សន្និបាតប្រចាំមណ្ឌលជួយយើងឲ្យការពារចំណងមិត្តភាពជាមួយនឹងព្រះ
១. តើព្រះយេហូវ៉ាផ្ដល់អ្វីឲ្យយើងដើម្បីជួយយើងឲ្យបំពេញកិច្ចការផ្សព្វផ្សាយដំណឹងល្អ?
១ ព្រះយេហូវ៉ាផ្ដល់ឲ្យយើងយ៉ាងបរិបូរនូវព័ត៌មាន ការអប់រំនិងការលើកទឹកចិត្ត ដើម្បីឲ្យយើងអាចបំពេញកិច្ចការដែលលោកប្រគល់ឲ្យ ពោលគឺការផ្សព្វផ្សាយដំណឹងល្អ។ (ម៉ាថ. ២៤:១៤; ២ធី. ៤:១៧) សន្និបាតប្រចាំមណ្ឌលរបស់យើងគឺជាវិធីមួយដែលយើងអាចទទួលព័ត៌មាន ការអប់រំនិងការលើកទឹកចិត្ត។ កម្មវិធីថ្មីសម្រាប់ឆ្នាំកិច្ចបម្រើ២០១០ នឹងបកស្រាយប្រធាន«ចូរការពារចំណងមិត្តភាពរបស់អ្នកជាមួយនឹងព្រះ» ដែលមានមូលដ្ឋានលើរ៉ូម ៨:៥ និងយូដាស ១៧-១៩។ កម្មវិធីនេះនឹងចាប់ផ្ដើមនៅសប្ដាហ៍ថ្ងៃទី៣១ ខែសីហា ឆ្នាំ២០០៩។
២. (ក) តើយើងនឹងទទួលប្រយោជន៍ពីកម្មវិធីសន្និបាតប្រចាំមណ្ឌលយ៉ាងដូចម្ដេច? (ខ) តើកម្មវិធីសន្និបាតប្រចាំមណ្ឌលមុនៗបានជួយអ្នកក្នុងកិច្ចបម្រើផ្សាយយ៉ាងណា?
២ របៀបដែលយើងអាចទទួលប្រយោជន៍ : កម្មវិធីនេះនឹងជួយយើងឲ្យប្រុងប្រយ័ត្ននឹងគ្រោះថ្នាក់ផ្សេងៗ ដូចជាអ្វីៗណាដែលអាចស៊ីពេលវេលា ហើយអាចបង្វែរអារម្មណ៍យើងចេញពីអ្វីដែលពិតជាសំខាន់។ យើងនឹងរៀនចេះទប់ទល់ចំពោះអារម្មណ៍បណ្ដែតបណ្ដោយទៅតាមពិភពលោកនេះ ហើយយើងនឹងពិនិត្យមើលថាបុគ្គលដែលមានចំណងមិត្តភាពជាមួយនឹងព្រះមានលក្ខណៈអ្វីខ្លះ។ សុន្ទរកថាចែកជាផ្នែកៗនៅថ្ងៃអាទិត្យនឹងបង្ហាញពីរបៀបដែលបុគ្គលម្នាក់ៗ ឬជាក្រុមគ្រួសារអាចចាត់វិធានការដើម្បីពង្រឹងចំណងមិត្តភាពរបស់គេជាមួយនឹងព្រះ ថ្វីបើជួបប្រទះការបង្ខិតបង្ខំ និងការសាកល្បងជំនឿក៏ដោយ។ កម្មវិធីនេះនឹងជួយយើងឲ្យការពារចិត្ត ជាគ្រិស្តសាសនិកដែលស្មោះត្រង់ ហើយក៏ជួយយើងឲ្យចាំច្បាស់ថាអស់អ្នកដែលការពារចំណងមិត្តភាពជាមួយនឹងព្រះ នឹងទទួលពរដ៏អស្ចារ្យ។
៣. តើសន្និបាតប្រចាំមណ្ឌលរបស់អ្នកនឹងមាននៅពេលណា? ហើយតើអ្នកតាំងចិត្តធ្វើអ្វី?
៣ ពេលដែលបងប្អូនដឹងថា សន្និបាតប្រចាំមណ្ឌលនឹងមាននៅពេលណានិងនៅកន្លែងណាហើយ សូមរៀបចំយ៉ាងណាដើម្បីឲ្យបានចូលរួម ហើយយកចិត្តទុកដាក់ស្ដាប់កម្មវិធីទាំងពីរថ្ងៃនោះ។ ចូរប្រាកដក្នុងចិត្តថាព្រះយេហូវ៉ានឹងឲ្យពរដល់អ្នកដែលខំព្យាយាម។—សុភ. ២១:៥
៤. តើយើងប្រាកដជានឹងទទួលអ្វីនៅឯសន្និបាតប្រចាំមណ្ឌលខាងមុខនេះ?
៤ ប្រាកដហើយ អំណោយដ៏ល្អនេះមកពីព្រះយេហូវ៉ា។ កម្មវិធីដែលបានរៀបចំដោយខ្ញុំបម្រើដ៏ស្មោះត្រង់នោះ គឺជាអ្វីដែលយើងត្រូវការដើម្បីបន្តធ្វើជាអ្នកបម្រើព្រះ។ យើងពិតជាដឹងគុណចំពោះព្រះយេហូវ៉ា ដែលលោកផ្ដល់អ្វីៗទាំងអស់ដើម្បីជួយយើងឲ្យ«ខំប្រឹងព្យាយាមឥតឈប់ក្នុងការប្រកាសប្រាប់សេចក្ដីសង្ឃឹមរបស់យើង»។—ហេ. ១០:២៣-២៥; យ៉ា. ១:១៧