ការរៀបចំថ្មីសំរាប់ពិគ្រោះសាឡើងវិញ អំពីកម្មវិធីសន្និបាត
លោកីយ៍របស់សាតាំងចេះតែមានស្ថានភាពកាន់តែអាក្រក់ឡើងៗ ប៉ុន្តែព្រះយេហូវ៉ាកំពុងតែជួយពង្រឹងកម្លាំងរបស់យើងដើម្បី«ឲ្យលះចោលសេចក្ដីទមិលល្មើស និងសេចក្ដីប៉ងប្រាថ្នាក្នុងលោកនេះ ហើយឲ្យរស់នៅក្នុងសម័យនេះ ដោយសេចក្ដីធ្ងន់ធ្ងរ សេចក្ដីសុចរិត ហើយដោយគោរពប្រតិបត្ដិដល់ព្រះវិញ»។ (ទីត. ២:១២) កម្មវិធីសន្និបាតតាមមណ្ឌលនិងថ្ងៃសន្និបាតពិសេសប្រចាំឆ្នាំ ជាសំវិធានការពីរដែលព្រះយេហូវ៉ារៀបចំឲ្យយើងតាមរយៈ‹អ្នកបំរើស្មោះត្រង់ដែលមានវិនិច្ឆ័យល្អ›។ (ម៉ាថ. ២៤:៤៥) ឱកាសជួបជុំគ្នាដើម្បីស្ដាប់កម្មវិធីអំពីរឿងខាងវិញ្ញាណបែបនេះពិតជាពង្រឹងកម្លាំងរបស់យើងមែន!
ក្នុងកំឡុងឆ្នាំកិច្ចបំរើ២០០៥ យើងនឹងមានការរៀបចំថ្មីសំរាប់ការពិគ្រោះសាឡើងវិញអំពីកម្មវិធីសន្និបាត ដើម្បីជួយឲ្យចងចាំនិងអនុវត្តតាមការណែនាំដែលយើងទទួលនោះ។ ទំព័រទី៥-៦ នៃសន្លឹកបន្ថែមនេះមានអត្ថបទដែលសង្ខេបនូវអ្វីដែលនឹងត្រូវថ្លែងនៅសន្និបាតទាំងពីរនោះ ហើយក៏មានសំនួរដែលយើងអាចប្រើដើម្បីពិគ្រោះសាឡើងវិញនូវកម្មវិធីនោះ។ ក្រុមជំនុំនានានឹងពិនិត្យមើលពត៌មាននេះក្នុងកំឡុងពេលប្រជុំអប់រំកិច្ចបំរើមុនពេលដែលជិតដល់សន្និបាតហើយមិនយូរប៉ុន្មានក្រោយពីកម្មវិធីសន្និបាត។ តើត្រូវរៀបចំការពិគ្រោះទាំងពីរនេះយ៉ាងណា?
មួយឬពីរសប្ដាហ៍មុនក្រុមជំនុំចូលរួមសន្និបាតតាមមណ្ឌល នោះត្រូវមានសុន្ទរកថាដប់នាទីក្នុងកម្មវិធីប្រជុំអប់រំកិច្ចបំរើ ដើម្បីបង្កើនចំណាប់អារម្មណ៍ឲ្យចង់ចូលរួមស្ដាប់កម្មវិធី ហើយសុន្ទរកថានោះនឹងមានមូលដ្ឋានលើអត្ថបទដែលមានចំណងជើងថា «កម្មវិធីថ្មីសំរាប់ថ្ងៃសន្និបាតពិសេស»។ អ្នកថ្លែងសុន្ទរកថានោះក៏នឹងដៅបញ្ជាក់ពីសំនួរសំរាប់ការពិគ្រោះសាឡើងវិញ ហើយនឹងលើកទឹកចិត្តបងប្អូនទាំងអស់គ្នាឲ្យកត់កំណត់ខ្លះៗនៅឯសន្និបាតដើម្បីត្រៀមខ្លួនសំរាប់ការពិគ្រោះសាឡើងវិញដែលនឹងធ្វើឡើងតែប៉ុន្មានសប្ដាហ៍ក្រោយពីសន្និបាត។
ក្នុងកំឡុងប៉ុន្មានសប្ដាហ៍ក្រោយពីសន្និបាត នោះការប្រជុំអប់រំកិច្ចបំរើនឹងរួមមានការពិគ្រោះសាឡើងវិញអស់១៥នាទី អំពីថ្ងៃទីមួយនៃកម្មវិធីសន្និបាត។ សប្ដាហ៍បន្ទាប់ពីនោះទៀតត្រូវកំណត់១៥នាទីសំរាប់ការពិគ្រោះសាឡើងវិញអំពីថ្ងៃទីពីរនៃកម្មវិធីសន្និបាត។ សំនួរក្នុងសន្លឹកបន្ថែមនេះសំរាប់ការពិគ្រោះសាឡើងវិញ ត្រូវប្រើជាមូលដ្ឋានសំរាប់ការពិគ្រោះទាំងនោះ។ ការពិគ្រោះសាឡើងវិញគួរផ្ដោតអារម្មណ៍ទៅលើផលប្រយោជន៍ដែលយើងបានទទួលពីកម្មវិធីសន្និបាត។ សុន្ទរកថាខ្លះពួកអ្នកចាស់ទុំអាចកាត់ឲ្យខ្លី ទុកចោលឬប្ដូរទៅប្រជុំអប់រំកិច្ចបំរើនៅថ្ងៃផ្សេងទៀត ដើម្បីឲ្យមានពេលគ្រប់គ្រាន់សំរាប់ពិគ្រោះសាឡើងវិញ។
យើងនឹងមានកម្មវិធីដូចគ្នាស្តីអំពីថ្ងៃសន្និបាតពិសេស ប៉ុន្តែកំណត់តែ១៥នាទីប៉ុណ្ណោះក្នុងមួយលើក ដើម្បីពិគ្រោះកម្មវិធីទាំងមូលនោះសាឡើងវិញ។ យើងទាំងអស់គ្នាគួររក្សាទុកហើយប្រើសន្លឹកបន្ថែមនេះដើម្បីទទួលប្រយោជន៍យ៉ាងពេញលេញពីការណែនាំល្អប្រសើរដែលព្រះយេហូវ៉ាផ្ដល់ឲ្យយើង។—អេសា. ៤៨:១៧, ១៨