កម្មវិធីថ្មីនៃសន្និបាតតាមមណ្ឌល
លោកិយប្រហែលជាចង់ឲ្យយើងជឿថារបបនេះនឹងស្ថិតស្ថេរជារៀងរហូត។ យ៉ាងណាក៏ដោយ ព្រះបន្ទូលរបស់ព្រះណែនាំយើងឲ្យយល់ផ្ទុយពីនេះទៅវិញ។ (១យ៉ូន. ២:១៥-១៧) ព្រះបន្ទូលរបស់ព្រះជួយយើងឲ្យយល់ថាការប្រមូលទ្រព្យសម្បត្ដិនៅផែនដីជាអ្វីដែលឥតប្រយោជន៍។ ដើម្បីពង្រឹងកម្លាំងរាស្ត្ររបស់ព្រះ កម្មវិធីសន្និបាតតាមមណ្ឌលសម្រាប់ឆ្នាំកិច្ចបម្រើ២០០៧នឹងពន្យល់ប្រធានបទ«[ចូរ]ប្រមូលទ្រព្យសម្បត្ដិ...នៅឯស្ថានសួគ៌វិញ»។—ម៉ាថ. ៦:១៩, ២០
គំនិតសម្ភារៈនិយមរួមបញ្ចូលអ្វីដែលបានសំដៅនៅអេភេសូរ ២:២គឺជា «មេគ្រប់គ្រងរាជ្យលើអាកាស ជាវិញ្ញាណ ដែលសព្វថ្ងៃនេះ បណ្ដាលមកក្នុងពួកមនុស្សរឹងចចេស»។ ដូចជាខ្យល់ដែលយើងដកដង្ហើមមានគ្រប់ទីកន្លែង ដូច្នេះ«វិញ្ញាណរបស់លោកីយ»ក៏មាននៅពាសពេញក្នុងរបបលោកិយនេះដែរ។ (១កូ. ២:១២) ដោយហេតុថាឥទ្ធិពលរបស់វាខ្លាំងដល់ម្ល៉េះ ដែលព្រះគម្ពីរហៅវាជា«មេគ្រប់គ្រង»។ កម្មវិធីថ្មីនៃសន្និបាតតាមមណ្ឌលនឹងជួយយើងឲ្យជៀសវាងពីគំនិតសម្ភារៈនិយមរបស់លោកិយនេះ និងផ្ដោតអារម្មណ៍ទៅលើអ្វីដែលសំខាន់ជាង។ (ម៉ាថ. ៦:៣៣) បន្ថែមទៀត កម្មវិធីសន្និបាតនឹងជួយយើងឲ្យទុកចិត្តទៅលើព្រះយេហូវ៉ាក្នុងការបំពេញកិច្ចបម្រើផ្សាយរបស់យើង ទោះបីជាមានទុក្ខលំបាកឬការគាបសង្កត់ណាក្ដី។
ចូររៀបចំឲ្យបានចូលរួមទាំងពីរថ្ងៃ ហើយអ្នកគួរ«ប្រុងប្រយ័ត[ឬ«យកចិត្តទុកដាក់»]លើសទៅទៀត»នឹងកម្មវិធីសន្និបាត។ (ហេ. ២:១; ខ.ស.) ចូរកត់កំណត់ខ្លីៗនូវចំណុចដែលអាចយកទៅអនុវត្តតាមក្នុងជីវិតនិងក្នុងកិច្ចបម្រើផ្សាយរបស់អ្នក។ ដោយចូលរួមតាំងពីដើមរហូតដល់ចប់នៃកម្មវិធីសន្និបាតដែលគួរឲ្យពេញចិត្តនេះ អ្នកនឹងទទួលការពង្រឹងកម្លាំង និងការលើកទឹកចិត្តដើម្បីបន្ត‹ប្រមូលទ្រព្យសម្បត្ដិនៅឯស្ថានសួគ៌វិញ›!