ការរៀបចំពិសេសសម្រាប់អញ្ជើញមនុស្សទូទាំងពិភពលោក ឲ្យមកចូលរួមមហាសន្និបាតដែលមានប្រធានថា «សេចក្ដីសង្គ្រោះជិតណាស់ហើយ!»
អ្នកផ្សាយក្នុងក្រុមជំនុំនីមួយៗត្រូវចែកលិខិតអញ្ជើញពិសេស
១ ចាប់ផ្ដើមពីខែឧសភា ឆ្នាំ២០០៦ នាប្រទេសទាំងប៉ុន្មានដែលស្ថិតនៅប៉ែកខាងជើងខ្សែអេក្វាទ័រហើយរួចមកទូទាំងពិភពលោកទាំងមូល មានការរៀបចំមួយ សម្រាប់ប្រើលិខិតអញ្ជើញពិសេស ដើម្បីអញ្ជើញមនុស្សឲ្យមកមហាសន្និបាត ដែលនឹងមាននៅប្រមាណ១៥៥ប្រទេស។ ការរៀបចំពិសេសនោះនឹងបន្តរហូតដល់ចប់មហាសន្និបាតចុងក្រោយ ហើយក៏រួមបញ្ចូលមហាសន្និបាតពិសេសដែលត្រូវមាននៅប្រទេសអាឡឺម៉ង់ សាធារណរដ្ឋឆេកូ និងប្រទេសប៉ូឡូញ ក្នុងកំលុងខែកក្កដា និងសប្ដាហ៍ទីមួយនៃខែសីហា ឆ្នាំ២០០៦។
២ ដោយសារគ្រាចុងបញ្ចប់នេះជិតចប់ហើយនោះ មហាសន្និបាតដែលលើកបញ្ជាក់សេចក្ដីសន្យាទាំងប៉ុន្មានរបស់ព្រះ ស្តីអំពីការសង្គ្រោះឲ្យរួចពីរបបលោកិយអាក្រក់នេះ គួរជាទីទាក់ចិត្តទាញអារម្មណ៍ដល់មនុស្សដែលមានចិត្តគំនិតត្រឹមត្រូវ។ ព័ត៌មាននៅមហាសន្និបាតគួរជំរុញឲ្យពួកគេគិតអំពីអ្វីដែលនឹងកើតឡើងនៅថ្ងៃមុខ។ ដើម្បីឲ្យមនុស្សរាប់លាននាក់មានឱកាសស្ដាប់ព័ត៌មានដែលជួយសម្រាលទុក្ខនិងផ្ដល់សេចក្ដីសង្ឃឹមនោះ ក្រុមជំនុំរបស់ស្មរបន្ទាល់ព្រះយេហូវ៉ាជាង៩៨.០០០ទូទាំងពិភពលោក កំពុងតែត្រូវជំរុញឲ្យចូលរួមយ៉ាងសកម្ម ក្នុងកិច្ចការអញ្ជើញមនុស្សឲ្យមកឯមហាសន្និបាតតាមតំបន់។
៣ ក្រុមជំនុំនឹងទទួលលិខិតអញ្ជើញមួយចំនួនដែលល្មមឲ្យអ្នកផ្សាយម្នាក់ៗបាន៥០សន្លឹក។ បើទទួលចំនួនលិខិតអញ្ជើញលើសពីចំនួននោះ អ្នកត្រួសត្រាយក្នុងក្រុមជំនុំអាចប្រើបាន។ ក្នុងក្រុមជំនុំនីមួយៗ ការរៀបចំពិសេសនេះនឹងចាប់ផ្ដើមបីសប្ដាហ៍មុនថ្ងៃដំបូងនៃមហាសន្និបាតដែលក្រុមជំនុំត្រូវចូលរួម។ នោះគួរឲ្យមានពេលគ្រប់គ្រាន់ដើម្បីចែកក្នុងតំបន់ផ្សាយទាំងអស់ឬភាគច្រើននៃតំបន់ផ្សាយ។
៤ គឺល្អបំផុតបើចែកលិខិតអញ្ជើញដល់ម្ចាស់ផ្ទះម្នាក់ៗដោយផ្ទាល់ខ្លួន ប្រសិនបើអាចធ្វើទៅបាន។ ត្រូវព្យាយាមចែកលិខិតទាំងអស់ក្នុងកំលុងបីសប្ដាហ៍នោះ។
៥ យើងជឿជាក់ថា ការខំខ្នះខ្នែងទូទាំងពិភពលោក ដើម្បីអញ្ជើញមនុស្សមកឯមហាសន្និបាត«សេចក្ដីសង្គ្រោះជិតណាស់ហើយ!»ដូចត្រូវបញ្ជាក់ក្នុងអត្ថបទនេះ នឹងជាទីបន្ទាល់យ៉ាងធំមួយ។ យើងអធិស្ឋានសុំព្រះយេហូវ៉ាប្រទានពរយ៉ាងបរិបូរទៅលើការព្យាយាមរបស់អ្នកផ្ទាល់ ពេលដែលចូលរួមសកម្មភាពពិសេសនេះ។