ការរៀបចំមួយសម្រាប់អ្នកបម្រើព្រះ
១ នៅឆ្នាំ១៩៣៨ អង្គការព្រះយេហូវ៉ាមានការរៀបចំថ្មីមួយ។ ក្រុមជំនុំមួយចំនួនបានត្រូវអញ្ជើញឲ្យមកចូលរួមសន្និបាតតាមភូមិភាគ ដែលឥឡូវហៅថាសន្និបាតប្រចាំមណ្ឌល។ តើពួកគេចូលរួមដោយមានគោលបំណងអ្វី? នៅខែមករា ឆ្នាំ១៩៣៩ ឯកសារជាភាសាអង់គ្លេសចំណងជើងថាអ្នករាយការណ៍ (ឥឡូវហៅថាកិច្ចបម្រើព្រះ) បានចែងថា៖ «សន្និបាតទាំងនេះគឺជាផ្នែកមួយនៃការរៀបចំរបស់ព្រះយេហូវ៉ាដើម្បីចាត់ចែងកិច្ចការផ្សព្វផ្សាយអំពីរាជាណាចក្ររបស់លោក។ កម្មវិធីនេះផ្ដល់នូវការណែនាំដ៏សំខាន់ចាំបាច់ដើម្បីឲ្យយើងម្នាក់ៗបំពេញឲ្យបានត្រឹមត្រូវនូវកិច្ចបម្រើដែលបានត្រូវកំណត់ឲ្យយើង»។ ពេលយើងពិចារណាអំពីការរីកចម្រើននៃចំនួនអ្នកប្រកាសអំពីរាជាណាចក្រព្រះចាប់ពីចំនួនអ្នកផ្សាយ៥៨.០០០នាក់ នៅឆ្នាំ១៩៣៨ រហូតដល់ជាង៧.០០០.០០០នាក់ នៅឆ្នាំ២០០៩ នោះបង្ហាញយ៉ាងច្បាស់ថាសន្និបាតប្រចាំមណ្ឌល កំពុងតែសម្រេចតាមគោលបំណងនៃសន្និបាតទាំងនោះ ពោលគឺជួយអ្នកបម្រើព្រះឲ្យ‹បំពេញកិច្ចបម្រើដែលបានត្រូវកំណត់ឲ្យ›។
២ ប្រធាននៃសន្និបាតសម្រាប់ឆ្នាំក្រោយ: យើងកំពុងរង់ចាំដោយចិត្តរំភើបរហូតដល់អាចចូលរួមសន្និបាតប្រចាំមណ្ឌលដែលនឹងចាប់ផ្ដើមនៅខែកញ្ញា ហើយទទួលការលើកទឹកចិត្តដែលនឹងត្រូវផ្ដល់មកតាមរយៈកម្មវិធីនោះ។ ប្រធានគឺ«អ្នករាល់គ្នាមិនរួមចំណែកក្នុងពិភពលោកឡើយ» ដែលដកស្រង់ពី យ៉ូហាន ១៥:១៩។ តើមានសុន្ទរកថាអ្វីខ្លះដែលនឹងផ្ដល់ប្រយោជន៍ចំពោះអ្នកបម្រើព្រះ? នៅថ្ងៃសៅរ៍នឹងមានសុន្ទរកថាប្រធាន«តើកិច្ចបម្រើពេញពេលជួយការពារយើងតាមរបៀបណា?»។ យើងក៏នឹងរីករាយស្ដាប់សុន្ទរកថាចែកជាបីផ្នែកដែលមានប្រធានថា «កុំបង្ខូចខ្លួនជាមួយនឹង . . . » «សត្វសាហាវ» «មេស្ត្រីពេស្យា» និង «អ្នកធ្វើដំណើរជួញដូរ»។ នៅថ្ងៃអាទិត្យយើងនឹងស្ដាប់សុន្ទរកថាចែកជាផ្នែកៗដែលមានប្រធានថា«ចូរស្រឡាញ់ព្រះយេហូវ៉ា កុំស្រឡាញ់ពិភពលោក»។ ក៏មានសុន្ទរកថាផ្សេងទៀតដូចជា «ចូរបន្តធ្វើជា‹ជនបរទេសនិងអ្នកស្នាក់នៅបណ្ដោះអាសន្ន›» និង«កុំខ្លាចឡើយ! អ្នកអាចឈ្នះពិភពលោកនេះបាន!»។
៣ ក្រោយពីបានចូលរួមសន្និបាតប្រចាំមណ្ឌល បងស្រីម្នាក់ដែលមិនសូវមានសកម្មភាពក្នុងកិច្ចបម្រើផ្សាយ បានសរសេរថាកម្មវិធីសន្និបាតបានជំរុញទឹកចិត្តគាត់ឲ្យគិតពិចារណាឡើងវិញអំពីកាលៈទេសៈរបស់ខ្លួន និងតាំងចិត្ត«ទៅផ្សព្វផ្សាយ ហើយឈប់រកលេស!»។ កម្មវិធីសន្និបាតប្រចាំមណ្ឌលសម្រាប់ឆ្នាំកិច្ចបម្រើថ្មីពិតជានឹងជួយយើងម្នាក់ៗឲ្យស្រឡាញ់ព្រះយេហូវ៉ាជាជាងពិភពលោកនេះ។ (១យ៉ូន. ២:១៥-១៧) កុំខានចូលរួមស្ដាប់ដោយយកចិត្តទុកដាក់ ដើម្បីទទួលប្រយោជន៍យ៉ាងពេញលេញពីកិច្ចប្រជុំនេះ ដែលបានត្រូវរៀបចំដោយសេចក្ដីស្រឡាញ់សម្រាប់អ្នកបម្រើព្រះ!
[សំណួរសម្រាប់អត្ថបទសិក្សា]
១. នៅឆ្នាំ១៩៣៨ តើមានការរៀបចំថ្មីអ្វី? ហើយតើក្នុងគោលបំណងអ្វី?
២. តើមានសុន្ទរកថាអ្វីខ្លះដែលនឹងត្រូវថ្លែងនៅឯសន្និបាតប្រចាំមណ្ឌលសម្រាប់ឆ្នាំកិច្ចបម្រើថ្មី?
៣. តើយើងអាចទទួលប្រយោជន៍អ្វីពីការចូលរួមសន្និបាតប្រចាំមណ្ឌល?