កម្មវិធីថ្មីនៃសន្និបាតប្រចាំមណ្ឌល
ព្រះយេហូវ៉ាសមនឹងទទួលសិរីរុងរឿង។ តើយើងលើកតម្កើងសិរីរុងរឿងព្រះយេហូវ៉ាយ៉ាងដូចម្ដេច? តើមានការពិបាកអ្វីដើម្បីលើកតម្កើងសិរីរុងរឿងព្រះ? តើអ្នកដែលលើកតម្កើងសិរីរុងរឿងព្រះឥឡូវនេះ មានពរអ្វីខ្លះ? កម្មវិធីសន្និបាតប្រចាំមណ្ឌលសម្រាប់ឆ្នាំកិច្ចបម្រើ២០០៨ នឹងផ្ដល់ចម្លើយដ៏គាប់ចិត្តចំពោះសំណួរទាំងនេះ។ សន្និបាតនេះមានចំណងជើងថា៖ «[ចូរ]ធ្វើទាំងអស់ ដើម្បីលើកតម្កើងសិរីរុងរឿងរបស់ព្រះ»។ (១ករ.[១កូ.] ១០:៣១, ខ.ស.) សូមពិចារណាអ្វីដែលយើងនឹងទទួលពីការបង្ហាត់បង្រៀនដ៏បរិបូររបស់ព្រះ ដែលមាននៅសន្និបាតខាងមុខនេះ។
អ្នកត្រួតពិនិត្យតំបន់នឹងថ្លែងអំពី«ហេតុអ្វីគួរលើកតម្កើងសិរីរុងរឿងរបស់ព្រះ?» ហើយ«ចូរតាំងគំរូល្អដោយបំពេញតាមតម្រូវការរបស់ព្រះ»។ គាត់ក៏នឹងថ្លែងសុន្ទរកថាសាធារណៈដែលមានចំណងជើងថា «តើនរណាជាអ្នកលើកតម្កើងសិរីរុងរឿងរបស់ព្រះ?» ហើយសុន្ទរកថាចុងក្រោយ «ការសរសើរតម្កើងព្រះដោយសាមគ្គីភាពទូទាំងពិភពលោក»។ គាត់ក៏នឹងដឹកនាំសាលាកិច្ចបម្រើផ្សាយដែរ។ អ្នកត្រួតពិនិត្យមណ្ឌលនឹងថ្លែងសុន្ទរកថាដែលមានចំណងជើងថា «ចូរមានអំណរក្នុងការសម្ដែងឲ្យឃើញសិរីរុងរឿងរបស់ព្រះ» «ចូរយកចិត្តទុកដាក់នឹងសេចក្ដីត្រូវការតាមតំបន់» ហើយ«ចូរនៅ‹ខ្ជាប់ខ្ជួន ក្នុងសេចក្ដីពិត› »ដែលមានមូលដ្ឋានទៅលើបទគម្ពីរនៅពេត្រុសទី២ ១:១២។ បន្ថែមទៅទៀត យើងនឹងរៀននូវរបៀបដែល«កិច្ចបម្រើត្រួសត្រាយលើកតម្កើងសិរីរុងរឿងរបស់ព្រះ»។ សុន្ទរកថាដ៏គួរឲ្យចាប់អារម្មណ៍ទីមួយដែលចែកជាផ្នែកៗគឺ «ចូរលើកតម្កើងសិរីរុងរឿងរបស់ព្រះនៅគ្រប់ទិដ្ឋភាពនៃជីវិតយើង» ហើយសុន្ទរកថាទាំងនេះនឹងពិនិត្យមើលខ្លឹមសារពីបទគម្ពីរនៅកូរិនថូសទី១ ១០:៣១។ សុន្ទរកថាដែលចែកជាផ្នែកៗមួយទៀតគឺ «ចូរធ្វើកិច្ចបម្រើបរិសុទ្ធដើម្បីសរសើរព្រះយេហូវ៉ា» ហើយសុន្ទរកថាទាំងនេះក៏ទាក់ទងនឹងផ្នែកផ្សេងៗនៃការថ្វាយបង្គំរបស់យើងដែរ។ យើងនឹងសិក្សាទស្សនាវដ្ដីប៉មយាមដោយសង្ខេប និងពិគ្រោះអំពីបទគម្ពីរប្រចាំថ្ងៃនៅថ្ងៃអាទិត្យ។ ម្យ៉ាងទៀតក៏មានការជ្រមុជទឹកដែរ។
មនុស្សភាគច្រើនមិនព្រមទទួលស្គាល់ព្រះឡើយ។ ច្រើននាក់ត្រូវបានបំបែរអារម្មណ៍ដោយផែនការរបស់មនុស្សជាខ្លាំង រហូតដល់ពួកគេមិនគិតអំពីភាពរុងរឿងរបស់ព្រះយេហូវ៉ាទេ។ (យ៉ូន. ៥:៤៤) ប៉ុន្តែយើងជឿជាក់ថា គឺមានតម្លៃណាស់បើចំណាយពេលពិចារណាពីរបៀបដែលយើងអាចធ្វើតាមចំណងជើងសន្និបាតនេះដែលថា «[ចូរ]ធ្វើទាំងអស់ ដើម្បីលើកតម្កើងសិរីរុងរឿងរបស់ព្រះ»។ សូមឲ្យយើងរៀបចំទុកជាមុនដើម្បីចូលរួម និងទទួលប្រយោជន៍យ៉ាងពេញលេញពីកម្មវិធីទាំងអស់។