. តើអ្នកចូលចិត្តអ្វីអំពីមហាសន្និបាតប្រចាំឆ្នាំ? តើយើងគួរប្ដេជ្ញាចិត្តធ្វើអ្វី?

[ប្រអប់នៅទំព័រ៥]

កម្មវិធី

ថ្ងៃសុក្រនិងថ្ងៃសៅរ៍

៩:០០ព្រឹក-៤:០៥រសៀល

ថ្ងៃអាទិត្យ

៩:០០ព្រឹក-៣:២៥រសៀល