ឥឡូវជាពេលត្រូវផ្សព្វផ្សាយ!
១ «ចូរកោតខ្លាចដល់ព្រះ ហើយសរសើរសិរីល្អរបស់ទ្រង់ចុះ!»។ ក្រោមការដឹកនាំរបស់ទេវតា សារនេះកំពុងតែត្រូវប្រកាសដល់«គ្រប់អស់ទាំងសាសន៍ គ្រប់ពូជអំបូរ គ្រប់ភាសាហើយគ្រប់ទាំងគ្រួសារ»។ ហេតុអ្វីសារនេះកំពុងតែត្រូវប្រកាស? «ដ្បិតពេលដែល[ព្រះ]ត្រូវជំនុំជំរះ នោះបានមកដល់ហើយ»។ សព្វថ្ងៃនេះយើងកំពុងតែរស់នៅក្នុង‹ពេលជំនុំជំរះ›ដែលនឹងឆ្ពោះទៅដល់កំរិតខ្ពស់បំផុតពេលដែលរបបលោកីយ៍នេះត្រូវបំផ្លាញចោល។ ជាការសំខាន់សំរាប់ជីវិតមនុស្សទាំងឡាយឲ្យគេថ្វាយបង្គំដល់«ព្រះដ៏បង្កើតផ្ទៃមេឃ ផែនដី សមុទ្រនឹងរន្ធទឹកទាំងប៉ុន្មាន»។ គ្មានកិច្ចការណាផ្សេងទៀតសព្វថ្ងៃនេះដែលបន្ទាន់ឬសំខាន់ជាងការប្រកាសអំពី«ដំណឹងល្អដ៏នៅអស់កល្បជានិច្ច»នេះឡើយ។ ពិតមែនហើយ ឥឡូវនេះគឺជាពេលត្រូវផ្សព្វផ្សាយ!—វិវរ. ១៤:៦, ៧, កំណែជាអក្សរទ្រេត
២ ក្នុងកំឡុងពេល១០ឆ្នាំកន្លងទៅនេះ អ្នកបំរើព្រះយេហូវ៉ាបានចំណាយពេលជិត១២ពាន់លានម៉ោងក្នុងកិច្ចការប្រកាសអំពីព្រះរាជាណាចក្រនិងការបញ្ចុះបញ្ចូលឲ្យមានសិស្ស។ បងប្អូនជាច្រើននាក់បានធ្វើការកែប្រែក្នុងជីវិតរបស់គេដើម្បីចូលរួមឲ្យបានច្រើនជាងក្នុងចំរូតខាងវិញ្ញាណ។ (ម៉ាថ. ៩:៣៧, ៣៨) ជាឧទាហរណ៍ កាលពីឆ្នាំទៅរៀងរាល់ខែជាមធ្យមមានអ្នកផ្សព្វផ្សាយជាង៨៥០.០០០នាក់បានបំរើជាអ្នកត្រួសត្រាយ។ សំរាប់អ្នកត្រួសត្រាយពេញពេល នេះតម្រូវឲ្យចំណាយពេលជាមធ្យម៧០ម៉ោងរាល់ខែក្នុងកិច្ចការផ្សព្វផ្សាយ។ សំរាប់អ្នកត្រួសត្រាយជំនួយ សេចក្ដីតម្រូវគឺ៥០ម៉ោង។
៣ តម្រូវការជាអ្នកត្រួសត្រាយ: ដោយពួកគេទទួលស្គាល់ថា «ពេលវេលាចង្អៀតណាស់ហើយ»នោះ អ្នកត្រួសត្រាយខិតខំប្រឹងប្រែងដើម្បីរក្សាជីវភាពរបស់ខ្លួនឲ្យមានភាពសាមញ្ញ។ (១កូ. ៧:២៩, ៣១) ពួកគេស្វែងរកវិធីកាត់បន្ថយរាល់ការចំណាយផ្សេងៗដើម្បីអាចចំណាយពេលតិចជាងក្នុងការរកស៊ីចិញ្ចឹមជីវិត។ ជាឧទាហរណ៍អ្នកខ្លះផ្លាស់ប្ដូរទីលំនៅទៅនៅផ្ទះដែលតូចជាង។ អ្នកខ្លះទៀតបានកាត់ចេញរាល់វត្ថុទ្រព្យដែលមិនចាំបាច់។ (ម៉ាថ. ៦:១៩-២១) ជារឿយៗពួកគេត្រូវកាត់បន្ថយការបំពេញចំណង់ចំណូលចិត្តផ្ទាល់ខ្លួន។ ទាំងអស់នេះបានត្រូវធ្វើឡើងដើម្បីអាចចំណាយពេលឲ្យបានច្រើនជាងក្នុងកិច្ចបំរើផ្សាយ។ (អេភ. ៥:១៥, ១៦) ការព្យាយាម ដោយមានស្មារតីលះបង់ប្រយោជន៍ខ្លួន និងដោយពឹងផ្អែកលើព្រះយេហូវ៉ាតាមរយៈការអធិស្ឋានដើម្បីសុំជំនួយពីទ្រង់នោះ អ្នកផ្សព្វផ្សាយជាច្រើនបានរៀបចំកាលវិភាគដ៏ស្រួលមួយដែលជួយពួកគាត់ឲ្យត្រួសត្រាយ។
៤ តើអ្នកអាចត្រួសត្រាយបានឬទេ? សូមអញ្ជើញសាកសួរពួកអ្នកត្រួសត្រាយពីរបៀបដែលពួកគេបានទទួលជោគជ័យក្នុងកិច្ចការរបស់គេ។ សូមផ្សព្វផ្សាយជាមួយពួកគាត់ហើយពិសោធនូវអំណររបស់ពួកគាត់។ សូមសិក្សាអត្ថបទអំពីការត្រួសត្រាយដែលមានក្នុងប្រកាសនវត្ថុផ្សេងៗរបស់យើង។ សូមរៀបចំគោលដៅសមរម្យសំរាប់ខ្លួនដែលអាចនាំឲ្យឆ្ពោះទៅដល់ការត្រួសត្រាយ។ បើមានឧបសគ្គផ្សេងៗនាបច្ចុប្បន្ននេះដែលរារាំងអ្នកមិនឲ្យបំរើជាអ្នកត្រួសត្រាយ សូមទូលថ្វាយព្រះយេហូវ៉ាអំពីឧបសគ្គនេះក្នុងការអធិស្ឋានហើយសូមទ្រង់ជួយដោះស្រាយ។—សុ. ១៦:៣
៥ អំណោយពរនិងអំណរ: ការត្រួសត្រាយនឹងធ្វើឲ្យបំនិនរបស់យើងក្នុងការប្រើព្រះបន្ទូលព្រះរឹតតែប្រសើរហើយនាំឲ្យមានអំណរដែលចេះតែកើនឡើង។ អ្នកត្រួសត្រាយវ័យក្មេងម្នាក់ធ្លាប់ប្រាប់ថា«ពរមួយគឺជួយយើងឲ្យចេះកាត់ស្រាយព្រះបន្ទូលរបស់ព្រះយ៉ាងត្រឹមត្រូវ។ ពេលដែលយើងធ្វើជាអ្នកត្រួសត្រាយ យើងប្រើព្រះគម្ពីរច្រើន។ ឥឡូវ ពេលដែលខ្ញុំផ្សព្វផ្សាយពីផ្ទះមួយទៅផ្ទះមួយ ខ្ញុំចេះគិតអំពីបទគម្ពីរដែលសមស្របនឹងកាលៈទេសៈរបស់ម្ចាស់ផ្ទះម្នាក់ៗ»។—២ធី. ២:១៥
៦ ការត្រួសត្រាយក៏បង្រៀនយើងនូវបំនិនដ៏មានតម្លៃជាច្រើនដែលអាចធ្វើឲ្យជីវិតយើងបានប្រសើរផងដែរ។ ការត្រួសត្រាយអាចជួយយុវវ័យរៀនអំពីរបៀបលៃពេលវេលាប្រកបដោយប្រាជ្ញា របៀបគ្រប់គ្រងប្រាក់កាសនិងរបៀបស្រុះស្រួលគ្នានឹងអ្នកឯទៀត។ យុវវ័យជាច្រើនបណ្ដុះទស្សនៈខាងវិញ្ញាណចំពោះជីវិតបន្ទាប់ពីបានត្រួសត្រាយ។ (អេភ. ៤:១៣) ម្យ៉ាងវិញទៀត ពួកអ្នកត្រួសត្រាយមានឱកាសដ៏ល្អឯកដើម្បីពិសោធជារឿយៗនូវជំនួយនិងរង្វាន់ពីព្រះយេហូវ៉ា។—កិច្ច. ១១:២១; ភី. ៤:១១-១៣
៧ អំណោយពរដ៏សំខាន់បំផុតមួយដែលមកពីការត្រួសត្រាយនោះជួយឲ្យយើងចូលទៅជិតព្រះយេហូវ៉ា។ នេះអាចជួយទ្រទ្រង់យើងពេលឆ្លងកាត់ការល្បងល។ បងស្រីម្នាក់ដែលបានស៊ូទ្រាំក្នុងរយៈកាលនៃការលំបាកក្រៃលែងមួយបានថ្លែងថា៖ «ចំណងមេត្រីភាពដ៏ជិតស្និទ្ធដែលខ្ញុំបានបណ្ដុះជាមួយនឹងព្រះយេហូវ៉ាតាមរយៈការត្រួសត្រាយបានជួយខ្ញុំឲ្យស៊ូទ្រាំការលំបាកទាំងអស់របស់ខ្ញុំ»។ គាត់បានបន្ថែមថា៖ «ខ្ញុំមានអារម្មណ៍សប្បាយរីករាយដែលខ្ញុំប្រើ . . . ជីវិតរបស់ខ្ញុំដើម្បីចំណាយពេលបំរើព្រះយេហូវ៉ាពេញពេល។ នេះបានជួយខ្ញុំឲ្យលះបង់ប្រយោជន៍ខ្លួនក្នុងរបៀបដែលខ្ញុំមិនដែលគិតថាអាចធ្វើទៅបាន»។ (កិច្ច. ២០:៣៥) សូមឲ្យយើងពិសោធដូចគ្នាដែរនូវអំណោយពរដ៏សម្បូណ៌ពេលដែលយើងខំប្រឹងអស់ពីសមត្ថភាពក្នុងកិច្ចការផ្សព្វផ្សាយដ៏សំខាន់ដល់ជីវិតនេះ។—សុ. ១០:២២
[សំណួរសម្រាប់អត្ថបទសិក្សា]
១. ហេតុអ្វីបានជាឥឡូវនេះជាពេលត្រូវផ្សព្វផ្សាយ?
២. តើតាមរបៀបណាដែលអ្នកបំរើព្រះយេហូវ៉ាកំពុងតែបង្ហាញថាពួកគេទទួលស្គាល់ភាពបន្ទាន់នៃគ្រាដែលគេកំពុងតែរស់នៅសព្វថ្ងៃនេះ?
៣. តើជារឿយៗអ្នកផ្សព្វផ្សាយត្រូវធ្វើការកែប្រែអ្វីខ្លះដើម្បីអាចធ្វើជាអ្នកត្រួសត្រាយបាន?
៤. តើជំហានដែលមានប្រយោជន៍អ្វីខ្លះដែលអាចជួយអ្នកបន្ដិចម្ដងៗឲ្យឈានទៅដល់គោលដៅនៃការត្រួសត្រាយ?
៥. តើតាមរបៀបណាដែលការត្រួសត្រាយជួយធ្វើឲ្យបំនិនរបស់យើងក្នុងកិច្ចបំរើផ្សាយបានប្រសើរថែមទៀត?
៦. តើការត្រួសត្រាយបង្ហាត់យើងអ្វីខ្លះ?
៧. តើការផ្សព្វផ្សាយជួយយើងឲ្យចូលទៅជិតព្រះយេហូវ៉ាយ៉ាងដូចម្ដេច?